Dagiti Nagturpos iti Gilead​—“Pudno a Misionero!”

“ANIA ti misionero?” Dayta a saludsod ti indatag ti maysa a pagiwarnak agarup uppat a dekadan ti napalabas. Inkalintegan ti mannurat a dagiti pudno a misionero ket alikamen iti pannakapasayaat ti kagimongan ken ekonomia. Nupay kasta, idi Domingo, Marso 5, 1995, iti Assembly Hall dagiti Saksi ni Jehova idiay Jersey City, makaawis ti pannakaipaay ti nagpaiduma unay a kita ti sungbat. Ti okasion? Ti panagturpos ti maika-98 a klase ti Watchtower Bible School of Gilead​—ti eskuelaan a nakaibaonen kadagiti misionero iti amin a paset ti lubong!

Kalpasan ti panglukat a kanta ken kararag, sibabara nga inabrasa ni Albert D. Schroeder iti Bagi a Manarawidwid dagiti amin nga 6,430 a timmabuno. Kadagiti panglukat a komentona, pinagminar ni Kabsat Schroeder no apay a naiduma dagiti nagturpos iti Gilead manipud kadagiti sabsabali nga agkunkuna a misioneroda. Kinunana: “Ti Biblia isut’ kangrunaan a libro agpaay iti Gilead.” Saan a masanay dagiti agturpos iti Gilead nga agbalin a social worker, no di ket mannursuro iti Sao ti Dios. Gapuna, isudat’ naisangsangayan a kualipikado a mangaywan kadagiti naespirituan a kasapulan dagiti tattao kadagiti ganggannaet a tay-ak.

Sinalaysay dagiti simmaruno a nagpalawag ti adu a sabsabali pay a pamay-an a pangipaneknekan dagiti nagturpos iti Gilead iti panagbalinda a “pudno” a misionero. Nakisarita kadakuada ni Charles Molohan iti tema nga “Agtultuloykayo a Mangpataud iti Nasayaat a Bunga kas Misionero.” Iti panangadawna kadagiti sasao ni apostol Pablo iti Colosas 1:9, 10, pinalagipan ni Kabsat Molohan dagiti nagturpos a ti napalabas a lima a bulanda iti Gilead tinulonganna ida a rumang-ay “iti umiso a pannakaammo iti Dios.” Daytoy ti tumulong kadakuada a mangpataud iti bunga iti nagkadua a pamay-an: babaen ti panangiparangarang iti bunga ti espiritu ti Dios ken babaen ti panangiranud kadagiti kinapudno ti Biblia iti sabsabali.

Simmaruno ni Daniel Sydlik iti Bagi a Manarawidwid buyogen ti mamagpanunot a tema “Dikay Ikompromiso ti Biagyo.” Dinakamatna ti saludsod ni Jesus: “Anianto ti ited ti maysa a tao a kasukat ti kararuana?” (Mateo 16:26) Kinuna ni Kabsat Sydlik: “Insukat dagiti tattao ti kararuada maipaay iti nalaklaka, nanamnam-ay a wagas ti panagbiag.” Nupay kasta, dagidiay addaan iti sibibiag a pammati saanda a makikompromiso no maipasangoda kadagiti pakasubokan ken pakasuotan. Dagiti sasao ni Jesus ipamatmatna a masapul a situtulok ti maysa a ‘mangited,’ a daytat’ panagsakripisio, tapno magun-od ti kararua, wenno biag ti maysa. Nabagbagaan dagiti kabbaro a misionero nga itedda ken Jehova ti amin a kararuada, ti inggat’ kabaelanda, iti serbisiona!

Simmaganad, nagsarita ni William Van de Wall iti Service Department Committee iti tema a “Ni Apostol Pablo​—Ti Ulidan a Maikari a Tuladen.” Inlawlawag ni Kabsat Van de Wall: “Indaulo ni Pablo ti panagmisionero a trabaho idi immuna a siglo.” Kalpasanna, mayannatup ti pannakaitampok ti uppat a pamay-an a nangipakitaan ni apostol Pablo iti nasayaat nga ulidan para kadagiti misionero itatta: (1) ti napudno a pannakaseknan ken ayat ni Pablo iti tattao, (2) ti kinaepektibona iti ministerio, (3) ti naemma a panagkedkedna a mangitan-ok iti bagina, (4) ti awan panagduadua a panagtalekna ken Jehova.

“Palubosanyo ni Jehova a Mangusig Kadakayo iti Baro a Destinoyo” isut’ tema nga inlawlawag ni Lyman A. Swingle iti Bagi a Manarawidwid. Babaen ti panangaramatna ti teksto iti dayta nga aldaw, ti Salmo 139:16, impabigbig ni Kabsat Swingle a, kas kabbaro a misionero, maipasangodanto kadagiti parikut iti pakaidestinuanda ket iti dayta ammo ni Jehova dagiti solusion. “Agpatulongkayo kenkuana,” imbalakadna, “makisaritakay kenkuana no addaankay iti parikut. Ikagumaanyo a tarusan no aniat’ pagayatanna.”

Kalpasanna, nagsarita ni John E. Barr iti Bagi a Manarawidwid iti tema a “Ti Pammatiyo Dumakdakkel iti Kasta Unay.” (2 Tesalonica 1:3) Iti Lucas 17:1, mabasatayo a kinuna ni Jesus: “Saan a maliklikan nga umay dagiti pakaigapuan ti pannakaitibkol.” Naitibkol ti sumagmamano gapu iti personalidad dagiti padada a misionero. Ngem pinaregta ni Kabsat Barr dagiti misionero a maaddaanda iti pammati a kasapulan tapno agbalin a manangpakawan. Kinapudnona, iti daytoy a konteksto a nagpakpakaasi idi dagiti adalan ni Jesus: “Ikkannakami iti ad-adu pay a pammati.” (Lucas 17:2-5) Ti pammati dagiti misionero masuot met babaen kadagiti nagduduma nga organisasional a panagbalbaliw. “Addaantay kadi iti pammati a mangawat kadagitoy,” insaludsod ni Kabsat Barr, “wenno agbalindanto kadi a kasla bantay a lapped?”

Simmaganad ti sumagmamano a pammagbaga ti dua nga instruktor ti Gilead. Indagadag ni Jack Redford kadagiti nagturpos a pagtalinaedenda ti positibo a kababalin. Dinakamatna ti maysa a misionero a pimmanaw iti destinona gapu iti sumagmamano a panangsutil dagiti padana a misionero. Nupay kasta, ballaagannatay ti Kasuratan maibusor iti awan mamaayna a panagluksaw. (Eclesiastes 7:9) “Maaddaankay iti umiso a kababalin,” imbalakadna. “Agbalinkay a manangpakawan kadagiti biddut ken kinaimperpekto ti dadduma iti aglawlawyo.”

Kalpasanna, insaludsod ti registrar ti Gilead, ni U. V. Glass: “Nakasaganakay kadi a mangsaranget a sibaballigi iti ‘panawen ken di mapakpakadaan a pasamak’”? (Eclesiastes 9:11) “Kanayon nga agbaliwbaliw ti estilo ti panagbiagtayo,” kinuna ni Kabsat Glass, “ket dadduma ti makatuok unay.” Adda dagiti misionero a di ninamnama a naipasango iti panagkapuy ti salun-at, sakit, ken parparikut iti pamilia, a pakapilitan ti sumagmamano a mangpanaw iti destinoda. “Uray aniaman ti dumteng a di mapakpakadaan a pasamak,” kinuna ni Kabsat Glass, “ammotayo a sipupuot ni Jehova iti dayta ken maseknan. No agtalektayo kenkuana, ammotayo nga agballigitayto!”

Ti palawag a napauluan iti “Mangilasin Maipaay iti Panagmisionero a Serbisio” isut’ nagnguduan dagiti agsasagadsad a palawag iti bigat. Impalawag ni Theodore Jaracz iti Bagi a Manarawidwid ti saludsod a nadakamat iti pangrugian, nga, “Ania ti misionero?” Kas panangsungbat, inlawlawagna ti Aramid kapitulo 13 ken 14 maipapan iti panagmisionero da Pablo ken Bernabe. Nabatad, saan a naipamaysa dayta a trabaho iti panangrisut kadagiti parikut ti kagimongan, no di ket iti ‘panangideklara iti naimbag a damag.’ (Aramid 13:32) Insaludsod ni Kabsat Jaracz: “Saankay kadi nga umanamong nga impakita da Pablo ken Bernabe no ania a talaga ti pudno a kinamisionero?” Kalpasanna, nakiddaw ti aduanen kapadasan a misionero a ni Robert Tracy iti Mexico a mangiburay iti sumagmamano a makaparagsak a kapadasanna kas maysa nga ebanghelisador.

Nadanon ti tampok ti programa iti bigat bayat nga inyawat ni Kabsat Schroeder dagiti diploma ti 48 a nagturpos. Naragsakan dagiti timmabuno a nakangngeg iti nagan ti 21 a dagdaga a nakaidestinuan dagiti misionero: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, ken Venezuela.

Kalpasan ti panaginana maipaay iti pangngaldaw, nagtataripnong manen ken tinagiragsak dagiti timmabuno ti nabiag a panagadal iti Pagwanawanan, nga indauluan ni Robert P. Johnson iti Service Department. Dagiti miembro ti maika-98 a klase ti nagsungbat kadagiti saludsod. Sinaruno daytoy ti agsasaganad nga interbiu nga indauluan dagiti kameng ti staff ti Gilead. Naparegta unay dagiti timmabuno bayat nga imburay dagiti nagturpos ti kapkapadasanda iti tay-ak ken inyebkasda ti rikriknada maipapan iti pakaidestinuanda kas misionero.

Iti innem ket kagudua a tawen, masarakan ti Gilead kadagiti pasilidad ti Watchtower Society idiay Wallkill, Nueva York. Nupay kasta, idi Abril 1995, nayakar ti eskuelaan sadiay baro a Watchtower Educational Center idiay Patterson, Nueva York. Kasanot’ panagrikna ti pamilia ti Bethel idiay Wallkill maipapan iti daytoy a panagbalbaliw? Iti daytoy a panagturpos, napagsaludsodan ti sumagmamano manipud Wallkill. Dagiti makapikapik-rikna nga ebkasda isut’ pammaneknek a dagiti estudiante ti Gilead nakaibatida kadakuada iti manayon a pakalaglagipan. Nabatad, dagitoy natulok a lallaki ken babbai ket pudno a misionero​—napakumbaba, managsakripisio, maseknanda unay a tumulong iti sabsabali.

Bayat a nagpatingga ti panagturpos, manginanama dagiti isuamin a timmabuno iti Eskuelaan ti Gilead nga itultuloynanto nga aramiden a sibaballigi ti naaramidannan iti nasuroken a 50 a tawen​—mangpataud kadagiti pudno a misionero!

[Kahon iti panid 18]

Estadistika ti Klase:

Bilang dagiti pagilian a nairepresentar: 8

Bilang dagiti pagilian a nakaitudingan: 21

Bilang dagiti estudiante: 48

Promedio nga edad: 32.72

Promedio a tawen iti kinapudno: 15.48

Promedio a tawen iti amin-tiempo a ministerio: 10.91

[Ladawan iti panid 18]

Ti Maika-98 a Nagturpos a Klase ti Watchtower Bible School of Gilead

Iti listaan ditoy baba, dagiti intar nanumeruanda manipud sango nga agpalikud, ket dagiti nagan nailista manipud kanigid nga agpakanawan iti kada intar.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.