Ania ti Ar-aramiden ti Dios?

“Apay, O Jehova, nga agtalinaedka a sitatakder iti adayo? Apay nga agtalinaedka a silelemmeng kadagiti tiempo ti riribuk?”a​—SALMO 10:1.

TI LAENG parupa dagiti damdamag patalgedanna nga agbibiagtayon “kadagiti tiempo ti riribuk.” No mabiktimatayo iti krimen wenno nakaro nga aksidente, wenno no matay ti ipatpategtayo, nalabit maisaludsodtayo, Bulsek kadi ti Dios? Adda kadi pannakaseknanna? Talaga kadi nga adda Dios?

Ngem napanunotmo kadin a mabalin a biddut ti nakaibatayan dagiti namnamaentayo iti Dios? Kas pagarigan: Naupay ti maysa nga ubing gapu ta pinanawan ti amana a napan nagtrabaho. Kailiw ti ubing ti amana ket kayatna a sumangpet koman. Marikna ti ubing a kasla nabaybay-an. Iti nagmalmalem, kanayon nga isaludsodna, “Ayanna ni Tatang?”

Nalakatay laeng a makita a biddut ti panagpampanunot dayta nga ubing. Ngamin, iti dayta a gundaway, agtartrabaho ni tatangna para iti kasapulan ti intero a pamilia. Mabalin kadi a biddut met ti panagpampanunottayo no ireklamotayo, “Ayanna ti Dios”?

Kas pagarigan, mabalin a tarigagayan ti dadduma nga agbalin koma ti Dios kas manangdusa, ket dusaenna a dagus dagiti agar-aramid iti dakes. Adda met dagiti mangibilang iti Dios kas Santa Claus manipud langit, a mangipaay kadagiti sagsagut a kas iti trabaho, asawa, wenno iti panangabak ti tiket iti loteria.

Dagiti kasta ti panangmatmatda ipagarupda a no saan a dagus nga ipaay ti Dios ti hustisia wenno bendision, saan kano a maseknan kadagiti panagsagsagabatayo ken dina met ammo dagiti kasapulantayo. Ngem saan a pudno dayta! Kinapudnona, madama nga agtartrabaho ni Jehova a Dios agpaay iti intero a sangatauan, nupay saan nga iti pamay-an a kidkiddawen ti kaaduan.

Ania ngarud ti ar-aramiden ti Dios? Tapno masungbatan dayta, masapul nga usigentayo ti rugrugi ti pakasaritaan ti tao idi a naguped ti nasayaat a relasion ti tao ken ti Dios​—ngem mabalin pay nga isubli.

Dagiti Makadangran nga Epekto ti Basol

Panunotem ti maysa a nabayagen a marmarba a balay. Nasayaat idi ti kasasaadna, ngem ita nadadaelen dagiti atep, ruangan, ken makinruar a didingna. Gapu iti kakaro ti dadaelna, saanen a nalaka a tarimnen dayta; kasapulan ti umdas a panawen.

Usigem met ti pannakadangran ti sangatauan agarup 6,000 a tawen ti napalabasen, idi a ti espiritu a parsua a ni Satanas inallukoyna da Adan ken Eva nga agrebelde iti Dios. Sakbay dayta, tagtagiragsaken ti immuna nga agassawa ti perpekto a salun-at ken agnanayonto koma ti biagda ken ti agbalin a kaputotanda. (Genesis 1:28) Nupay kasta, kas iti marmarba a balay, nadadael ti di pay naipasngay a pamilia ti sangatauan gapu iti panagbasol da Adan ken Eva.

Nakaro ti panangdangran dayta a panagrebelde. Kuna ti Biblia: “Babaen iti maysa a tao [ni Adan] simrek ti basol iti lubong ken ti ipapatay babaen iti basol.” (Roma 5:12) Malaksid iti ipapatay gapu iti basol, nadadael pay ti relasiontayo iti Namarsua ket naapektaran uray ti bagi, panunot, ken riknatayo. Kas resulta, ti kasasaadtayo ket kas iti marmarban a balay. Umiso ti pananggupgop ni nalinteg a Job iti kasasaadtayo idi dineskribirna ti biag ti tao kas “ababa ken napno iti rigat.”​—Job 14:1, Ti Baro a Naimbag a Damag Biblia.

Ngem binaybay-an kadi ti Dios ti sangatauan kalpasan a nagbasol da Adan ken Eva? Saan! Kinapudnona, sipud idi agingga ita, agtultuloy nga agtartrabaho ti nailangitan nga Amatayo agpaay iti pamilia ti sangatauan. Tapno ad-adda pay a maapresiartayo ti ar-aramidenna para kadatayo, usigentayo ti tallo nga addang a nasken iti panangtarimaan ti balay ken no kasano nga umasping dagitoy iti inaramid ti Dios tapno maisubli ti nasayaat a kasasaad ti sangatauan.

1 Kalpasan a masukimat ti bumalay no ania ti dadael ti balayna, nasken nga agdesision no tarimaanen wenno rebbaenna dayta.

Kalpasan unay ti panagrebelde idiay Eden, impakaammon ni Jehova a Dios ti panggepna a mangisubli iti nasayaat a kasasaad ti sangatauan. Kinunana iti espiritu a parsua a nangisungsong iti panagrebelde: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.”​—Genesis 3:15.

Kadagita nga ebkas, inkari ni Jehova a dadaelenna daydiay nangisungsong iti panagrebelde iti Eden. (Roma 16:20; Apocalipsis 12:9) Kanayonanna pay, impadto ni Jehova nga addanto “bin-i” a mangsubbot iti sangatauan manipud basol.b (1 Juan 3:8) Kadagita a kari, imbatad ni Jehova no anianto ti aramidenna: Inkeddeng ti Dios a tarimaanen saan ket a rebbaen ti arig-balay a sangaparsuaan. Ngem masapul ti umdas a panawen tapno maisubli ti sigud a kasasaad ti sangatauan.

2 Mangaramid ti maysa nga arkitekto iti detalyado a disenio (blueprint) para iti pannakatarimaan ti balay.

Ni Jehova a Dios impaayanna dagiti Israelita kadagiti linteg ken nangdisenio iti templo a pagdayawanda kenkuana. Kuna ti Biblia: “Dagidiay a banag ket anniniwan ti bambanag nga umay.” (Colosas 2:17) Kas kadagiti blueprint, iladladawan dagita ti dakdakkel a banag.

Kas pagarigan, nangidatag dagiti Israelita kadagiti daton nga animal tapno mapakawan ti basbasolda. (Levitico 17:11) Dagita a daton iladawanda ti dakdakkel a daton a maidatag kalpasan ti adu a siglo​—maysa a daton a naan-anay a mangsubbot iti sangatauan.c Dagiti disenio ti tabernakulo ken templo a pagdaydayawan dagiti Israelita iladawanda dagiti addang nga aramiden ti masanguanan a Mesias, wenno ti “bin-i,” sipud ipapatayna kas subbot agingga iti ipapanna sadi langit.​—Kitaem ti tsart iti panid 7.

3 Maysa a managibangon ti mapili a mangipatungpal iti panagtarimaan babaen ti panangsurotna kadagiti blueprint.

Ni Jesus ti naikari a Mesias a mangsurot iti padron ti panagdaton a naipasdek kadagiti Israelita ken mangited iti mismo a biagna tapno masubbot ti sangatauan. Kinapudnona, ni Juan a Mammautisar inawaganna ni Jesus a “ti Kordero ti Dios a mangikkat iti basol ti lubong.” (Juan 1:29) Sidadaan nga inawat ni Jesus dayta nga annongen. Kinunana: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.”​—Juan 6:38.

Malaksid iti ‘panangited ni Jesus iti kararuana kas subbot a kasukat dagiti adu,’ pagayatan pay ti Dios a mangaramid ni Jesus iti tulag kadagiti pasurotna maipaay iti maysa a Pagarian. (Mateo 20:28; Lucas 22:29, 30) Dayta a Pagarian ti pamay-an ti Dios a mangitungpal iti panggepna para iti sangatauan. Ti mensahe maipapan iti Pagarian ti Dios ket naawagan iti “naimbag a damag” gapu ta ilawlawag dayta a nangipasdek ti Dios iti maysa a gobierno idiay langit a mangituray iti daga!​—Mateo 24:14; Daniel 2:44.d

Agtultuloy ti Trabaho a Panagtarimaan

Sakbay a nagsubli ni Jesus idiay langit, imbilinna kadagiti pasurotna: “Mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu . . . Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.”​—Mateo 28:19, 20.

No kasta, ti panangisubli iti sigud a kasasaad ti sangatauan ket saan nga agpatingga iti ipapatay ni Jesus. Agtultuloy dayta agingga iti “panungpalan ti sistema ti bambanag”​—ti tiempo a ti Pagarian ti Dios mangrugi nga iturayanna ti dagatayo. Dayta a tiempo ket daytoy agdama a panawentayo. Ammotayo dayta gapu ta matungtungpalen ti pagilasinan nga impadto ni Jesus mainaig iti “panungpalan ti sistema ti bambanag.”e​—Mateo 24:3-14; Lucas 21:7-11; 2 Timoteo 3:1-5.

Iti 236 a pagilian itan, tungtungpalen dagiti Saksi ni Jehova ti imbilin ni Jesus a pannakaikasaba ti naimbag a damag ti Pagarian ti Dios. Kinapudnona, daytoy basbasaem a magasin ket nadisenio a mangtulong kenka tapno maammuam ti ad-adu pay maipapan iti dayta a Pagarian ken no ania ti itungpalna. Iti panid 2 ti tunggal ruar Ti Pagwanawanan, mabasam daytoy: “Daytoy a magasin . . . liwliwaenna amin a tattao babaen ti naimbag a damag a ti Pagarian ti Dios, a maysa a pudpudno a gobierno idiay langit, asidegen a pagpatinggaenna ti amin a kinadakes ken pagbalinenna a paraiso ti daga. Iparparegtana ti panamati ken Jesu-Kristo, a natay maigapu kadatayo tapno magun-odtayo ti biag nga agnanayon, ken agturturay itan kas Ari iti Pagarian ti Dios.”

Iti agdama, mabalin nga adda pay la madamdamagmo ita a kalamidad ken iraraut dagiti terorista, wenno mapasaram a mismo ti trahedia. Nupay kasta, no agadalka iti Biblia, makombinsirka a saan a binaybay-an ti Dios ti sangatauan. Imbes ketdi, ti Dios “saan nga adayo iti tunggal maysa kadatayo.” (Aramid 17:27) Kasta met, kas inkarina, sigurado a matagiragsaktayto manen ti kasasaad a napukaw dagiti immuna a nagannak kadatayo.​—Isaias 55:11.

[Footnotes]

[Tsart/Dagiti Ladawan iti panid 7]

(Para iti aktual a pannakaurnosna, kitaem ti publikasion

“Katulad ti Kinapudno”​—No Ania ti Iladawan ti Tabernakulo

TI ALTAR

Ti kinamasindadaan ti Dios a mangawat iti daton ni Jesus.​—HEBREO 13:10-12.

TI NANGATO A PADI

Ni Jesus.​—HEBREO 9:11.

1 Iti Aldaw ti Panangabbong, mangidatag ti nangato a padi iti daton para iti basbasol ti umili.​—LEVITICO 16:15, 29-31.

1 Idi Nisan 14, 33 K.P., indaton ni Jesus ti biagna agpaay kadatayo.​—HEBREO 10:5-10; 1 JUAN 2:1, 2.

TI NASANTUAN

Ti kasasaad ni Jesus kas napulotan iti espiritu.​—MATEO 3:16, 17; ROMA 8:14-17; HEBREO 5:4-6.

TI KORTINA

Ti nainlasagan a bagi ni Jesus, ti bangen a namagsina iti naindagaan ken nailangitan a biag. ​—1 CORINTO 15:44, 50; HEBREO 6:19, 20; 10:19, 20.

2 Sumrek ti nangato a padi iti bangir ti kortina a mamagsina iti Nasantuan ken ti Kasasantuan.

2 Idi napagungaren ni Jesus, arigna simrek iti bangir ti kortina idi immuli idiay langit “tapno agparang . . . iti sanguanan a mismo ti Dios maipaay kadatayo.”​—HEBREO 9:24-28.

TI KASASANTUAN

Langit.​—HEBREO 9:24.

3 Apaman a makastrek ti nangato a padi iti Kasasantuan, iparsiakna ti dadduma a dara ti daton iti sanguanan ti lakasa ti tulag.​—LEVITICO 16:12-14.

3 Babaen ti panangidatagna iti pateg ti naibukbok a darana, impaay ni Jesus ti pudpudno a pangabbong kadagiti basoltayo.​—HEBREO 9:12, 24; 1 PEDRO 3:21, 22.