Agrag-okayo ken Jehova ken Agragsakkayo
TIEMPO ti panagrag-o ti naballigi a pannakairingpas ti aniaman a makagunggona a proyekto. Para kadagiti 48 nga estudiante ti maika-106 a klase ti Watchtower Bible School of Gilead, makaparagsak nga okasion ti panagturposda a naangay idi Marso 13, 1999, idiay Watchtower Educational Center sadi Patterson, New York.
Iti panglukat a sasao ni Theodore Jaracz, a miembro ti Bagi a Manarawidwid, nagturpos iti maikapito a klase ti Gilead, ken tserman ti programa ti panagturpos, intampokna ti sasao ti Salmo 32:11 (NW): “Agrag-okayo ken Jehova ken agragsakkayo, dakayo a nalinteg.” No apay a rumbeng nga agrag-oda amin iti daytoy nga okasion, kinunana: “Agrag-otayo kadagiti okasion a kas iti daytoy gapu iti ar-aramiden ni Jehova kadagidiay nalinteg ti panagpuspusona a tattao, a pakairamanan dagiti estudiante ti Gilead.” Nupay implano dagiti estudiante ti panagadalda iti Gilead School ken impakatda ti amin a kabaelanda tapno maikarida nga agserbi kas misionero, ni Jehova ti namagballigi iti amin. (Proverbio 21:5; 27:1) Impaganetget ni Brother Jaracz a dayta ti panggapuanda nga ‘agrag-o ken Jehova.’
Adda met iti auditorio sadi Patterson dagiti kameng ti pamilia ken sangaili dagiti estudiante a naggapu iti 12 a pagilian tapno imatanganda daytoy naragsak nga okasion. Nabatad a naragsak amin dagiti 5,198 a timmabuno—a pakairamanan dagiti miembro ti pamilia ti Bethel idiay Brooklyn, Patterson, ken Wallkill, a nagbuya ken dimngeg babaen ti video—bayat a sineggaanda ti programa.
Nabalakadanda nga Itultuloyda ti Agrag-o
Iti paggibusan ti panglukat a sasao ni Brother Jaracz, inyam-ammona ti umuna kadagiti lima nga ispiker, a nangisagana iti makaparegta a Nainkasuratan a pammagbaga a saan laeng a para kadagiti nagturpos iti Gilead no di ket para kadagiti amin a timmabuno.
Ti immuna a nagpalawag isu ni William Malenfant, a naggraduar iti maika-34 a klase ti Gilead, ken agserserbi itan a katulongan ti Teaching Committee ti Bagi a Manarawidwid. Mainaig iti temana a “Saan a Barengbareng ti ‘Amin a Banag!’” a naibatay iti Eclesiastes 1:2, insaludsodna: “Talaga kadi a kayat a sawen ni Solomon a barengbareng ti amin a banag, iti naan-anay a kayulogan dayta a sao?” Ti sungbat: “Saan. Ti tuktukoyenna a barengbareng ket dagiti natauan nga aramid a di mangikabkabilangan iti pagayatan ti Dios, dagiti gannuat a di maitunos iti pagayatan ti Dios.” Maigidiat iti dayta, saan a barengbareng ti panagdaydayaw iti pudno a Dios a ni Jehova; kasta met ti panagadal iti Biblia a Sao ti Dios, ken ti panangisuro iti dayta kadagiti sabsabali. Saan a lipaten ti Dios dagiti kasta nga aramid dagiti adipenna. (Hebreo 6:10) Kinapudnona, uray no dumteng ti didigra kadagidiay inanamongan ti Dios, “masingdanan[danto] iti galut ti biag ken Jehova.” (1 Samuel 25:29) Anian a makaliwliwa a panunoten! Ti pananglaglagip kadagitoy a punto matulonganna dagiti amin nga agdaydayaw ken Jehova a mangtaginayon iti rag-oda.
Ni John Barr, miembro ti Bagi a Manarawidwid, pinaregtana ti nagturpos a klase babaen ti palawagna a “Tagiragsakenyo ti Pakaitudinganyo kas Misionero.” Impakitana a makaay-ayo unay ken Jehova a Dios ti panagserbi kas misionero. “Napateg dayta a paset iti ebkas ti panagayat ni Jehova iti lubong. Imbaonna ditoy daga ti bugbugtong nga Anakna. Ni Jesus ti katan-okan a misionero, ti kangrunaan a misionero.” Nupay mabalin dagiti nagturpos nga utoben dagiti panagbalbaliw a nasken idi nga aramiden ni Jesus tapno maitungpalna a sibaballigi ti trabahona ditoy daga, dagiti gunggona nga impaay ti panagserbi ni Jesus kas misionero ket magun-odan pay laeng dagiti amin a mangaprobetsar kadagitoy. Ngamin, kas inlawlawag ni Brother Barr, naragsakan ni Jesus a mangaramid iti trabaho ti Dios, ken inayatna met dagiti tattao. (Proverbio 8:30, 31) Indagadag ni Brother Barr kadagiti nagturpos nga agtalinaedda iti pakaibaonanda, saan laeng a basta agibturda, no di ket gapu ta pagragsakanda nga aramiden dayta. “Agpannuraykayo ken Jehova; dinakayto paayen,” imbalakadna iti klase.—Salmo 55:22.
“Pannagna iti Nagan ni Jehova iti Agnanayon.” Dayta ti tema a pinili ti simmaganad a nagpalawag, ni Lloyd Barry, a maysa met a miembro ti Bagi a Manarawidwid. Nagturpos ni Brother Barry iti maika-11 a klase ti Gilead ket kalpasanna nagserbi kas misionero idiay Japan iti nasurok a 25 a tawen. Insalaysayna ti sumagmamano kadagiti kapadasan dagiti immun-una a misionero ken dineskribirna dagiti karit a nakaipasanguanda. Ania a praktikal a balakad ti impaayna iti agturpos a klase? “Kangrunaan iti amin, mantenerenyo ti espiritualidadyo. Kasta met, adalenyo ti pagsasao ken ti kultura. Salimetmetanyo ti naragsak a kababalin. Ken agtalinaedkayo iti trabaho; dikay koma mauma wenno mapaksuyan.” Kinuna ni Brother Barry kadagiti nagturpos a kadagiti sabali a pagilian a pakaibaonanda, makasarakda iti adu a tattao a magmagna iti nagan ti nagduduma a didiosen, ket impalagipna kadakuada ti sasao ni Mikias: “Amin dagiti il-ili magnada tunggal maysa iti nagan ti diosna; ket magnatayto iti nagan ni Jehova a Diostayo iti agnanayon nga awan inggana.” (Mikias 4:5) Ti ulidan nga impaay dagiti dati a misionero ket awan duadua a nabileg a panggutugot kadagiti amin nga adipen ti Dios nga agtultuloy a magna iti nagan ni Jehova ken simamatalek nga agserbi kenkuana.
Ti instruktor ti Gilead a ni Lawrence Bowen ti simmaruno a nagpalawag. Indatag ti temana ti saludsod nga “Anianto Ngata ti Pagbalinanyo?” Impakitana a ti balligi iti panagserbi iti Dios ket agpannuray iti pammati ken panagtalek ken Jehova. Gapu iti naan-anay a panagpannurayna ken Jehova, naparmek ni Ari Asa ti buyot dagiti kabusor a buklen ti maysa a milion a lallaki. Ngem pinalagipan ni propeta Asarias a masapul nga itultuloyna ti agpannuray iti Dios: “Ni Jehova adda kadakayo, bayat ti kaaddayo kenkuana.” (2 Cronicas 14:9-12; 15:1, 2) Yantangay ti nagan ti Dios a Jehova ipasimudaagna ti ideya a mapagbalinna ti bagina iti kayatna a pagbalinan tapno matungpal ti panggepna—kaipapananna man ti panagbalinna a Manangipaay, Mannalaknib, wenno uray Mannusa—dagiti misionero nga agpannuray ken ni Jehova ken agtrabaho a maitunos iti panggepna agballigidanto kadagiti pakaibaonanda. (Exodo 3:14) Iti konklusionna, kinuna ni Brother Bowen: “Pulos a diyo liplipatan a no la ket pagbalinenyo a panggepyo ti panggep ni Jehova, mapagbalinnakayo iti aniaman a kasapulan a pagbalinanyo tapno maitungpalyo ti trabahoyo.”
Ti maudi a nagpalawag iti daytoy a paset ti programa ket ni Wallace Liverance, dati a misionero ken agdama a registrar ti eskuelaan. Napauluan ti palawagna iti “Pagtalinaedenyo a Nabiag ti Sao ti Dios ken Agtignay iti Biagyo.” Naipamaysa dayta iti di makeltay a mensahe, wenno kari, ti Dios nga agtultuloy nga agturong iti naan-anay a pannakatungpalna. (Hebreo 4:12) Impluensiaanna ti biag dagidiay agpaidalan iti dayta. (1 Tesalonica 2:13) Kasano a dayta a sao ket mapagtalinaed a nabiag ken agtignay iti biagtayo? Babaen ti naanep a panagadal iti Biblia. Pinalagipan ni Brother Liverance dagiti nagturpos maipapan kadagiti wagas ti panagadal iti Biblia a nasursuroda iti Gilead a pakairamanan ti panangbasa ken panangibuksil iti kaipapanan ken pakayaplikaran ti Sao ti Dios. Inadawna ti sasao ni Albert Schroeder, miembro ti Bagi a Manarawidwid a nagserbi kas tserman ti komite a nangipasdek iti Gilead School nasurok a 50 a tawenen ti napalabas: “Babaen ti panangusar iti konteksto, magun-odan ti maysa ti naan-anay, umiso, naespirituan a bileg nga impaay ti Dios babaen ti Saona.” Ti kastoy a wagas ti panagadal iti Biblia pagtalinaedenna ti Sao ti Dios a nabiag ken nasamay.
Makaparagsak a Kapkapadasan ken Interbiu
Kasaruno dagiti palawag, dimngeg dagiti timmabuno iti sumagmamano a makaparagsak a kapkapadasan nga insalaysay dagiti estudiante. Iti panangiturong ni Mark Noumair, dati a misionero ken agdama nga instruktor ti Gilead, insalaysay ken indemostra ti maysa a grupo dagiti estudiante no kasanoda nga inkagumaan ti mangasaba iti nagduduma a kasasaad. Nairugi dagiti dadduma nga inyadalan iti Biblia dagiti tattao iti teritoria babaen ti panangpaliiw kadagiti kasasaad ken sasao dagiti tattao ken babaen ti panangipakitada iti personal nga interes. No kasta, ‘inasikaso [dagiti estudiante] ti bagbagida ken ti isursuroda’ ken talaga nga interesadoda a tumulong kadagiti sabsabali a gumun-od iti pannakaisalakan.—1 Timoteo 4:16.
Adu a praktikal a singasing ti naipaay, ket ti rag-o nga itden ti panagserbi kas misionero imparangarang met ti sumagmamano nga aduanen kapadasan a kakabsat a madama idi nga agsansanay iti eskuelaan a para kadagiti kameng dagiti komite ti sanga nga opisina a naangay idiay Watchtower Educational Center. Da Brother Samuel Herd ken Robert Johnson nga agserserbi iti hedkuarter sigaganaygay nga ininterbiuda dagiti pannakabagi ti sangsanga nga opisina ti Sosiedad idiay Bolivia, Zimbabwe, Nicaragua, Central African Republic, Dominican Republic, Papua New Guinea, ken Cameroon.
Kasaruno dagiti kapadasan ken interbiu, ni Gerrit Lösch, a nagturpos iti maika-41 a klase ti Gilead ken miembro itan ti Bagi a Manarawidwid, impaayna ti maudi a palawag nga addaan mamagpanunot a tema a “Makaay-ayoka Kadi a Tao?” Impalagip nga umuna ni Brother Lösch kadagiti nagturpos a ni Jesus, ti perpekto nga Anak ti Dios, ket saan nga imbilang dagiti tattao a makaay-ayo, no di ket “inumsi ken liniklikan dagiti tattao.” (Isaias 53:3, NW) Isu a saan a pakasdaawan nga iti adu a paset ti lubong ita, saan a maikabkabilangan wenno maawat dagiti misionero. Iti sabali a bangir, kabayatan ti adu a tawen a panagserbina idiay Babilonia, ni Daniel ket namitlo a daras nga inawagan ti Namarsua kas “madungdungngo unay” babaen ti maysa nga angel. (Daniel 9:23; 10:11, 19) Ania ti namagbalin ken Daniel a kasta? Pulos a dina inkompromiso dagiti prinsipio ti Biblia iti pannakibagayna iti kultura ti Babilonia; napudno iti amin nga aramidna, a dina inusar uray kaanoman ti saadna nga agpaay iti bukodna a pagimbagan; ken napinget idi nga agadal iti Sao ti Dios. (Daniel 1:8,9; 6:4; 9:2) Naynay met a nagkararag ken ni Jehova ken kanayon a madadaan a mangidaydayaw iti Dios gapu kadagiti gapuananna. (Daniel 2:20) Babaen ti panangtuladda iti ulidan ni Daniel, agbalin met a makaay-ayo dagiti adipen ti Dios, mabalin a saan nga iti lubong, no di ket ken ni Jehova a Dios.
Kas paggibusan ti programa a makapabang-ar iti naespirituan, imbasa ti tserman ti sumagmamano a telegrama ken mensahe a naggapu iti aglawlaw ti lubong. Kalpasanna, nayawat iti tunggal maysa kadagiti 24 a pagassawaan dagiti diplomada, ken nayanunsio dagiti pagilian a pakaibaonanda. Kamaudiananna, imbasa ti pannakabagi ti klase ti maysa a surat a naiturong iti Bagi a Manarawidwid ken iti pamilia ti Bethel, a mangyeb-ebkas iti panangapresiar ti klase iti panagsanay ken preparasion a naipaay kadakuada iti napalabas a lima a bulan.
Idi nalpasen ti programa, ‘naragsak ken siyayaman’ a nagawid dagiti timmabuno.—Nehemias 12:27.
[Kahon iti panid 27]
Estadistika ti Klase
Bilang dagiti pagilian a nairepresentar: 10
Bilang dagiti pagilian a pakaibaonanda: 19
Bilang dagiti estudiante: 48
Bilang dagiti agassawa: 24
Promedio nga edad: 33
Promedio a tawen iti kinapudno: 16
Promedio a tawen iti amin-tiempo a ministerio: 13
[Ladawan iti panid 25]
Ti Maika-106 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.