Taginayonem “ti Ayat nga Adda Kenka Idi Damo”

“Itultuloymo a salimetmetan a sititibker ti adda kenka.”​—APOC. 3:11.

1, 2. Ania ti nariknam idi nakombinsirka a kinapudno ti maad-adalmo maipapan ken Jehova?

MALAGIPMO pay kadi idi damo a naammuam ti maipapan iti nagsayaat a namnama nga ituktukon ni Jehova kadagiti natulnog a tattao? No sabali idi ti relihionmo, ania ti nariknam idi nailawlawag kenka manipud iti Kasuratan dagiti panggep ti Dios wenno dagiti sursuro a sigud a narigatmo a matarusan? Nalabit a naamirismo a kamali gayam dagiti dati a naisuro kenka. Ngem anian a ragsakmo ita yantangay naammuamon ti kinapudno! No inkaubingam ti kinapudno, malagipmo pay kadi ti nariknam idi nakombinsirka a kinapudno ti maad-adalmo maipapan kenni Jehova ken inkeddengmon ti agbiag maitunos iti dayta?​—Roma 12:2.

² Adu a kakabsat ti mangibaga a nakaragragsakda, nasingedda kenni Jehova, ken agyamanda ta inyadanina ida kenkuana. (Juan 6:44) Gapu iti ragsakda, natignayda a makiraman kadagiti Nakristianuan nga aktibidad. Aglaplapusanan ti rag-oda nga uray la inranudda dayta iti asinoman. Kasta kadi met ti nariknam?

3. Ania ti kasasaad ti kongregasion Kristiano idiay Efeso idi nangted ni Jesus iti mensahe kadakuada?

³ Idi nangted ni Jesus iti mensahe iti kongregasion Kristiano idiay Efeso idi umuna a siglo, dinakamatna ti maipapan iti “ayat nga adda kenka idi damo.” Nupay adu ti naimbag a galad dagiti taga-Efeso, bimmaaw ti panagayatda ken Jehova. Gapuna, kinuna kadakuada ni Jesus: “Ammok dagiti aramidmo, ken ti panagbannog ken panagibturmo, ket saanmo a maanusan dagiti dakes a tattao, ket subokem dagidiay agkunkuna nga apostolda, ngem saanda met a kasta, ket nasarakam ida a naulbod. Mangipakpakitaka met iti panagibtur, ken naganuska maigapu iti naganko ket saanka a nabannog. Nupay kasta, adda daytoy a busorek kenka, ta pinanawam ti ayat nga adda kenka idi damo.”​—Apoc. 2:2-4.

4. Apay a naintiempuan iti kaaldawantayo ti mensahe ni Jesus kadagiti taga-Efeso?

⁴ Ti balakad ni Jesus kadagiti taga-Efeso ken iti dadduma a kongregasion a nadakamat iti libro nga Apocalipsis ket maitutop kadagiti napulotan a Kristiano gapu kadagiti kasasaad a napasaranda iti sumagmamano a tiempo sipud idi 1914. (Apoc. 1:10) Ngem uray ita, mabalin a ti dadduma a Kristiano bumaaw ‘ti damo nga ayatda’ kenni Jehova ken iti Nakristianuan a kinapudno. Bayat a sipapanunottayo iti dayta, usigentayo no kasano a ti pananglagip ken panangutob iti mismo a kapadasanyo tulongannakayo a mangtaginayon, mangpabaro, ken mangparayray iti ayat ken kinaregta a damo a nariknayo para iti Dios ken iti kinapudno.

Ania ti Nakakombinsir Kenka iti Kinapudno?

5, 6. (a) Ania ti masapul a paneknekan ti tunggal Kristiano iti bagina? (b) Ania ti nakakombinsir kenka a kinapudno ti isursuro dagiti Saksi ni Jehova? (c) Ania ti makatulong iti maysa a mangparayray iti ayat nga adda kenkuana idi damo?

⁵ Sakbay a ti maysa idedikarna ti biagna ken Jehova, masapul a ‘mapaneknekanna’ a mismo no ania “ti naimbag ken makaay-ayo ken naan-anay a pagayatan ti Dios.” (Roma 12:1, 2) Agkalikagum dayta iti panangadal iti kinapudno a linaon ti Biblia. Nagduduma ti rason ti tunggal maysa no apay a nakombinsirda a kinapudno ti isursuro dagiti Saksi ni Jehova. Malagip dagiti dadduma a nagbalbaliw ti panangmatmatda idi nabasada iti Biblia ti nagan ti Dios wenno idi naawatanda ti pudpudno a kasasaad dagiti natay. (Sal. 83:18; Ecl. 9:5, 10) Nagutugot met ti dadduma gapu iti ayat a nakitada iti ili ni Jehova. (Juan 13:34, 35) Naawatan met ti dadduma no ania ti kayat a sawen ti saan a pannakipaset iti lubong. Nabigbigda a saan a mabalin a makiraman dagiti pudno a Kristiano kadagiti napolitikaan nga isyu wenno iti panaggugubat dagiti nasion.​—Isa. 2:4; Juan 6:15; 17:14-16.

⁶ Dagita ti sumagmamano a rason a nakatignayan ti adu tapno ayatenda ti Dios. Panunotem man biit no ania ti nakakombinsir kenka iti kinapudno. Gapu ta nagduduma ti kasasaad ken katatao ti tunggal maysa, mabalin a naiduma ti rasonmo no apay nga ay-ayatem ni Jehova ken patiem dagiti karina. Nalabit a saan a nagbalbaliw dagita a rasonmo. Ngem saan met a nagbalbaliw ti kinapudno. Gapuna, ti panangusigmo kadagita a kapanunotan ken rikrikna ti makatulong kenka a mangparayray iti damo nga ayatmo iti kinapudno.​—Basaen ti Salmo 119:151, 152; 143:5.

Parayrayem ti ‘Damo nga Ayatmo’

7. Apay a nasken a parayrayentayo ti damo nga ayattayo iti kinapudno, ken kasanotayo a maaramidan dayta?

⁷ Nalabit a dakkel ti nagbalbaliwan ti biagmo sipud idi nagdedikarka ken Jehova. Napateg ti damo nga ayatmo iti kinapudno, ngem iti panaglabas ti panawen, kinasapulam ti nabarbara nga ayat tapno madaeram dagiti baro a karit a nangsubok iti pammatim. Ngem tinulongannaka ni Jehova. (1 Cor. 10:13) Gapuna, napateg met kenka dagiti kapadasan a nagun-odmo bayat ti panaglabas dagiti tawen. Tinulongandaka a mangparayray iti ayat nga adda kenka idi damo, ken maysa dayta a pamay-an a napaneknekam a mismo no ania ti naimbag ken makaay-ayo a pagayatan ti Dios.​—Jos. 23:14; Sal. 34:8.

8. Kasano nga inyam-ammo ni Jehova ti bagina kenni Moises, ken kasano a dagiti Israelita ad-adda a naam-ammoda ti Dios?

⁸ Kas panangyilustrar, usigem ti kasasaad dagiti Israelita idi imbaga ni Jehova ti panggepna a mangispal kadakuada manipud pannakaadipen idiay Egipto. Kastoy ti panangyam-ammo ti Dios iti bagina kenni Moises: “Agbalinakto no anianto ti pagbalinak.” (Ex. 3:7, 8, 13, 14) No an-anagen, ibagbaga ni Jehova a kabaelanna ti agbalin iti aniaman a kayatna a pagbalinan tapno mawayawayaanna ti ilina. Kadagiti simmaruno a pasamak ken kas kinalikaguman ti kasasaad, nakita dagiti Israelita no kasano nga imparangarang ni Jehova ti nadumaduma nga aspeto ti kinasiasinona​—kas Mannakabalin-amin, Ukom, Lider, Manangispal, Mannakigubat, ken Manangipaay.​—Ex. 12:12; 13:21; 14:24-31; 16:4; Neh. 9:9-15.

9, 10. Ania dagiti pamay-an a ti maysa ad-adda a maam-ammona ti Dios, ken apay a nasayaat a lagipen dagita a kapadasan?

⁹ Naiduma met ketdi ti kasasaadmo kadagiti nagkauna nga Israelita. Kaskasdi, nalabit nga adda dagiti kapadasam a nakakombinsiram a pudno a maseknan ti Dios kenka, banag a nangpabileg iti pammatim. Nalabit nga iti sumagmamano a pamay-an, pinaneknekan kenka ni Jehova nga isu ket Manangipaay, Manangliwliwa, wenno Mannursuro. (Basaen ti Isaias 30:20b, 21.) Wenno nalabit nakitam a nalawag a nasungbatan ti kararagmo. Mabalin met a naipasangoka iti maysa a parikut ket adda kabsat a timmulong kenka. Wenno mabalin nga iti personal a panagadalmo iti Biblia, adda dagiti teksto a nakitam nga agaplikar kenka.

¹⁰ No estoriaem dagiti kasta a kapadasam, nalabit nga ibilang ti dadduma a kasla bassit la a banag dagita gapu ta saan met a namilagruan. Ngem para kenka, nagdakkel a banag dayta. Matmatam a pamay-an dayta ni Jehova tapno ipakitana kenka ti kinasiasinona. Panunotem ti kabayagmon iti kinapudno. Malagipmo pay kadi ti sumagmamano a gundaway a nariknam ti personal a pannakaseknan ni Jehova kenka? Makatulong ti pananglagip kadagita ken no ania ti nariknam kadagidi a tiempo tapno mapabaro ti panagayatmo ken Jehova a kas idi damo. Ipategmo dagita a kapadasam. Utobem ida. Pammaneknek dagita a maseknan kenka ni Jehova, ket awan ti asinoman a mabalin a mangbalbaliw iti dayta a panangmatmatmo.

Sukimatem ti Bagim

11, 12. Ania ti mabalin a makagapu a bumaaw ti panagayat ti maysa a Kristiano iti kinapudno, ken ania ti imbalakad ni Jesus?

¹¹ Gapu ta saan a pulos nga agbalbaliw ni Jehova, saan nga isu ti makagapu no kas pagarigan ta bimmaawen ti panagayatmo kenkuana ken iti kinapudno. (Mal. 3:6; Sant. 1:17) Agingga ita, isu ket maseknan kenka. Komusta ngarud no nagbalbaliwen ti relasionmo ken Jehova? Mabalin ngata a gapu ta mariknam nga ad-adu ita ti pakarigatam ken pakaringgoram? Nalabit nga idi, napingpinget ti panagkararagmo, naan-anep ti panagadalmo, ken nasansansan ti panagmennamennam. Wenno mabalin a naregregtaka idi iti ministerio ken regular ti pannakigimongmo.​—2 Cor. 13:5.

¹² No kalpasan ti panangsukimatmo iti bagim ket nadlawmo dagita a panagbalbaliw, ania ngata ti makagapu? Naapektaran kadin ti pannakariknam iti kinaganat ti panawen maipapan iti kinaasideg ti aldaw ni Jehova gapu kadagiti kadawyan a pakaseknan, kas iti panangipaay iti kasapulan ti pamiliam, panangaywan iti salun-atmo, wenno aniaman nga umarngi iti dayta? Kinuna ni Jesus kadagiti apostolna: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo. Ta dumtengto dayta kadagidiay amin nga agnanaed iti rabaw ti intero a daga. Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak.”​—Luc. 21:34-36.

13. Ania ti nangyarigan ni Santiago iti Sao ti Dios?

¹³ Ti napaltiingan a mannurat iti Biblia a ni Santiago indagadagna kadagiti padana a manamati a masapul a sipupudno nga usigenda ti bagida maitunos iti kuna ti Sao ti Dios. Insurat ni Santiago: “Agbalinkayo a managtungpal iti sao, ket saan a managdengngeg laeng, nga al-allilawenyo ti bagbagiyo iti ulbod a panagrasrason. Ta no ti asinoman managdengngeg iti sao, ket saan a managtungpal, daytoy ket umasping iti tao a kitkitaenna ti nakaisigudan a rupana iti maysa a pagsarmingan. Ta kitaenna ti bagina, ket isu mapan ket dagus a malipatanna no ania a kita ti tao isuna. Ngem ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho, naragsakto iti panangaramidna iti dayta.”​—Sant. 1:22-25.

14, 15. (a) Kasano a makatulong ti Biblia a mangparang-ay iti espiritualidadyo? (b) Ania dagiti saludsod a mabalinyo nga usigen?

¹⁴ Agsarming ti tao tapno makitana no nanakman ti langana. Kas pagarigan, no makitana a saan a husto ti plastar ti kurbatana, urnosenna dayta. Wenno no nakuso ti buokna, mabalinna a sagaysayen. Umasping iti dayta, tulongannatayo ti Biblia a mangsukimat iti bagitayo. No idiligtayo ti bagitayo sigun iti ibagbaga ti Biblia a rumbeng a pagbalinantayo, kasla us-usarentayo dayta a pagsarmingan. Ngem awan serbina nga agsarmingtayo no saantay nga aturen ti di umiso a makitatayo iti langatayo. Masiribtayo no agtignaytayo a maitunos iti makitatayo iti “perpekto a linteg” ti Dios, a ‘tungpalentayo’ dagiti kalikagumanna. Gapuna, no makita ti maysa a bimmaaw ti damo nga ayatna kenni Jehova ken iti kinapudno, nasayaat nga utobenna dagitoy a saludsod: ‘Ania dagiti parikut a pakaipaspasanguak, ken kasano ti panangtamingko kadagita ita? Kasano ti panangtamingko kadagita idi naglabas? Adda kadi nagbaliwanna?’ No ipalgak ti kasta a panangusig ti aniaman a nagkurangam, dimo iyaleng-aleng dagita. No kasapulan ti panagbalbaliw, dagus nga aramidem dayta.​—Heb. 12:12, 13.

¹⁵ Makatulong met ti kasta a panangusig tapno makaipasdekka kadagiti kabaelam a ragpaten a kalat a mangparang-ay iti espiritualidadmo. Nangted ni apostol Pablo iti nadiosan a balakad iti katrabahuanna a ni Timoteo tapno mapasayaatna ti ministeriona. Indagadag ni Pablo iti daytoy nga agtutubo: “Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao.” Nasken nga utobentayo met maitunos iti Sao ti Dios no ania dagiti mabalintayo a parang-ayen iti panagserbitayo.​—1 Tim. 4:15.

16. Ania a peggad ti nasken a pagannadanyo no sukimatenyo ti bagiyo maitunos iti Kasuratan?

¹⁶ No sipupudno a sukimatem ti bagim, mabalin a makitam ti sumagmamano a pagkapuyam. Nalabit makapaupay dayta, ngem dimo ipalubos a mapasamak kenka ti kasta. Total, ti panggep ti panangsukimatmo iti bagim ket tapno makitam no ania ti mabalin pay a parang-ayem. Siempre, kayat ni Satanas a marikna ti maysa a Kristiano nga awan serserbina gapu kadagiti pagkuranganna. Kinapudnona, iparikna dayta a kabusor a laksiden kano ti Dios ti aniaman a panagregget nga agserbi kenkuana. (Job 15:15, 16; 22:3) Ngem sipipinget a pinaneknekan ni Jesus a maysa a kinaulbod dayta. Kinapudnona, ibilang ti Dios a napateg ti tunggal maysa kadatayo. (Basaen ti Mateo 10:29-31.) No makitam nga adda dagiti pagkurangam, dayta koma ti mangtignay kenka tapno sipapakumbaba nga ikagumaam ti agbalbaliw babaen ti tulong ni Jehova. (2 Cor. 12:7-10) No malimitaran ti magapuanam gapu iti sakit wenno kinalakay ken kinabaket, mangikeddengka kadagiti kalat a kabaelam a ragpaten. Ngem dika koma sumuko wenno dimo ipalubos a bumaaw ti ayatmo.

Adu a Bambanag a Pagyamanan

17, 18. Ania dagiti magunggonayo no parayrayenyo ti ayat nga adda kadakayo idi damo?

¹⁷ Dakkel ti gunggona nga itden ti agtultuloy a panangparayray iti ayat nga adda kenka idi damo. Mabalinmo a parayrayen ti pannakaammom maipapan iti Dios ken ti panangipategmo iti naayat a panangiwanwanna. (Basaen ti Proverbio 2:1-9; 3:5, 6.) “Iti panangsalimetmet [kadagiti hudisial a pangngeddeng ni Jehova] adda dakkel a gunggona,” kinuna ti salmista. “Ti pammalagip ni Jehova mapagpiaran, mamagsirib iti daydiay awanan kapadasan.” Malaksid iti dayta, “naragsak dagidiay awan pagkuranganna iti dalanda, dagidiay magmagna iti linteg ni Jehova.”​—Sal. 19:7, 11; 119:1.

¹⁸ Sigurado nga umanamongka nga adu a bambanag ti rumbeng a pagyamanam. Ammom dagiti makagapu no apay a kastoy ti kasasaad ita ditoy lubong. Tagtagiragsakem ti naespirituan a panangaywan ken atension nga ipapaay ti Dios iti ilina iti kaaldawantayo. Awan duadua nga agyamanka met ta inyadaninaka ni Jehova iti sangalubongan a kongregasionna ken inikkannaka iti gundaway nga agbalin a maysa kadagiti Saksina. Bilangem dagiti bendision a tagtagiragsakem! No ilistam amin dagita, nalabit a nakaat-atiddog. No kanayon nga aramidem dayta, awan duadua a mapabilegka a mangyaplikar iti daytoy a balakad: “Itultuloymo a salimetmetan a sititibker ti adda kenka.”​—Apoc. 3:11.

19. Malaksid iti panangusig iti relasionmo iti Dios, ania dagiti makatulong tapno mataginayonmo ti nabileg nga espiritualidadmo?

¹⁹ Ti panangusig no kasano a bimmileg ti pammatim iti panaglabas ti panawen ket maysa laeng nga addang a makatulong kenka a mangsalimetmet a sititibker iti adda kenka. Kanayon nga itampok daytoy a pagbasaan ti dadduma pay a napateg a bambanag a makatulong tapno mataginayonmo ti espiritualidadmo. Ramanenna ti kararag, itatabuno ken pannakipaset kadagiti Nakristianuan a gimong, ken ti sireregta a pannakiraman iti trabaho a panangasaba. Makatulong dagitoy tapno maitultuloymo a mapabaro ken maparayray ti ayat nga adda kenka idi damo.​—Efe. 5:10; 1 Ped. 3:15; Jud. 20, 21.

Ania ti Sungbatyo?

• Kasano a maparegtakayo no usigenyo dagiti rason nga ay-ayatenyo ni Jehova?

• Iti ania a mapabilegkayo no utobenyo dagiti mismo a kapadasanyo iti naglabas a tawtawen?

• Apay a nasken a sukimatenyo ti ayatyo iti Dios?

[Ladawan iti panid 23]

Ania ti nangatrakar ken nakakombinsir kenka iti kinapudno?

[Ladawan iti panid 25]

Adda kadi nakitam iti bagim a masapul nga aturem?