Masarakan Dagiti Nagturpos iti Gilead ti “Ad-adu a Kinaragsak iti Panangted”
IDI Domingo, Marso 6, 1994, naguummong ti pamilia ti Bethel iti sangalubongan a hedkuarter dagiti Saksi ni Jehova ken dagiti sangaili maipaay iti naragsak nga okasion—ti panagturpos ti maika-96 a klase ti Watchtower Bible School of Gilead. Iti panglukat a sasaona, kinuna ti tsirman ti programa a ni Karl F. Klein, nga ag-dua a dekadan nga agserserbi iti Bagi a Manarawidwid dagiti Saksi ni Jehova, kadagiti 46 nga estudiante: “Kinuna ni Jesus a naragragsak ti mangted ngem ti umawat. Pudno met dayta iti annongenyo kas misionero—no ad-adda a mangtedkayo, ad-adda met ti ragsakyo.”—Aramid 20:35.
Pammakada a Balakad
Simmaruno ti maysa a serye dagiti palawag a maipaay kadagiti estudiante. Binukel ni Leon Weaver, kameng ti Service Department Committee, ti tema a “Ti Panagibtur Idaydayawna ni Jehova.” Maipasangotay amin kadagiti suot. (2 Corinto 6:3-5) “No marigatantayo,” kinuna ni Kabsat Weaver, “naglaka ti agpannuray iti bagbagitayo.” Nupay kasta, pinalagipanna dagiti estudiante: “Aniaman a suot a gagangay kadagiti tattao ti pakaipasanguanyo, maseknan ni Jehova iti dayta. Pulos a dina ipalubos a masulisogkayo iti labes ti kabaelanyo nga ibturan.”—1 Corinto 10:13.
“Ipategyo a Kanayon ti Annongenyo” ti paulo ti sumaruno a palawag nga impaay ni Lyman Swingle ti Bagi a Manarawidwid. Saan a kanayon a pinili dagiti Israelita ti pagnaedanda ken ti aramidenda. Naikkan ti tunggal tribu iti maysa a kadisso ti daga, ken natudingan dagiti Levita kadagiti espesipiko a pagrebbengan nga annongenda. Kasta met, adu kadagiti agserserbi iti amin-tiempo itatta—kas dagiti misionero ken kameng ti pamilia ti Bethel—ti saan a mangikeddeng agpaay iti bagbagida no sadino ti pagnaedanda ken no ania a trabaho ti aramidenda. Kasanon no pagduaduaan ti maysa ti annongenna? “No kumitakayo a sipapasnek iti Kangrunaan nga Ahente iti pammatitayo, ni Jesus, ken imutektekanyo a naimbag ti ulidanna, saankayto a mapaay,” kinuna ni Kabsat Swingle.—Hebreo 12:2, 3.
Simmaruno a nagpalawag ni Leonard Pearson, kameng ti Watchtower Farms Committee, iti tema nga “Agtalinaedkayo a Nakapokus.” Kinunana: “Uray no addaanka iti kasayaatan a kamera, kasayaatan a buya a retratuen, ken makaay-ayo nga aglawlaw, naalas latta ti ladawan—no saan a nakapokus ti kameram.” Kas iti wide-angle lens, ti panangmatmattayo masapul nga iramanna ti sangalubongan a panangasaba a maar-aramid ita. Pulos a ditay koma liplipatan ti pakabuklan ti ladawan. “Dagidiay a ti bagbagida ti pampanunotenda saanda a naragsak iti annongenda,” kinuna ni Kabsat Pearson. “Dagidiay sipapanunot ken Jehova ken iti trabaho nga impaaramidna kadakuada agballigida.”
“Nagadu ti Rumbeng a Pagyamanan” ti paulo ti sumaganad a palawag nga impaay ni John E. Barr, sabali pay a kameng ti Bagi a Manarawidwid. “Siyayamankay koma a kanayon ken Jehova,” imbalakad ni Kabsat Barr kadagiti estudiante. “Isu dayta ti maysa kadagiti kadakkelan a pagtaudan ti pannakapnek, uray no ania ti annongenyo.” Ti siyayaman a kababalin tinignayna ni David a nangisurat: “Dagiti beddeng kadagiti makaay-ayo a disso naibatangda kaniak. Wen, addaanak iti nasayaat a tawid.” (Salmo 16:6) “Addaankay iti nagpateg a sanikua iti panagbalin a nasinged ken Jehova iti inaldaw a panagbiagyo,” kinuna ni Kabsat Barr. “Pulos a saan a yadayo kadakayo ni Jehova dayta a relasion no la ket ta kanayon a matmatanyo dayta kas maysa a banag a makaay-ayo unay a pagyamananyo.”
Ti instruktor ti Gilead a ni Jack Redford ti simmaruno a nagpalawag, iti tema a “Kasanoyo nga Aramaten ti Dilayo?” Anian a nagkas-ang ti ibunga ti nadarasudos a panagsasao! (Proverbio 18:21) Kasano a matengngel ti dila? “Masapul a sanayenyo pay nga umuna ti panunotyo,” insungbat ni Kabsat Redford, “agsipud ta yanninaw ti dila ti panunot ken ti puso.” (Mateo 12:34-37) Nangipaay ni Jesus iti nagsayaat nga ulidan; inaramatna ti dilana a nangidayaw iti nagan ni Jehova. “Itatta adda bisin iti panagdengngeg kadagiti sao ni Jehova,” kinuna ni Kabsat Redford iti klase. “Ammoyo dagidiay a sasao. Addaankay iti ‘dila dagiti nasursuruan.’ Ngarud, ti dilayo kanayon koma nga iturong ti panunot ken puso a naidedikar a naan-anay ken Jehova.”—Isaias 50:4.
Naipaganetget ti kinapateg ti kararag iti palawag a “Magmagnakay Aya a Kasla Addakayo iti Sanguanan ni Jehova?” Kinuna ni Ulysses Glass, registrar ti eskuelaan: “No igaed ti maysa nga ama ti agtrabaho tapno masuportaranna ti pamiliana ngem pulos a di makisarita kadakuada ken pulos a dina yebkas ti panangipategna, mabalin a panunoten ti pamiliana nga isut’ agtartrabaho gapu laeng ta pagrebbenganna dayta, saan ket a gapu iti ayat. Kasta met kadatayo. Mabalin a naagawatayo iti panagserbi iti Dios. Ngem no saantay nga agkararag, no kasta naidedikartayo laeng iti trabaho imbes nga iti naayat a nailangitan nga Amatayo.”
Nagpalawag ni Theodore Jaracz, kameng ti Bagi a Manarawidwid, iti tema a “No Apay nga Umariwekwek ti Tumiptipon iti Ili ti Dios.” Tunggal tawen ginasgasut a ribu ti agturturong iti organisasion ni Jehova. (Zacarias 8:23) Ania ti mangipabigbig kadagiti Saksi ni Jehova kas ili ti Dios? Umuna, awatenda ti intero a Biblia kas Sao ti Dios. (2 Timoteo 3:16) Maikadua, neutralda no iti politika. (Juan 17:16) Maikatlo, mangpampaneknekda maipapan iti nagan ti Dios. (Juan 17:26) Maikapat, ipakpakitada ti managsakripisio nga ayat. (Juan 13:35; 15:13) Buyogen kadagitoy a kredensial, situtured a ‘maideklara[tayo] a sisasaknap dagiti kinatan-ok daydiay nangayab kadatayo manipud iti kinasipnget nga agturong iti nakaskasdaaw a lawagna.’—1 Pedro 2:9.
Kalpasan dagitoy makaparegta a palawag, inawat dagiti 46 nga estudiante dagiti diploma. Naitudingda iti 16 a dagdaga iti aglikmut ti lubong.
Naiduma a Programa iti Malem
Iti malem, indaulo ni Donald Krebs, kameng ti Bethel Committee, ti napaababa a Panagadal iti Pagwanawanan. Kalpasanna, imparang dagiti nagturpos ti programa a napauluan “Ni Sirib Agpukpukkaw iti Lansangan.” (Proverbio 1:20) Imparangda dagiti makagunggona a kapadasanda agpadpada iti panangasaba iti lansangan ken iti sentro ti negosio. Pudno la unay, bendisionan ni Jehova dagidiay situtured a mangasaba iti impormal a wagas. “Kayatko a panunoten ti bagbagitayo kas kumpay kadagiti ima dagiti managani nga anghel,” kinuna ti maysa kadagiti nagturpos. “No natadtadem dagiti paglaingantayo, ad-adu a trabaho ti pangusaran dagiti anghel kadatayo.” (Idiligyo ti Apocalipsis 14:6.) Nangipabuya met dagiti estudiante iti slide a nangipasiar kadagiti timmabuno idiay Bolivia, Malta, ken Taiwan—tallo kadagiti dagdaga a nakaibaonan dagiti nagturpos iti daytoy a klase.
Kalpasanna, nainterbiu da Wallace ken Jane Liverance—17 a tawenen a misionero. Idi Oktubre 1993 naawisda idiay Watchtower Farms, a pagserserbian ita ni Kabsat Liverance kas maysa kadagiti instruktor ti Gilead.
Simmaruno ti uppat-pasetna a presentasion, a napauluan “Panagraem Kadagiti Maikari Bayat ti Kinalakayda.” Bayat a lumakay dagiti tao, ti panagamak nga agbalin nga awan serserbina ken mabaybay-an mabalin nga pukawenna ti panagtalek iti bagi. (Salmo 71:9) Impakita daytoy makaabbukay a pabuya no kasano a matulongan dagiti amin iti kongregasion dagiti kasta a matalek a lallakay ken babbaket.
Kalpasan ti pangserra a kanta ken kararag, narikna dagiti amin a 6,220 a timmabuno idiay Jersey City Assembly Hall ken kadagiti babbabassit a pagtataripnongan a nabang-aranda. Ikararagantayo dagiti nagturpos kadagiti baro nga annongenda. Sapay koma ta agtultuloy a sagrapenda ti dakdakkel a kinaragsak nga agtaud iti panangted.
[Kahon iti panid 26]
Estadistika ti Klase
Bilang dagiti pagilian a nairepresentar: 9
Bilang dagiti pagilian a nakaitudingan: 16
Bilang dagiti estudiante: 46
Promedio nga edad: 33.85
Promedio a tawen iti kinapudno: 16.6
Promedio a tawen iti amin-tiempo a ministerio: 12.2
[Kahon iti panid 27]
Naikkan iti Naisangsangayan nga Atension ti Malta
LINAPDAN ti Kakristianuan ti kinapudno ti Biblia idiay Malta iti adu a tawen. Nagturpos iti maikawalo a klase idi 1947 dagiti maudi a misionero ti Gilead a naibaon sadiay, da Frederick Smedley ken Peter Bridle. Nupay kasta, naaresto ken napapanawda idiay Malta di nagbayag kalpasan ti isasangpetda. Ipadamag ti 1948 Yearbook of Jehovah’s Witnesses: “Ti panawen a nabusbos dagitoy dua a misionero kadagiti pangukoman ken kadagiti opisial ti daga ket kas kaadu iti nabusbosda iti panangannongda kadagiti ministerial a rebbengenda, gapu laeng iti ibubusor ti Hirarkia ti Romana Katolika. Kuna dagiti papadi a ti Malta ket kukua dagiti Katoliko ken masapul a pumanaw ti siasinoman a sabali a tao.” Ita, kalpasan ti 45 a tawen, uppat a misionero manipud iti maika-96 a klase ti Gilead ti naibaon idiay Malta.
[Ladawan iti panid 26]
Ti Maika-96 a Nagturpos a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud, ket dagiti nagan nailista manipud kanigid nga agpakanawan iti kada intar.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.