Sireregta a Makipagani Dagiti Nagturpos iti Gilead!

“DAKKEL ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mateo 9:37, 38) Adda naisangsangayan a kaipapanan dagita a sasao kadagiti nagturpos nga estudiante ti maika-116 a klase ti Watchtower Bible School of Gilead bayat nga agsaganada a mapan kadagiti pakaibaonanda kas misionero.

Idi Sabado, Marso 13, 2004, adda 6,684 a nagtataripnong iti Watchtower Educational Center idiay Patterson, New York, ken kadagiti lugar a nakaipabuyaan ti programa ti panagturpos babaen ti telebision, ket immawat ti klase iti pammakada a balakad ken pammaregta. Makasursurotayo amin iti naipaay a balakad bayat a sireregta a makipasettayo iti naespirituan a panagani.

Ti panglukat a palawag ni Theodore Jaracz, maysa a kameng ti Bagi a Manarawidwid ken nagturpos iti maikapito a klase ti Gilead, intampokna ti sasao ni Jesus: “Inkayo . . . ket mangaramidkayo iti ad-adalan kadagiti tattao iti amin a nasion.” (Mateo 28:19, 20) Anian a maitutop dayta yantangay dagiti nagraduar ket maibaon iti 20 a nagduduma a pagilian! Impalagipna kadagiti estudiante a babaen ti instruksion ti Sao ti Dios, naan-anay a nakabalanda nga agbalin a nareregta a trabahador iti kapatgan a naespirituan a panagani.​—Mateo 5:16.

No Kasano nga Agbalin a Nabunga a Managani

Ti umuna nga ispiker iti programa isu ni Robert Wallen, a nakipagtrabaho iti Gilead School iti adu a tawen. Iti palawagna a napauluan “Ti Pintas ti Pannakipagrikna,” kinunana kadagiti estudiante: “Ti pannakipagrikna ket maysa a lenguahe a mabalin a mangngeg dagiti tuleng ken makita dagiti bulsek.” Pagaammo a naimbag ni Jesus ti rigat dagiti sabsabali ket binang-aranna ida. (Mateo 9:36) Adu ti gundaway a maaramid met dayta dagiti estudiante​—iti panangasaba, iti kongregasion, iti pagtaengan dagiti misionero, ken iti asawada. Indagadag kadakuada ti ispiker: “Iparangarangyo koma iti biagyo ti pintas ti pannakipagrikna bayat a pagserbianyo ti dadduma. Sa la agballigi ti inaldaw a panagnaedyo iti pagtaengan dagiti misionero no iparangarangyo ti kasayaatan a kababalinyo. Gapuna, determinadokayo koma a mangikawes iti pannakipagrikna.”​—Colosas 3:12.

Simmaruno ni Gerrit Lösch, kameng ti Bagi a Manarawidwid ken nagturpos iti maika-41 a klase ti Gilead, ket inlawlawagna ti tema nga “Agibumbunannag Agpaay iti Pannakaisalakan.” (Isaias 52:7) Tapno maisalakan dagiti tattao inton madadael daytoy agdama a sistema ti bambanag, masapul a gumun-odda nga umuna iti umiso a pannakaammo manipud iti Sao ti Dios, ipakaammoda ti pammatida iti publiko, ken agpabautisarda. (Roma 10:10; 2 Timoteo 3:15; 1 Pedro 3:21) Ngem saan a ti pannakaispal dagiti tattao ti kangrunaan a rason no apay nga ipakaammo ti pannakaisalakan no di ket tapno maidaydayaw ti Dios. Gapuna, binalakadan ni Kabsat Lösch dagiti agbalin a misionero: “Idanonyo ti mensahe ti Pagarian agingga iti ungto ti daga, ken agbalinkayo a naregta nga agibumbunannag agpaay iti pannakaisalakan, a pakaidayawan amin ni Jehova.”​—Roma 10:18.

‘Kasanot’ Karaniagyo?’ ti saludsod ti instruktor ti Gilead a ni Lawrence Bowen. Tinukoyna ti sasao ni Jesus a nairekord iti Mateo 6:22 ken pinaregtana dagiti agturpos nga estudiante a pagtalinaedenda a “simple” ti matada tapno “maisilnagda ti naespirituan a lawag a mangpadayag ken ni Jehova ken pakagunggonaan dagiti pada a tattao.” Manipud rugi ti ministeriona, nangipasdek ni Jesus iti perpekto nga ulidan iti daytoy a banag babaen ti kanayon a panangyun-unana iti pagayatan ti Dios. Babaen ti panangutobna kadagiti agkakaimbag a bambanag nga insuro kenkuana ni Amana idiay langit, natulongan ni Jesus a mangibtur kadagiti pannubok nga inyeg kenkuana ni Satanas idiay let-ang. (Mateo 3:16; 4:1-11) Naan-anay a nagpannuray ni Jesus ken ni Jehova bayat nga intungpalna ti impaannong kenkuana ti Dios. Umasping iti dayta, tapno masarangetda dagiti dumteng a karit, masapul nga itultuloy dagiti misionero nga annuroten dagiti naimbag a kababalin ti panagadal iti Biblia ken naan-anay nga agpannurayda ken ni Jehova.

Ni Mark Noumair, instruktor iti Gilead ken nagturpos iti maika-77 a klase ti Gilead, inngudona daytoy a serye dagiti palawag babaen ti tema nga “Adtoykami iti Imam.” (Josue 9:25) Pinaregtana dagiti estudiante a tuladenda ti kababalin dagiti nagkauna a Gabaonita. Nupay ti Gabaon ket ‘dakkel a siudad ken amin dagiti lallakina mannakabalinda,’ saan a kinalikaguman dagiti Gabaonita ti pannakabigbig wenno ninamnama nga isuda ti masurot. (Josue 10:2) Sidadaan a nagserbida kas “agur-urnong iti kayo ken agsaksakdo iti danum” iti sidong dagiti Levita kas panangsuporta iti panagdayaw ken ni Jehova. (Josue 9:27) No an-anagen, ti agturpos a klase kasla kunkunada iti Dakdakkel a Josue, ni Jesu-Kristo, “Adtoykami iti imam.” Ita ta mapandan iti pakaibaonanda a ganggannaet a lugar, masapul nga awatenda ti aniaman a trabaho nga ipaannong kadakuada ti Dakdakkel a Josue.

Dagiti Kapadasan ken Interbiu

“Naan-anay a Luktan Dagiti Kasuratan” ti tema ti diskusion iti maysa a grupo dagiti estudiante nga indauluan ni Wallace Liverance, nagturpos iti maika-61 a klase ti Gilead ken maysa kadagiti instruktor. Insalaysay ken indemostrada dagiti kapadasanda iti tay-ak ti ministerio kabayatan ti panageskuelada. Nabatad nga immukuok iti pusoda ti naregta a panagadalda iti Kasuratan iti uneg ti lima a bulan a panagsanayda ken naparegtada a mangiranud kadagiti naadalda. (Lucas 24:32) Kabayatan ti lima a bulan a panageskuelada, inranud ti maysa nga estudiante iti mismo a kabsatna no ania ti maad-adalna. Dayta ti nangtignay iti kabsatna a mangbirok iti kongregasion iti lugarda ket rinugianna ti nagadal iti Biblia. Nakualipikar itan kas maysa a di bautisado nga agibumbunannag.

Kalpasan dagitoy a kapadasan, indauluan da Richard Ashe ken John Gibbard ti pananginterbiu iti sumagmamano a nabayagen a matalek nga adipen ni Jehova, agraman kadagiti agdaldaliasat a manangaywan, a madama ti espesial a pannakasanayda iti Watchtower Educational Center. Nagturposda met kadagiti immun-una a klase ti Gilead School. Malagip pay ti maysa kadakuada ti kinuna ni Kabsat Knorr kabayatan ti klaseda idi: “Ditoy Gilead, adu ti maadalyo. Ngem maibilang a pannakapaay no agbalinkayto a natangsit inton rummuarkayo. Kayatmi a managayatkayo koma inton rummuarkayo.” Dagiti agdaldaliasat a kakabsat binalakadanda dagiti agturpos nga agbalinda koma a nakonsiderar kadagiti tattao, a makilangenda kas iti pannakilangen ni Kristo, ken sipapakumbaba nga awatenda ti aniaman a maipaannong kadakuada. No iyaplikarda dayta a balakad, awan duadua a makatulong kadagiti kabbaro a misionero nga agbalin a nabunga kadagiti pakaibaonanda.

Sireregta a Makipaganikayo!

Naaddaan iti gundaway a mangngeg dagiti timmabuno ti palawag ni Stephen Lett, maysa a kameng ti Bagi a Manarawidwid. Imparangna ti kangrunaan a palawag ti programa, a napauluan iti “Sireregta a Makipaganikayo!” (Mateo 9:38) Limitado ti tiempo ti literal a panagani. Dagiti agani masapul nga igaedda ti agtrabaho. Anian a napatpateg pay dayta kabayatan ti panungpalan daytoy sistema ti bambanag! Iti dakkel a naespirituan a panagani, adda dagiti biag a nairaman. (Mateo 13:39) Pinaregta ni Kabsat Lett dagiti agturpos a dida ‘agpalpallailang iti aramidda’ no di ket ‘nasgedda koma iti espiritu’ ken ‘agpaadipenda ken Jehova’ iti daytoy dinto mauliten a panagani. (Roma 12:11) Inadaw ti ispiker ti sasao ni Jesus: “Itannawagyo dagiti matayo ket matmatanyo dagiti talon, ta purawdan a maipaay iti pannakaani.” (Juan 4:35) Kalpasanna, indagadagna kadagiti agturpos a reggetanda ti panagani babaen ti panangikagumaanda a mangdanon kadagiti tattao kaanoman wenno sadinoman ti pakasarakan kadakuada ken babaen ti panangaprobetsar iti amin a gundaway a mangasaba iti di pormal. Ti pananggundaway iti amin a kanito ket makatulong iti panangipaay iti epektibo a panangsaksi. Naregta a Dios ni Jehova, ken namnamaenna a tuladentayo isuna ken sigagaget a makipasettayo iti naespirituan a panagani.​—2 Ar-ari 19:31; Juan 5:17.

Iti panangingudona iti programa, ti tserman a ni Kabsat Jaracz imbasana dagiti kablaaw manipud iti nagduduma a sanga nga opisina ken intedda kadagiti estudiante dagiti diplomada. Maysa kadagiti nagturpos ti nangibasa iti surat ti klase, nga inyebkasda ti nasged a panagyamanda iti inawatda a panagsanay. Nalawag, ti panagturpos ti maika-116 a klase pinaregtana ti amin a timmabuno nga agbalinda nga ad-adda a determinado a sireregta a makipagani.

[Kahon iti panid 25]

ESTADISTIKA TI KLASE

Bilang dagiti pagilian a nairepresentar: 6

Bilang dagiti pagilian a pakaibaonan: 20

Bilang dagiti estudiante: 46

Promedio nga edad: 34.2

Promedio a tawen iti kinapudno: 17.2

Promedio a tawen iti amin-tiempo a ministerio: 13.9

[Ladawan iti panid 26]

Ti Maika-116 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.