Saludsod
● Ania iti rebbengen dagiti agserbi nga attendant kadagiti gimong ti kongregasion?
Dagiti attendant isuda ti mangipaay iti nabara a panangabrasa kadagiti amin a tumabuno iti gimong. Ti rebbengenda ramanenna ti panangpatugaw kadagidiay maudi a sumangpet, mangirekord iti bilang ti timmabuno, mangsalimetmet iti talna ken urnos, ken mangtaming iti bentilasion ti Kingdom Hall. Masapul a mannakigayyem dagiti attendant, kakabsat a lallaki a makabael a mangimaton kadagiti responsabilidadda.—om p. 63-4.
Masapul nga alerto dagiti attendant iti kasapulan dagiti agdadamo a sangaili, a maiparikna kadakuada a maawatda, a tulongan ida a sumapul iti tugawda. No maigiya dagiti agdadamo a tumabuno iti pagtugawanda, ikagumaan dagiti attendant a saanda a madisturbo dagiti nalpasen a nakatugaw. No dadduma maipaayan dagiti agdadamo iti magasina a pagadalanda.
Ti panangtaginayon iti urnos ken talna bayat ti gimong ket nasken unay. Idinto ta paregtaen dagiti nagannak nga itugotda dagiti annakda iti gimong, adda maaramid a pannakasinga no dadduma. Ngem no dagiti ubbing ket agtultuloyda a di makatalna ken naariwawa, maysa nga attendant ti siaanus a mangitukon iti tulong, a nalabit a mabalakadan iti naganak nga iruarna pay laeng bassit daytoy ubing manipud iti pagtataripnongan. No dagiti nagannak nga addaan ti ubbing ket agtugawda idiay asideg iti pagruaran no kasapulan, bassit laeng a pannaksinga ti maaramid.
Kadagiti lugar a problema iti siguridad, madutokan dagiti attendant a mangsaluad a maibusor iti bandalismo wenno gulo nga iyeg dagiti bumusbusor. No adda man sumrek iti Kingdom Hall a manggulo iti gimong, masapul a makiddaw kenkuana a rummuar. Ngem no agkitakit ken itultuloyna ti mangriribuk, dumawat dagiti panglakayen iti tulong ti autoridad. Kadagiti dadduma a lugar nalabit a kasapulan a madutokan dagiti kakabsat a mangbantay kadagiti nakaparke a lugan iti ruar ti Kingdom Hall bayat iti gimong tapno malapdan iti panangdadael wenno panangtakaw.
No madama a maala ti bilang dagiti timmabuno, amin dagiti adulto ken agtutubo a dumdumngeg ken magunggonaan kadagiti gimong, uray no limitado laeng, masapul a maibilangda.