Ammoyo Kadi?
Ania ti maadaltayo iti nadakamat iti Biblia a pannakidagus ni Pedro iti maysa nga agkurkurti iti lalat sakbay a naibaon ken Cornelio?
▪ Sigun iti salaysay iti Aramid, nagdagus ni Pedro iti “sumagmamano nga aldaw . . . idiay Joppe iti maysa a Simon, maysa nga agkurkurti iti lalat,” nga “adda balayna iti igid ti baybay.” (Aramid 9:43; 10:6) Imbilang dagiti Judio a narugit ken makaipababa ti trabaho ti agkurkurti iti lalat. Iti Talmud, nababbaba dagiti agkurkurti iti lalat ngem dagiti agkolkolekta iti ibleng ti animal. Kanayon a masagid ni Simon ti bangkay dagiti animal, isu a naynay a naibilang a narugit sigun iti Linteg. (Levitico 5:2; 11:39) Dakamaten ti nadumaduma a reperensia a mabalin a nagaramat ni Simon iti danum ti baybay iti trabahona, ket nalabit adayo iti ili ti pagtartrabahuanna gapu ta “nabangsit ti proseso” ti panagkurti iti lalat.
Uray kasta ti kasasaad, nabatad a di nagreklamo ni Pedro iti panagdagusna iti balay ni Simon. Ipakita daytoy a nalabit nasursuro ni Pedro nga iwaksi iti kaugalian dagiti Judio a panangidumduma kadagiti tattao nga ibilangda a narugit, kas iti inaramid ni Jesus.—Mateo 9:11; Lucas 7:36-50.
Ania ti kaipapanan ti kinuna ni Jesus a “sinaom a mismo dayta”?
▪ Idi a ti Judio a nangato a padi a ni Caifas kiniddawna ken Jesus nga ipalgakna no isu ti Kristo nga Anak ti Dios, kinuna ni Jesus: “Sinaom a mismo dayta.” (Mateo 26:63, 64) Ania ti kayatna a sawen?
Saan a padpadasen ni Jesus a liklikan ti saludsod ni Caifas. Agparang a ti ebkas a “sinaom a mismo dayta” ket gagangay a pagsasao dagiti Judio a mangpasingked a pudno ti naibaga. Kas pagarigan, ti Talmud ti Jerusalem, maysa a narelihiosuan a libro dagiti Judio a nagupgop idi maikapat a siglo C.E., dakamatenna ti maysa a lalaki a Judio a napagsaludsodan no natayen ti rabbi, ket simmungbat a kinunana: “Nasaomon.” Natarusan daytoy kas pammasingked a talaga a natayen ti rabbi.
Binigbig ni Jesus nga adda autoridad ti nangato a padi a mamagsapata kenkuana a mangibaga iti pudno. Maysa pay, no agulimek laeng ni Jesus, kaawatan nga ilibakna nga isu ti Kristo. Gapuna, ti sungbat ni Jesus a: “Sinaom a mismo dayta” kaipapananna nga aminenna iti nangato a padi nga isu ti Kristo. Iti umasping a salaysay ni Marcos, idi kiniddaw ni Caifas nga ipalgak ni Jesus no isu ti Mesias, situtured nga insungbat ni Jesus: “Siak.”—Marcos 14:62; kitaem met ti Mateo 26:25 ken Marcos 15:2.
[Ladawan iti panid 18]
Pagkurtian ti lalat idiay Fez, Morocco