Baro nga Eskediul ti Gimong ti Kongregasion
1, 2. Mangrugi inton Enero 2009, ania dagiti mapasamak a panagbalbaliw kadagiti gimong?
1 Adda makaparagsak a pakaammo a naibasa kadagiti kakabsat iti intero a lubong idi lawas ti Abril 21-27, 2008. “Mangrugi inton Enero 1, 2009, ti Panagadal iti Libro ti Kongregasion ket maangay a kadua ti Teokratiko nga Eskuelaan ti Panagministro ken ti Gimong ti Serbisio. Ti Panagadal iti Libro ti Kongregasion ket maawaganton iti Panagadal ti Kongregasion iti Biblia.”
2 Eskediul Para iti Daytoy a Linawas a Gimong: Agpaut ti intero a gimong, agraman ti kanta ken kararag, iti maysa nga oras ken 45 a minuto. Mangrugi ti gimong babaen ti kanta ken kararag (5 min.), sa sarunuen ti Panagadal ti Kongregasion iti Biblia (25 min.). Sumaruno a dagus ti Teokratiko nga Eskuelaan ti Panagministro (30 min.). Kalpasanna, adda kanta (5 min.) a mangiruangan iti Gimong ti Serbisio (35 min.). Agngudo ti gimong babaen ti kanta ken kararag (5 min.). Tapno matulongankayo nga agsagana maipaay kadagitoy a gimong, binulan a maipablaakto iti Ti Ministeriotayo iti Pagarian ti eskediul para iti Panagadal ti Kongregasion iti Biblia, Teokratiko nga Eskuelaan ti Panagministro, ken ti Gimong ti Serbisio.
3. Kasano a maikondukta ti Panagadal ti Kongregasion iti Biblia?
3 Panagadal ti Kongregasion iti Biblia: Maikondukta daytoy a gimong a kas iti pannakaikondukta ti Panagadal iti Pagwanawanan. Saan a kasapulan a repasuen ti material a napagadalan iti napan a lawas. Imbes ketdi, mairugi daytoy a gimong babaen ti ababa laeng nga introduksion tapno ad-adu ti gundaway dagiti amin a tumabuno a makaipaay iti ababa a komento. Ti mamangulo a manangaywan ti mangimaton iti pannakadutok dagiti panglakayen nga agsisinnublat a mangikondukta iti daytoy a gimong. Sabasabali a panglakayen ti mangikondukta iti tunggal lawas.
4. Ania a panagbalbaliw ti maaramid iti Gimong ti Serbisio?
4 Gimong ti Serbisio: Awan ti panagbalbaliw iti Gimong ti Serbisio malaksid iti pannakapaababa dagiti paset. Gagangay a lima minuto laeng ti kapaut dagiti pakaammo. Umdas daytoyen para kadagiti naintiempuan a napateg a pakaammo ken iti sumagmamano a surat manipud iti sanga nga opisina. Dagiti linawas a pakaammo, kas iti urnos iti panagserbi iti tay-ak, panagdalus, report ti kuenta, ken dagiti rutina a surat manipud iti sanga nga opisina ket saanen a masapul a maibasa iti plataporma. Maipaskil dagitoy iti information board tapno mabasa dagiti kakabsat. Dagidiay maikkan iti paset iti Gimong ti Serbisio ket masapul nga agsagana a naimbag, surotenda dagiti instruksion, ken saanda a lumbes iti naikeddeng nga oras.
5. Kabayatan ti lawas nga ibibisita ti manangaywan iti sirkito, ania ti eskediul ti gimong ti kongregasion iti tengnga ti lawas?
5 Ibibisita ti Manangaywan iti Sirkito: Saan a mabalbaliwan ti linawas nga eskediul ti manangaywan iti sirkito. Iti Martes, maangay ti Teokratiko nga Eskuelaan ti Panagministro ken ti Gimong ti Serbisio sa sarunuen ti kanta. Kalpasanna, ipaay ti manangaywan iti sirkito ti 30 minuto a palawagna. Kas iti maar-aramid ita kabayatan ti ibibisitana, maangay iti sabali a rabii ti Panagadal ti Kongregasion iti Biblia a sarunuen ti kanta sa ti palawag serbisio ti manangaywan iti sirkito. Agngudo ti gimong babaen ti kanta ken kararag.
6. Ania ti akem ti manangaywan iti grupo?
6 Dagiti Taripnong Sakbay ti Panangasaba: Ti bagi dagiti panglakayen ket mangtuding kadagiti manangaywan iti grupo a mangidaulo kadagiti grupo iti panangasaba ken mangipastor kadagiti indibidual iti grupo. No nasken a maysa a ministerial nga adipen ti matudingan iti dayta nga akem, isu ket maawagan kas “adipen ti grupo.”
7. Ania ti manamnamatayo iti baro nga eskediul ti gimong ti kongregasiontayo?
7 Iti daytoy a naidatag nga impormasion maipapan iti gimong ti kongregasion iti tengnga ti lawas, nabatad a maaddaantayo iti gundaway a mangtagiragsak iti makaisuro, makaparegta a rabii ti naespirituan a padaya. Daytoy ti tumulong kadatayo nga agbalin nga epektibo a manangaskasaba ken mannursuro, a nasanay tapno agbalin nga ad-adda nga epektibo iti ministerio.—Efe. 4:13, 14; 2 Tim. 3:17.
8. Kasano a makatulong kadatayo ken kadagiti dadduma ti nasakbay a panagsagana?
8 Ti panagadal a nasaksakbay kas panagsagana kadagitoy a gimong tulongannatayo a mangipamaysa kadagiti kangrunaan a punto a maipaganetget kabayatan ti gimong. Maaddaantayo amin iti gundaway nga agkomento, iti kasta makapagpipinnaregtatayo. (Roma 1:11, 12; Heb. 10:24) Ikagumaantayo nga ‘iparangarang ti panagrang-aytayo’ babaen ti ‘panangaramat a siuumiso iti sao ti kinapudno.’—1 Tim. 4:15; 2 Tim. 2:15.
9. Ania ti determinasiontayo, ken apay?
9 Maragsakantayo unay iti daytoy nagpateg a panagbalbaliw kadagiti gimong ti kongregasion iti tengnga ti lawas. Sapay koma ta itultuloytayo ti agpaiwanwan iti “matalek ken masirib nga adipen” ken agtalinaedtayo a nasinged iti Naindaklan a Pastortayo bayat nga isagsagananatayo iti um-umayen a dakkel a rigat.—Mat. 24:21, 45; Apoc. 7:14.