Lima a Rason nga Agbuteng iti Dios Imbes nga iti Tao
MARAGRAGSAKAN ti agtutubo a lalaki. Dina pulos ninamnama ti napasamak. Adda baro a naadalna iti pannakisaritana iti dua a Saksi ni Jehova. Sumagmamanon a tawen a maburburiboran no apay nga ipalpalubos ti Dios ti panagsagaba. Ngem ita, nalawag a nasungbatan dayta iti Biblia. Dina ammo a naglaon ti Biblia kadagiti nagpateg ken makatukay nga impormasion.
Sumagmamano a minuto kalpasan a pimmanaw dagiti Saksi, ti babai a makinkukua iti pagdagdagusanna dagus a simrek iti siled ket sipupungtot a dinamagna, “Siasino dagidiay a tattao?”
Gapu ta naklaat, saan a nakasungbat ti agtutubo a lalaki.
“Am-ammok ida,” imbugkaw ti babai, “no pastrekemto manen ida, mabalinmon ti pumanaw ditoy ket agbirokka iti sabali a pagkaseraam!”
Pinanalbaagna ti ridaw sa pimmanaw.
Dagiti Pudno a Pasurot ni Kristo Namnamaenda ti Ibubusor
Gagangayen ti kapadasan dayta nga agtutubo. Ilawlawag ti Sao ti Dios: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Kaaduanna a saan a nalatak dagiti pudno a Kristiano ken dida pulos nagbalin a kasta. Apay? Kinuna ni apostol Juan kadagiti padana a Kristiano: “Ammotayo a nagtaudtayo iti Dios, ngem ti intero a lubong adda iti pannakabalin daydiay nadangkes.” Nailadawan met ni Satanas a Diablo kas “leon a ngumerngernger, nga agsapsapul iti alun-onenna.” (1 Juan 5:19; 1 Pedro 5:8) Ti panagbuteng iti tao ti maysa kadagiti kaepektibuan nga igam ni Satanas.
Nalalais ken naidadanes ni Jesu-Kristo uray adu ti naaramidanna a naimbag ken awan basolna. Kinunana: “Ginuradak nga awan gapgapuna.” (Juan 15:25) Iti rabii sakbay ti ipapatayna, insaganana dagiti pasurotna babaen kadagitoy a sasao: “No guraennakayo ti lubong, ammoyo a ginuranak dayta sakbay a ginuranakayo. Laglagipenyo ti sao a kinunak kadakayo, Ti adipen saan a dakdakkel ngem iti apona. No indadanesdak, idadanesdakayto met.”—Juan 15:18, 20.
Gapu iti dayta, adu ti nagkedked a dumasig iti pudno a panagdayaw. Maipapan kadagidiay nangbirbirok ken Jesus iti maysa a gundaway, kuna ti Biblia: “Awan, siempre, ti agsao a silalatak maipapan kenkuana gapu iti panagbuteng kadagiti Judio.” (Juan 7:13; 12:42) Impangta dagiti relihioso a lider nga ilaksidda ti asinoman a mangipakita iti pammati ken Kristo. Gapuna, adu ti saan a nagbalin a Kristiano gapu iti panagbuteng iti tao.—Aramid 5:13.
Idi agangay, kalpasan a naipasdek ti Kristianidad, mabasatayo nga adda “dakkel a pannakaidadanes” a napasaran ti kongregasion idiay Jerusalem. (Aramid 8:1) Kinapudnona, dagiti Kristiano iti intero a masakupan ti Roma naipasangoda iti nakaro a pannakaidadanes. Dagiti prominente a lallaki idiay Roma kinunada ken apostol Pablo: “No maipapan itoy a sekta naammuanmi a masupsupiat iti isuamin a lugar.” (Aramid 28:22) Wen, nasaknap ti panangbusor kadagiti pudno a Kristiano.
Uray ita, us-usaren ni Satanas ti panagbuteng iti tao kas igam tapno malapdanna ti adu nga agbalin a pudno a pasurot ni Kristo. Dagiti napasnek a makipagad-adal iti Biblia kadagiti Saksi ni Jehova maipasangoda met iti ibubusor wenno pananglais, iti man eskuelaan, pagtrabahuan, sangakaarrubaan, wenno babaen kadagiti gagayyemda. Mabalin a maamakda a maikkat ti panagraem kadakuada ti sabsabali, mapukawda dagiti gagayyemda, wenno ti aniaman a material a tulong. Iti dadduma a lugar, mabalin nga agbuteng dagiti mannalon amangan no saan a tumulong dagiti kaarrubada iti panagani wenno iti panangsalaknib kadagiti dinguenda. Ngem iti laksid dagiti kasta a panagbuteng, minilion ti determinado nga agtalek iti Dios ken agbiag a maitunos iti Sao ti Dios, kas panangtulad ken Jesu-Kristo. Binendisionan ida ni Jehova gapu iti dayta.
No Apay nga Agbuteng iti Dios Imbes nga iti Tao
Idagadag kadatayo ti Biblia nga agbutengtayo iti Dios imbes nga iti tao. Kunana: “Ti panagbuteng ken Jehova isu ti punganay ti sirib.” (Salmo 111:10) Saan a pannakaaliaw daytoy a panagbuteng no di ket panagamak a makaaramid iti saan a makaay-ayo iti Daydiay gubuayan ti biagtayo. Dayta a panagbuteng ket nainaig unay iti ayat. Ngem apay a rumbeng nga agbutengtayo iti Dios imbes nga iti tao? Usigentayo ti lima a rason.
1 Ni Jehova ti Katan-okan. Nabilbileg nga amang ni Jehova ngem iti asinoman a tao. No agbutengtayo iti Dios, ipakpakitatayo nga addatayo iti dasig ti Mannakabalin-amin, nga iti imatangna “dagiti nasion kaslada maysa a tedted manipud iti timba.” (Isaias 40:15) Gapu ta mannakabalin-amin ti Dios, kabaelanna nga abaken ti “aniaman nga igam a mabukelto maibusor” kadagidiay nasungdo kenkuana. (Isaias 54:17) Ken yantangay Isu ti mangikeddeng no asino ti maikari nga umawat iti agnanayon a biag, masiribtayo no ditay ipalubos nga adda mangpasardeng kadatayo a mangammo iti maipapan iti Dios ken mangaramid iti pagayatanna.—Apocalipsis 14:6, 7.
2 Tulongan ken salaknibannatayo ti Dios. “Ti panagpigerger iti tattao isu ti mangipakat iti silo, ngem daydiay agtalek ken Jehova masalaknibanto,” kuna ti Biblia iti Proverbio 29:25. Maysa a silo ti panagbuteng iti tao gapu ta mabalin a dayta ti manglapped kadatayo a mangideklara iti pammatitayo iti Dios. Inkari ti Dios nga ispalennatayo: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”—Isaias 41:10.
3 Ipatpateg ti Dios dagidiay umadani kenkuana. Insurat ni apostol Pablo dagitoy a makatukay a sasao: “Kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno ti bambanag nga addan wenno ti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus nga Apotayo.” (Roma 8:37-39) No masursurotayo ti agtalek ken agtulnog iti Dios, matagiragsaktayo ti di agkupas nga ayat ti Sapasap a Soberano. Anian a pribilehio!
4 Apresiarentayo ti amin nga inaramid ti Dios agpaay kadatayo. Ni Jehova ti Namarsua kadatayo, daydiay namagbalin a posible ti biag. Kanayonanna, impaayna saan laeng a dagiti kangrunaan a kasapulan iti biag no di ket dagiti bambanag a mamagbalin iti biag a makaparagsak ken makapainteres. Kinapudnona, isu ti Gubuayan ti tunggal naimbag a sagut. (Santiago 1:17) Ni David, maysa a matalek a lalaki a nangapresiar iti naayat a kinamanangngaasi ti Dios, insuratna: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami . . . Nagbalinda nga ad-adu ngem iti kabaelak nga ibinsabinsa.”—Salmo 40:5.
5 Mabalin nga agbalbaliwto ti dadduma a bumusbusor kadatayo. Matulonganyo dagidiay bumusor kadakayo no itultuloyyo nga ipakita ti panagbuteng iti Dios ken panagayat kenkuana. Usigenyo dagiti kakabagian ni Jesus. Idi damo, saanda a nangipakita iti pammati kenkuana, imbes ketdi kinunada: “Napukawnan ti nakemna.” (Marcos 3:21; Juan 7:5) Ngem kalpasan ti ipapatay ken panagungar ni Jesus, adu kadakuada ti nagbalin a manamati. Dagiti kakabsat ni Jesus iti ina a da Santiago ken Judas nangisuratda pay iti paset ti Kasuratan. Ti maysa pay ket ni Saulo, ti panatiko a manangidadanes a nagbalin nga apostol Pablo. Dadduma kadagiti bumusbusor kadatayo ita ti mabalin a makaamiris nga adda kadatayo ti kinapudno manipud Biblia gapu iti natibker a determinasiontayo nga agtalinaed a matalek.—1 Timoteo 1:13.
Kas pagarigan, ni Aberash, maysa a babai idiay Africa, ikarkararagna a maammuanna koma ti kinapudno. Idi nangrugi a makipagadal iti Biblia kadagiti Saksi ni Jehova, nakaro ti panangbusor kenkuana ti pamiliada ken dagiti lider ti relihion. Nagsardeng a makipagadal iti Biblia ti dadduma kadagiti kabagianna gapu iti panagbuteng iti tao. Ngem dimmawat iti bileg ken tured manipud iti Dios ket nabautisaran kas maysa a Saksi ni Jehova. Ti resultana? Walo kadagiti kabagianna ti situtured a nagpayadal manen iti Biblia, ken rumangrang-aydan iti naespirituan.
Maparmekyo ti Panagbuteng iti Tao
Tapno maparmekyo ti panagbuteng iti tao, aramidenyo ti amin a kabaelanyo a mangparayray iti panagayatyo iti Dios. Maaramidyo dayta babaen ti panagadal iti Biblia ken panangutob kadagiti teksto a kas iti Hebreo 13:6, a nagkuna: “Ni Jehova ti katulongak; saanakto nga agbuteng. Ania ti maaramidan kaniak ti tao?” Diyo liplipatan dagiti rason no apay nga umiso ken nainsiriban ti panagbuteng iti Dios imbes nga iti tao.
Laglagipenyo met ti adu a bendision nga itden ti panangyaplikar kadagiti naadalyo iti Biblia. Mabalin a maammuanyo dagiti makapnek a sungbat kadagiti napateg a saludsod maipapan iti biag. Magun-odyo ti praktikal a sirib a tumulong kadakayo a mangsaranget kadagiti parikut iti biag. Maaddaankayo iti nagsayaat a namnama iti laksid dagiti narigat a kasasaad ita. Ken mabalinyo ti agkararag iti mannakabalin-amin a Dios iti aniaman a gundaway.
Insurat ni apostol Juan: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Itan ti tiempo nga agtalinaed a natibker ken agbiag a nabuyogan iti panagbuteng iti Dios. Imbes a tumulok iti panagbuteng iti tao, ipangagyo koma ti balakad ti Dios: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Proverbio 27:11) Anian a nagsayaat a pribilehio dayta!
Laglagipenyo a saan a maited ti tao ti kabaelan nga ited ti Dios kadagidiay agbuteng kenkuana: “Ti bunga ti kinapakumbaba ken ti panagbuteng ken Jehova ket kinabaknang ken dayag ken biag.”—Proverbio 22:4.
[Ladawan iti panid 14]
Gapu iti kinatured ni Aberash, walo kadagiti kabagianna ti agtultuloy nga agad-adal iti Biblia