Ti Biblia Balbaliwanna ti Biag

Kasano a ti maysa nga agsolsolo nga ina idiay Russia naisardengna ti agdroga ken napasayaatna ti relasionna kadagiti annakna? Kasano a ti maysa a walang a lalaki idiay Kyoto, Japan naaddaan iti bileg ken tured tapno mapagballigianna dagiti pagkapuyanna a nangituggod kenkuana iti kinapanglaw? Ania ti nakatulong iti maysa nga Australiano a paraaywan iti pangen (cowboy) tapno isardengna ti nalabes a panagin-inumna iti arak? Usigem ti salaysayda.

“Naadalko nga Obligasionko a Suportaran ti Bagik.”​—NELLY BAYMATOVA

EDAD: 45

NAKAYANAKANNA: RUSSIA

PAKASARITAANNA: ADIKTO ITI DROGA

TI NAPALABASKO: Dimmakkelak idiay Vladikavkaz, a kabesera ti Republic of North Ossetia (Alania itan). Nanam-ay ti biagmi, ngem saanak a naragsak. Idi agtawenakon iti 34, naminduan a nakisinaak iti asawak. Sangapulon a tawen nga agdrogdrogaak, ket naminduan a nagpaagasak gapu iti dayta. Nupay addaanak iti dua nga annak, awan idi ti mariknak a panangipateg kadakuada; ken saan met a nasayaat ti relasionko iti pamiliak ken gagayyemko.

Nagbalin a Saksi ni Jehova ni nanangko, ket masansan nga agsangit gapu kaniak ken agkararag ken Jehova tapno matulongannak. Napanunotko: ‘Naglaka la ketdin aya a mamatpati ni Nanang! Kasano koma a matulongannak ni Jehova?’ Ngem inkagumaak nga isardeng ti agdroga. Nupay kasta, marigatanak a mangisardeng iti bisiok. Naminsan, dua nga aldaw a saanak a nagdroga. Inkeddengko a masapul a rummuarak iti balay, ket timpuakak iti tawa. Ngem addaak gayam iti maikadua a kadsaaran. Natukkol ti takkiag ken ti gurongko ken nadangran ti bukotko. Gapu iti dayta, naidalitak iti nasurok a makabulan.

Bayat ti panagpaimbagko, inaywanannak ni nanangko ket saannak nga inumsi. Maawatanna a mariribukanak ken marigrigatanak a mangkontrol iti emosionko. Nupay kasta, iti abay ti katrek, nangibati iti sumagmamano a magasin nga Agriingkayo!a Sinaggaysak a binasa dagita ket naammuak a makapainteres ken makaisuro dagita. Gapuna, inkeddengko ti makipagadal iti Biblia kadagiti Saksi.

NO KASANO A BINALBALIWAN TI BIBLIA TI BIAGKO: Ti panangibaklay iti responsabilidad ti maysa kadagiti naadalko iti Biblia. Imbes nga agpannurayak iti suporta ni nanangko, naadalko nga obligasionko a suportaran ti bagik ken dagiti annakko. Yantangay nabayagen a ti pagayatak laeng ti inar-aramidko, marigatanak a mangyugali iti regular a panagtrabaho.

Kasta met, talaga a nakatulong kaniak ti balakad iti Deuteronomio 6:5-7, a mangibagbaga kadagiti nagannak nga isuroda dagiti annakda maipapan iti Dios. Naamirisko a sungsungbatak iti Dios ti wagas a panangpadakkelko iti dua nga annakko. Dayta ti nangtignay kaniak tapno ipaayak ida iti panawen ken patanorek ti maiparbeng a panagayat kadakuada.

Agyamanak unay ta impalubos ni Jehova a maammuak ti kinapudno maipapan kenkuana. Gapuna, indedikarko ti biagko kenkuana ket nabautisaranak kas Saksi ni Jehova.

NO KASANO A NAGUNGGONAANAK: Yantangay nasursurok a medmedan ti kinamanagpungpungtotko, simmayaat ti panaglangenmi ken Nanang. Simmayaat metten ti relasionko kadagiti annakko.

Yantangay kagurakon dagiti di nadiosan a bambanag, awanen ti adu a problemak a bunga ti dati a wagas ti panagbiagko. Nakaragragsakak itan a tumultulong kadagiti sabsabali a mangammo iti kinapudno maipapan iti naayat a Dios a ni Jehova.

“Mariknak a Talaga a Naispal ti Biagko.”​—MINORU TAKEDA

EDAD: 54

NAKAYANAKANNA: JAPAN

PAKASARITAANNA: WALANG

TI NAPALABASKO: Dimmakkelak iti siudad ti Yamaguchi iti poder ni Tatang ken ni lolak. Diak pulos naam-ammo ni nanangko. Idi agtawenak iti 19, natay ni lolak, ket nagtultuloy a nakipagnaedak ken tatangko. Agtartrabahoak kas kosinero, ket empleado met ni tatangko iti maysa nga industria ti taraon. Agduma ti oras ti trabahomi, isu a manmano nga agkitakami. Nayugalik ti agtrabaho iti napaut ken aginum a kadua dagiti gagayyemko.

Iti panaglabas ti tiempo, naumaak iti trabahok. Nakaapak ti amok ken dimmegdeg ti panaginumko. Nagangayanna, idi dandaniakon agtawen iti 30, inkeddengko ti agtalaw ken umadayo. Idi naibusen ti kuartak, nagtrabahoak iti pagsugalan (pachinko). Maysa a balasang ti naam-ammok, ket nagkasarkami. Ngem nagsinakami kalpasan ti dua ket kagudua laeng a tawen.

Limdaangak ken kimmapuy ti pakinakemko. Malaksid iti dayta, nailumlomak iti utang. Tapno maitarayak dagiti nakautangak, nakipagnaedak biit ken tatangko. Ngem nadadael ti relasionko ken tatangko gapu iti panagul-ulbodko kenkuana. Tinakawko pay ti kuartana ket nagbiagak a sugador iti sumagmamano a tiempo. Nagangayanna, pimmanglawak ket nagnaedak idi iti estasion ti tren. Immakarak idiay Hakata, sa idiay Himeji, ken kamaudiananna, iti siudad ti Kyoto. Sumagmamano a tawen a nagbiagak a walang.

NO KASANO A BINALBALIWAN TI BIBLIA TI BIAGKO: Idi 1999, addaak iti parke iti asideg ti Kamogawa River idiay Kyoto idi immasideg kaniak ti dua a babbai. Insaludsod ti maysa kadakuada, “Kayatmo kadi ti agadal iti Biblia?” Immanamongak. Dagiti nataengan a Kristiano iti lokal a kongregasion dagiti Saksi ni Jehova ti nangyadal kaniak iti Biblia ken timmulong kaniak a mangbigbig iti kinapateg ti panangyaplikar kadagiti prinsipio ti Biblia. Insingasingda nga agbirokak iti trabaho ken pagnaedak. Tapno mapabus-oyak ida, nagaplikarak iti sumagmamano a pagtrabahuan, ngem saanko nga pinagreggetan dayta idi damo. Ngem idi agangay, inkarkararagko nga agballigiak ken pinagreggetak ti nagsapul iti trabaho, ket nakasapulak idi kamaudiananna.

Nakatulong met kaniak ti panagkararag idi naipasangoak iti makakarit a pakasuotan. Natuntondak dagiti nakautangak ket singsingirendakon. Nariribukanak unay. Nupay kasta, iti inaldaw a panagbasak iti Biblia, nabasak ti Isaias 41:10. Iti dayta a bersikulo, inkari ti Dios kadagiti matalek nga adipenna: “Pudno a tulongankanto.” Dayta a kari ti nangted kaniak iti tured ken napigsa a pakinakem. Siaanep a nagtrabahoak ket nabayadak met laeng dagiti utangko. Idi tawen 2000, nakualipikarak a mabautisaran kas maysa kadagiti Saksi ni Jehova.

NO KASANO A NAGUNGGONAANAK: Dagiti naadalko iti Biblia ti nangtignay kaniak a mangisubli iti nasayaat a relasionko ken Tatang, ket pinakawannak kadagiti nagbasolak kenkuana. Kasta unay ti ragsakna ta nasursurok ti agbiag maitunos kadagiti pagalagadan ti Biblia. Mariknak a literal a naispal ti biagko gapu ta nagbiagak a maitunos kadagiti prinsipio ti Biblia.

Kanayonanna, kabaelakon ti agtrabaho tapno masuportarak ti bagik. (Efeso 4:28; 2 Tesalonica 3:12) Nakasarakak met kadagiti pudno a gagayyem iti uneg ti kongregasion Kristiano. (Marcos 10:29, 30) Agyamyamanak unay gapu kadagiti leksion iti biag nga insuro kaniak ni Jehova.

“Saan a Kaskarina a Makapagbalbaliwak.”​—DAVID HUDSON

EDAD: 72

NAKAYANAKANNA: AUSTRALIA

PAKASARITAANNA: MANGNGINUM

TI NAPALABASKO: Siak ti maika-11 nga anak da Willie ken Lucy. Nagnaed ti pamiliami iti maysa a komunidad dagiti Aborigine a maawagan iti Aurukun, iti makin-amianan a paset ti Queensland. Masarakan ti Aurukun iti igid ti nangayed nga Archer River ken asideg iti baybay. Tapno agbiagkami, insurodakami dagiti dadakkelmi no kasano ti aganup ken agkalap. Iti daydi a tiempo, naipasidongkami nga Aborigine iti paglintegan ti gobierno a mangiparparit kadakami nga agiggem iti kuarta, ken maiparit a rummuarkami iti naituding a komunidadmi.

Inggaed dagiti dadakkelko nga inyukuok kaniak dagiti nasayaat a galad ken insuroda ti amin nga annakda a mangraem kadagiti natataengan iti komunidad ken mangiranud iti adda kadakami uray no nakurapaykami. Kas resulta, imbilangmi ti amin a natataengan kas inna, amma, ikit, ken uliteg.

Pimmusay ni tatangko idi agtawenak iti pito, ket immakarkami iti komunidad dagiti Aborigine idiay Mapoon, nga agarup 150 a kilometro iti amianan ti Aurukun. Idi agtawenak iti 12, nasursurok ti agtaraken kadagiti kabalio ken baka, ket agingga idi dandani agtawenak iti 50, nagtrabahoak iti adu a rantso dagiti baka kas paraaywan iti pangen (cowboy). Saan a nasayaat ti wagas ti panagbiagko. Nalabes ken masansan ti panaginumko. Nangitunda dayta iti adu a parikut ken rigat.

Naminsan, bayat ti nalabes a panaginumko, agibar-ibar a rimmuarak iti hotel ket dinungparnak ti napartak a lugan. Dua a tawen a nagpaimbagak ket diakon nakasubli iti trabahok kas paraaywan iti pangen.

NO KASANO A BINALBALIWAN TI BIBLIA TI BIAGKO: Bayat ti tiempo a panagpaimbagko, adda gayyemko a balasang a nangyeg kadagiti basaek a magasin a Pagwanawanan ken Agriingkayo! Ngem saanak unay a nakaeskuela isu a saanak a makabasa a naimbag. Ngem iti maysa a nadagaang nga aldaw, maysa a natakneng a lalaki nga agtawen iti 83 ti simmarungkar kaniak. Pinaunegko tapno painumek iti nalamiis a danum. Inikkannak iti sumagmamano a naibatay-Biblia a literatura ken sinaludsodna no mabalinna ti agsubli tapno ilawlawagna kaniak ti linaon dagita. Nagangayanna, rinugianmi nga adalen a regular ti Biblia. Naamirisko a nasken a balbaliwak ti personalidad ken panagbiagko tapno magun-odak ti anamong ti Dios.

Saan a kaskarina a makapagbalbaliwak. Ngem gapu kadagiti pannursuro ni nanangko, dakkel ti panagraemko iti lakay a mangyad-adal kaniak iti Biblia ken iti naespirituan a pannakaawat nga inranudna. Nupay kasta, bimdengak a mangidedikar iti biagko iti Dios. Impagarupko a masapul a maammuak pay ti amin a nailanad iti Biblia.

Gapu iti dayta, maysa a katrabahuak ti timmulong kaniak a mangilinteg iti panangmatmatko. Saksi ni Jehova dayta a katrabahuak, ket impabasana kaniak ti pammaregta iti Colosas 1:9, 10. Kunaen dayta a teksto a nasken nga itultuloytayo ti “rumang-ay iti umiso a pannakaammo iti Dios.” Tinulongannak ti katrabahuak a mangtarus a kanayonto latta nga adda dagiti baro a banag a maadalko, isu a saan a rumbeng a ti limitado a pannakaammok ti manglapped kaniak.

Nangnangruna a naparegtaak idi rinugiak ti makitimpuyog kadagiti Saksi ni Jehova. Nasaksiak a mismo ti nagkaykaysa a panagdayaw iti Dios dagiti tattao a nagduduma ti kultura ken pannakapadakkelda. Dayta a panagkaykaysa ti naan-anay a nangkombinsir kaniak a nasarakakon ti pudno a relihion. Gapuna, idi 1985, nabautisaranak kas maysa kadagiti Saksi ni Jehova.

NO KASANO A NAGUNGGONAANAK: Limmaingak nga agbasa, ken adun nga oras iti kada lawas a tumultulongak iti sabsabali tapno masursuroda ti agbasa ken agadal iti Biblia. Kanayonanna, ti gayyemko a balasang a nangyeg kadagiti magasin a Pagwanawanan ken Agriingkayo! nakipagadal met kadagiti Saksi, nagpabautisar, ken isu itan ti ipatpategko nga asawa. Siraragsak nga agdangdanggaykami ita a tumultulong iti sabsabali iti komunidad dagiti Aborigine tapno maammuanda ti maipapan ken Jehova a Dios.

[Footnote]

[Blurb iti panid 21]

Nasarakanmi ken baketko ti pudpudno a rag-o nga itden ti panangtulong kadagiti Aborigine tapno maammuanda ti maipapan iti Dios