Pagtalinaedentayo a Nasayaat ti Kasasaad ti Lugar a Pagdaydayawantayo
1. Ania ti pakausaran ti Kingdom Hall?
1 Adda nasurok a 94,000 a kongregasion dagiti Saksi ni Jehova iti intero a lubong. Kaaduan a kongregasion ti agtataripnong tapno agadal iti Biblia ken aglalangen kas Kristiano iti Kingdom Hall, nga agserbi kas lokal a sentro ti nasin-aw a panagdayaw.
2. Apay a napateg a pagtalinaeden a nadalus ken presentable ti Kingdom Hall?
2 Regular nga Eskediul ti Panagdalus: Napateg a paset ti sagrado a panagserbitayo ti panangdalus iti Kingdom Hall. Kuna ti libro a Ministeriotayo, iti panid 61-2: ‘Rebbeng nga ibilang dagiti kakabsat kas pribilehio ti pinansial a panangsuporta iti Kingdom Hall ken ti panagboluntario a mangtaginayon iti dayta a nadalus, presentable ken nasayaat ti kasasaadna. Iti uneg ken ruar, rumbeng nga irepresentar ti Kingdom Hall ti organisasion ni Jehova.’ Kasapulan ti regular a panangdalus ken panangmantener iti Kingdom Hall no mamin-adu a mausar iti kada lawas. Kaaduanna a dagiti boluntario manipud (kadag)iti kongregasion a mangus-usar iti Kingdom Hall ti mangasikaso kadagitoy. Kas idi tiempo ti Biblia, dagiti adipen ni Jehova ita masapul nga arisgaanda met a ‘pasayaaten ken tarimaanen’ ti lugar a pagdaydayawantayo.—2 Cron. 34:10.
3. Kasano a mayurnos ti panagdalus iti Kingdom Hall, ken siasino dagiti mabalin a makipaset iti daytoy a pribilehio?
3 Maipaskil koma iti information board ti linawas nga eskediul ti panagdalus iti Kingdom Hall. Rumbeng nga agsisinnublat nga agdalus dagiti amin a grupo ti panagadal iti libro iti kada lawas, a surotenda ti listaan dagiti banag a nasken nga aramiden. Dagiti amin a makabael masapul a makipasetda iti linawas a pribilehio a mamagtalinaed iti Kingdom Hall a nadalus ken presentable. Iti panangiwanwan dagiti dadakkelda, mabalin a makiraman nga agdalus dagiti ubbing, iti kasta, masursuroda nga ipateg daytoy a pribilehio. Kasapulan ti nasayaat a kooperasion tapno saan laeng a manmano ti makipaset iti daytoy napateg nga aspeto ti panagdayawtayo, nangruna no saan la a maymaysa a kongregasion ti mangus-usar iti Kingdom Hall.
4. Ania ti masapul a maaramid tapno ammo ti kongregasion no ania ti aramidenda no agdalusda iti Kingdom Hall?
4 No mabalbalin, maipaskil koma dagiti urnos ti panagdalus iti bodega nga ayan dagiti alikamen a pagdalus. Masapul a mailista no ania dagiti linawas a matrabaho, a pakairamanan ti panangdalus kadagiti tawa, panangpunas kadagiti lamisaan ken tugtugaw, panangibelleng iti basura, panangnasnas iti suelo, ken panangpunas kadagiti sarming. Mabalin a saan a masapul nga aramiden a kanayon dagiti dadduma a trabaho, kas ti panangpasileng kadagiti alikamen a naaramid iti kayo, naan-anay a panangdalus kadagiti tugaw, de koriente nga alikamen, ken pananglaba kadagiti kortina. Masapul a maidulin iti lugar a di magaw-at dagiti ubbing ken masapul a silalawag a namarkaan dagiti kemikal a pagdalus. Masapul nga adda met naisurat nga ababa nga instruksion no kasano nga usaren dagita a kemikal.
5. Kasano kapateg ti kinatalged, ken ania dagiti bambanag a masapul a sukimaten a kanayon? (Kitaenyo ti kahon iti panid 4.)
5 Ti kinatalged iti Kingdom Hall ket isu ti kapatgan. (Deut. 22:8) Mainaig iti daytoy, ti kahon iti panid 4 ket naglaon kadagiti bambanag a masapul a sukimaten a kanayon tapno maliklikan dagiti aksidente.
6. Kasano a maimatonan ti trabaho a panangtarimaan iti Kingdom Hall?
6 Panangtarimaan iti Kingdom Hall: Responsabilidad ti bagi dagiti panglakayen nga imatonan ti panangtarimaan iti Kingdom Hall. Kaaduanna, maysa a panglakayen wenno ministerial nga adipen ti madutokan a mangasikaso iti trabaho. Kitaenna ti inaldaw a pannakausar ti Kingdom Hall, ken siguraduenna a nadalus ken nasayaat ti kasasaad daytoy ken umdas dagiti suplay. Nasken nga awan dagiti makadangran a bambanag iti uneg ken ruar ti Kingdom Hall. No dua wenno ad-adu pay a kongregasion ti mangus-usar iti Kingdom Hall, mangdutok dagiti bagi dagiti panglakayen iti operating committee a mangaramid kadagiti urnos iti pannakaasikaso ti pasdek ken dagiti sanikua. Dagiti bagi dagiti panglakayen ti mangimaton iti trabaho daytoy a komite.
7. (a) Ania ti rumbeng a maaramid a tinawen tapno masigurado a nasayaat ti kasasaad ti Kingdom Hall? (b) Ania dagiti bambanag a masapul a kitaen a kanayon? (Kitaenyo ti kahon iti panid 5.)
7 Maminsan iti makatawen a masukimat a naimbag ti Kingdom Hall. Aramiden daytoy dagiti panglakayen babaen ti panangaramidda kadagiti urnos tapno maasikaso a naimbag ti aniaman a masapul a matarimaan. Mabalin a maawis dagiti agibumbunannag a tumulong kadagiti kasapulan a matarimaan. Alerto koma ti amin a mangkita kadagiti babassit a bambanag ken alistoda koma a mangkita no ania dagiti masapul a tarimaanen.
8. Kaano a mabalin a makiuman dagiti panglakayen iti Kingdom Hall Construction Desk no maipapan iti panagtarimaan?
8 No kasapulan dagiti panglakayen ti balakad wenno tulong iti panangmantener iti Kingdom Hall, mabalinda ti makiuman iti Kingdom Hall Construction Desk iti sanga nga opisina. Mabalin a karaman ditoy dagiti banag a kas iti panangtarimaan iti estruktura ken kadagiti agubo, agbuot, ken agagneb a paset ti Kingdom Hall.
9. Ania nga addang ti masapul a masurot no kasapulan ti mangtangdan iti kontratista?
9 Nainsiriban a Panangusar Kadagiti Pondo ti Kongregasion: Ar-aramiden dagiti boluntario ti kaaduan a trabaho iti Kingdom Hall ken iti aglawlawna. Ti kinamanagsakripisioda ket nagsayaat nga ebkas ti ayat ken dakkel ti maitulongna tapno maksayan dagiti gastos. Kitaen dagiti panglakayen no kasanoda a makaekonomia no kasapulanda ti mangtangdan iti kontratista a mangaramid iti dadduma a trabaho, kas iti panangpaksiat kadagiti peste wenno dakkel a panangretubar. Maaramidda daytoy babaen ti panangisaganada nga umuna iti naisurat a detalyado a deskripsion ti trabaho ken aniaman a kasapulan a materiales. Mangtedda iti listaan kadagiti nadumaduma a mangsupsuplay kadagiti materiales tapno agpapadada a mangpresio kadagitoy. Kalpasan a makita dagiti panglakayen dagiti agduduma a presio dagiti suplayer wenno kontratista, pilienda no siasino ti mangituktukon iti kasayaatan. Masapul a masurot daytoy nga addang uray no adda kabsat a nagitukon nga isu ti mangtrabaho wenno mangsuplay kadagiti kasapulan a materiales iti naituding a presio.
10. Ania ti rumbeng a maaramid tapno masigurado nga umiso ti pannakausar dagiti pondo ti kongregasion?
10 No saan la a maymaysa a kongregasion ti mangus-usar iti Kingdom Hall, adda koma nakabanko a pondo ti operating committee ket ikkanda ti tunggal bagi dagiti panglakayen iti binulan a naisurat a pinansial a report tapno makita dagiti panglakayen no kasano ti pannakausar dagiti pondo. Dagiti panglakayen ti responsable iti umiso a pannakausar dagiti pondo ti kongregasion.
11. Ania ti nasken a maaramid no kasapulan ti dakkel a pannakatarimaan wenno pannakaretubar iti Kingdom Hall?
11 Dakkel a Panangtarimaan ken Panangretubar: No makita ti operating committee nga adda napateg a kasapulan mainaig iti pannakausar wenno pannakatarimaan ti Kingdom Hall, ti komite iyumanna daytoy kadagiti bagi dagiti panglakayen. Makiuman dagiti panglakayen iti Kingdom Hall Construction Desk no makitada a kasapulan ti dakkel a panangtarimaan wenno panangretubar, wenno kasapulan ti tulong manipud iti ruar (dagi)ti kongregasion a mangus-usar iti dayta a Kingdom Hall. Mangipaay daytoy a departamento kadagiti makatulong a singasing no kasano a maaramid ti trabaho. No dakkel ti magastos, nasken nga adda umiso a pattapatta dagiti paggastuan ken adda maaramid a resolusion nga anamongan ti kongregasion.—Kitaenyo ti “Saludsod” iti Pebrero 1994 a Ti Ministeriotayo iti Pagarian.
12. Kasanotay a maipakita nga apresiarentayo ti pribilehio nga aggigimong iti Kingdom Hall?
12 Anian a panangipategtayo iti pribilehiotayo nga aggigimong iti Kingdom Hall! Pulos a ditay kayat a baybay-an wenno tagtagilag-anen dagiti gimongtayo. Makatulong ti amin iti pannakamantener daytoy a probision nga agpaay a pakapabilgantayo babaen ti pannakipaset a naan-anay iti panangasikaso iti Kingdom Hall-tayo. Pakaitan-okan daytoy ti nasin-aw a panagdayaw ken pakaidayawan ti nagan ni Jehova. Determinadotayo koma a mamagtalinaed a nasayaat ti kasasaad ti lugar a pagdaydayawantayo.
[Kahon iti panid 4]
Listaan Dagiti Banag a Manteneren
◻ Masapul a nalaka a magaw-at dagiti pagiddep iti apuy ken maminsan iti makatawen a masukimat dagitoy.
◻ Masapul a nalawag ken nalaka a makita dagiti pagruaran ken agdan, ken masapul a nalagda dagiti pagkaptan iti agdan.
◻ Masapul a nadalus, naurnos, ken awan dagiti nalaka a mauram a bambanag, personal a bambanag, agraman dagiti basura iti uneg dagiti bodega ken kasilias.
◻ Masapul a masukimat ken madalusan a kanayon dagiti atep ken kalasugan.
◻ Masapul a masilawan dagiti pagnaan iti igid ti dalan ken paradaan ken awan koma ti aniaman a banag a makaikaglis wenno makaitikleb.
◻ Masapul a masukimat ken umiso ti pannakamantener dagiti sistema ti koriente ken bentilasion.
◻ Masapul a matapalan a dagus dagiti agubo tapno maliklikan dagiti nakaro a parikut iti panagagneb ken panagbuot.
◻ Masapul a maikandado ti Kingdom Hall no nakapanawen dagiti tattao.
[Kahon iti panid 5]
Panangasikaso iti Kingdom Hall ken iti Sanikua
◻ Ruar: Nasayaat met laeng kadi ti atep, diding, pinta, dagiti tawa, ken karatula ti Kingdom Hall?
◻ Paraangan: Nasayaat met laeng kadi ti pannakamantener ti paraangan? Natalged met laeng kadi dagiti pagnaan iti igid ti dalan, alad, ken paradaan?
◻ Uneg: Presentable met laeng kadi ti suelo, dagiti kortina, tugtugaw, saksakan ken switch ti koriente, dagiti pinta ken baldosa, ken dagiti kabinet a pagikabilan kadagiti literatura?
◻ Alikamen: Nasayaat met laeng kadi ti kondision dagiti silaw, sound system, bentilador, ken aircon?
◻ Kasilias: Nadalus met laeng kadi ken nasayaat ti kasasaad dagitoy?
◻ Dagiti dokumento ti kongregasion: Kabaruan met laeng kadi ken umiso dagiti dokumento ti korporasion ken dagiti titulo ti daga? Nakaalakayo kadin iti property-tax-exemption?