AGKURKURTI ITI LALAT

Tao a nasigo iti propesion a panagkurti, ti trabaho a panamagbalin a lalat kadagiti kudil ti animal a kalpasanna maaramat iti panagaramid iti nadumaduma a kita ti aruaten. (2Ar 1:8; Mt 3:4) Di pagduaduaan a ti pakaar-aramidan ti panagkurti iti naglabas ket kas iti pakaar-aramidan dayta iti nabiit pay idiay Makintengnga a Daya​—iti maysa wenno dua ti siledna a pagkurtian, nga ayan dagiti rimienta ken tangke a pagisaganaan kadagiti kudil. Ti pamunganayan a proseso ti panangisagana iti lalat ramanenna idi ti (1) panangpalukay kadagiti dutdot, gagangay a babaen ti pagyuperan nga apug; (2) panangikkat kadagiti dutdot, saggabassit a lasag, ken taba a dimket iti kudil; ken (3) panangkurti iti kudil babaen iti arak a naaramid manipud iti bambanag a kas iti ukis ti sumac wenno ti roble, wenno manipud iti dadduma pay a kita ti mula.

Nangbusbos ni Pedro iti “sumagmamano nga aldaw . . . idiay Joppe iti maysa a Simon, maysa nga agkurkurti iti lalat,” a ti balayna adda iti igid ti baybay.​—Ara 9:43; 10:32.