Pasiarem ti Nagan a Masarakan iti Tanap
ST. MORITZ. Pamiliar kadi kenka dayta a lugar? Nalabit a kasta gapu ta iti intero a lubong, maysa dayta kadagiti nalatak a pagbakasionan iti tanap ti Engadine idiay Switzerland. Ngem ti St. Moritz ket maysa laeng kadagiti lugar a nabayagen a daydayuen dagiti tattao iti daytoy a nakapimpintas a tanap a masarakan iti naabbungotan iti yelo nga Alps iti abagatan a daya ti Switzerland iti asideg ti beddeng ti Italia. Masarakan met dita ti Swiss National Park, nga ayan ti agkakapintas ken nadumaduma a kita ti mula ken animal a mangidaydayaw iti Naindaklan a Namarsua kadatayo a ni Jehova. (Sal. 148:7-10) Makita pay dita dagiti bambanag a mangyanninaw iti maysa a kaugalian idi ngalay ti maika-17 a siglo.
Mabalin a maatrakarka iti naisangsangayan nga arkos nga adda iti adu a balay iti dayta a tanap. Makita pay laeng ita ti nagan ti Dios a naikitikit iti sango ti balay, kas iti ngato ti makinsango a ridaw. Kadagiti naglabas a siglo, maysa a kaugalian ti panangarkos iti makinruar a paset ti balay babaen kadagiti kitikit, naipinta man dayta iti diding, nayukit iti semento, wenno naikitikit iti bato. Makitam ditoy ti ladawan ti maysa a balay iti purok ti Bever. Kastoy ti pannakaipatarus ti kitikit: “Tawen 1715. Ni Jehova ti pangrugian, ken ni Jehova ti pagnguduan. Maitungpal ti amin a banag gapu iti Dios, ken awan ti maaramid no awan ti tulongna.” Wen, namindua a nadakamat ti personal a nagan ti Dios iti dayta a nagkauna a kitikit.
Adda pay makitam a nadadaan a kitikit iti purok ti Madulain. Kastoy ti mabasa iti kitikit: “Salmo 127. Malaksid no ni Jehova ti mangbangon iti balay, awan serserbi ti napinget a panagtrabaho dagiti nangibangon iti dayta. Lucius Rumedius. Tawen 1654.”
Apay nga adda dagiti naikitikit a nagan ti Dios kadagiti balbalay iti dayta a tanap? Idi tiempo ti Repormasion, naipablaak ti Biblia iti Romansh, maysa a lenguahe a naibatay iti Latin a maus-usar idiay Engadine. Kinapudnona, dayta ti umuna a libro a naipatarus iti Romansh. Gapu ta adu a lumugar ti natukay ti pusoda iti nabasada iti Sao ti Dios, saan laeng a dagiti naganda ti inkitikitda iti makinruar a paset ti balayda no di ket dagiti pay teksto iti Biblia nga adda personal a nagan ti Dios.
Wen, agingga ita ipakpakaammo ken idaydayaw dagitoy a kitikit ti nagan ni Jehova, sinigsiglon ti napalabas sipud idi naikitikit dagita kadagiti balbalay. Maawis dagiti bisita ken lumugar iti daytoy a tanap nga agsursuro iti ad-adu pay maipapan iti nakaim-imbag a Dios a ni Jehova babaen ti panangsarungkarda iti sabali pay a patakder a nakaisuratan ti naganna—ti Kingdom Hall dagiti Saksi ni Jehova idiay Bever.
[Picture Credit Line iti panid 7]
© Stähli Rolf A/age fotostock