Makitatayo Kadi Dagiti Espiritu?

URAY kasano ti panangmingmingmo iti tangatang, awan a pulos ti makitam nga espiritu. Iyallingagmo ta lapayagmo ngem awan ti mangngegmo a timek manipud kadagiti espiritu. Nupay kasta, masiguradom nga addada. Nasaririt ken mannakabalin dagiti espiritu. Adda bukodda a nagnagan ken kababalin. Dadduma kadakuada ti tumultulong kadatayo, ngem kayatdatayo a dangran ti dadduma. Agpapadada nga interesado kadatayo.

Ti pudno a Dios ket maysa nga Espiritu. (Juan 4:24) Naisalsalumina ti naganna a Jehova. (Salmo 83:18) Dayta ti mangiduma kenkuana iti adu a palso a didios. Insurat ti salmista: “Ni Jehova naindaklan ken maidaydayaw iti kasta unay. Isu nakaam-amak iti ngatuen dagiti amin a sabali a didios. Ta amin dagiti didios ti il-ili didiosda nga awanan pateg; ngem no maipapan ken Jehova, inaramidna ti mismo a langlangit. Dayaw ken kinangayed addada iti sanguananna; pigsa ken kinapintas addada iti santuariona.”​—Salmo 96:4-6.

Dagiti Sirmata Maipapan iti Pudno a Dios

Kuna ti Biblia: “Awan ti tao a nakakita iti Dios uray kaano.” (Juan 1:18) Ditay pulos mailadawan ti langa ken dayagna, no kasano a ti nayanak a bulsek dina mailadawan ti nadumaduma a maris. Ngem babaen iti Biblia a Saona, iladawan ti Dios dagiti banag a ditay makita babaen kadagiti banag a makitatayo, no kasano a ti nalaing a mannursuro ilawlawagna dagiti komplikado a banag kadagiti estudiantena babaen kadagiti termino a maawatanda. Babaen kadagiti naipaltiing a sirmata a naipaay kadagiti matalek nga adipenna idi ugma, tulongannatayo ni Jehova tapno mailadawantayo ti langlangit ken tapno maawatantayo ti pakainaigantayo kadagiti agnanaed sadiay.

Kas pagarigan, iti sirmata a nakita ni propeta Ezequiel, inaigna ti dayag ni Jehova iti apuy, raniag, safiro a bato, ken bullalayaw. Iti sabali pay a sirmata, nakita ni apostol Juan a situtugaw ni Jehova iti tronona ket kinunana a ti langa ti Dios “umasping iti bato a jaspe ken iti napateg a nalabaga ti marisna a bato,” sa innayonna nga “iti aglikmut ti trono adda bullalayaw a ti langana umasping iti esmeralda.” Ipamatmat kadatayo dagita a panangiladawan a ti presensia ni Jehova ket karkarna ken makapaamanga ti kinangayed, kinaimbag, ken kinatalinaayna.​—Apocalipsis 4:2, 3; Ezequiel 1:26-28.

Naaddaan met ni propeta Daniel iti sirmata maipapan ken Jehova ket nakitana ti “sangapulo a ribu a maminsangapulo a ribu [nga anghel] a nagtalinaed a sitatakder iti mismo a sanguanan [ni Jehova].” (Daniel 7:10) Nakaskasdaaw la ketdi dayta a buya! Uray maysa laeng nga anghel ti makitam iti sirmata, makapaamanga daytan, anianto la ketdin no makitam iti sirmata ti linaklaksa a perpekto nga anghel!

Iti Biblia, agarup 300 a daras a nadakamat dagiti anghel, a ti dadduma kadakuada ket serafin wenno kerubin. Ti Griego ken Hebreo a sasao a naipatarus iti Biblia kas “anghel” ket agpada a kaipapananna ti “mensahero.” Dagiti anghel mabalinda ngarud ti makikomunikar iti maysa ken maysa, ket nakikomunikarda idi kadagiti tattao. Saanda a sigud a tattao a nagbiag ditoy daga. Nabayagen a pinarsua ni Jehova dagitoy nga espiritu sakbay a naparsua ti tao.​—Job 38:4-7.

Iti sirmata ni Daniel, naguummong dagiti umariwekwek nga anghel tapno saksianda ti naisangsangayan a pasamak. Nakita ni Daniel ti “maysa a kasla anak ti tao” nga immasideg iti trono ni Jehova ket naited kenkuana ti “panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo.” (Daniel 7:13, 14) Ti “anak ti tao,” a kangrunaan nga anghel idiay langit, isu ti napagungar a ni Jesu-Kristo, a naipaayan iti autoridad a mangituray iti intero a daga. Ti turayna ti mangsukatto iti amin a gobierno ti tao ket pagpatinggaennanto ti sakit, panagleddaang, panangirurumen, kinapanglaw, ken uray ti ipapatay.​—Daniel 2:44.

Ti pannakaitrono ni Jesus ket sigurado a nagrag-oan unay dagiti umariwekwek a matalek nga anghel, nga agtarigagay iti pagimbagan ti sangatauan. Ngem nakalkaldaang ta adda dagiti espiritu a parsua a saan a kasta ti tarigagayda.

Dagiti Kabusor ti Dios ken ti Tao

Idi rugrugi pay laeng ti pakasaritaan ti tao, maysa kadagiti anghel, a nagutugot gapu iti tarigagayna a mapagdayawan, ti bimmusor ken Jehova ket pinagbalinna ti bagina a Satanas, a kaipapananna ti “Bumusbusor.” Yantangay ni Satanas ti kadadaksan a persona, naan-anay a busbusorenna ni Jehova, ti managayat unay a persona. Adda dagiti anghel a kimmanunong iti panagrebelde ni Satanas. Tinukoy ida ti Biblia kas dagiti demonio. Kas ken Satanas, nagbalin dagiti demonio a nadangkok a kabusor ti sangatauan. Kaaduan a panagsagaba ditoy daga, kas iti di kinahustisia, sakit, kinapanglaw, ken gubgubat ket resulta ti impluensiada.

Nupay manmanon a mapagsasaritaan ti maipapan ken Satanas iti adu kadagiti simbaan ti Kakristianuan, ipalgak ti Job a libro ti Biblia no ania dagiti kababalin ken motibo daytoy rebelde nga anghel. Kunana: “Ita dayta idi ti aldaw a simrek ti annak ti pudno a Dios tapno agsaadda iti sanguanan ni Jehova, ket uray ni Satanas simrek iti mismo a nagtetengngaanda.” Iti dayta a panagsasarita, sikukuspag a pinabasol ni Satanas ti lalaki a ni Job nga agserserbi kano iti Dios gapu laeng iti bendision a magunggun-odanna. Tapno mapaneknekan ni Satanas ti pammabasolna, kasta unay ti panangparigatna ken Job. Pinukawna dagiti dinguen ken pinapatayna ti sangapulo nga annak ni Job, sa pinagsagabana iti naut-ot a busbusali ti intero a bagina. Napaay ti pammabasol ni Satanas iti laksid ti amin a panangparigatna.​—Job 1:6-19; 2:7.

Adda la ketdi naimbag a rason no apay a nabayagen nga ipalpalubos ni Jehova ti kaadda ni Satanas, ngem saan nga agnanayon a kasta. Mabiiten a mapukaw ni Satanas. Silalawag a nadeskribir iti libro ti Apocalipsis dagiti napateg a pasamak mainaig kadagiti espiritu a pulos a ditay nakita. Kastoy ti mabasatayo: “Bimtak ti gubat sadi langit: Ni Miguel [ti napagungar a ni Jesu-Kristo] ken dagiti anghelna nakibakalda iti dragon [ni Satanas], ket nakibakal ti dragon ken dagiti anghelna ngem saan a nangabak, awan met ti nasarakanen a lugar maipaay kadakuada idiay langit. Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana.”​—Apocalipsis 12:7-9.

Usigem ta ibagana nga ‘iyaw-awan ni Satanas ti intero a mapagnaedan a daga.’ Iyaw-awanna dagiti tattao babaen kadagiti ulbod a doktrina tapno maisiasida ken Jehova ken iti Saona. Ti maysa kadagita a kinaulbod ket ti ipapan idiay langit ti amin a natay. Adu ti agsisimparat a kapanunotan maipapan iti daytoy. Kas pagarigan, iti Africa ken Asia, adu ti mamati a no matay ti tao mapanda iti lugar dagiti espiritu a pagnanaedan dagiti inapoda. Dagiti pannursuro maipapan iti purgatorio ken impierno naibatayda met iti ideya nga agtultuloy nga agbiag dagiti tattao kalpasan ti ipapatay.

Adda Kadi Nailangitan a Biag Kalpasan ti Ipapatay?

Ngem ti ngay pammati dagiti minilion iti intero a lubong nga amin a naimbag a tattao ket mapan idiay langit? Agpayso nga adda dagiti naimbag a tattao a mapan idiay langit, ngem bassit laeng ti bilangda no idilig kadagiti binilion a natayen. Ibaga ti Biblia nga adda 144,000 a “nagatang manipud iti daga” ket agserbidanto kas “papadi” ken “ar-ari iti daga.” (Apocalipsis 5:9, 10; 14:1, 3) Dagitoy agraman ti Anak ti tao a ni Jesu-Kristo, buklenda ti maysa a nailangitan a gobierno, ti Pagarian ti Dios. Dayta a gobierno ti mamagpatingga ken Satanas ken dagiti demoniona, ket pagbalinennanto met a paraiso daytoy daga. Mapagungarto ti kaaduan kadagiti natay ken adda namnamada nga agbiag nga agnanayon iti dayta a Paraiso ditoy daga.​—Lucas 23:43.

No kasta, umariwekwek nga espiritu ti agtataeng idiay langit. Ni Jehova a Dios, ti Namarsua iti amin a biag, isu ti Katan-okan kadakuada. Linaklaksa nga anghel ti matalek nga agserserbi kenkuana. Ti dadduma nga anghel, nga insungsong ni Satanas, simiasida ken Jehova ken inyaw-awanda dagiti tattao. Kasta met, adda laeng sumagmamano a tattao a “nagatang,” wenno napili, manipud ditoy daga nga addaan iti naisangsangayan nga akem idiay langit. Maibatay iti daytoy, usigentay ita no siasino kadagiti espiritu ti mabalin a pakiumanan, ken no kasano ti makiuman kadakuada.