SUHETO ITI AKKUB | KAYATMO KADI NGA ADALEN TI BIBLIA?

Programa a Panagadal iti Biblia Para iti Amin

Nalatak dagiti Saksi ni Jehova iti intero a lubong gapu iti panangasabada iti publiko. Ngem ammom kadi a mangikonkonduktakami met iti programa a panagadal iti Biblia iti intero a lubong?

Lalaki a makipagad-adal iti Biblia iti pagtrabahuanna

Idi 2014, nasurok a 8,000,000 a Saksi iti 240 a pagilian ti nangikondukta iti gistay 9,500,000 a panangyadal iti Biblia iti kada bulan.a Ad-adu nga amang ti bilang dagiti agad-adal iti Biblia ngem iti populasion ti tunggal maysa kadagiti 140 a pagilian!

Tapno maitungpal daytoy a panangisuro, tinawen a mangipabpablaak dagiti Saksi ni Jehova iti agarup maysa ket kagudua a bilion a Biblia, libro, magasin, ken dadduma pay a katulongan iti panangyadal iti Biblia—iti agarup 700 a lengguahe! Gapu iti daytoy di maartapan a panagipablaak, maadal dagiti tattao ti Biblia iti lengguahe a kayatda.

“Diak pulos kayat ti agadal iti eskuelaan, ngem magustuak ti agadal iti Biblia. Talaga a makaliwliwa dagiti maad-adalko!”—Katlego, South Africa.

“Daytoy a panagadal sinungbatanna ti amin a saludsodko ken dadduma pay.”—Bertha, Mexico.

“Iti pagtaengak idi ti pagadalanmi iti Biblia iti oras a makitak a kombeniente. Ania koma pay ti sapulek!”—Eziquiel, Brazil.

“No dadduma, agpaut ti panagadalmi iti 15 agingga iti 30 a minuto—no dadduma met, napapaut pay—aniaman ti kombeniente kaniak.”—Viniana, Australia.

“Libre ti panagadal—agasem!”—Aimé, Benin.

“Nakaan-anus ken nakasingsingpet ti mangyad-adal kaniak. Simmingedkami iti maysa ken maysa.”—Karen, Northern Ireland.

“Adu ti agad-adal iti Biblia uray saanda nga agbalin a Saksi.”—Denton, England.

SUNGBAT DAGITI MASANSAN A MAISALUDSOD MAIPAPAN ITI PROGRAMA A PANAGADAL ITI BIBLIA

Kasano ti panagadal iti Biblia?

Mangpilikami iti nadumaduma a topiko iti Biblia ken usigenmi dagiti nainaig a teksto. Kas pagarigan, sungbatan ti Biblia dagiti saludsod a kas iti: Asino ti Dios? Ania a kita a persona ti Dios? Adda kadi naganna? Sadino ti pagnanaedanna? Mabalintay kadi ti suminged kenkuana? Ngem ti problema ket no ania a paset ti Biblia ti pakasarakantayo kadagiti sungbat.

Tapno matulongan dagiti tattao a mangbirok kadagiti sungbat, masansan nga us-usarenmi ti 224 ti panidna a libro nga Ania a Talaga ti Isursuro ti Biblia?b Nadisenio daytoy a mangtulong kadagiti tattao a mangtarus kadagiti kangrunaan a sursuro ti Biblia. Ramanenna dagiti topiko maipapan iti Dios, Jesu-Kristo, panagsagaba ti tao, panagungar, kararag, ken dadduma pay.

Kaano ken sadino a maaramid ti panagadal?

Maaramid ti panagadal iti oras ken lugar a kombeniente kenka.

Kasano kapaut ti tunggal panagadal?

Adu ti mangilatlatang iti maysa nga oras wenno nasursurok pay iti kada lawas a mangadal iti Biblia. Ngem mabalin nga agbaliw ti kapaut dayta, depende iti eskediulmo. Dadduma a panagadal ket agpaut laeng iti 10 wenno 15 a minuto iti kada lawas.

Mano ti bayadan iti panagadal?

Libre ti panagadal agraman dagiti publikasion a maadal. Maitunos daytoy iti imbilin ni Jesus kadagiti adalanna: “Inawatyo nga awan bayadna, itedyo nga awan bayadna.”—Mateo 10:8.

Kasano kapaut ti programa a panagadal?

Agdepende dayta kenka. Adda 19 a maadal a topiko iti libro nga Ania a Talaga ti Isursuro ti Biblia? Mabalinmo nga adalen ti amin wenno aniaman kadagita a topiko iti kapartak a kombeniente kenka.

Masapul kadi nga agbalinak a maysa a Saksi ni Jehova?

Saan. Raemenmi ti kalintegan ti tunggal maysa nga agpili no ania ti patienna. Ngem dagidiay makaadal kadagiti kangrunaan a sursuro ti Biblia makaaramidda iti umiso a desision.

Pakasarakak kadagiti kanayonan nga impormasion?

Mangipapaay ti Web site a jw.org iti umiso nga impormasion maipapan kadagiti patpatien ken aktibidad dagiti Saksi ni Jehova.

Kasanoak a makapagkiddaw iti panagadal iti Biblia?

Agkiddawka online iti www.jw.org/ilo.
Agsuratka iti adres nga adda iti panid 2 daytoy a magasin.

a Gagangay a maikonkondukta ti panagadal iti Biblia iti kada indibidual wenno babassit a grupo dagiti tattao.

b Impablaak dagiti Saksi ni Jehova. Nasuroken a 230 a milion a kopia daytoy a libro ti nayimprenta iti nasurok a 260 a lengguahe.

TULONG KADAGITI PAMILIA

“Idi nangrugi ni baketko a makipagadal iti Biblia, nadlawko a dakkel ti nagbalbaliwanna. Simmayaat ti relasionmi. Kayatko a maammuan no ania ti ad-adalenna isu a nakipagadalak met. Nagbalinak a nasaysayaat a tao gapu kadagiti nasursurok. Simminged ti pamiliami gapu iti panagadalmi iti Biblia.”—Eziquiel.

“Idi rinugiakon ti makipagadal iti Biblia, insardengkon ti agdroga ken agbartek. Nasursurok met a kontrolen ti pungtotko. Nadaldalus ken naur-urnosen ti balaymi. Ad-adda a maapresiarko ti pamiliami ken maay-ayatanak a mangaramid kadagiti pagragsakanda. Nakaragragsakak.”—Karen.

“Adda dagiti manglalais iti panagadalko iti Biblia. Ngem kayat ni lakayko nga agadalak. Kunana: ‘Diak dengdenggen ti ibagbaga dagiti tattao. Nakitak a dakkel ti nagbalbaliwam—dayta ti napateg kaniak. Itultuloymo ti ar-aramidem.’ Naragragsak itan ti pamiliami!”—Viniana.