Umadanika iti Dios
Ti “Managdengngeg iti Kararag”
TALAGA kadi a sungbatan ni Jehova a Dios ti napasnek a kararag dagiti agdaydayaw kenkuana? Ti salaysay ti Biblia maipapan iti saan unay a nalatak a tao nga agnagan Jabez, ipakitana a ni Jehova ket talaga a “Managdengngeg iti kararag.” (Salmo 65:2) Kasla di umiso ti pakasarakan iti dayta a salaysay—iti listaan dagiti kaputotan iti rugrugi ti libro nga Umuna a Cronicas. Usigentayo ti 1 Cronicas 4:9, 10.
Mabasatayo laeng ti maipapan ken Jabez kadagitoy dua a bersikulo. Sigun iti bersikulo 9, ti inana ti “nangpanagan kenkuana iti Jabez, a kunkunana: ‘Isu impasngayko buyogen ti rigat.’”a Apay a pinilina ti kasta a nagan? Narigrigat kadi ti panangipasngayna ken Jabez ngem iti panangipasngayna iti dadduma nga annakna? Maysa kadi a balo, a nalabit maladingitan ta awan ti asawana a mangpadaan iti pannakaipasngay ti anakna? Awan ti ibaga ti Biblia. Ngem idi agangay, adda nangnangruna a panggapuan daytoy nga ina a mangipannakkel iti daytoy nga anakna. Nalabit nalinteg met dagiti kakabsat ni Jabez, ngem isu ket nagbalin a “nadaydayaw idi ngem ti kakabsatna.”
Managkararag ni Jabez. Rinugianna ti kararagna babaen ti panagkiddawna iti pamendision ti Dios. Adda tallo a kiniddawna a mangipamatmat iti kinabileg ti pammatina.
Umuna, nagkiddaw ni Jabez iti Dios a kunkunana: “Palawaem ti teritoriak.” (Bersikulo 10) Daytoy nadayaw a tao dina ag-aguman ti daga a kukua ti padana a tao. Ti napasnek a kiddawna ket mabalin nga ad-adda a mainaig kadagiti tattao, saan ket nga iti daga. Nalabit idawdawatna ti natalna a pannakapalawa ti teritoriana para iti ad-adu a managdaydayaw iti pudno a Dios.b
Maikadua, kiniddaw ni Jabez a maadda koma kenkuana ti ‘ima’ ti Dios. Ti simboliko nga ima ti Dios kaipapananna ti pannakabalin nga us-usarenna a mangtulong kadagiti agdaydayaw kenkuana. (1 Cronicas 29:12) Ammo ni Jabez a saan nga ababa ti ima ti Dios kadagidiay addaan pammati Kenkuana, isu a mangnamnama a patgan ti Dios ti kiddawna.—Isaias 59:1.
Maikatlo, inkararag ni Jabez: “Aluadannak manipud iti didigra, tapno saannak a masaktan dayta.” Dagiti sasao a “tapno saannak a masaktan dayta,” ipamatmatna a saan nga inkararag ni Jabez a malisianna ti didigra, no di ket tapno maibturanna ti ladingit wenno tapno saan a malapunos kadagiti epekto ti kinadakes.
Ipakita ti kararagna a maseknan ni Jabez iti pudno a panagdayaw, iti pammatina, ken iti panagtalekna iti Managdengngeg iti kararag. Ania ti sungbat ni Jehova? Nagngudo ti salaysay kadagitoy a sasao: “Ti Dios intedna kencuana ti dinawatna.”—Ti Biblia
Saan a nagbalbaliw ti Managdengngeg iti kararag. Kaay-ayona ti kararag dagiti agdaydayaw kenkuana. Kastoy ti manamnama dagidiay addaan pammati ken panagtalek kenkuana: “Uray ania ti dawatentayo maitunos iti pagayatanna, denggennatayo.”—1 Juan 5:14.
[Footnotes]
a Ti nagan a Jabez ket nagtaud iti puon a sao a mabalin a kaipapananna ti “rigat.”
b Iti Targum, a pakabasaan iti panangipaulog dagiti Judio iti Sagrado a Kasuratan, kastoy ti panangipatarusna iti sasao ni Jabez: “Bendisionannak iti annak, ken palawaem dagiti beddengko para iti ad-adu nga adalan.”