Talaga a Maseknan ti Dios​—No Apay a Patientayo

RINIBU a tawenen nga isalsaludsod dagiti tattao: No ay-ayatennatayo ti Dios, apay a kasta unay ti panagsagaba? Nakapatpateg dayta a saludsod, nupay nabayagen. Nalabit umanamongka a no ipatpategmo ti maysa a tao, saanmo a kayat nga agsagaba ken ikagumaam la ketdi a tulongan no adda parikutna. Gapuna, marikna ti adu a tattao a mabalin a saan a maseknan ti Dios kadatayo gapu ta nakaro ti panagsagaba iti lubong. Ngarud, napateg nga usigentayo nga umuna ti pammaneknek a talaga nga ipatpategnatayo ti Dios ken maseknan kadatayo.

Paneknekan ti Sangaparsuaan a Naayat ti Dios

Ni Jehova a Dios “Daydiay nangaramid ti langit ken daga ken ti baybay ken amin a bambanag nga adda kadakuada.” (Aramid 4:24) No utobentayo dagiti pinarsua ni Jehova, maibagatayo la ketdi a maseknan kadatayo. Kas pagarigan, panunotem dagiti banag a pakaay-ayuan ken pakaragsakam. Kayatmo kadi ti naimas a taraon? Uray no maysa laeng a kita ti taraon ti impaay ni Jehova kadatayo, agbiagtayo latta. Ngem nagadu nga agkakaimas a taraon ti pinataudna. Kasta met, inarkosan ni Jehova ti daga kadagiti adu a nagduduma a kayo, sabong, ken agkakapintas a buya tapno agbalin a naragsak ken makapainteres ti biag.

Usigem met ti pannakaparsuatayo. Saan a kasapulan iti panangtaginayon iti biag ti abilidadtayo nga agpakatawa, mangtagiragsak iti musika, ken mangipateg iti kinapintas, ngem insagut amin dagita ti Dios tapno agbalin a naragsak ti biagtayo. Panunotem met ti relasionmo iti sabsabali. Siasino koma kadatayo ti saan a mangtagiragsak iti nasinged a pannakikadua dagiti nasayaat a gagayyem wenno ti panangabrasa ti maysa nga ipatpategtayo? Agasem, maysa a sagut ti managayat a Dios ti abilidadtayo nga agayat! Yantangay inikkan ti Dios dagiti tattao iti abilidad nga agayat, paset la ketdi ti personalidad ti Dios dayta a galad.

Ipanamnama ti Biblia nga Ay-ayatennatayo ti Dios

Ibaga kadatayo ti Biblia a ti Dios ket ayat. (1 Juan 4:8) Malaksid a naiparangarang ti ayat ti Dios iti sangaparsuaan, naibatad pay dayta iti Biblia a Saona. Kas pagarigan, mangipaay ti Biblia kadagiti pagannurotan para iti nasayaat a salun-at, mangiparegta iti kinatimbeng iti isuamin a banag, ken mangpakdaar maibusor iti panagbartek ken kinabuklis.​—1 Corinto 6:9, 10.

Mangipaay pay ti Biblia kadagiti nainsiriban a balakad maipapan iti pannakilangen, nga idagadagna nga agiinnayattayo ken tratuentayo ti sabsabali buyogen ti panagraem, dignidad, ken asi. (Mateo 7:12) Kondenarenna dagiti aramid ken kababalin a mangituggod iti panagsagaba​—agum, panangidanondanon, apal, pannakikamalala, ken pammapatay. No agbiag ti isuamin maitunos iti nasayaat a balakad ti Biblia, sigurado a basbassit ti panagsagaba iti intero a lubong.

Ngem ti kadakkelan nga ebkas ti ayat ti Dios isu ti panangtedna ken Jesus nga Anakna tapno masubbot ti sangatauan. Kuna ti Juan 3:16: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” Gapuna, nakaaramiden ni Jehova iti pamay-an tapno permanente nga agpatingga ti ipapatay ken ti amin a kita ti panagsagaba.​—1 Juan 3:8.

Nalawag nga aduantayo iti pammaneknek nga ay-ayatennatayo ni Jehova. No kasta, saan a kayat ti Dios nga agsagabatayo. Agtignayto tapno pagpatinggaenna ti panagsagaba. Masiguradotayo dayta yantangay dakamaten kadatayo ti Biblia no kasano a pagpatinggaenna ti panagsagaba.

[Ladawan iti panid 4]

Maysa a sagut ti managayat a Dios ti abilidad nga agayat