Saludsod Dagiti Agbasbasa

Apay a Dagiti Saksi ni Jehova Dida Agus-usar Kadagiti Imahen iti Panagdayawda?

Iti intero a lubong, dagiti Hindu, Budista, Katoliko, ken miembro ti Orthodox Church ibilangda dagiti idolo, imahen, wenno ladawan kas napateg a paset ti panagdayawda. Iti nadumaduma a paset ti Africa, agdaydayaw dagiti umili kadagiti kinitikitan a kayo wenno bato a pagarupenda a pagnanaedan ti maysa a dios wenno espiritu ti maysa a dios.

Maigidiat iti dayta, saan nga agus-usar dagiti Saksi ni Jehova iti aniaman a kita ti idolo wenno imahen iti panagdayawda. No mapankayo kadagiti pagtataripnonganda a maaw-awagan iti Kingdom Hall, awan makitayo a ladladawan ti “sasanto” wenno rebulto ni Jesus wenno ni Maria.a Apay? Usigentayo ti kuna ti Biblia maipapan iti daytoy a banag.

Ania ti Inkalikagum ti Dios Kadagiti Israelita?

Kalpasan a winayawayaanna dagiti Israelita manipud Egipto, impaayan ida ni Jehova a Dios iti nalawag nga instruksion maipapan iti kayatna a panagdayawda kenkuana. Kastoy ti sagudayen ti maikadua iti maaw-awagan Sangapulo a Bilin: “Dika mangaramid maipaay kenka iti maysa a kinitikitan a ladawan wenno maysa a porma a kaasping ti aniaman a banag nga adda iti langlangit sadi ngato wenno adda iti daga iti baba wenno adda iti dandanum iti uneg ti daga. Dika agruknoy kadakuada wenno mauyotan nga agserbi kadakuada, agsipud ta siak ni Jehova a Diosmo maysaak a Dios a mangalkalikagum iti naipamaysa a debosion.”​—Exodo 20:4, 5.

Idi it-ited ti Dios dagita a bilin ken Moises, manarimaan met dagiti Israelita nga agar-aramid iti balitok a kigaw a baka, a nalabit tinuladda dagiti Egipcio iti panagdayawda kadagiti animal. Saanda nga inawagan ti estatua iti nagan ti didiosen ti Egipto. Imbes ketdi, inaramatda dayta iti panagdayawda ken Jehova. (Exodo 32:5, 6) Ania ti reaksion ti Dios? Gimmil-ayab ti ungetna kadagiti nagdaydayaw iti ladawan isu a dinadael ni Moises dayta.​—Exodo 32:9, 10, 19, 20.

Idi agangay, imbinsabinsa ni Jehova a Dios ti maikadua a bilin. Impalagipna kadagiti Israelita babaen ken Moises a masapul a dida mangaramid maipaay kadakuada iti “kinitikitan a ladawan, ti langa ti aniaman a simbolo, ti ladawan ti lalaki wenno babai, ti ladawan ti aniaman nga animal nga adda iti daga, ti ladawan ti aniaman a nagpayak a tumatayab nga agtayab iti langlangit, ti ladawan ti aniaman a banag nga aggargaraw iti daga, ti ladawan ti aniaman nga ikan nga adda iti dandanum iti uneg ti daga.” (Deuteronomio 4:15-18) Nalawag a di rumbeng nga agaramat dagiti Israelita kadagiti idolo, aniaman ti sukog wenno porma dagita iti panagdayawda iti Dios.

Ngem idi agangay, nagdaydayaw manen dagiti Israelita kadagiti idolo. Tapno maaturna ida, nangibaon ni Jehova kadagiti mammadto a mangipakdaar iti um-umay a pannusa gapu iti panagdayawda kadagiti idolo. (Jeremias 19:3-5; Amos 2:8) Kas maysa a nasion, linaksid ti Israel dagiti pakdaar ti Dios. Gapuna, idi 607 K.K.P., impalubos ni Jehova a dadaelen dagiti Babilonio ti Jerusalem ken kautibuenda ti nasion.​—2 Cronicas 36:20, 21; Jeremias 25:11, 12.

Ania ti Pammati Dagiti Kristiano Idi Umuna a Siglo?

Idi nagbalin a Kristiano dagiti di Judio idi umuna a siglo, insardengdan ti agusar kadagiti idolo iti panagdayawda iti Dios. Maipapan iti panangaskasaba ni Pablo, kastoy ti kinuna ni Demetrio a mammanday iti pirak nga idolo idiay Efeso: “Lallaki, pagaammoyo unay a manipud itoy a negosio addaantayo ti kinarang-ay. Kasta met, makita ken mangngegyo no kasano a saan laeng nga iti Efeso no di ket iti nganngani intero a distrito ti Asia a daytoy a Pablo nakaguyugoy iti dakkel a bunggoy ket imbaw-ingna ida iti sabali a kapanunotan, a kunkunana a saan a didios dagidiay inaramid dagiti ima.”​—Aramid 19:25, 26.

Ti sinao ni Pablo pasingkedanda ti akusasion ni Demetrio. Idi makisarsarita kadagiti Griego idiay Atenas, kinuna ni Pablo: “Rebbeng a ditay pagarupen a ti Nadibinuan a Persona umasping iti balitok wenno pirak wenno bato, nga umasping iti maysa a banag a naikitikit babaen ti arte ken panagpartuat ti tao. Pudno, ti Dios pinalabasna dagiti tiempo ti kasta a kinaignorante, ngem ita ibagbagana iti sangatauan nga isuda amin iti isuamin a disso masapul nga agbabawida.” (Aramid 17:29, 30) Nagsurat met ni Pablo kadagiti taga-Tesalonica maipapan iti dayta a banag ken kinomendaranna ida a kunkunana: “Bimmaw-ingkayo iti Dios manipud kadagiti idoloyo.”​—1 Tesalonica 1:9.

Malaksid ken Pablo, pinakdaaran met ni apostol Juan dagiti Kristiano iti panagusar kadagiti ladawan iti panagdayawda. Idi ngudo ti umuna a siglo, sititibker nga imbaga ni Juan: “Igagayo ti bagbagiyo manipud kadagiti idolo.”​—1 Juan 5:21.

Agtulnog dagiti Saksi ni Jehova iti nabatad a bilin ti Dios a dida agusar iti aniaman a kita ti imahen iti panagdayawda kenkuana. Kombinsidoda iti kinuna ni Jehova a Dios: “Siak ni Jehova. Dayta ti naganko; ket iti asinoman a sabali saanko nga ited ti bukodko a dayag, wenno ti dayawko kadagiti kinitikitan a ladawan.”​—Isaias 42:8.

[Footnote]

[Blurb iti panid 31]

“Siak ni Jehova. Dayta ti naganko; ket iti asinoman a sabali saanko nga ited ti bukodko a dayag, wenno ti dayawko kadagiti kinitikitan a ladawan.” ​—Isaias 42:8