Ti Biblia Balbaliwanna ti Biag

ANIA ti nangtignay iti maysa a Rastafarian tapno ipapukisna ti nasallapid a buokna ken mangidian iti panangidumdumana kadagiti puraw a tattao? Ken ania ti nanggutugot iti naranggas nga agtutubo a lalaki nga agkolkolekta iti kuarta kadagiti aglaklako iti droga tapno balbaliwanna ti biagna? Usigem ti salaysayda.

“Naisardengko Metten ti Panangidumduma.”​—HAFENI NGHAMA

EDAD: 34

NAKAYANAKANNA: ZAMBIA

PAKASARITAANNA: RASTAFARIAN

TI NAPALABASKO: Naipasngayak iti maysa a kampo a pagkamangan idiay Zambia. Nagtalaw ni Nanang idiay Namibia bayat ti gubat ket nakitimpuyog iti South West Africa People’s Organization (SWAPO). Makilablaban daytoy nga organisasion maibusor iti rehimen ti South Africa a nangituray idi iti Namibia.

Nagnaedak iti sumagmamano a kampo a pagkamangan bayat ti umuna a 15 a tawen iti biagko. Dagiti agtutubo kadagiti kampo ti SWAPO masanayda a mangidaulo iti pannakawayawaya. Masursuruanda iti politika ken maisuroda a manggura kadagiti puraw a tattao.

Idi agtawenakon iti 11, kayatko ti agbalin a kameng iti maysa a relihion nga adda iti kampo a sadiay nga aglalaok ti Romano Katoliko, Luterano, Anglicano, ken dadduma pay. Ngem inupaynak ti pastor a kinasaritak. Sipud idin nagbalinakon nga ateista. Ngem idi agtawenakon iti 15, gapu ta pagay-ayatko ti musika a reggae ken tarigagayak a pagpatinggaen ti pannakairurumen dagiti nangisit nga Africano, nakikapponak iti organisasion dagiti Rastafarian. Pinaatiddogko ti buokko, nagsigarilioak iti marihuana, insardengko ti pannangan iti karne, ken intandudok ti pannakawayawaya dagiti nangisit. Nupay kasta diak binalbaliwan ti imoral a panagbiagko wenno insardeng ti nagbuya kadagiti naranggas a pelikula. Intultuloyko pay ti nagsao iti dakes.

NO KASANO A BINALBALIWAN TI BIBLIA TI BIAGKO: Idi 1995, idi agarup agtawenak iti 20, pinampanunotko a naimbag ti pagbanagan ti biagko. Ad-adalek amin dagiti masarakak a publikasion dagiti Rastafarian. Dadduma kadagitoy ti nangtukoy iti Biblia, ngem awan ti kababagasna dagiti nabasak. Isu nga inkeddengko a basaen a mismo ti Biblia.

Idi agangay, adda libro nga impablaak dagiti Saksi ni Jehova nga inted ti maysa a gayyemko a Rastafarian. Inadalko a bukodko daytoy a publikasion agraman ti Biblia. Kalpasanna, naam-ammok dagiti Saksi ni Jehova ket intultuloyko ti nakipagadal kadakuada.

Inkagumaak nga insardeng ti agsigarilio ken ti nalabes a panaginum. (2 Corinto 7:1) Pinasayaatko ti langak, nagpapukisak, insardengko ti nagbuya iti pornograpia ken iti naranggas a pelikula, ken inkagumaak ti saan nga agsao iti dakes. (Efeso 5:3, 4) Idi agangay, naisardengko metten ti panangidumdumak kadagiti puraw a tattao. (Aramid 10:34, 35) Karaman kadagitoy a panagbalbaliwko ti saankon a panagdengngeg iti musika a mangitantandudo iti panangidumduma iti puli ken ti saankon a pannakitimpuyog kadagiti dati a gagayyemko a mabalin a mangimpluensia kaniak nga agsubli iti dati a panagbiagko.

Kalpasanna, sinapulko ti Kingdom Hall dagiti Saksi ni Jehova ket kiniddawko nga agbalinak a kameng ti relihionda. Inyadalandak iti Biblia. Idi inkeddengko ti agpabautisar kas Saksi ni Jehova, saan a naragsakan ti pamiliak. Imbaga ni nanangko nga agpiliak iti uray ania a “Kristiano” a relihion, saan la ket a dagiti Saksi ni Jehova. Gapu iti determinasionko a makitimpuyog kadagiti Saksi, kanayon a babalawennak ti ulitegko a nangato ti saadna iti gobierno.

Nupay kasta, gapu ta naadalko no kasano a trinato ni Jesus dagiti tattao ken inyaplikarko ti balakadna, natulonganak a mangdaer iti ibubusor ken pananglais. Idi indiligko ti isursuro dagiti Saksi iti kunaen ti Biblia, kombinsidoak a nasarakak ti pudno a relihion. Kas pagarigan, mangaskasaba dagiti Saksi kas imbilin ti Biblia. (Mateo 28:19, 20; Aramid 15:14) Saanda met a makipaspaset iti politika.​—Salmo 146:3, 4; Juan 15:17, 18.

NO KASANO A NAGUNGGONAANAK: Epektibo a nakatulong kaniak ti panagsursurok nga agbiag maitunos kadagiti pagalagadan ti Biblia. Kas pagarigan, idi insardengko ti agusar iti marijuana, naksayan iti ginasut a doliar ti paggastuak iti kada bulan. Saanakon nga agam-ammangaw, ken simmayaat ti mental ken pisikal a salun-atko.

Ti biagko addaanen iti direksion ken panggep nga inar-arapaapko sipud pay idi agtutuboak. Kapatgan iti amin, mariknak itan a nasingedak iti Dios.​—Santiago 4:8.

“Nasursurok a Medmedan ti Pungtotko.”​—MARTINO PEDRETTI

EDAD: 43

NAKAYANAKANNA: AUSTRALIA

PAKASARITAANNA: AGLAKLAKO ITI DROGA

TI NAPALABASKO: Agkaraakar ti pamiliami idi ubingak. Nagnaedak kadagiti babassit nga ili, iti dakkel a siudad, ken iti away a pakaay-aywanan dagiti katutubo. Adda dagiti diak malipatan a nagsayaat a kapadasak a kaduak dagiti kasinsin ken ulitegko​—panagkalap, panaganup, panagkitikit, ken panagaramid kadagiti boomerang.

Boksingero ni tatangko ket sinuruannak a makiboksing idi agtutuboak. Nagbalinak a naranggas. Idi tin-edyerak, nagbalin nga ayuyangko dagiti pagiinuman. Kaduak dagiti gagayyemko nga agsapul iti gulo. Kutsilio ken pang-or ti baseball ti armasmi a makiranget iti 20 wenno nasursurok pay a tattao.

Ti pagsapulak ket aglako iti droga ken kadagiti banag a tinakaw dagiti trabahador iti sangladan. Inusardak met a parasingir dagiti aglaklako iti droga ket agusarak iti paltog tapno diak marigatan nga agsingir. Kalatko ti agbalin a berdugo. Ti prinsipiok ket, Mangpapatay wenno mapapatay.

NO KASANO A BINALBALIWAN TI BIBLIA TI BIAGKO: Nangnangngegkon ti maipapan kadagiti Saksi ni Jehova idi agtutuboak. Idi agtawenak iti nasurok laeng a 20, sinaludsodko ken nanangko no ammona ti ayan ti siasinoman a Saksi. Dua nga aldaw kalpasanna, maysa a Saksi nga agnagan Dixon ti nagtuktok iti ridawko. Kalpasan ti panagsaritami, inawisnak a tumabuno kadagiti gimong dagiti Saksi ni Jehova. Rinugiak ti tumabuno ket nasurok 20 a tawen itan a makigimgimongak. Awan ti saludsodko a saan a nasungbatan dagiti Saksi babaen ti panangusarda iti Biblia.

Naragsakanak a nakaammo nga interesado ni Jehova kadagiti indibidual, uray kadagiti dakes ti panagbiagda. (2 Pedro 3:9) Naammuak a ni Jehova ket maysa a naayat nga Ama a mangaywan kaniak, uray no awan ti sabali a mangaramid iti dayta. Naliwliwaak met a nakaammo a pakawanennak kadagiti basolko no agbalbaliwak. Dakkel ti epektona kaniak dagiti bersikulo ti Biblia iti Efeso 4:22-24. Dayta ti nangparegta kaniak a ‘mangiwaksi iti daan a personalidad’ ken ‘mangikawes iti baro a personalidad a naparsua maitunos iti pagayatan ti Dios.’

Saan a kas karina a nakapagbalbaliwak. Nabaelak ti saan nga agdroga iti makalawas, ngem tumulokak nga agdroga no kaduak dagiti “gagayyemko” iti ngudo ti lawas. Naamirisko a masapul nga adaywak ida tapno madalusak ti biagko, isu nga inkeddengko ti agnaed iti sabali a probinsia. Intukon ti dadduma a barkadak a kaduaandak iti panagbiahek, ket immannugotak. Bayat ti biahe, nangrugida nga agsusop iti marijuana ket intukonda ti dadduma kaniak. Imbagak kadakuada nga isardengkon dayta a bisio, ket nagsisinakami iti pagbeddengan ti probinsia. Naammuak idi agangay a di nagbayag kalpasan ti panagsisinami, nagtagiarmas dagiti barkadak sada tinakawan ti maysa a bangko.

NO KASANO A NAGUNGGONAANAK: Apaman a naisardengko ti pannakitimpuyogko kadagita a barkadak, nadlawko a nalaka laengen a balbaliwak ti panagbiagko. Idi 1989, nabautisaranak kas Saksi. Kalpasan ti pannakabautisarko, nagserbi met ken Jehova ti adingko a babai, ni nanangko, ken ni tatangko.

Addan 17 a tawen sipud nakiasawaak ket naaddaankami iti tallo a nakaay-ayat nga annak. Nasursurok a medmedan ti pungtotko, uray no adda ti makagapu. Kasta met, nasursurok nga ayaten dagiti tattao aniaman ti tribu, puli, wenno lenguaheda. (Apocalipsis 7:9) Mariknak a pudno kaniak dagitoy a sasao ni Jesus: “No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.”​—Juan 8:31, 32.

[Blurb iti panid 19]

Karaman iti panagbalbaliwko ti saankon a panagdengngeg iti musika a mangitantandudo iti panangidumduma iti puli

[Blurb iti panid 20]

Kaduak dagiti gagayyemko nga agsapul iti gulo. Kutsilio ken pang-or ti baseball ti armasmi a makiranget iti 20 wenno nasursurok pay a tattao