Dagiti Urnos Para Kadagiti Lugar a Pagdaydayawan

NABILIN dagiti pudno nga agdaydayaw ken Jehova nga agtataripnongda tapno agsursuro ken agpipinnaregtada. (Heb. 10:23-25) Ti umuna a lugar a nagdaydayawan ti ili a pinili ti Dios, dagiti Israelita, ket ti “tabernakulo, ti tolda a pagkonsultaan.” (Ex. 39:32, 40) Idi agangay, nangbangon ni Solomon nga anak ni David iti balay, wenno templo a pakaidayawan ti Dios. (1 Ar. 9:3) Kalpasan a nadadael dayta a templo idi 607 B.C.E., nagtataripnong dagiti Judio kadagiti pasdek a maawagan iti sinagoga tapno agdaydayawda iti Dios. Idi agangay, naibangon manen ti templo, ket nausar manen kas sentro ti pudno a panagdaydayaw. Nangisuro ni Jesus kadagiti sinagoga ken iti templo. (Luc. 4:16; Juan 18:20) Adda pay inangay ni Jesus a gimong iti bantay.​—Mat. 5:1–7:29.

² Kalpasan ti ipapatay ni Jesus, nagtataripnong dagiti Kristiano kadagiti publiko a lugar ken kadagiti pagtaengan tapno isuroda ti Kasuratan ken makalangenda dagiti kapammatianda. (Ara. 19:8, 9; Roma 16:3, 5; Col. 4:15; Flm. 2) No dadduma, masapul nga agtataripnong dagiti nagkauna a Kristiano kadagiti naiputputong a lugar tapno saan ida a makita dagiti manangidadanes. Dagiti matalek nga adipen ti Dios idi un-unana tartarigagayanda ti agtataripnong kadagiti lugar a pagdaydayawan tapno ‘sursuruan ida ni Jehova.’​—Isa. 54:13.

³ Aggigimong met ita dagiti Kristiano kadagiti pagtaengan ken publiko a lugar. Masansan a mausar dagiti pagtaengan a pagtataripnongan sakbay ti panangasaba. Maysa a pribilehio daytoy para kadagidiay mangipausar iti pagtaenganda a pagtataripnongan. Adu ti nagunggonaan iti naespirituan gapu ta impausarda ti pagtaenganda.

KINGDOM HALL

⁴ Kingdom Hall ti kangrunaan a paggigimongan dagiti Saksi ni Jehova. Kaaduanna, magatang ti maysa a lote sa maibangon ti baro a Kingdom Hall wenno matarimaan ti dati a naibangonen a pasdek. Tapno makainut iti gastos ken mausar a naimbag dagitoy a pasdek, mabalin a sumagmamano a kongregasion ti agusar iti Kingdom Hall no praktikal. Iti dadduma a lugar, kasapulan nga agabangda iti pasdek. Masapul a maidedikar dagiti baro a Kingdom Hall ken no adu ti nabalbaliwan wenno natarimaan iti dati a maus-usar a Kingdom Hall. Ngem no bassit laeng a panagbalbaliw ti naaramid iti datin a Kingdom Hall, saanen a kasapulan a maidedikar.

⁵ Ti Kingdom Hall ket saan a kasapulan a nagarbo a pasdek tapno pagsiddaawen ti sabsabali. Nupay nagduduma ti diseniona iti nadumaduma a lugar, kanayon a mausar iti praktikal a pamay-an. (Ara. 17:24) Masapul a komportable ken kombiniente daytoy a pakaangayan dagiti Nakristianuan a gimong a maibagay iti kasasaad iti maysa a lugar.

⁶ Tumultulong ti amin a kongregasion dagiti Saksi ni Jehova tapno mamantener ken matarimaan dagiti Kingdom Hall nga us-usarenda. Awan ti maaramid a panagkolekta wenno panagur-or iti pondo. Adda kahon ti kontribusion a pagitinnagan dagiti tumabuno iti gimong tapno masupusopan dagiti paggastuan mainaig iti pannakausar ti Kingdom Hall. Aramidenda daytoy a situtulok ken naimpusuan.​—2 Cor. 9:7.

⁷ Ibilang dagiti miembro ti kongregasion a pribilehioda a suportaran ti paggastuan iti Kingdom Hall ken agboluntario tapno mataginayon a nadalus ken nasayaat ti kasasaadna. Gagangay a maysa a panglakayen wenno ministerial nga adipen ti matudingan a mangyeskediul iti panagdalus. Kaaduanna, adda batang nga agdalus ti tunggal grupo iti panangasaba, nga idauluan ti manangaywan iti grupo wenno ti katulonganna. Iti man uneg ken ruar ti Kingdom Hall, maitutop koma nga irepresentarna ni Jehova ken ti organisasionna.

⁸ No saan laeng a maymaysa a kongregasion ti aggigimong iti maysa a Kingdom Hall, dagiti panglakayen kadagita a kongregasion mangbukelda iti Kingdom Hall Operating Committee a mangasikaso iti pannakatarimaan ti pasdek ken sanikua. Dagiti bagi dagiti panglakayen ti mangpili iti kabsat nga agbalin a koordineytor ti operating committee. Babaen ti panangiwanwan dagiti bagi dagiti panglakayen, imonitor ti operating committee ti panagdalus ti Kingdom Hall ken siguraduenna a mataginayon a nasayaat ti kasasaad ken kanayon nga adda mausar a pagdalus. Kasapulan ti panagtitinnulong dagiti kongregasion nga agus-usar.

⁹ No adu a kongregasion ti agus-usar iti maymaysa a Kingdom Hall, mabalin nga agsisinnukat ti oras ti gimong. Aramiden daytoy dagiti panglakayen gapu ta maseknanda iti maysa ken maysa ken adda panagayatda iti kakabsatda. (Fil. 2:2-4; 1 Ped. 3:8) Saan koma a maymaysa laeng a kongregasion ti agdesision para iti dadduma a kongregasion. No bisitaen ti manangaywan iti sirkito ti maysa kadagiti kongregasion a mangus-usar iti Kingdom Hall, baliwan ti dadduma a kongregasion dagiti oras ti gimongda iti dayta a lawas no kasapulan.

¹⁰ Mabalin a mausar ti Kingdom Hall para iti kasar ken palawag ti pumpon babaen ti pammalubos ti Komite ti Serbisio ti Kongregasion. Usigen a naimbag dagiti panglakayen ti kiddaw ken ibatayda ti desisionda kadagiti instruksion ti sanga nga opisina.

¹¹ Manamnama a nasayaat ti panagtignay dagiti mapalubosan a mangusar iti Kingdom Hall ken maitutop koma para kadagiti pudno a Kristiano. Awan koma ti maaramid iti Kingdom Hall a mabalin a pakaitibkolan dagiti kakabsat wenno pakaumsian ti nagan ni Jehova ken ti naimbag a nagan ti kongregasion. (Fil. 2:14, 15) Babaen ti panangiwanwan ti sanga nga opisina, mabalin nga usaren ti Kingdom Hall para kadagiti naespirituan nga aktibidad, kas iti Kingdom Ministry School ken ti Pioneer Service School.

¹² Adda koma panagraem ti kongregasion iti lugar a paggigimonganda. Ti koma panagkawkawes, panaglanglanga, ken kababalintayo ipakitana a raraementayo ni Jehova, ti Dios a daydayawentayo. (Ecl. 5:1; 1 Tim. 2:9, 10) Ap-apresiarentayo dagiti Nakristianuan a gimong no iyaplikartayo daytoy a balakad.

¹³ Napateg a taginayonentayo ti kinaurnos kabayatan dagiti gimong. Masapul a katugaw dagiti nagannak ti annakda. Maparegta dagiti nagannak nga adda babassit nga annakda nga agtugawda iti lugar a saan unay a makaistorbo ken no kasapulan, iruarda ti annakda tapno disiplinaenda wenno asikasuenda ti dadduma pay a banag.

¹⁴ Madutokan dagiti kualipikado a kakabsat a lallaki nga agserbi kas attendant kadagiti gimong iti Kingdom Hall. Masapul nga alerto, mannakigayyem, ken nataktikada. Karaman kadagiti responsabilidadda ti mangkablaaw kadagiti kabbaro ken ipariknada a maawatda, mangbilang kadagiti timmabuno, tumulongda a mangbirok iti pagtugawan dagiti naladaw, ken kitaenda no nasayaat ti temperatura ken bentilasion ti Kingdom Hall. No kasapulan, dagiti attendant palagipanda dagiti nagannak a bantayanda ti annakda tapno saanda a tumanaray sakbay ken kalpasan ti gimong wenno agay-ayam iti plataporma. Mabalin a sitataktika nga ibaga ti attendant iti nagannak nga iruarna pay laeng ti naalikuteg nga anakna tapno saan a makaistorbo kadagiti agdengdengngeg. Dakkel ti maitulong dagiti attendant tapno magunggonaan ti tunggal maysa iti gimong. Nasaysayaat no dagiti panglakayen ken ministerial nga adipen ti agserbi kas attendant.

PANAGIBANGON ITI KINGDOM HALL

¹⁵ Idi umuna a siglo, adda dagiti Kristiano a nabakbaknang ngem iti dadduma, isu nga insurat ni apostol Pablo: “Babaen ti panagpapada, ti sobrayo punnuanna ti kasapulanda, tapno ti sobrada punnuanna met ti pagkuranganyo, tapno adda panagpapada.” (2 Cor. 8:14) Maar-aramid met ita ti “panagpapada.” Mapagtitipon ti kontribusion dagiti kongregasion iti intero a lubong tapno mausar iti panagibangon ken panangtarimaan kadagiti Kingdom Hall. Ti naparabur a tulong dagiti kakabsat iti intero a lubong ket apresiaren unay ti organisasion ken dagiti kongregasion a magunggonaan kadagitoy a kontribusion.

¹⁶ Ti sanga nga opisina ti agdesision no ania a Kingdom Hall ti maitutop nga usaren ti tunggal kongregasion. Ikeddeng met ti sanga nga opisina no kaano ken sadino ti pakaibangonan ti baro a Kingdom Hall ken mangtarimaan kadagiti datin a Kingdom Hall iti teritoria a sakup ti sangay. No adda dumteng a didigra, mayurnos a matarimaan dagiti nadadael a Kingdom Hall. No dadduma, matarimaan met ti balbalay dagiti kakabsat.

¹⁷ Organisaren ti sanga nga opisina dagiti boluntario a tumulong a gumatang iti lote, mangaramid iti plano ti Kingdom Hall, mangala kadagiti permit, agibangon, ken mangmantener. Gapu ta adu a pagilian ti agkasapulan iti adu a Kingdom Hall, kasapulan met ti adu a boluntario. Amin a bautisado nga agibumbunannag a kualipikado ken mayat nga agboluntario ket maparegta a suratanna ti aplikasion sa itedna iti Komite ti Serbisio ti kongregasionna. Uray dagiti di bautisado nga agibumbunannag mabalinda ti tumulong a mangibangon ken mangtarimaan iti Kingdom Hall-da.

ASSEMBLY HALL

¹⁸ Kaaduanna nga agtataripnong dagiti nagkauna a Kristiano iti babassit a grupo. Ngem no dadduma, agtataripnong ti “adu a tattao.” (Ara. 11:26) Kasta met, aguummong ita ti ili ni Jehova kadagiti dadakkel a taripnong kas iti asamblea sirkito ken rehional a kombension. Masansan a maabangan dagiti pasilidad a pakaangayan dagitoy a taripnong. Ngem no saan a maitutop dagita wenno awan ti maabangan, mabalin ti mangipatakder iti lugar a pagdaydayawan a maawagan iti Assembly Hall.

¹⁹ No dadduma, adda magatang a pasdek, matarimaan, ken mausar kas Assembly Hall. Ngem masansan nga adda magatang a lote a pakaibangonan ti baro nga Assembly Hall. Nagduduma ti kadakkel dagiti Assembly Hall, depende iti kasapulan iti maysa a lugar. Magatang laeng ti lote ken maibangon ti Assembly Hall no naadalen a naimbag ti sanga nga opisina no mano ti magastos ken no kasano kasansan a mausar dayta.

²⁰ Mangdutok ti sanga nga opisina kadagiti kakabsat a mangasikaso iti pannakausar ken pannakamantener ti Assembly Hall. Adda dagiti urnos a regular a panagdalus dagiti sirkito iti mamindua iti makatawen ken regular a panangmantener. Magunggonaan dagiti kakabsat no agboluntarioda iti daytoy a trabaho. Maparegta ngarud dagiti kongregasion a naimpusuan a suportaranda dagitoy nga urnos.​—Sal. 110:3; Mal. 1:10.

²¹ No dadduma, mabalin a mausar ti Assembly Hall para kadagiti dadduma pay nga aktibidad ti organisasion, kas kadagiti Bible School ken dagiti espesial a miting dagiti manangaywan iti sirkito. Kas iti Kingdom Hall, ti Assembly Hall ket naidedikar a lugar a pagdaydayawan. No agtataripnongtayo iti Assembly Hall, nadayaw koma ti panagkawkawes, panaglanglanga, ken kababalintayo a kas met laeng no aggigimongtayo iti Kingdom Hall.

²² Adu nga interesado ti sumsumrek iti organisasion ti Dios bayat ti maudi a paset ti maudi nga al-aldaw. Pammaneknek dayta a bembendisionan ni Jehova ti organisasionna. (Isa. 60:8, 10, 11, 22) Gapuna, kayattayo a suportaran dagiti urnos tapno maaddaantayo kadagiti lugar a pagdaydayawan ken mataginayontayo a nadalus ken komportable dagita. No aramidentayo dayta, ipakpakitatayo nga ap-apresiarentayo ti panggep dagita a lugar a tumulong kadatayo nga agpipinnaregta, nangnangruna ta makitkitatayo nga umas-asidegen ti aldaw ni Jehova.