Nagtalinaedak nga Okupado iti Organisasion ni Jehova

Kas Insalaysay ni Vernon Zubko

DIMMAKKELAK iti away iti asideg ti Stenen, maysa a purok iti probinsia ti Saskatchewan, Canada. Dagiti nagannakko a da Fred ken Adella inggaedda ti nagtrabaho tapno maipaayda ti naespirituan ken material a kasapulanmi kada manangko nga Aurellia ken dagiti adiek a da Alvin, Allegra, ken Daryl. Agingga ita, agyamankami iti panangisuroda kadakami iti kinapudno.

Ni tatangko, a napulotan a Kristiano, ket maysa a natured nga ebanghelisador. Nupay nagaget nga agtrabaho tapno adda pagbiagmi, siniguradona nga inyam-ammo ti bagina kas Saksi. Kanayon nga isarsaritana ti kinapudno. Dakkel ti epektona kaniak ti kinaregta ken kinaturedna. Masansan nga ibagana, “Agtalinaedka nga okupado iti organisasion ni Jehova ket maliklikam ti adu a parikut.”

Masansan a mangasabakami iti lansangan ti Stenen ken kadagiti kabangibang a komunidad. Para kaniak, saan a kanayon a nalaka dayta. Adda dagiti manursuron iti tunggal ili, nga um-umsienda dagiti agtutubo a kas kadakami. Naminsan idi agtawenak iti walo, nakatakderak iti maysa a lugar nga iggemko Ti Pagwanawanan ken Agriingkayo! idi pinalikmutandak ti maysa a grupo dagiti agtutubo. Inagawda ti baro a kallugongko sa inkabilda iti maysa a poste iti abayko. Naimbag laengen ta adda kaduak a natataengan a kabsat a nakakita iti mapaspasamak. Immasideg ket dinamagna, “Inan-anodaka Vern?” Dagus a nagtataray dagiti agtutubo. Nupay medio makaparurod ti napasamak, nasursurok a no mangasaba iti lansangan, saan koma a basta nakatakder iti maymaysa a lugar a kasla poste. Ti kasta a pannakasanay bayat a dumakdakkelak ti nangted met kaniak iti tured a mangasaba iti binalaybalay.

Nabautisarankami ken Alvin idi Mayo 1951. Agtawenak idi iti 13. Malagipko pay laeng ti pammaregta ni Kabsat Jack Nathan, ti nangipaay iti palawag ti bautismo, a dimi pulos palabsen ti uray maysa laeng a bulan a saan a mangisarita iti maipapan ken Jehova.a Para iti pamiliami, ti panagpayunir ti kasayaatan a karera a ragpaten. Gapuna, idi nagraduarak idi 1958, immakarak idiay Winnipeg, Manitoba, tapno agpayunir. Nupay kayat koma ni tatangko nga agtrabahoak iti negosio ti pamiliami kas parakatam, talaga nga iparparegtada ken nanangko ti panagpayunir isu a sinuportaranda ti desisionko.

Baro a Pagtaengan ken Baro a Kadua

Idi 1959, inyawis ti sanga nga opisina iti asinoman a makabael tapno umakar idiay Quebec, nga addaan iti dakkel a panagkasapulan kadagiti ebanghelisador. Nagpayunirak idiay Montreal. Anian a panagbalbaliw dayta! Baro a banag kaniak ti panagsursuro iti lenguahe a Pranses ken pannakibagay iti sabali a kultura. Kinuna kaniak ti manangaywan iti sirkitomi, “Dimo koma aramiden dagiti bambanag sigun iti nakairuamam.” Nagsayaat a balakad dayta.​—1 Cor. 9:22, 23.

Awan ti kaduak a payunir idi immakarak idiay Quebec. Ngem adda agtutubo nga agnagan iti Shirley Turcotte a naam-ammok idi idiay Winnipeg ket isu ti nagbalin a permanente a kaduak sipud idi nagkallaysakami idi Pebrero 1961. Dimmakkel met iti pamilia a mangipatpateg ken Jehova. Nupay diak ninamnama idi, isu ket nagbalin a gubuayan ti pigsa ken pammaregta kaniak bayat ti panaglabas dagiti tawen.

Panangasaba iti Gaspé

Dua a tawen kalpasan ti kasarmi, naibaonkami kas special pioneer idiay Rimouski, Quebec. Iti simmaganad a primavera, kiniddaw ti sanga nga opisina a mangasabakami iti nadumaduma a lugar ti Gaspé Peninsula, nga adda iti makindaya a kosta ti Canada. Ti annongenmi ket mangimula iti adu a bin-i ti kinapudno agingga iti kabaelanmi. (Ecl. 11:6) Inkargami iti luganmi ti nasurok a 1,000 a magasin ken dandani 400 a libro, agraman dagiti taraon ken kawesmi ket nagrubuatkami para iti makabulan a panangasaba. Organisado ti panangwanasmi iti amin a babassit a purok iti Gaspé. Ti lokal nga estasion ti radio pinakdaaranna dagiti lumugar nga addada Saksi a simmangpet ket dida koma aw-awaten dagiti itedmi a publikasion. Ngem impagarup ti kaaduan a lumugar a panangyanunsio dayta kadagiti publikasionmi isu nga inawatda ketdi dagiti literatura.

Kadagidi a tawtawen, nabiit pay a napalubosan ti panangasaba iti dadduma a lugar ti Quebec isu a gagangay laeng ti panangsitar dagiti polis. Napasamak dayta iti maysa a siudad a sadiay dandani napaimaanmi kadagiti literatura ti tunggal bumalay. Maysa a polis ti nangawis kadakami iti presinto ket kimmuyogkami. Natakuatak a nangipaulog ti abogado ti siudad iti maysa a bilin a mangpaspasardeng kadakami a mangasaba. Gapu ta awan ti hepe ti polis iti dayta nga aldaw, impakitak iti abogado ti maysa nga autorisado a surat ti sanga nga opisina ti Toronto a mangilawlawag iti kalinteganmi a mangasaba. Kalpasan a nabasana ti surat, dagus a kinuna ti abogado: “Kinapudnona, diak kayat ti riri. Ti padi ti nangibaga a pasardengenkayo a mangasaba.” Gapu ta kayatmi a maammuan dagiti lumugar a saan nga ilegal ti trabahomi, dagus a nagsublikami iti lugar a nangpasardengan kadakami dagiti polis ket intuloymi ti nangasaba.

Kabigatanna, idi binisitami ti hepe, nakapungtot idi naammuanna a napasardengkami. No nangngegyo la koma ti pannakisaritana iti telepono iti dayta nga abogado! Kinuna kadakami ti hepe a no adda tumaud a problema iti panangasabami, isu a mismo ti teleponuanmi tapno tamingenna dayta. Nupay estranghero ken saankami a nalaing nga agsao iti Pranses, naasi ken managpadagus kadakami dagiti lumugar. Ngem pampanunotenmi, ‘Awatendanto ngata ti kinapudno?’ Nasungbatan dayta sumagmamano a tawen kalpasanna, idi nagsublikami tapno mangibangon kadagiti Kingdom Hall iti intero a Gaspé. Natakuatanmi nga adu kadagiti nakasabaanmi ket kakabsattayo itan. Wen, ni Jehova ti nangpadakkel kadagita.​—1 Cor. 3:6, 7.

Maysa a Tawid

Naipasngay ti anakmi a ni Lisa idi 1970. Daytoy a tawid manipud ken Jehova ti ad-adda a nangparagsak iti biagmi. Nakipagtrabaho kaniak da Shirley ken Lisa iti panagibangon kadagiti Kingdom Hall. Idi nagraduar ni Lisa, kinunana: “Nanang, Tatang, yantangay siak ti makagapu a nagsardengkayo a payunir iti sumagmamano a tiempo, kayatko a subadan dayta babaen ti panagpayunirko.” Kalpasan ti nasurok a 20 a tawen, agserserbi pay laeng ni Lisa kas payunir, ngem kaduana itan ni lakayna a Sylvain. Naaddaanda iti pribilehio nga agtrabaho iti sumagmamano a panagibangon a proyekto iti ballasiw taaw. Kalat ti pamiliami a salimetmetan ti simple a panagbiag ken sidadaan nga agpausar ken Jehova. Diak pulos nalipatan ti kinuna ni Lisa idi nangrugi nga agpayunir. Kinapudnona, nagsubliak a payunir idi 2001 gapu iti pammaregtana ket nagtultuloyak agingga ita. Ti panagpayunir ti agtultuloy a mangisursuro kaniak nga agtalek ken Jehova iti amin nga aramidek ken agbiag a simple ngem makapnek ken naragsak.

Agkalikagum iti Ayat, Kinasungdo, ken Kinamatalek ti Panagibangon a Proyekto

Insuronak ni Jehova a no sidadaantayo nga agpausar kenkuana ken awatentayo ti aniaman nga itedna nga annongen, agapittayo iti adu a bendision. Nagpateg a pribilehio ti agserbi iti Regional Building Committee ken makipagtrabaho kadagiti kakabsat iti panagibangon a proyekto iti intero a Quebec ken iti dadduma pay a lugar.

Nupay saan a nalaing nga agpalawag ti dadduma a boluntario, nasigoda iti panagibangon kadagiti Kingdom Hall. Dagitoy a maipatpateg a kakabsat ipasnekda ti trabahoda isu nga agminar ti kinasigoda. Agresulta dayta kadagiti napipintas a patakder a mausar a pagdayawan ken Jehova.

Maisalsaludsod kaniak, “Ania dagiti kangrunaan a galad ti maysa a boluntario iti panagibangon iti Kingdom Hall?” Sigun iti kapadasak, masapul nga ayatenna nga umuna ni Jehova ken ti Anakna agraman dagiti kakabsat. (1 Cor. 16:14) Maikadua, kasapulan ti kinasungdo ken kinamatalek. No saan a maaramid dagiti bambanag sigun iti namnamaenmi​—ken talaga a mapasamak dayta​—ti kinasungdo ti mangtignay iti maysa a mangitultuloy a mangsuporta iti teokratiko nga urnos. Ti kinamatalek ti mangtignay kenkuana nga agboluntario para kadagiti masanguanan a proyekto.

Agyamyaman ken Jehova

Nupay natay ni tatangko idi 1985, naitukit iti isipko ti balakadna nga agtalinaedak nga okupado iti organisasion ni Jehova. Awan duadua nga isu ket okupado ita kas iti dadduma nga immawat iti annongenda iti nailangitan a paset ti organisasion ni Jehova. (Apoc. 14:13) Agtawen itan ni Nanang iti 97. Saanen a makapagsao a kas iti dati gapu ta naistrok ngem kaskasdi a kabesadona ti Biblia. Agadaw kadagiti teksto no agsurat ken paregtaennakami nga agtultuloy nga agserbi ken Jehova. Anian a yamanmi nga annakda ta naaddaankami iti kasta a naayat a nagannak!

Agyamanak met ken Jehova gapu ken Shirley, ti matalek nga asawa ken katakunaynayko. Intultuloyna nga impapuso ti balakad ni nanangna, “Sigurado nga okupado ni Vern iti kinapudno isu a namnamaem a saanna a busbosen kenka ti amin a tiempona.” Idi nagkasarkami 49 a tawenen ti napalabas, determinadokami nga agkadua nga agserbi ken Jehova agingga iti kinalakay ken kinabaketmi, ken no makalasatkami iti panungpalan daytoy a sistema, agkaduakami nga agsubli iti kinasalibukagmi ken agtultuloy nga agserbi iti Dios iti agnanayon. Wen, ‘aduankami iti aramiden iti trabaho ti Apo.’ (1 Cor. 15:58) Pudno nga inaywanannakami ni Jehova ken siniguradona a dikam pulos agkurang iti aniaman a naimbag.

[Footnote]

[Ladawan iti panid 31]

“Kalat ti pamiliami a salimetmetan ti simple a panagbiag ken sidadaan nga agpausar ken Jehova”