Saludsod
● Ania nga iskediol ti masapul a masurot iti espesial a miting a mangsaklaw iti Panagadal ti Libro iti Kongregasion bayat ti lawas iti bisita ti manangaywan iti sirkito?
Bayat ti bisita iti manangaywan ti sirkito, maaramid ti urnos nga agpaay iti intero a kongregasion nga agtataripnong iti Kingdom Hall nga agpaay iti espesial a miting a ramanenna ti Panagadal ti Libro iti Kongregasion, maysa a panangusig iti Nainkasuratan ken naorganisasionan nga impormasion a natemaan iti “Agtultuloyka Kadagiti Bambanag a Naadalmo,” ken maysa a palawag ti serbisio babaen iti manangaywan ti sirkito. Daytoy a miting ti masansan a kayat a maaramid iti rabii ti Huebes wenno Biernes.
Ti miting isut’ mairugi babaen iti kanta ken kararag, kalpasanna maysa kadagiti panglakayen ti mangidaulo iti 45-minuto a Panagadal ti Libro iti Kongregasion. Ikagumaan a mawanas iti amin a material a naituding nga agpaay iti lawas, a mabasa dagiti amin a parapo, a kas iti gagangay a maaramid iti regular a linawas a panagadal. Ti Panagadal ti Libro iti Kongregasion isut’ sarunuen iti maysa a panagkanta iti sabali a kanta ti Pagarian. Kalpasanna usaren iti manangaywan ti sirkito iti 30 a minutos a mangidaulo iti paset nga “Agtultuloyka Kadagiti Bambanag a Naadalmo.” Kalpasan dayta, ipalawagna iti maysa a 30-minuto a palawag ti serbisio a maitutop a nangnangruna iti kasapulan ti kongregasion a maserserbian. Iti palawag ti serbisio, mangted iti maiparbeng a komendasion ken balakad a nadisenio a mamabileg iti kongregasion ken mamaregta kadagiti kakabsat nga agtalinaed a natibker iti serbisio ti Pagarian.
Maserraan ti miting babaen iti kanta ken kararag. Amin dagiti kanta a mausar isudat’ pilien iti manangaywan ti sirkito. Ti intero a programa, agraman kanta ken kararag, ti saan koma a lumbes iti dua nga oras.
Daytoy nga urnos a naiyusuat idi 1977 isut’ nawadwad ti maipaayna a mangaramid iti bisita ti manangaywan iti sirkito a kas maysa a banag nga espesial a pagragsakan ken pakagunggonaan iti intero a kongregasion ken iti tunggal maysa nga agibumbunannag a tumabuno ken makipaset iti daytoy a nagsayaat a parabor iti organisasion ni Jehova.