Selebrasion ti Memorial iti 1990
1 Iti Martes, Abril 10, 1990, markaanna iti maika-1,957 nga anibesario ti Memorial iti ipapatay ni Kristo. No agplanotayo a tumabuno, nasken a panunotentayo dagiti sabsabali a masapul nga imbitaran ken no kasanotayo a makatulong iti aniaman a banag. Itan ti tiempo a rugian ti agsagana a maipaay iti Memorial ken panunoten iti panangawis kadagiti dadduma.—Pangaasiyo ta kitaenyo iti “Bambanag nga Isagana iti Memorial” iti panid 3.
2 Kasano ti panangmatmattayo iti itatabuno ti Memorial? Matmatantayo koma a kas pribilehio ken oportunidad a mangipakita iti panangipateg a maipaay iti sakripisio ni Kristo. No ammoyo nga awankayo idiay kongregasionyo, siguruenyo nga adda kadakayo iti direksion ti Kingdom Hall idiay lugar a papananyo tapno makatabunokayo sadiay.
USARENYO TI ESPESIAL NGA IMBITASION
3 Mabalin a rugianen nga usaren iti espesial nga imbitasion ti Memorial inton tiempo iti espesial a palawag ti publiko iti Marso 25. Laglagipenyo a saan a mausar dagitoy a kas handbill ngem masapul a maited a mismo kadagiti interesado a tattao. Agsipud ta dagiti tattao ket masansanda a malipatan iti petsa ken oras, maisingasing a maisurat wenno maimakinilia a silalawag iti direksion ti Kingdom Hall ken iti oras ti Memorial idiay baba iti imbitasion. Nalabit nga agkedked dagiti agdadamo nga interesado a mapan idiay Kingdom Hall nga agwaywayas. Mabalinyo kadi a dagasen wenno sabaten ida idiay ruangan iti hall? Ikagumaanyo met a tulongan dagidiay makaammon iti kinapudno bayat ti adun a tawtawen ngem sagpaminsanda laeng a tumabuno.—Luc. 11:23; Juan 18:37b.
DAGITI KASAPULAN NGA ISAGANA
4 Kayat dagiti panglakayen ti kongregasion a masigurado nga amin dagiti urnos a maipaay iti Memorial ket naannad a maaramidda a nasakbay. Siguruenyo a pilien dagiti makabael a kakabsat a lallaki a mangipasa iti emblema. Dagitoy a kakabsat ti masapul a panglakayen wenno ministerial nga adipen, no adda dagitoy. Adda koma umdas a kakabsat a nakasagana a mangaramid iti daytoy tapno saan unay a napaut iti pannakaipasa dagiti emblema. Kalpasan dagiti manangipasa a nangidasar kadagiti timmabuno, dagiti manangipasa ti agtugaw iti sango ket ti ispiker isu met ti mangidasar kadakuada. Kamaudiananna, maysa kadakuada ti mangidasar iti ispiker.
5 Iti panaglabas ti kada tawen, umadanitayo iti aldaw a ti Pangrabii iti Apo ket saanton a marambakan. Imbilin ni Jesus nga ti ipapatayna ket malaglagip agingga nga amin dagiti kakabsatna ket maikaduadan kenkuana idiay Pagarian. (Luc. 22:19; 1 Cor. 11:25) Agingga ngarud iti dayta masapul a situtulnog ken simamatalektayo nga agtataripnong iti kada tawen a maipaay iti selebrasion ti Memorial a buyogen iti naindaklan a rag-o ken panangipateg.
[Kahon iti panid 3]
Bambanag nga Isagana iti Memorial
(Kitaen iti Pebrero 15, 1985 a Watchtower, panid 19.)
1. Napakaammuan kadin iti tunggal maysa, agraman ti ispiker, maipapan iti oras ken lugar iti selebrasion? Adda aya pagluganan ti ispiker?
2. Adda kadin masinnunuo nga urnos dagidiay mangidasar iti emblema?
3. Naaramiden aya iti urnos no siasino daydiay mangitugot iti nadalus a mantel ti lamisaan ken ti kasapulan a bilang dagiti kopa ken plato?
4. Ania nga urnos ti naaramiden a maipaay iti panagdalus ti hall?
5. Nadutokan kadin dagiti attendant ken dagiti mangipasa? Adda kadi naiyiskediol a miting kadakuada sakbay ti Memorial tapno maiwardas iti rebbengenda? Kaano? Ania a wagas ti masurot tapno masigurado a maserbian dagiti amin a siuumiso?
6. Kompleto kadi ti urnos a tumulong kadagiti nataengan ken baldado a kakabsat? Naiyurnosen aya daydiay mapan agserbi iti siasinoman a napulotan a naiyospital a saan a makapan idiay Kingdom Hall?