Pagalagadan ti Biblia—Apay nga Annuroten?
INUUGMA kadi ken istrikto unay ti panangmatmat ti Biblia maipapan iti sekso? Saan. Imbes ketdi, matulongannatayo a mangliklik iti:
▪ Saksakit a mayakar babaen iti sekso
▪ Panagsikog a di pay nagkasar
▪ Nasaem nga epekto ti narakrak a panagasawa
▪ Maduddudog a konsiensia
▪ Nababa a panangmatmat iti bagi gapu iti pananggundaway ti sabali
Ti Namarsua a ni Jehova a Diosa kayatna a maragsakan ken magunggonaantayo iti panangusartayo kadagiti sagutna. Ti Dios isu “Daydiay mangisursuro kenka tapno magunggonaam ti bagim.” (Isaias 48:17) Dagiti mangan-annurot kadagiti pagalagadan ti Biblia maipapan iti sekso maaddaanda iti:
▪ Anamong ti Dios
▪ Natalna a panunot
▪ Natibtibker a relasion ti pamilia
▪ Naimbag a reputasion
▪ Panagraem iti bagi
Ngem kasanon no saan a mayannurot iti moral a pagalagadan ti Biblia ti panagbiagmo? Posible kadi a mabalbaliwam dayta? Isingir kadi kenka ti Dios ti napalabas nga ar-aramidmo?
Usigem daytoy: Sumagmamano a kameng ti kongregasion Kristiano idi umuna a siglo ti dati a mannakiabig, mannakikamalala, ken homoseksual. Inkeddengda a baliwan ti panagbiagda, ket nagunggonaanda. (1 Corinto 6:9-11) Kasta met ti inaramid ti rinibu a tattao ita iti intero a lubong. Inwaksida ti dati nga imoral a panagbiagda ket nagunggonaanda iti panangannurotda kadagiti pagalagadan ti Biblia. Kas pagarigan, usigem ti kapadasan ni Sarah a nadakamat iti umuna nga artikulo.
“Dagus a Nabang-aranak”
Natakuatan ni Sarah a saan a naipaay ti imoral a panagbiagna ti wayawaya ken pannakapnek a birbirokenna. “Sidsidirennak ti konsiensiak,” kinunana. “Mabain ken madanaganak amangan no agsikog ken agsakitak. Patiek nga adda Dios, ken ammok a masaksaktan ti riknana gapu iti wagas ti panagbiagko. Narugit ti panagkitak iti bagik.”
Idi agangay, natignay ni Sarah a mangbaliw iti panagbiagna. Nagpatulong kadagiti nagannakna a Saksi ni Jehova ken kadagiti kualipikado a Kristiano a panglakayen iti lugarda. “Nasdaawak iti pannakaseknan ken ayat dagiti dadakkelko ken dagiti panglakayen iti kongregasion,” kuna ni Sarah. “Dagus a nabang-aranak.”
Adda itan dua nga annak ni Sarah. Kunana: “Ibagbagak kadagiti annakko no ania ti napalabasko. Kayatko a maawatanda a dakes ti pagbanagan ti di mangikankano kadagiti pagalagadan ti Dios. Kayatko a tulongan ida a mangbigbig iti pisikal, mental, ken emosional a pagimbagan ti panangannurot kadagiti pagalagadan ti Dios maipapan iti sekso. Patiek nga inikkannatayo ti Dios kadagiti moral a pagalagadan tapno saantayo nga agsagaba.”
Magunggonaanka met no agpaiturongka iti naayat a panangiwanwan ti Dios. Kastoy ti kari ti Biblia: “Dagiti bilin manipud ken Jehova nalintegda, mamagrag-o iti puso; ti bilin ni Jehova nadalus, mamagsilnag iti matmata. . . . Iti panangsalimetmet kadakuada adda dakkel a gunggona.”—Salmo 19:8, 11.b
[Footnotes]
a Jehova ti personal a nagan ti Dios kas nailanad iti Biblia.
b Tapno maammuam ti ad-adu pay a praktikal a balakad ti Biblia, makisaritaka kadagiti Saksi ni Jehova iti lugaryo, wenno agsuratka iti maitutop nga adres a nailista iti panid 4 wenno lukatam ti Web site a www.watchtower.org.
[Blurb iti panid 8]
Masansan a nasaem ti epekto ti di panangikankano kadagiti pagalagadan ti Biblia
[Blurb iti panid 9]
Nadalus ti konsiensia dagidiay mangan-annurot kadagiti pagalagadan ti Biblia ken natibtibker ti relasion ti pamiliada