Ti Biblia Balbaliwanna ti Biag Dagiti Tattao
Apay a ti maysa a babai a napukawen ti panagtalekna iti relihion ket us-usarenna itan ti adu a tiempona a tumulong iti sabsabali tapno maammuanda ti maipapan iti Dios? Ania ti nangtignay iti maysa a lalaki nga agbalin a managayat iti talna idinto ta dati a pagay-ayatna ti naranggas nga isport? Kasano a nakapagbalbaliw ti lalaki nga adikto iti droga, mangnginum, ken mannakiranget iti lansangan? Basaem ti salaysayda.
PERSONAL NGA IMPORMASION
NAGAN: PENELOPE TOPLICESCU
EDAD: 40
NAKAYANAKANNA: AUSTRALIA
PAKASARITAANNA: NADISMAYA ITI RELIHION
TI NAPALABASKO: Nayanakak iti Sydney, Australia, ngem immakar ti pamiliami idiay New Guinea (Papua New Guinea itan) idi dua laeng ti tawenko. Agarup dua a tawen a nagindegkami idiay Rabaul ken walo a tawen idiay Bougainville. Kadagidi a tiempo, awan pay ti TV iti New Guinea, isu a dimmakkelkami ken adingko nga iti ruar ti pagay-ayamanmi—aglangoy, agbatok, ken agkamping.
Idi agsangapulo ti tawenkon, naginteresak iti relihion. Gapu ta Katoliko ni nanangko, insingasingna nga atendarak dagiti panagadal iti Biblia nga idadauluan ti maysa kadagiti madre iti lugarmi. Nabuniaganak kas Katoliko idi 10 ti tawenko.
Nupay kasta, idi nagsublikami ditoy Australia ken agtin-edyerakon, nagduaduaakon dagiti insuro kaniak ti relihionko. Idi haiskulak, naadalko ti nagkauna a historia. Masansan a mabayag a pagsarsaritaanmi ken tatangko ti imbilangmi a sarsarita laeng a linaon ti Biblia ken no kasano ti panangrugi dagiti relihion. Idi agangay, diak kayaten ti agtultuloy a Katoliko.
Nagsina dagiti nagannakko idi 16 ti tawenko. Narigatan ni nanangko isu nga idi agangay, nakipagyanak kada tatangko ken ti kabbalayna. Nabati ni adingko iti poder ni Nanang sada immakar iti sabali a paset ti Australia. Nakalidlidayak kadagidi a panawen. Dua a tawen ti limmabas sakbay a naipaspasigko manen ti riknak ken nanangko. Rinugiak ti agbartek, agdroga, ken maki-party. Insardengko ti nageskuela ket nagtrabahoak ngem sinayangko ti biagko gapu iti imoral nga ar-aramidko idi agedadak iti 20 ken iti sumagmamano a tawen kalpasanna.
Idi agtawenakon iti 25, napampanunotko manen ti Biblia. Nangrugiak iti baro a trabahok ket naam-ammok sadiay ni Liene, ti nasingpet a babai a kanayon a nadayaw iti amona uray no nagubsang kenkuana. Idi dinamagko no apay a nadayaw latta ti pannakisaritana iti amona, inlawlawagna a makipagad-adal ngamin iti Biblia kadagiti Saksi ni Jehova ken ikagkagumaannan nga iyaplikar dagiti prinsipio ti Biblia. Imbaga ni Liene nga iyadalannak iti Biblia. Gapu ta diak naawatan ti kayatna a sawen, impagarupko a mabalinko a masursuro ti amin nga ammona iti Biblia iti uneg laeng ti maysa nga oras. Iti dayta a rabii, tallo nga oras a sinungsungbatan ni Liene dagiti saludsodko maipapan iti Biblia. Nasdaawak ta amin a sungbatna ket naibatay iti Biblia.
Malaglagipko pay nga idi agmanmanehoak nga agawid iti dayta a rabii kalpasan ti panagsarsaritami ken Liene, kasuronko ti Dios ta dina man la impakaammo kaniak a nasapsapa ti kinapudno maipapan kenkuana. Ammok a dagiti Saksi ket nadalus ti moral a panagbiagda isu nga impapanko a naladawen a makapagbalbaliwak pay. Diak idi matukod a panunoten a mapanak met mangasaba iti binalaybalay a kas kadakuada. Intultuloyko ti nakipagadal kadagiti Saksi ngem ti panggepko ket agsapul iti di umiso a sursuroda tapno nadalus ti konsiensiak a mangisardeng iti pannakipagadalko kadakuada. Naamirisko met laeng idi agangay nga awan ti masarakak a biddut iti sursuroda.
NO KASANO A BINALBALIWAN TI BIBLIA TI BIAGKO: Bayat nga umad-adu ti maad-adalko a moral a pagalagadan ti Biblia, kumarkaro met ti panangsidir kaniak ti konsiensiak. Tapno makissayan ti pannakakonsiensiak, insardengko ti agdroga. Ngem idi immakarak iti sabali a pagilian, nasumokko manen ti aginum ken maki-party. Kasla kada ikagumaak ti agbiag a maitunos kadagiti prinsipio ti Biblia, masublianak met ti dati a kabibiagko. Impeksak ti bainko ken Jehova babaen iti kararag, ngem nadagsen latta ti riknak.
Natulonganak idi naammuak ti naasi a panangtrato ni Jehova kada Ari David ken Bat-seba. Situtured nga inaklon ni David ti basolna idi nabalakadan, ken dina inkalintegan dagiti inaramidna. Sipapakumbaba pay nga inawatna ti disiplina kenkuana. (2 Samuel 12:1-13) Tunggal agkamaliak, lagipek dayta a salaysay tapno nalaklakak nga ibaga ken Jehova ti panagbabawik. Kasta met nga inkeddengko ti agkararag sakbay a masulisogak imbes a kalpasanna. Dakkel ti naitulong dayta iti panagbalbaliwko.
NO KASANO A NAGUNGGONAANAK: Datin a managpungpungtotak. Ngem impaamiris kaniak ti teksto ti Biblia iti Efeso 4:29-31 a nasken a liklikak ti “kinapait ken unget ken pungtot.” No makontrolko ti panagpungtotko, mamedmedak met ti dilak. Nakatulong met kaniak ti balakad ni Jesus a “ti koma latta saoyo a Wen kaipapananna ti Wen” tapno agbalinak a natibtibker kadagiti panagdesisionko.—Mateo 5:37.
Ni nanangko, nga idi damo ket bumusbusor iti pannakitimpuyogko kadagiti Saksi, kinunana idi agangay nga ipagpannakkelnakon. Kastoy pay ketdi ti imbagana, “Ammok a ti katataom itan ket saan a gapu iti pannakapadakkelmo no di ket gapu kadagiti nasursurom maipapan ken Jehova.” Naragsakanak unay a nakangngeg iti dayta.
Panagriknak ket makapnek ken addan kaipapanan ti biagko. Iti napalabas a siam a tawen, dakami ken lakayko ket amin-tiempo a mangisursuron iti Biblia. Wen, mangaskasabaakon iti binalaybalay, ken mariknak a daytoy ti kasayaatan kadagiti amin a trabaho a naaramidak.
PERSONAL NGA IMPORMASION
NAGAN: DENIS BUSIGIN
EDAD: 30
NAKAYANAKANNA: RUSSIA
PAKASARITAANNA: KARATISTA
TI NAPALABASKO: Naipasngayak iti siudad ti Perm’ ngem dimmakkelak iti Furmanov, ti siudad nga agarup 40,000 ti umilina iti rehion ti Ivanovo, Russia. Nangayed a siudad ti Furmanov ken aduan iti nagpipintas a kayo a dumuyaw ken lumabaga dagiti bulongda no dumteng ti otonio. Bayat dagiti dekada ti 1980 ken 1990, kimmaro dagiti mapaspasamak a krimen iti siudad. Nanumo ti biag ti pamiliami. Siak ken dagiti nagannakko ken ti adingko a lalaki ket agnanaed iti apartment a maysa ti kuartona isu a nakail-ilet.
Idi pito ti tawenko, rinugiak ti nagadal iti karate. Kaay-ayok ken impangpangrunak dayta nga isport. Addaak a kanayon iti gym tunggal nawayaak isu a bin-ig nga umaayam dagiti gagayyemko. Nagun-odko ti red belt idi agtawenak iti 15 sa nagun-odko met ti brown belt idi agtawenak iti 16. Karamanak iti grupo dagiti karatista a nakisalisal iti pasalip dagiti kampeon iti Russia ken Eurasia. Kasla naraniag ti masakbayak, ngem nagbalbaliw dagiti kasasaad idi agtawenak iti 17.
Naarestoak ken ti dadduma a gagayyemko gapu ta nakaaramidkami iti krimen. Nasentensiaanak a maibalud iti dua a tawen. Nagrigat ti kasasaad ti maysa a balud, ngem iti pagbaludan ti damo a nakakitaak iti Biblia. Binasak ti Genesis, Salmo, ken ti Baro a Tulag. Inkabesak pay ketdi ti Amami ken rinabii nga ilualok dayta sakbay a maturogak ta impapanko a makatulong met kaniak uray kaskasano.
Nawayawayaanak idi 2000, ngem awan ti direksion ken panggep ti biagko isu a rinugiak ti agdroga. Iti daytoy a tiempo a natay ni nanangko. Nagrigatko nga inliwliwag dayta ta isu ti kapatgan iti biagko. Ngem naisardengko ti panagdrogak ken intultuloyko manen ti kinakaratistak. Immakarak met idiay siudad ti Ivanovo. Sadiay a nakasarakak iti trabahok iti maysa a groseria. Ti babai a katulongan ti manedyer dayta a groseria ket maysa kadagiti Saksi ni Jehova. Inlawlawagna kaniak ti sumagmamano a simple a kinapudno iti Biblia ken nakisarita iti maysa a Saksi a lalaki a regular a mangyadal kaniak iti Biblia.
NO KASANO A BINALBALIWAN TI BIBLIA TI BIAGKO: Bayat ti panagad-adalko iti Biblia, natukay unay ti riknak idi naammuak a panggep ti Dios a pagbalinen a paraiso ti daga, isu a kayatko nga aramiden ti aniaman a makalikaguman tapno agbiagakto iti dayta. Naamirisko met nga adda dagiti nangato a pagalagadan ni Jehova a Dios a kayatna nga annuroten ti tattao. Masansan idi a ti bagik laeng ti pampanunotek. Ngem naadalko a tarigagayan ni Jehova nga ikabilangak met ti sabsabali ken patanorek dagiti galad nga awan pay idi kaniak kas iti kinamanangngaasi ken panagayat iti talna.
Bayat nga inut-utobko ti maipapan iti amin nga inaramid ni Jehova para kaniak—kas iti panangipaayna iti Anakna a sakripisio maipuon iti basbasolko—natignayak a mangbalbaliw iti biagko tapno maipakitak ti panagyamanko iti panagayat ti Dios kaniak. Kas pagarigan, naadalko manipud iti Salmo 11:5 a kagura ni Jehova ti kinaranggas isu nga insardengko ti agbuya kadagiti programa iti TV a mangitampok iti kinaranggas ken gura. Nupay narigatanak, insardengko ti kinakaratistak ta naranggas dayta nga isport. Impaamiris kaniak ti prinsipio ti 1 Corinto 15:33 a dakkel ti impluensia kaniak dagidiay piliek a pakigayyeman. Ti pannakaibaludko ti pammaneknek iti kinaagpayso dayta a prinsipio. Gapuna, inkeddengko a saanakon a makikadua kadagidiay pagay-ayatda unay ti naranggas nga isport.
NO KASANO A NAGUNGGONAANAK: Ti pannakigayyemko kadagiti Saksi ni Jehova ken ti panagadalko iti Biblia ti nakatulong kaniak nga agbalin a mapagtalkan. Kas pagarigan, naadalko iti Hebreo 13:5 a nasken nga agbalinak a kontento ken liklikak ti panagayat iti kuarta. Nakatulong ti panangyaplikarko iti dayta a balakad tapno saanakon nga agulbod ken agtakaw.
Sigud a napateg kaniak ti pannakigayyem. Iti napalabas, nakitak a gapu iti kinaagum wenno panagbuteng, nagsisina ti adu nga aggagayyem. Saan a perpekto dagiti Saksi ni Jehova ngem naammuak a raraemenda dagiti pagalagadan ti Dios ken ikagkagumaanda nga iyaplikar ti balakadna iti pannakilangenda iti sabsabali. Adu kadakuadan ti nagbalin a pudno a gagayyemko.
Ania ngata ti nagbanagak no diak nasursuro nga inyaplikar dagiti pagalagadan ti Biblia? Nalabit addaak manen iti pagbaludan wenno adda manen dagiti napasaktak ken napagsagabak. Ngem ita, addaanakon iti nasayaat nga asawa ken dua nga annak a lallaki. Kas sangapamiliaan, siraragsak a tultulonganmi ti dadduma a mangammo iti kinapudno maipapan iti Dios.
PERSONAL NGA IMPORMASION
NAGAN: JOSÉ CARLOS PEREIRA DA SILVA
EDAD: 31
NAKAYANAKANNA: BRAZIL
PAKASARITAANNA: MANNAKIRANGET ITI LANSANGAN
TI NAPALABASKO: Dimmakkelak iti kaiskuateran iti Americana, São Paulo. Awan ti nadalus a danum a paggapuan ti inumenmi. Narugit ti aglawlawmi. Agdindinamag ti lugarmi a napno iti kinaranggas ken krimen.
Dimmakkelak a naranggas ken managpungpungtot. Kanayon a mairamanak kadagiti panagraranget iti lansangan, isu a kabutengdak dagiti kaarrubak. Impakitak babaen iti kawesko, langak, ken tigtignayko a maysaak a maton. Naglaingak nga uminum nga uray la masansan a saak la agsardeng no awanen ti puotko. Kas kadagiti manongko, nasumokko ti droga. Kinapudnona, maysan kadakuada ti natay gapu iti nakaro a panagdroga.
NO KASANO A BINALBALIWAN TI BIBLIA TI BIAGKO: Idi naam-ammok dagiti Saksi ni Jehova, impakitada kaniak iti Biblia a pagbalinento ti Dios a paraiso ti intero a daga. (Lucas 23:42, 43; Apocalipsis 21:3, 4) Naammuak met a dagiti natay ket saandan a sipapanunot iti aniaman, isu a ti Dios saanna a dusaen dagiti tattao iti umap-apuy nga impierno. (Eclesiastes 9:5, 6) Urayak la a nabang-aran! Gapu iti naammuak maipapan iti Dios, desididoakon a mangbalbaliw iti biagko. Ngem saan a kaskarina nga isardengko ti nakairuamak a panagsao iti dakes, panagdroga, panaginum, ken pannakiranget.
Nupay kasta, naparegtaak iti kinuna ni apostol Pablo a mabasa iti 1 Corinto 6:9-11. Ipakita dayta a teksto a dagiti bisiok ket kas met iti bisio ti dadduma a Kristiano idi umuna a siglo. Ngem kastoy pay ti kuna dagita a bersikulo: “Kasta idi ti sumagmamano kadakayo. Ngem naugasankayon, ngem nasantipikarkayon, ngem naideklarakayon a nalinteg iti nagan ni Apotayo a Jesu-Kristo ken babaen iti espiritu ti Diostayo.” Dagita ti nangted kaniak iti namnama a kabaelak met ti agbalbaliw tapno maparagsakko ti Dios.
Idi nangrugiak a nakitimpuyog kadagiti Saksi ni Jehova, nakombinsirak nga an-annurotenda ti pudno a relihion. Ammoda ti dati a naranggas ken agresibo a kababalinko, ngem kaskasdi a sipapasnek ken siaayat nga inawatdak.
NO KASANO A NAGUNGGONAANAK: No diak inadal ti Biblia ken diak binalbaliwan ti kabibiagko, nalabit natayak koma itan. Ngem maragragsakanakon ta natulongak ti maysa kadagiti kakabsatko nga agadal iti Biblia ken mangisardeng iti pannakaadiktona iti droga. Naparegtak met ti dadduma a kabagiak nga agadal iti Biblia. Agyamanak unay ta indedikarkon ti biagko nga agserbi iti Dios a maseknan unay kadatayo!
[Blurb iti panid 24]
“Inkeddengko ti agkararag sakbay a masulisogak imbes a kalpasanna. Dakkel ti naitulong dayta iti panagbalbaliwko”