Kaano a Dumteng ti Gubat ti Armagedon?

“Nakitak, ket, adtoy! maysa a dakkel a bunggoy, nga awan ti tao a nakabael a mangbilang, manipud kadagiti amin a nasion ken kadagiti tribu ken kadagiti ili ken kadagiti pagsasao, a . . . naggapu iti dakkel a rigat.”​—APOCALIPSIS 7:9, 14.

MAIKUNATAYO nga asidegen ti gubat ti Armagedon. Kasano?

Adda itan ti sangalubongan a bunggoy dagiti tattao nga agserserbi ken Jehova ken mangan-annurot kadagiti nalinteg a pagalagadan ti Biblia. Iti tulong ti Dios, minilion a tattao manipud iti amin a nasion, tribu, ken pagsasao ti maum-ummong a mangbukel iti panagkakabsat nga agkaykaysa ken agiinnayat dagiti miembrona. Kasta dagiti Saksi ni Jehova.​—Juan 13:35.

Dandanin ummongen ni Satanas dagiti buyotna tapno isayangkatna ti kakaruan a panangraut kadagitoy a mannakikappia ken kasla awan gawayna a tattao. (Ezequiel 38:8-12; Apocalipsis 16:13, 14, 16) Kasano a masiguradom dayta? Deskribiren ti Biblia dagiti espesipiko a pasamak a makatulong kadatayo a mangammo no kaano a dumteng ti gubat ti Armagedon. Adu kadagitoy ti matungtungpal itan.

Dagiti Padto a Matungtungpal Itan

Dinamag dagiti adalan ni Jesus no kasano a maammuan dagiti tattao nga agbibiagdan iti “panungpalan ti sistema ti bambanag.” (Mateo 24:3) Iti sungbat ni Jesus, dinakamatna ti maysa a panawen a “ti nasion tumakderto a bumusor iti nasion ken ti pagarian a bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso.” Sana kinuna: “Amin dagitoy a banag ket pangrugian dagiti ut-ot ti panagrigat.” (Mateo 24:7, 8) Dinakamat ni apostol Pablo daytoy met laeng a panawen kas ‘maudi nga al-aldaw,’ a kinunana a dagita nga aldaw ket “napeggad a tiempo a narigat a pakilangenan.” (2 Timoteo 3:1) Panagkunam, matungtungpal ngatan dagitoy a naipadto a pasamak?

Apay ngata a nakarigrigat daytoy a tiempo? Imbaga ni apostol Juan ti makagapu idi impadtona nga ‘ababa laengen ti tiempo’ ni Satanas ken dagiti demoniona a mangaramid iti kaykayatda ditoy daga. Nadeskribir nga addanto “dakkel nga unget” ni Satanas iti dayta a tiempo. (Apocalipsis 12:7-12) Madlawmo kadi a managpungpungtot ken naranggas dagiti tattao ita, saan laeng nga iti maysa a lugar no di ket iti intero a lubong?

Imbaga met ni Jesus a bayat dayta a tiempo ti rigat, maibanagto ti naisangsangayan a trabaho. “Daytoy naimbag a damag ti pagarian [ti Dios],” kinunana, “maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Ikaskasaba itan dagiti Saksi ni Jehova iti nasurok a 235 a daga ti naimbag a damag ti Pagarian ti Dios iti nasurok a 500 a pagsasao. Ti dua a naibatay-Biblia a pagiwarnakda, Ti Pagwanawanan ken ti Agriingkayo!, ti kasaknapan pay laeng a maiwarwaras a magasin. Impatarus met dagiti Saksi ti Biblia iti agarup 100 a pagsasao. Dagita a trabaho ket ar-aramiden dagiti boluntario ken masupsuportaran kadagiti naimpusuan a donasion. Saan ngata a daytoy a nakasaksaknap a panangasaba ti kaitungpalan ti padto ni Jesus?

Saggaysa met a dakamaten ti Biblia dagiti pasamak a mangiturong iti gubat iti nagbaetan ni Jehova a Dios ken dagiti bumusbusor kenkuana. Usigem ti tallo kadagita a padto a makitamto a matungpal.

Paspasamak a Makitamto a Matungpal

Padto 1. Kuna ti Biblia a dagiti nasion mangipaulogdanto iti maysa a deklarasion ti “talna ken talged.” Ipagarupdanto a dandanidan masolbar dagiti kangrunaan a problema. Nupay kasta, dinto pay la agari ti talna kalpasan dayta a pasamak.​—1 Tesalonica 5:1-3.

Padto 2. Kalpasanna, ikeddengto ti nadumaduma a gobierno a busoren dagiti narelihiosuan nga organisasion iti intero a lubong. Iti Biblia, dagitoy a gobierno ti insimbolo ti maysa nga atap nga animal; ket dagiti palso a relihion ditoy lubong ti insimbolo ti maysa a babai nga agsaksakay dayta nga animal. (Apocalipsis 17:3, 15-18) Daytoy a simboliko nga animal saannanto a mapupuotan nga ar-aramidenna ti kayat ti Dios babaen ti panangdadaelna kadagiti relihion a siuulbod nga agkunkuna a pannakabagi ida ti Dios.

Kastoy ti panangdeskribir ni apostol Juan iti daytoy nga eksena: “Ti sangapulo a sara a nakitam, ken ti atap nga animal, dagitoy guraendanto ti balangkantis ket pagbalinendanto a walangwalang ken lamolamo, ket lamutendanto dagiti nalasag a pasetna ket isu puorandanto a naan-anay iti apuy. Ta ti Dios inkabilna dayta kadagiti pusoda ti panangitungpalda ti panunotna.”​—Apocalipsis 17:16, 17.

Padto 3. Kalpasan ti naballigi a pannakaraut dagiti palso a relihion, ummongento ni Satanas dagiti nasion tapno rautenda dagiti agdaydayaw ken Jehova a Dios.​—Apocalipsis 7:14; Mateo 24:21.

Anianto ti Epekto Dayta Kenka?

No saanmo pay a nausig ti Biblia, amangan no dimo patien a mapasamakto dagiti nadakamat. Ngem sigurado a matungpalto ti amin a detalye dagita a pasamak ken asidegen a matungpalda. Patalgedan met dayta ti nakaad-adu a natungpalen a padto ti Biblia.a

Apay a dimo iwayaan nga ammuen no apay a kombinsido dagiti Saksi ni Jehova nga asidegen ti “gubat ti naindaklan nga aldaw ti Dios a Mannakabalin-amin,” ken no apay a saanmo a rumbeng a pagbutngan dayta? Kiddawem nga ilawlawagda ti kunaen ti Biblia a masapul nga aramidem tapno mairamanka kadagidiay salakniban ni Jehova a Dios. (Apocalipsis 16:14) Mabalin a mabalbaliwan ti panangmatmatmo iti masanguanan gapu iti masursurom.

[Footnote]

[Blurb iti panid 8]

Saan ngata a ti trabaho dagiti Saksi ni Jehova ket kaitungpalan ti padto ti Biblia?