Tiempo Itan ti Panagpili
“Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.”—Genesis 1:27.
DAGITA a pamiliar a sasao iti panglukat a kapitulo ti Biblia itampokda ti maysa kadagiti kasayaatan nga ‘inaramid ti Dios a napintas iti tiempona’—ti panangparsuana iti perpekto a pagassawaan, da Adan ken Eva. (Eclesiastes 3:11) Kas Namarsua, kinuna kadakuada ni Jehova a Dios: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.”—Genesis 1:28.
Babaen kadagita a sasao, impakaammo ti Dios ti panggepna iti umuna a pagassawaan. Masapul nga agpaaduda ken aywananda ti daga, a pagbalinenda a sangalubongan a paraiso tapno pagtaenganda ken dagiti annakda. Saan a naikeddeng a nasaksakbay no kasano kapaut ti biagda. Imbes ketdi, inkari kadakuada ti Dios ti maysa a nagsayaat a namnama. No umiso ti pilienda ken agtalinaedda a natulnog iti Dios, agbiagda nga agnanayon buyogen ti naan-anay a talna ken kinaragsak.
Di umiso ti pinilida isu a lumakay ken matay ti amin a tattao. Kinapudnona, binigbig ni patriarka a Job: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Ania ti napasamak?
“Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin,” kuna ti Biblia. (Roma 5:12) Dayta a “maysa a tao” ket ni Adan, a sipapakinakem a nanglabsing iti simple ngem nalawag a bilin ti Dios. (Genesis 2:17) Gapu iti dayta nga inaramidna, napukawna ti gundaway nga agbiag nga agnanayon iti paraiso a daga. Dayta ti makagapu a napukaw met dagiti kaputotanna ti maysa a nagpateg a tawid ket inyallatiwna kadakuada ti lunod ti basol ken ipapatay. Agparang a napukawen ti aniaman a naraniag a masanguanan. Ngem talaga kadi a kasta?
Inton Mapabaro ti Bambanag
Rinibu a tawen kalpasanna, napaltiingan ti salmista a mangisurat: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Kas pammatalged a matungpal ti inkari ti Dios idiay Eden, makapabileg nga inladawanna iti Saona no ania ti mabiiten nga aramidenna: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Kalpasanna, ti Dios a mismo kinunana: “Adtoy! Pagbalbalinek a baro ti amin a bambanag.”—Apocalipsis 21:4, 5.
Yantangay adda tiempo ti amin a bambanag, ti saludsod ket, Kaano a mapabaro ti amin a bambanag tapno matungpal dagiti agkakaimbag a kari ti Dios? Dagiti Saksi ni Jehova, a mangipabpablaak iti daytoy a magasin, ikagkagumaanda nga ipakaammo kadagiti tattao nga agbibiagtayon iti inawagan ti Biblia kas ‘maudi nga al-aldaw’ ken asidegen ti tiempo a ti Dios ‘pagbalinenna a baro ti amin a bambanag.’ (2 Timoteo 3:1) Paregtaendakayo a mangsukimat iti Biblia ken mangammo kadagiti agkakaimbag a namnama a mabalinyo a tagiragsaken. Idagadagmi met kadakayo nga awatenyo daytoy nga awis: “Birokenyo ni Jehova bayat a masarakan pay. Umawagkayo kenkuana bayat nga asideg pay.” (Isaias 55:6) Imbes nga ikeddeng ti gasat, agpannuray a mismo kadakayo no ania ti pagbanagan ti biagyo ken ti agnanayon a masakbayanyo!
[Blurb iti panid 8]
“Adtoy! Pagbalbalinek a baro ti amin a bambanag”