Panangparmek Kadagiti Karit iti Panangasaba iti Binalaybalay

“Nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangadang.”​—1 TES. 2:2.

1. Ania dagiti karit a nakaipasanguan ni Jeremias, ken kasano a napagballigianna dagita?

ADDAAN met ni Jeremias iti rikna kas kadatayo. Idi imbaga ni Jehova ti annongenna kas “mammadto kadagiti nasion,” kinunana: “Ay, O Soberano nga Apo Jehova! Adtoy pudno a saanko nga ammo ti agsao, ta maysaak laeng nga ubing.” Nupay kasta, nagtalek ken Jehova ket inawatna dayta nga annongen. (Jer. 1:4-10) Iti nasurok nga 40 a tawen, inibturan ni Jeremias ti panangumsi, pananglais, panangranggas, ken di panangikankano dagiti tattao. (Jer. 20:1, 2) Adda panawen a kasla kayatnan ti sumuko. Kaskasdi, sipipinget nga indeklarana ti mensahe a di kayat nga ipangag ti kaaduan a tattao. Babaen ti tulong ti Dios, naitungpal ni Jeremias ti annongenna a dina pulos kabaelan nga ibaklay no iti bukodna laeng.​—Basaen ti Jeremias 20:7-9.

2, 3. Kasano a dagiti adipen ti Dios ita maipaspasangoda kadagiti karit nga umasping iti napasaran ni Jeremias?

² Mapaspasaran met ti adu nga adipen ti Dios ita ti narikna ni Jeremias. No pampanunotentayo ti panangasaba iti binalaybalay, dadduma kadatayo ti mabalin a nangibaga idi, ‘Diak la ketdi kabaelan dayta.’ Ngem idi nabigbigtayo a pagayatan ni Jehova nga iwaragawagtayo ti naimbag a damag, naparmektayo ti panagamak ket nagbalintayo nga okupado iti panangasaba. Nupay kasta, adu kadatayo ti maipaspasango kadagiti parikut a mamagbalin a narigat no dadduma ti agtultuloy a mangasaba. Pudno a narigat ti mangirugi iti panangasaba iti binalaybalay ken mangitultuloy iti dayta agingga iti panungpalan.​—Mat. 24:13.

³ Kasano ngay no nabayagkan a makipagad-adal iti Biblia kadagiti Saksi ni Jehova ken tumabtabuno kadagiti gimong ti kongregasion ngem bumdengka latta a mangasaba iti binalaybalay? Wenno maysakan a bautisado a Saksi ngem iti panagriknam ket marigatanka a mangasaba iti binalaybalay uray no kabaelan met ti salun-atmo? Laglagipem a dagiti kakabsat iti aniaman a kultura ken kasasaad maipaspasangoda met kadagiti karit iti panangasaba iti binalaybalay. Ngem babaen ti tulong ni Jehova, mapagballigiam dayta.

Maaddaankayo iti Tured

4. Ania ti nakatulong ken apostol Pablo a mangiranud iti naimbag a damag buyogen ti kinatured?

⁴ Awan duadua a mabigbigyo a maitungtungpal ti sangalubongan a trabaho a panangasaba, saan a babaen ti pannakabalin ken sirib ti tao no di ket babaen ti espiritu ti Dios. (Zac. 4:6) Pudno met dayta no maipapan iti panangasaba ti tunggal Kristiano. (2 Cor. 4:7) Usigenyo ti kapadasan ni apostol Pablo. Iti pananglagipna iti tiempo idi isu ken ti kaduana a misionero ket sikukuspag a trinato dagiti bumusbusor, kinunana: “Kalpasan nga immuna a nagsagabakami ken sikukuspag a natrato . . . idiay Filipos, a nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangadang.” (1 Tes. 2:2; Ara. 16:22-24) Kasla di nakappapati nga adda idi tiempo a ti naregta a manangaskasaba a kas ken Pablo ket marigatan met a mangasaba. Ngem kas kadatayo amin, nasken nga agtalek ni Pablo kenni Jehova tapno mairanudna ti naimbag a damag buyogen ti kinatured. (Basaen ti Efeso 6:18-20.) Kasano a matuladtayo ti ulidan ni Pablo?

5. Ania ti maysa a pamay-an tapno maaddaantayo iti tured a mangasaba?

⁵ Ti maysa a pamay-an tapno maaddaantayo iti tured ket babaen ti kararag. Kuna ti maysa a payunir: “Agkararagak tapno makapagsaoak a situtured, agkararagak tapno madanonko ti puso dagiti tattao, ken agkararagak tapno maaddaanak iti rag-o iti ministerio. Kinapudnona, saantayo a trabaho daytoy no di ket trabaho ni Jehova, isu nga awan ti maaramidantayo no awan ti tulongna.” (1 Tes. 5:17) Amintayo koma ket agtultuloy nga agkararag maipaay iti tulong ti nasantuan nga espiritu ti Dios tapno maaddaantayo iti tured a mangasaba.​—Luc. 11:9-13.

6, 7. (a) Ania ti nasirmata ni Ezequiel, ken ania ti kaipapananna? (b) Ania a leksion ti ipaay ti sirmata ni Ezequiel kadagiti adipen ti Dios ita?

⁶ Adda pay ipalgak ti libro nga Ezequiel a makatulong kadatayo tapno makapagsaotayo a situtured. Iti sirmata, ni Jehova nangted ken Ezequiel iti maysa a lukot a nasuratan ti agsumbangir a panidna iti “dungdung-aw ken as-asug ken sangsangit” ket imbagana a kanenna dayta, a kunkunana: “Anak ti tao, pakanem koma ti tianmo, iti kasta mapunnom dagiti mismo a bagismo iti daytoy a lukot nga itedko kenka.” Ania ti kaipapanan daytoy a sirmata? Masapul nga ipapuso ni Ezequiel ti mensahe nga iwaragawagna. Dayta koma ti mangapektar iti mismo a riknana. Kalpasanna, kinuna ti propeta: “Rinugiak a kanen, ket iti ngiwatko nagbalin a kas iti diro ti kasam-itna.” Kas iti pannangan iti diro, makaay-ayo ken Ezequiel ti panangiwaragawag iti mensahe ti Dios iti publiko. Ibilangna a natan-ok a pribilehio ti mangibagi kenni Jehova ken mangitungpal iti inted-Dios nga annongenna, uray kaipapanan dayta ti panangipakaammona iti nadagsen a mensahe kadagiti manangyaleng-aleng a tattao.​—Basaen ti Ezequiel 2:8–3:4, 7-9.

⁷ Naglaon daytoy a sirmata iti nagpateg a leksion agpaay kadagiti adipen ti Dios ita. Adda met nadagsen a mensahe nga idanontayo kadagiti tattao a masansan a di mangapresiar iti panagreggettayo. Tapno maitultuloytayo a maipateg ti Nakristianuan a ministeriotayo kas inted ti Dios a pribilehiotayo, masapul nga itultuloytayo ti mangipauneg kadagiti naespirituan a taraon. Ngem ditay naan-anay a maipapuso ti Sao ti Dios no parparawpaw wenno saan a regular ti panagadaltayo. Mabalinyo kadi a pasayaaten ti kalidad ti personal a panagbasa ken panagadalyo iti Biblia ken pagbalinen a regular dayta? Mabalin kadi a sansanenyo nga utoben ti mabasbasayo?​—Sal. 1:2, 3.

Panangirugi iti Saritaan Maipapan iti Biblia

8. Ania a pamay-an ti nakatulong iti dadduma nga agibumbunannag tapno mairugida ti saritaan maipapan iti Biblia bayat ti panagbalaybalayda?

⁸ Para iti adu nga agibumbunannag, ti umuna a paset ti saritaan ti karigatan a paset ti panangasaba iti binalaybalay. Kinapudnona, iti dadduma a teritoria, narigat ti mangirugi kadagiti saritaan. Natakuatan ti dadduma nga agibumbunannag a nalaklakada nga iruangan ti saritaan iti bumalay babaen ti sumagmamano a napili a sasao sadanto mangitukon iti polieto, kas naibalabala iti naipasurot a kahon. Ti paulo ti polieto wenno ti namaris a ladawanna ti mabalin a mangala iti atension ti bumalay, ket dayta ti mangted kadatayo iti gundaway nga agsaludsod ken mangibaga iti apagbiit no ania ti panggep ti isasarungkartayo. Mabalinyo met nga ipakita iti bumalay ti tallo wenno uppat a nadumaduma a polieto ken pagpilienyo no ania kadagita ti paginteresanna. Ngem siempre, ti kalattayo ket saan laeng a tapno ipaima wenno ibati dagiti polieto iti tunggal bumalay no di ket usaren dayta a mangirugi iti saritaan nga agturong iti panangyadal iti Biblia.

9. Apay a nagpateg ti panagsagana a naimbag?

⁹ Aniaman a pamay-an ti usarenyo, ti panagsagana a naimbag matulongannakayo nga agbalin a kalmado ken naganaygay a mangasaba iti binalaybalay. Kinuna ti maysa a payunir: “Naragragsakak no nagsaganaak a naimbag. Magagaranak a mangiparang iti insaganak a presentasion.” Kuna ti sabali pay a payunir, “No ammok ti linaon dagiti publikasion nga ipaimak, nagangganaygayak a mangusar kadagita.” Nupay adda sumagmamano a pagimbaganna no kabesaduenyo iti isipyo ti presentasion nga usarenyo, adu ti nakapaneknek a nasaysayaat no sanayenyo ti presentasion babaen ti aktual a panangisawangyo iti dayta. Nakatulong dayta kadakuada a mangaramid iti amin a kabaelanda agpaay ken Jehova.​—Col. 3:23; 2 Tim. 2:15.

10. Ania ti mabalin nga aramiden tapno agbalin a praktikal ken makagunggona dagiti taripnong sakbay ti panangasaba?

¹⁰ Dagiti taripnong sakbay ti panangasaba matulongandatayo nga agbalin nga epektibo ken naragragsak a mangasaba iti binalaybalay. No ti teksto iti dayta nga aldaw ket direkta a mainaig iti panangasaba, mabalin a basaen ken ilawlawag dayta iti apagbiit. Nupay kasta, ti kabsat a mangidaulo iti dayta a taripnong ket nasken a mangiwaya iti umdas a tiempo a mangilawlawag wenno mangidemostra iti maysa a simple a presentasion a maitutop iti teritoria wenno mangusig iti dadduma pay a praktikal nga impormasion a mabalin nga usaren iti tay-ak iti dayta nga aldaw. Makatulong dayta tapno agbalin nga ad-adda nga epektibo dagiti mangasaba. Babaen ti nasakbay ken nasayaat a panagsagana, maaramidan dayta dagiti panglakayen ken asinoman a mangidaulo kadagiti kasta a taripnong ken maliklikanda pay ti lumbes iti naituding a tiempo.​—Roma 12:8.

Ti Maaramidan ti Panagimdeng

11, 12. Kasano a ti panagimdeng a nabuyogan iti pannakipagrikna tulongannatayo a mangidanon iti naimbag a damag kadagiti tattao? Mangted kadagiti pagarigan.

¹¹ Saan laeng a ti panagsagana a naimbag ti makatulong kadatayo a mangirugi iti saritaan maipapan iti Biblia ken mangdanon iti puso dagiti tattao iti ministerio no di pay ket ti nauneg a personal a pannakaseknan kadagiti sabsabali. Ti maysa a pamay-an a maipakitatayo ti kasta a pannakaseknan ket babaen ti panagimdengtayo. Kinuna ti maysa nga agdaldaliasat a manangaywan: “Ad-adda nga ipangag dagiti tattao ti naimbag a damag no naanus ken sisasaganatayo nga umimdeng, ken pammaneknek dayta a pudno a maseknantayo kadakuada.” Ti panagimdeng a nabuyogan iti pannakipagrikna ket mabalin a tulbek a manglukat iti puso ti bumalay, kas ipakita ti sumaganad a kapadasan.

¹² Iti surat a naipablaak iti periodiko a Le Progrès idiay Saint-Étienne, Francia, insalaysay ti maysa a babai ti maipapan iti isasarungkar ti dua a babbai di nagbayag kalpasan a napasaranna ti nakas-ang nga ipupusay ti tallo-bulan pay laeng nga anakna. “Dagus a nailasinko ida kas Saksi ni Jehova,” kinunana. “Agpadispensarak koman ta diak maasikaso ida ngem nakitak ti ituktukonda a broshur. Maipapan dayta iti panangipalubos ti Dios iti panagsagaba. Isu nga inkeddengko a pastreken ida tapno paneknekak kadakuada a di umiso ti isursuroda. . . . Nasurok a maysa nga oras ti panagsasaritami. Immimdengda kaniak buyogen ti pannakipagrikna. Naliwliwaak gapu iti dayta, isu nga idi agpakadadan, immannugotak a sarungkarandakto manen.” (Roma 12:15) Idi agangay, nagpayadal iti Biblia daytoy a babai. Imutektekanyo ta saan a ti imbaga dagiti Saksi ti natandaanan daytoy a babai idi damo a simmarungkarda no di ket ti panagimdengda a nabuyogan iti pannakipagrikna.

13. Kasano a maibagaytayo ti wagas ti panangidatagtayo iti naimbag a damag kadagiti makasaritatayo?

¹³ No dumngegtayo buyogen ti pannakipagrikna, arigna nga ik-ikkantayo iti gundaway dagiti tattao a mangyebkas no apay a kasapulanda ti Pagarian. Iti kasta, nalaklakatayo nga iranud ti naimbag a damag. Nalabit napaliiwyo nga epektibo a manangaskasaba dagidiay nasigo a managimdeng. (Prov. 20:5) Mangipakpakitada iti pudno a pannakaseknan kadagiti tattao a makasaritada iti ministerio. Saanda laeng nga inotar dagiti nagan ken adres dagitoy no di ket dagiti pay pakaseknan ken kasapulanda. No adda espesipiko a saludsod ti bumalay, agsukimatda maipapan iti dayta, sadanto agsubli iti kabiitan a tiempo tapno iranud ti nasukimatda. Kas ken apostol Pablo, ibagayda ti wagas ti panangidatagda iti mensahe ti Pagarian iti kasasaad ti tao a makasaritada. (Basaen ti 1 Corinto 9:19-23.) Ti kasta a napasnek a pannakaseknan allukoyenna dagiti tattao a dumngeg iti naimbag a damag ken silalawag nga iyanninawna ti “nadungngo a panangngaasi ti Diostayo.”​—Luc. 1:78.

Taginayonenyo ti Positibo a Kababalin

14. Bayat nga itungpaltayo ti ministeriotayo, kasano a mayanninawtayo dagiti galad ni Jehova?

¹⁴ Ipatpategnatayo ni Jehova babaen ti panangipaayna kadatayo iti wayawaya nga agpili. Nupay isu ti Mannakabalin-amin a Dios, kayatna nga agserbi kenkuana ti asinoman gapu iti ayat, saan ket a mapilpilit. Bendisionanna dagiti mangapresiar kadagiti agkakaimbag a probisionna. (Roma 2:4) Kas ministrona, sisasaganatayo koma a mangiranud iti naimbag a damag iti pamay-an a makaay-ayo iti naasi a Diostayo tunggal mangasabatayo. (2 Cor. 5:20, 21; 6:3-6) Gapuna, nasken a taginayonentayo ti positibo a kababalin kadagiti tattao iti teritoriatayo. Ania ti makatulong kadatayo a mangaramid iti dayta?

15. (a) Ania ti imbilin ni Jesus nga aramiden dagiti apostolna no saan nga ipangag dagiti tattao ti mensaheda? (b) Ania ti makatulong kadatayo a mangipamaysa iti panangbirok kadagiti maikari?

¹⁵ Imbilin ni Jesus kadagiti apostolna a dida koma maupay no adda dagiti saan a mangipangag iti mensaheda no di ket ipamaysada a biroken dagiti maikari. (Basaen ti Mateo 10:11-15.) Ti panangipasdek kadagiti simple ken kabaelantayo a ragpaten a kalat ket makatulong kadatayo a mangitungpal iti daytoy. Maysa a kabsat ti nangyarig iti bagina iti maysa nga agsapsapul iti gameng. Saan a maawanan iti namnama a makasarakto latta iti arig gameng a tao nga interesado iti kinapudno. Sabali pay a kabsat ti addaan iti kalat a kada lawas, mangbirok iti maysa nga interesado ken sarungkaranna kalpasan ti sumagmamano nga aldaw tapno parayrayenna ti interesna. Ikagkagumaan met ti dadduma nga agibumbunannag ti mangibasa iti uray maysa laeng a teksto iti bumalay agingga a posible. Ania met a kalat ti mabalin nga ikeddengmo a ragpaten?

16. Ania dagiti rason nga itultuloytayo ti mangasaba?

¹⁶ Ti balligi ti panangasabatayo iti binalaybalay ket saan laeng nga agpannuray iti panangipangag dagiti tattao iti mensahetayo. Pudno, nakapatpateg ti trabaho a panangasaba tapno maisalakan dagiti nasingpet ti panagpuspusona a tattao, ngem adda pay dadduma a napapateg a panggepna. Ti Nakristianuan a ministeriotayo ti mangipaay iti gundaway tapno maipakitatayo ti ayattayo ken Jehova. (1 Juan 5:3) Maliklikantayo ti agbalin a manungsungbat iti dara. (Ara. 20:26, 27) Mangted pay daytoy iti pakdaar kadagiti di nadiosan a tattao a ‘dimtengen ti oras ti panangukom ti Dios.’ (Apoc. 14:6, 7) Kangrunaan ti amin, babaen ti panangikasaba iti naimbag a damag, maidaydayaw ti nagan ni Jehova iti intero a daga. (Sal. 113:3) Gapuna, dumngeg man dagiti tattao wenno saan, masapul nga itultuloytayo nga ikasaba ti mensahe ti Pagarian. Wen, makaay-ayo ken Jehova ti amin a panagreggettayo a mangikasaba iti naimbag a damag.​—Roma 10:13-15.

17. Iti mabiiten, mapilitanto dagiti tattao a mangbigbig iti ania?

¹⁷ Nupay adu ita ti di mangipangag iti panangasabatayo, mabiiten nga agbaliw ti panangmatmatda iti daytoy a trabaho. (Mat. 24:37-39) Impasigurado ni Jehova kenni Ezequiel nga inton matungpal dagiti panangukom nga inwaragawagna, dagiti rebelioso nga Israelita “sigurado a maammuandanto met a ti maysa a mammadto a mismo adda iti tengngada.” (Ezeq. 2:5) Umasping iti dayta, inton iyeg ti Dios ti panangukomna iti agdama a sistema ti bambanag, mapilitanto dagiti tattao a mangbigbig a ti mensahe nga inkaskasaba dagiti Saksi ni Jehova kadagiti publiko a lugar ken iti binalaybalay ket naggapu iti maymaysa a pudno a Dios a ni Jehova, ken dagiti Saksi ti pudno a pannakabagina. Anian a pribilehiotayo nga irepresentar ti naganna ken ikasaba ti mensahena iti daytoy nakapatpateg a tiempo! Babaen ti tulongna, itultuloytayo koma a parmeken dagiti karit a maipasango kadatayo iti panangasaba iti binalaybalay.

Ania ti Sungbatyo?

• Kasanotayo a maaddaan iti tured a mangasaba?

• Ania ti makatulong kadatayo a mangirugi iti saritaan maipapan iti Biblia no mangasabatayo iti binalaybalay?

• Kasanotayo a maipakita ti napasnek a pannakaseknantayo kadagiti sabsabali?

• Ania ti makatulong kadatayo a mangtaginayon iti positibo a kababalin kadagiti tattao iti teritoriatayo?

[Kahon/​Ladawan iti panid 9]

Maysa a Pamay-an Tapno Mairugi ti Saritaan Maipapan iti Biblia

Kas panangrugi:

◼ Kalpasan a makablaawanyo ti bumalay, mabalin a mangipaimakayo iti polieto sa kunaenyo, “Simmarungkarak ita gapu ta kayatko nga iranud ti makaparegta nga impormasion mainaig iti daytoy napateg a topiko.”

◼ Wenno mangitukon iti polieto ket kunaenyo, “Simmarungkarak biit ta kayatko a maammuan ti kapanunotanyo maipapan iti daytoy a suheto.”

No ti bumalay inawatna ti polieto:

◼ Saludsodenyo a dagus no ania ti kapanunotanna maipapan iti paulo ti polieto.

◼ Umimdengkayo a naimbag, nga ikagumaanyo a tarusan no ania ti kapanunotanna. Siraragsak a pagyamananyo ti komentona.

Kas panangituloy iti saritaan:

◼ Basaen ken ilawlawagyo ti maysa wenno ad-adu pay a teksto, nga ibagayyo ti presentasionyo kadagiti paginteresan ken kasapulan ti bumalay.

◼ No interesado, paimaanyo iti literatura ken idemostrayo ti panagadal iti Biblia no ipalubos ti kasasaad. Iyurnosyo ti panagsubliyo.