Raraemenyo Kadi ti Lugar a Pagdaydayawanyo?

“Sipud iti pannakaipasngay ti ebanghelio, kanayon nga addaan dagiti Kristiano iti naikeddeng ken masnup a lugar a pagdaydayawan iti Dios.”​—“Primitive Christianity,” ni William Cave.

KANAYON a maragsakan dagiti tao ti Dios nga agtitipon tapno agdaydayaw. Pudno daytoy idi umuna a siglo a kas ita. Umanamong amin dagiti nagkauna a mannurat ken teologo, kas kada Lucian, Clement, Justin Martyr, ken Tertullian, nga addaan dagiti Kristiano kadagiti masnup a lugar a regular a pagtataripnonganda tapno agdaydayaw a sangsangkamaysa.

Paneknekan met dayta ti Biblia, a nangaramid iti adu a panangtukoy kadagiti regular a panaggigimong dagiti grupo dagiti Kristiano. Pagaammo dagitoy a grupo kas kongregasion. Maitutop daytoy agsipud ta ti sao a “kongregasion” kadagiti orihinal a pagsasao iti Biblia kaipapananna ti maysa a grupo dagiti tao a naurnong a maipaay iti partikular a panggep wenno aramid.

Dagiti Lugar a Pagdaydayawan Dagiti Immuna a Kristiano

Aniat’ ar-aramiden dagiti umuna-siglo a Kristiano no agtataripnongda? Deskribiren ti Biblia ti sumagmamano kadagita a panaggigimong ken ipakitana a ti panangisuro ket maysa a napateg a paset. (Aramid 2:42; 11:26; 1 Corinto 14:19, 26) Adda dagiti edukasional a programa, agraman dagiti diskurso, panangisalaysay kadagiti makaparegta a kapadasan, ken naannad a panangusig kadagiti surat a naggapu iti bagi a manarawidwid sadi Jerusalem wenno iti maysa nga apostol.

Idiay Aramid 15:22-35, mabasatayo a kalpasan a naibasa ti kasta a surat iti maysa a grupo dagiti Kristiano idiay Antioquia, “pinaregta [da Judas ken Silas] dagiti kakabsat iti adu a diskurso ken pinakiredda ida.” Kunaen ti sabali pay a salaysay nga idi nakagteng da Pablo ken Bernabe idiay Antioquia “ken naurnongda ti kongregasion, sinaritada dagiti amin a banag nga inaramid ti Dios babaen kadakuada.” Napateg met a paset iti Nakristianuan a panaggigimong ti panagkararag ken Jehova.​—Aramid 14:27.

Dagiti lugar a pagdaydayawan dagiti kongregasion idi umuna a siglo ket saan a nararanga a pasdek a kas kadagiti adu a simbaan ti Kakristianuan itatta. Kaaduanna, kadagiti pribado a balay ti paggigimongan dagiti immuna a Kristiano. (Roma 16:5; 1 Corinto 16:19; Colosas 4:15; Filemon 2) Masansan nga agtataripnongda iti kuarto iti tuktok ti balay wenno iti akinngato a kuarto ti pribado a balay. Iti akinngato a kuarto a naangay ti Pangrabii ti Apo. Iti met akinngato a kuarto a napulotan dagiti 120 nga adalan iti nasantuan nga espiritu idi Pentecostes.​—Lucas 22:11, 12, 19, 20; Aramid 1:13, 14; 2:1-4; 20:7, 9.

Itatta, sursuroten dagiti Saksi ni Jehova ti padron nga impasdek dagiti apostol. Aggigimongda kadagiti lugar a maaw-awagan Kingdom Hall, a pagsanayanda kas manangaskasaba ti naimbag a damag ti Pagarian ti Dios. (Mateo 24:14) Idiay Kingdom Hall, adalenda met ti Kasuratan, agkararag, ken agpipinnaregtada. Maitunos daytoy iti balakad ti Biblia idiay Hebreo 10:24, 25: “Agpipinnanunottayo a maipaay iti pannakaparegtatayo iti ayat ken kadagiti naimbag nga ar-aramid, a ditay baybay-an dagiti panaggigimongtayo, a kas iti kadaywan dagiti dadduma, no di ket agpipinnaregtatayo, ket nangnangruna gapu ta makitayo nga umas-asidegen ti aldaw.”

Umiso a Panangusar iti Lugar a Pagdaydayawantayo

Malagipyo pay kadi ti sasao ni apostol Pablo: “Ti Dios saan a Dios ti riri, no di talna” ken, “Maaramid koma dagiti isuamin a banag iti natakneng ken naurnos”? No sukimatenyo ti konteksto dagitoy a sasao, makitayo a salsalaysayen ni Pablo no kasanot’ rumbeng a pannakaangay dagiti Nakristianuan a panaggigimong. Kas idi kaaldawan dagiti apostol, siguraduen dagiti Kristiano itatta a naurnos ken organisado unay dagiti panaggigimongda.​—1 Corinto 14:26-40.

Kinuna ti Abril 1, 1970, a ruar Ti Pagwanawanan: “Ti espiritual a kasasaad idiay Kingdom Hall ket napaypayso, nga agub-ubbog manipud iti napaypayso nga interes iti pudno a panagdaydayaw ken panangisuro manipud Biblia. Ket ti nalawag, natural nga aglikmut iti paggigimongan ti mangparegta kadagiti timmabuno nga agbalin a naragsak ken mannakigayyem, saan a mababain gapu iti misterioso a maipappapilit a kinasanto.” Siempre, nasken met ti kinaannad tapno ti pannakausar ti Kingdom Hall kanayon a yanninawna ti panagraem ken kinadayaw.

Nakaro ti kinaawan panagraem ti Kakristianuan iti daytoy a banag. Usaren dagiti dadduma a relihiuso nga organisasion dagiti lugar a pagdaydayawanda a paglinglingayan ti komunidad. Sadiayda nga angayen dagiti konsierto ti relihiuso a musika a rock, addaanda kadagiti siled para iti weight lifting, billiaran, pagaw-awiran kadagiti ubbing, ken pagbuyaan iti sine iti uneg a mismo. Nangangay ti maysa a simbaan iti ay-ayam a wrestling kas paset ti programada. Saan a maitunos daytoy iti padron nga intuyang dagiti apostol.

Idi umuna a siglo, makorehir ti kongregasion a di umno ti ar-aramidenna. Kas pangarigan, ginundawayan dagiti dadduma iti kongregasion Kristiano sadi Corinto ti mangan ken agiinum bayat ti pannakarambak ti Pangrabii ti Apo. Itugotda ti pangrabiida a kanenda sakbay wenno kabayatan ti panagtataripnong. Adda pay dagidiay nalabes ti pannakabussogda ken mabartek. Pudno a di maitutop daytoy. Nagsurat ni apostol Pablo kadakuada: “Apay, awan kadi ti balayyo a panganan ken paginumanyo?”​—1 Corinto 11:20-29.

Maitunos iti balakad ni Pablo, ikagumaan dagiti Saksi ni Jehova a sanguen dagiti personal a banag idiay balayda wenno iti sabali a lugar a saan ket nga idiay Kingdom Hall. Agpayso a mangipaay dagiti regular a panaggigimongtayo iti nasayaat a gundaway tapno makita dagiti gagayyemtayo. Nupay kasta, naidedikar ken Jehova ti Kingdom Hall, isu a nasken a mausar laeng iti panagdaydayaw kenkuana. Saantay a gundawayan ti itatabunotayo sadiay tapno agkomersio wenno tapno makitulag iti negosio.

Mainayon pay, saan nga usaren ti kongregasion dagiti Kingdom Hall para kadagiti programa a paglinglingayan, panagur-or iti pundo, wenno kadagiti sosial a serbisio, kas iti panangaywan kadagiti ubbing. Adda dadduma a lugar a mabalin a pangtamingan iti kakasta a personal ken pinansial a bambanag.

Napaliiw dagiti panglakayen iti maysa a Kingdom Hall nga adda dagiti kameng ti kongregasion a naruam nga agbulod ken agisubli kadagiti bambanag a binulodda kadagiti panaggigimong. Kasta met, adda ugalida a makisinnukat kadagiti videocassette a sine idiay Kingdom Hall. Nupay saan a panguartaan daytoy, tinulongan ida dagiti panglakayen a makakita iti pagimbagan ti panangasikaso kadagitoy a bambanag iti pagtaengan aginggat’ mabalin.

Tapno maliklikan dagiti situasion a mangted iti naalas nga impresion ken tapno masigurado nga umiso ti pannakausar ti Kingdom Hall, rumbeng a saludsoden ti tunggal maysa ti bagina: ‘Adda kadi dagiti personal a banag nga as-asikasuek idiay Kingdom Hall a mabalinko met nga asikasuen idiay balay?’ Kas pangarigan, no mangorganisarkayo iti panagpasiar wenno dadduma pay a sosial a panagtitipon, saan kadi a nasaysayaat no idiay balay a pagsasaritaan ti kakasta nga urnos? Mabalintay kadi nga usaren ti telepono wenno sarungkaran dagidiay kayattayo a makasao idiay balayda a mismo? Kas ken Pablo, mabalintay a kunaen: ‘Apay, awan kadi ti balaytayo a pangtamingantayo kadagita a bambanag?’

Naituding a Tiempo ken Lugar Maipaay iti Panagdaydayaw ken Jehova

Kuna ti Biblia idiay Eclesiastes 3:1: “Maipaay iti tunggal banag adda naituding a tiempo, uray pay tiempo maipaay iti tunggal aramid iti baba ti langit.” Iti panaggigimongtayo idiay Kingdom Hall, maipamaysatayo a sanguen dagiti aktibidad a mainaig iti Nakristianuan a ministerio. Maysa dayta a naituding a tiempo maipaay iti panagdaydayaw ken Jehova.

Nangipaay ti kabsat ni Jesus iti ina a ni Santiago iti balakad maibusor iti panangidumduma iti uneg ti kongregasion Kristiano. (Santiago 2:1-9) Kasanotay a maiyaplikar daytoy a balakad idiay Kingdom Hall? Mabalin nga agminar ti panangidumduma no maaramid sadiay ti nakadidillaw a panangiwaras kadagiti naisurat nga imbitasion para kadagiti sosial a pasken. Iti maysa a kongregasion, adda dagiti naruam a mangikabil kadagiti imbitasion kadagiti bag wenno Biblia dagidiay timmabuno. Pudno, nanamnam-ay daytoy ngem ti panangipatulod kadagiti imbitasion babaen ti koreo wenno panangitulod kadagitoy iti tunggal pagtaengan. Nupay kasta, kasanot’ panagrikna dagidiay di nakaawat iti imbitasion no napaliiwda a nawarasan iti imbitasion dagiti dadduma? Saan kadi a mabalin nga ipamatmat daytoy ti panangidumduma?

Siempre, awan ti nainget a paglintegan a mangiparit iti maysa a mangyawat iti sabali iti personal a mensahe wenno pakete idiay Kingdom Hall; saan met a dakes a pagsasaritaan idiay Kingdom Hall dagiti inaldaw nga aktibidad wenno pasamak, awisen ti maysa a tao idiay balayyo, wenno awisenyo a makipaglinglingay. Ngem naiparparna laeng koma daytoy ken maaramid iti naannad ken di nakadidillaw a pamay-an. Ditay koma ipalubos a singaendatayo dagiti personal nga urnos manipud iti pudpudno a panggep ti panagtataripnongtayo idiay Kingdom Hall, nga isu ti panagpipinnabileg iti naespirituan.​—Mateo 6:33; Filipos 1:10.

Lallaki a Mangituyang iti Ulidan

Sireregta a mangituyang dagiti panglakayen ken ministerial nga adipen iti ulidan iti panangraem iti Kingdom Hall. Kadawyan a maysa wenno dua a panglakayen ken ministerial nga adipen ti matudingan a mangasikaso kadagiti bambanag mainaig iti pannakamentenar ti Kingdom Hall. No nasurok a maysa a kongregasion ti agus-usar iti maymaysa a Kingdom Hall, asikasuen ti maysa a komite dagiti panglakayen dagitoy a bambanag.

Nupay adda dagiti natudingan a mangibaklay iti kakasta nga annongen, rumbeng nga ipakita dagiti amin a ministerial nga adipen ken panglakayen ti pudpudno a pannakaseknan iti paggigimongan. Bigbigenda a naidedikar ti Kingdom Hall ken Jehova ken mausar iti panagdaydayaw kenkuana.

Saan koma a mangitungtungkua dagiti panglakayen no adda dagiti nasken a matarimaan. (2 Cronicas 24:5, 13; 29:3; 34:8; Nehemias 10:39; 13:11) Kadagiti dadduma a kongregasion, regular a masukimat ti Kingdom Hall tapno maasikaso a dagus ti aniaman a nasken a matarimaan. Mangaramidda kadagiti imbentario tapno masigurado a nakasagana a kanayon dagiti kasapulan a suplay. No adda lugar a naituding a pagidulinan kadagiti suplay, aruaten, ken alikamen iti panagdalus, rumbeng a pakaseknan dagiti amin a panglakayen ken ministerial nga adipen ti kasasaad daytoy, a siguraduenda a nadalimanek a kanayon. Maipakita dagidiay mangay-aywan iti literatura ken magasin ti pannakaseknanda babaen ti panangidalimanekda a dagus kadagiti basio a karton tapno saan nga agkaiwara dagitoy.

Babaen ti ulidanda, matulongan dagiti panglakayen ken ministerial nga adipen dagiti dadduma iti kongregasion a mangipakita ti regta iti Kingdom Hall. (Hebreo 13:7) Maipakita ti amin ti umno a panagraem babaen ti pannakiraman iti panagdalus iti paggigimongan ken babaen ti panangipakita iti pudpudno a pannakaseknan iti buya daytoy.

Kinuna ni Jesus idiay Mateo 18:20: “No adino ti naguurnongan ti dua wenno tallo gapu iti naganko, addaak idiay nagtengngaanda.” Wen, interesado ni Jesus iti ar-aramidentayo no aguurnongtayo tapno agdaydayaw ken Jehova. Ramanen daytoy ti aniaman a panagtataripnong kadagiti pribado a pagtaengan ken kadagiti dadakkel a panagtataripnong kas kadagiti kumbension wenno asamblea.

Kadagiti minilion a Saksi ni Jehova, awan ti lugar nga as-asideg iti pusoda ngem iti regular a lugar a pagdaydayawanda, ti Kingdom Hall. Ipakpakitada ti umno a panagraem iti dayta a lugar. Nagagetda a mangaywan iti dayta, ken pagreggetanda a kanayon nga usaren iti umiso a pamay-an. Sapay koma ta surotenyo met ti balakad nga ipaay a mismo ni Jehova: “Aluadam ta sakam no mapanka iti balay ti pudno a Dios.”​—Eclesiastes 5:1.