‘Nairamut ken Naipasdekkayo Kadi iti Pamuon’?

NAKAKITAKAYO kadin iti dakkel a kayo nga ab-ablatan ti napigsa nga angin ngem kaskasdi a saan a matuang? No wen, nalabit a nauneg ti pannakairamutna. Mabalin nga umaspingtayo iti dayta a kayo. Uray umab-ablat dagiti arig bagyo a pakasuotan, makapagibturtayo no agtalinaedtayo a ‘nairamut ken naipasdek iti pamuon.’ (Efe. 3:14-17) Ania dayta a pamuon?

Kuna ti Sao ti Dios a “ni Kristo Jesus a mismo ti pamuon a bato a pasuli” ti kongregasion Kristiano. (Efe. 2:20; 1 Cor. 3:11) Kas Kristiano, maiparparegta kadatayo nga ‘agtultuloytayo a magna a naikaykaysa kenkuana, a naparamut ken maibangbangon kenkuana ken mapatpatibker iti pammati.’ No aramidentayo dayta, madaerantayo ti amin a pannubok iti pammatitayo​—a pakairamanan dagiti “makaguyugoy nga argumento” a naibatay iti “ubbaw a panangallilaw” dagiti tattao.​—Col. 2:4-8.

“Ti Kaakaba ken Kaatiddog ken Kangato”

Ngem kasano nga agbalintayo a “naparamut” ken “mapatpatibker iti pammati”? Ti maysa a napateg a pamay-an tapno umuneg ti pannakairamuttayo ket babaen ti naanep a panagadal iti naipaltiing a Sao ti Dios. Kayat ni Jehova a ‘maawatantayo no ania ti kaakaba ken kaatiddog ken kangato ken kauneg’ ti kinapudno. (Efe. 3:18) Gapuna, awan koma ti Kristiano a mapnek iti narabaw a pannakaawatna, a kontento lattan a makaammo “kadagiti pamunganayan a banag” iti Sao ti Dios. (Heb. 5:12; 6:1) Imbes ketdi, tunggal maysa kadatayo ti masapul a magagaran a mangpauneg iti pannakaawatna kadagiti kinapudno iti Biblia.​—Prov. 2:1-5.

Siempre, dina kayat a sawen nga umdasen ti adu a pannakaammo tapno ‘maparamut ken maipasdektayo’ iti kinapudno. Saan kadi nga ammo met ni Satanas dagiti linaon ti Biblia? Ngarud, adda sabali pay a kasapulan. Nasken a ‘maammuantayo ti ayat ti Kristo a manglab-aw iti pannakaammo.’ (Efe. 3:19) Kaskasdi, no itultuloytayo ti gumun-od iti umiso a pannakaammo iti Sao ti Dios gapu iti panagayattayo ken ni Jehova ken iti kinapudno, bumileg ti pammatitayo.​—Col. 2:2.

Subokem ti Pannakaawatmo

Apay a dimo suboken ita ti pannakaawatmo iti sumagmamano nga agkakapateg a kinapudno iti Biblia? No aramidem dayta, mabalin a maparegtaka nga agbalin nga ad-adda a naanep nga agadal a personal iti Biblia. Kas pagarigan, basaem dagiti panglukat a bersikulo ti surat ni apostol Pablo kadagiti taga-Efeso. (Kitaem ti kahon a “Kadagiti Taga-Efeso.”) Kalpasan a mabasam, isaludsodmo, ‘Naawatak kadi ti kaipapanan dagiti nayitaliko a paset ti teksto a masarakan iti kahon?’ Saggaysaentayo nga usigen dagita.

Natudingan “Sakbay ti Pannakabangon ti Lubong”

Insurat ni Pablo kadagiti pada a manamati: “[Ti Dios] intudingnatayo a nasakbay iti pannakaampon kas annak maipaay kenkuana babaen ken Jesu-Kristo.” Kinapudnona, panggep ni Jehova ti mangampon iti sumagmamano a tattao nga agbalin a paset ti perpekto a nailangitan a pamiliana. Makipagturayto dagitoy ken Kristo kas ar-ari ken papadi. (Roma 8:19-23; Apoc. 5:9, 10) Idi damo a kinarit ni Satanas ti kinasoberano ni Jehova, imparipiripna nga adda pagkurangan dagiti tattao a pinarsua ti Dios. Ngarud, anian a maitutop ti panangpili ni Jehova kadagiti tattao a maaddaanto iti paset iti panangikkat iti amin a kinadakes iti uniberso, agraman ti gubuayan ti kinadakes a ni Satanas a Diablo! Nupay kasta, saan nga inkeddeng a nasaksakbay ni Jehova no siasino dagiti indibidual nga amponenna kas annak. Imbes ketdi, inkeddengna nga adda grupo, wenno klase, dagiti tattao a makipagturay ken Kristo idiay langit.​—Apoc. 14:3, 4.

Ania a “lubong” ti tuktukoyen ni Pablo idi insuratna kadagiti pada a Kristiano nga isuda, kas grupo, ket napili “sakbay ti pannakabangon ti lubong”? Saanna a tuktukoyen ti tiempo sakbay a pinarsua ti Dios ti daga wenno dagiti tattao. Kasano koma a manungsungbat da Adan ken Eva iti tignayda no nasaksakbay nga inkeddeng ti Dios nga agbasolda sakbay pay a naparsuada? Saan a maitunos dayta iti prinsipio ti kinahustisia. Kaano ngarud nga inkeddeng ti Dios no kasanona a risuten ti parikut a timmaud idi dimmasig da Adan ken Eva ken ni Satanas iti iyaalsana maibusor iti kinasoberano ti Dios? Inaramid laeng dayta ni Jehova kalpasan a nagrebelde dagiti immuna a nagannaktayo ngem sakbay a nagbalin nga imperpekto ti posible a masubbot a sangatauan.

“Maitunos iti Kinabaknang ti Di Kaikarian a Kinamanangngaasina”

Apay nga imbaga ni Pablo a dagiti urnos a nadakamat kadagiti panglukat a bersikulo ti Efeso ket naaramid gapu iti ‘kinabaknang ti di kaikarian a kinamanangngaasi’ ti Dios? Dinakamatna dayta tapno ipaganetgetna a saan nga obligado ni Jehova a mangsubbot iti nagbasol a sangatauan.

Awan kadatayo ti makategged iti bukodna a pannakaisalakan. Ngem gapu iti nasged a panagayat ni Jehova kadagiti tattao, nangaramid iti naisangsangayan nga urnos tapno maispalnatayo. Gapu ta imperpekto ken managbasoltayo, pudno ti kinuna ni Pablo a ti pannakaisalakantayo ket maigapu iti di kaikarian a kinamanangngaasi.

Ti Sagrado a Palimed ti Panggep ti Dios

Idi damo, saan nga impalgak ti Dios no kasanona a risuten ti parikut a pinataud ni Satanas. Maysa dayta a “sagrado a palimed.” (Efe. 3:4, 5) Ngem idi naipasdek ti kongregasion Kristiano, impalgak ni Jehova dagiti detalye no kasano nga itungpalna ti orihinal a panggepna agpaay iti sangatauan ken iti daga. “Iti naan-anay a pagpatinggaan dagiti naituding a tiempo,” kuna ni Pablo, nangipasdek ti Dios iti “maysa a panangaywan,” maysa a sistema a mangimaton kadagiti bambanag a mamagkaykaysa iti amin a nasaririt a parsua.

Ti umuna a paset dayta a panagkaykaysa ket nangrugi idi Pentecostes 33 K.P., idi rinugian nga urnongen ni Jehova dagidiay makipagturay ken Kristo idiay langit. (Ara. 1:13-15; 2:1-4) Ti maikadua a pasetna ket ti pannakaurnong dagidiay agbiag nga agnanayon iti paraiso a daga iti sidong ti Mesianiko a Pagarian ni Kristo. (Apoc. 7:14-17; 21:1-5) Ti termino a “panangaywan” dina tuktukoyen ti Mesianiko a Pagarian, yantangay idi laeng 1914 a naipasdek dayta. Imbes ketdi, tuktukoyenna ti panangimaton ti Dios kadagiti bambanag tapno maitungpal ti panggepna a pagkaykaysaenna ti uniberso.

“Agbalinkayo a Nataenganen Kadagiti Pannakabalin ti Pannakaawat”

Awan duadua a dagiti nasayaat nga ugali ti panagadal tulongannaka a mangtarus a naan-anay iti “kaakaba ken kaatiddog ken kangato” ti kinapudno. Ngem saan met a pagsidaawan a nalaka a pakapuyen wenno dadaelen ni Satanas dagita a nasayaat nga ugali no nairuamka nga agdardaras a mangiringpas kadagiti bambanag. Dimo ipalubos a maaramidna dayta kenka. Usarem ti abilidadmo nga agpanunot nga inted kenka ti Dios tapno ‘agbalinka a nataengan kadagiti pannakabalin ti pannakaawat.’ (1 Juan 5:20; 1 Cor. 14:20) Siguraduem a kombinsidoka iti patpatiem ken kanayon a ‘mairasonam ti namnama nga adda kenka.’​—1 Ped. 3:15.

Iladawanmo nga addaka idiay Efeso idi damo a naibasa ti surat ni Pablo. Saanka ngata a matignay nga agtarigagay a rumang-ay iti “umiso a pannakaammo iti Anak ti Dios”? (Efe. 4:13, 14) Sigurado dayta! Gapuna, kasta met koma ti epektona kenka dagiti naipaltiing a sasao ni Pablo. Ti nasged a panagayat ken ni Jehova ken ti umiso a pannakaammo iti Saona tulongannaka nga agtalinaed a sititibker a ‘nairamut ken naipasdek iti pamuon,’ ni Kristo. Iti kasta, maibturam ti aniaman nga arig bagyo a pakasuotan a patauden ni Satanas maibusor kenka sakbay a dumteng ti naan-anay a panungpalan daytoy dakes a lubong.​—Sal. 1:1-3; Jer. 17:7, 8.

[Kahon/Ladawan iti panid 27]

“Kadagiti Taga-Efeso”

“Bendito koma ti Dios ken Ama ni Apotayo a Jesu-Kristo, ta binendisionannatayo iti tunggal naespirituan a bendision kadagiti nailangitan a disso a maikaykaysa ken Kristo, a kas iti panangpilina kadatayo a maikaykaysa kenkuana sakbay ti pannakabangon ti lubong, tapno iti sanguananna agbalintayo koma a nasantuan ken awan pakapilawanna iti ayat. Ta intudingnatayo a nasakbay iti pannakaampon kas annak maipaay kenkuana babaen ken Jesu-Kristo, maitunos iti pakaragsakan unay ti pagayatanna, a pakaidayawan ti nadayag a di kaikarian a kinamanangngaasina a siaasi nga impaayna kadatayo babaen ti ay-ayatenna. Babaen kenkuana addaantayo iti pannakaluk-at babaen ti subbot baeten iti dara dayta, wen, ti pannakapakawan dagiti labsingtayo, maitunos iti kinabaknang ti di kaikarian a kinamanangngaasina. Pinaaduna daytoy a maipaay kadatayo iti isuamin a sirib ken nasayaat a panagpampanunot, iti panangipakaammona kadatayo ti sagrado a palimed ti pagayatanna. Maitunos dayta iti pakaragsakanna unay a pinanggepna a mismo maipaay iti maysa a panangaywan agingga iti naan-anay a pagpatinggaan dagiti naituding a tiempo, awan sabali, tapno ummongen a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.”​—Efe. 1:3-10.