Itultuloyyo nga Ipateg Dagiti Kasta a Lallaki

MANIPUD idi 1992, nangdutok ti Bagi a Manarawidwid kadagiti aduanen kapadasan ken nataengan iti naespirituan a Kristiano a panglakayen a tumulong iti trabaho dagiti komite ti Bagi a Manarawidwid.a Dagitoy a katulongan a paset ti “sabsabali a karnero” mangipapaayda iti nagpateg a tulong iti Bagi a Manarawidwid. (Juan 10:16) Linawas a makimitingda iti komite a nakaitudinganda ken mangipaayda kadagiti impormasion ken singasing. Dagiti miembro ti Bagi a Manarawidwid ti mangaramid iti desision ngem dagiti katulongan ti mangipatungpal. Aramidenda met ti aniaman a maipaannong kadakuada. Kuyogenda dagiti miembro ti Bagi a Manarawidwid kadagiti espesial ken internasional a kombension. Maibaonda met a bumisita kadagiti sanga nga opisina kas pannakabagi ti hedkuarter.

Kinuna ti maysa kadagiti katulongan nga agserserbin manipud nairugi dayta nga urnos: “No itungpalko ti annongek, ad-adda a maipamaysa ti Bagi a Manarawidwid nga asikasuen dagiti naespirituan a banag.” Kastoy pay ti kuna ti maysa a kabsat a 20 a tawenen nga agserserbi kas katulongan: “Awan ti pangipadaak iti daytoy a pribilehiok.”

Adu a responsabilidad ti iparebbeng ti Bagi a Manarawidwid kadagiti katulonganda ket apresiarenda ti nagsayaat a maar-aramidan dagitoy a matalek ken nagaget a kakabsat. Sapay koma ta ‘itultuloytayo nga ibilang a maipatpateg dagiti kasta a tattao.’​—Fil. 2:29.