“Nakasingsingpet a Manangaywan ken Maipatpateg a Gayyem”

NI John (Jack) Barr, a nagserbi kas kameng ti Bagi a Manarawidwid dagiti Saksi ni Jehova, naturposna ti naindagaan a biagna idi agsapa ti Sabado, Disiembre 4, 2010. Isu ket agtawen iti 97. Ni Kabsat Barr ket nailadawan kas “nakasingsingpet a manangaywan ken maipatpateg a gayyem.”

Nayanak ni Kabsat Jack Barr idiay Aberdeen, Scotland. Isu ti buridek kadakuada a tallo nga agkakabsat. Agpada a napulotan dagiti nagannakna. Masansan a maragragsakan ni Kabsat Barr a manges-estoria iti kinaubingna; nga agyamyaman iti nagsayaat nga ulidan dagiti ing-ingungotenna a nagannak.

Idi agtin-edyer, marigatan unay ni Jack a makisarita kadagiti dina am-ammo. Ngem inkagumaanna a pinarmek dayta, isu nga iti maysa a malem ti Domingo ti 1927, idi agtawen iti 14, imbagana ken tatangna a nakasaganan a kumuyog a mangasaba iti binalaybalay. Dayta ti rugi ti adu a tawen a panagserbina ken Jehova. Sipud idi agingga iti ipapatayna, sireregta ni Kabsat Barr a nangikasaba iti naimbag a damag.

Maysa a nakaro nga aksidente a dandani nakatayan ti ipatpategna nga ina ti namagpanunot iti agtutubo a ni Jack maipapan iti panggep ti biag. Gapuna, indedikarna ti biagna ken Jehova idi 1929. Idi naikkan iti gundaway, insimbolona dayta a dedikasionna babaen ti bautismo idi 1934. Kalpasanna, nagbalin a kameng ti pamilia ti Bethel idiay London, England idi 1939. Dayta ti rugi ti amin-tiempo a panagserbina a nagpaut iti 71 a tawen.

Idi Oktubre 29, 1960, simrek ni Kabsat Barr iti inawaganna a “nakapatpateg a relasion” idi nagasawada ken Mildred Willett, maysa a nabayagen ken naregta a payunir ken misionera. Da Kabsat Jack ken Mildred Barr ket pagaammo kas mapagulidanan ken agpimpinnateg nga agassawa, ken nagtalinaedda a kasta agingga a naturpos ni Kabsat Mildred ti naindagaan a biagna idi Oktubre 2004. Bayat ti panagassawada, inaldaw nga agkaduada nga agbasa iti Biblia.

No madakamat ti nagan a Jack Barr, mapanunot dagiti makaam-ammo kenkuana ti maysa a kabsat a mangipapaay iti nainsiriban a balakad​—kanayon a balanse, naasi, ken naibatay iti Kasuratan. Isu ket nagaget, nakonsiderar ken naayat a manangaywan, ken nasungdo a gayyem. Dagiti komento, palawag, ken kararagna ipalgakda ti nauneg a panagayatna iti kinapudno ken nasinged a relasionna ken Jehova.

Nupay maikawatayo iti kaawan ti ipatpategtayo a ni Kabsat Barr, makipagragsaktayo kenkuana gapu iti pannakaawatna iti sagut nga imortalidad​—maysa a pribilehio a sinegseggaanna ken masansan a dakdakamatenna. Inaramidna ti amin a kabaelanna tapno magun-odna dayta.​—1 Cor. 15:53, 54.a

[Footnote]