Saludsod Dagiti Agbasbasa
Adda Kadi Aniaman a Puli nga Idumduma ti Dios?
▪ Awan. Silalawag a kunaen ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.
Natantan-ok ti panangmatmat ti Dios iti daytoy a banag ngem iti panangmatmat ti tao. Patien ti adu a tattao nga adda natantan-ok a puli (masansan a ti pulida). Umasping iti dayta ti kapanunotan ni Charles Darwin, a nagkuna: “Iti masanguanan, . . . dagiti sibilisado a puli ti tao mabalin a pukawen ken suktandanto dagiti saan a sibilisado a puli.” Nakalkaldaang ta adu ti nagbalin a biktima dagidiay mangipagarup a natantan-ok ti pulida.
Talaga kadi a natantan-ok ti maysa a puli ngem iti sabali? Kas pagarigan, napaneknekan kadin ti siensia a natantan-ok ti gene ti dadduma a puli, ngem nakapkapuy met ti dadduma? Saan a kasta ti natakuatan ni Propesor Bryan Sykes a maysa a geneticist iti Oxford University. Kunana: “Awan ti pagdudumaan dagiti gene ti aniaman a puli. . . . Kanayon a maisaludsod kaniak no adda Griego a DNA wenno Italiano a gene, siempre, awan. . . . Agkakabagiantayo amin.”
Maitunos dagita a takuat iti mabasatayo iti Kasuratan. Isuro ti Biblia a pinarsua ti Dios ti maysa a lalaki ken maysa a babai, a kadakuada a nagtaud ti amin a tao. (Genesis 3:20; Aramid 17:26) No kasta, iti imatang ti Dios, adda laeng maymaysa a puli ti tao.
Aniaman ti maris ti kudil wenno langa ti maysa a tao, awan idumduma ni Jehova. Imbes ketdi, napatpateg kenkuana ti linaon ti piguratibo a puso wenno ti kinataotayo. Kunana: “Kitaen ti tao ti akinruar a langa, ngem siak, kitaek ti puso.” (1 Samuel 16:7, Ti Baro a Naimbag a Damag Biblia) Maparegtatayo no laglagipentayo dayta. Ngem kasano?
Aniaman ti puli a nagtaudantayo, adu kadatayo ti saan a kontento iti langatayo, ngem saantayon a mabalbaliwan dayta. Nupay kasta, kabaelantayo a pasayaaten ti banag a kapatgan, ti panagpampanunot ken rikriknatayo. (Colosas 3:9-11) Mabalin a pagarupentayo a natantan-ok wenno nababbabatayo ngem kadagidiay sabali ti pulida. Yantangay saan a maitunos dagita kapanunotan iti panangmatmat ti Dios, ikagumaantayo ngarud nga iwaksi ti aniaman kadagita a rikna.—Salmo 139:23, 24.
Manamnamatayo ti tulong ni Jehova bayat nga ikagkagumaantayo a tuladen ti panangmatmatna. Ipalagip kadatayo ti Saona: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9) Pudno dayta aniaman ti puli a nagtaudantayo.