Dagiti Taripnong Sakbay ti Panangasaba a Mangibanag iti Panggepda

1. Ania ti panggep dagiti taripnong sakbay ti panangasaba?

¹ Naminsan, nagtataripnong da Jesus ken ti 70 nga adalanna sakbay nga imbaonna ida a mangasaba. (Luc. 10:1-11) Pinabilegna ida babaen ti panangipalagipna kadakuada nga adda manamnamada a tulong ken iwanwan ida ti “Apo ti panagani” a ni Jehova. Nangipaay met kadagiti instruksion a mangisuro kadakuada a mangitungpal iti trabaho, ken inorganisarna ida a “sagdudua.” Kasta met laeng ti panggep ita dagiti taripnong sakbay ti panangasaba—mangpabileg, mangisuro, ken mangorganisar.

2. Kasano ti rumbeng a kapaut ti taripnong sakbay ti panangasaba?

² Iti agdama, agpaut iti 10 agingga iti 15 a minuto ti taripnong sakbay ti panangasaba. Karaman iti dayta ti panangorganisar kadagiti rummuar a mangasaba, panangited iti teritoria, ken panagkararag. Ita, mabaliwanen dayta. Mangrugi inton Abril, ti taripnong sakbay ti panangasaba ket agpaut laengen iti lima agingga iti pito a minuto. Ngem no maangay dayta kalpasan ti gimong ti kongregasion, masapul nga ab-ababa pay gapu ta nakangngegen dagiti rummuar a mangasaba iti nagsayaat a pannakausig ti Kasuratan. No ababa laeng ti panagtataripnong sakbay ti panangasaba, ad-adu ti panawen a mabusbos iti ministerio. Kasta met, no nangrugin a nangasaba dagiti payunir wenno agibumbunannag sakbay ti taripnong, ab-ababa ti tiempo a pannakaisardeng ti panangasabada.

3. Kasano ti mabalin a pannakayurnos dagiti taripnong sakbay ti panangasaba tapno ad-adda a magunggonaan dagiti agibumbunannag?

³ Rumbeng a mayurnos dagiti taripnong sakbay ti panangasaba tapno ad-adda a magunggonaan dagiti agibumbunannag. Iti adu a kongregasion, mas mabenepisiaran dagiti grupo iti panangasaba no agduduma ti pagtataripnonganda imbes nga agtitiponda amin iti maymaysa a lugar. Mabalin a makatulong dayta tapno nalaklaka a makapan dagiti agibumbunannag iti pagtataripnongan ken nalabit iti teritoria. Al-alisto met a maorganisar dagiti agibumbunannag, ken nalaklaka para kadagiti manangaywan iti grupo nga ipaayan iti atension dagiti miembroda. Mabalin nga ikabilangan ti bagi dagiti panglakayen ti lokal a kasasaad ken kitaenda no ania ti kasayaatan. Sakbay ti pangserra a kararag, masapul nga ammo ti amin ti papananda a teritoria ken no asino ti kaduada.

4. Apay a di rumbeng nga ibilang a basbassit ti pateg dagiti taripnong sakbay ti panangasaba ngem iti dadduma a gimong?

⁴ Saan a Basbassit ti Pategda Ngem iti Dadduma a Gimong ti Kongregasion: Gapu ta dagiti taripnong sakbay ti panangasaba ket nairanta a pakagunggonaan dagiti rummuar a mangasaba, mabalin a saan a tabunuan dayta ti intero a kongregasion. Ngem dina kayat a sawen a tagtagilag-anentayon dagita wenno ibilangtayo a basbassit ti pategda ngem iti dadduma a gimong ti kongregasion. Kas iti amin a gimongtayo, dagiti taripnong sakbay ti panangasaba ket probision ni Jehova a mangtignay kadatayo nga agpipinnaregta iti ayat ken nasayaat nga ar-aramid. (Heb. 10:24, 25) Gapuna, nakasagana koma a naimbag ti mangidaulo tapno ti taripnong ket pakaidayawan ni Jehova ken pakabenepisiaran dagiti tumabuno. Ikagumaan koma ti amin a rummuar ti tumabuno no la ketdi ta praktikal.

5. (a) Ania ti paset ti manangaywan iti serbisio iti panangyurnos kadagiti taripnong sakbay ti panangasaba? (b) Kasano a mangidaulo ti maysa a sister iti taripnong sakbay ti panangasaba?

⁵ Panagsagana ti Mangidaulo: Tapno makasagana a naimbag ti adda pasetna iti gimong, masapul a nasaksakbay a maawatna ti pasetna. Kasta met laeng kadagiti taripnong sakbay ti panangasaba. Siempre, no agduduma ti pagdadanonan dagiti grupo ti panangasaba, ti manangaywan ti grupo wenno ti katulonganna ti mangidaulo iti taripnong ti grupoda. Ngem no kasapulan nga agtitipon dagiti grupo ti kongregasion para iti taripnong sakbay ti panangasaba, mangdutok ti manangaywan iti serbisio iti mangidaulo. Dadduma a manangaywan iti serbisio ket mangted iti eskediul iti amin a mangidaulo ken mangipaskilda iti kopia iti information board. Rumbeng a nainsiriban a pilien ti manangaywan iti serbisio dagiti mangidaulo, a laglagipenna a nakadepende ti kalidad dagitoy a taripnong iti abilidad dagidiay mangidaulo a mangisuro ken mangorganisar. No adda dagiti aldaw nga awan ti mabalin a mangidaulo a panglakayen, ministerial nga adipen, wenno kualipikado a bautisado a brother, masapul a mangdutok ti manangaywan iti serbisio iti bautisado a sister a makabael a mangidaulo.—Kitaenyo ti artikulo a “No Kabsat a Babai ti Masapul a Mangidaulo.”

6. Apay a napateg nga agsagana a naimbag ti mangidaulo?

⁶ No adda pasettayo iti Teokratiko nga Eskuelaan ti Panagministro wenno Gimong ti Serbisio, isaganatay a naimbag ken ditay tagtagilag-anen dayta. Manmano kadatayo ti sa laeng agsagana no agturturongen iti gimong. Kasta met koma ti panangipateg iti annongen a mangidaulo iti taripnong sakbay ti panangasaba. Gapu ta ab-ababanton ti taripnong sakbay ti panangasaba, nangnangruna a napateg ti nasayaat a panagsagana tapno makagunggona ti taripnong ken saan a lumbes iti oras. Karaman met iti nasayaat a panagsagana ti nasaksakbay a panangala iti teritoria.

7. Ania ti sumagmamano a banag a mabalin nga usigen ti mangidaulo?

⁷ No Ania ti Pagsasaritaan: Gapu ta agduduma ti kasasaad ti kada teritoria, saan a nangipaay ti matalek nga adipen iti balabala para iti tunggal taripnong sakbay ti panangasaba. Ti kahon a “Dagiti Mabalin a Mausig Bayat ti Taripnong Sakbay ti Panangasaba” ket naglaon iti sumagmamano a punto. Iti kaaduan a taripnong, adda pannakipartisipar dagiti agibumbunannag. Mabalin a sagpaminsan met nga adda maipabuya a nasayaat ti pannakaisaganana a demostrasion wenno maitutop a video manipud iti jw.org. No agsagsagana ti mangidaulo para iti taripnong sakbay ti panangasaba, panunotenna koma no ania ti makapabileg ken makaisuro kadagiti mangasaba iti dayta nga aldaw.

8. Ania ti mabalin a makagunggona unay a pagsasaritaan kadagiti taripnong sakbay ti panangasaba iti Sabado ken Domingo?

⁸ Kas pagarigan, ituktukon ti kaaduan nga agibumbunannag Ti Pagwanawanan ken Agriingkayo! kada Sabado. Adu kadagiti mangasaba iti Sabado ti saan a nakaruar bayat ti Lunes agingga iti Biernes, isu a mabalin a marigatandan a manglagip iti inensayoda a presentasion bayat ti panagdaydayaw ti pamiliada. Gapuna, makatulong iti mangidaulo no repasuenna ti maysa kadagiti pagtuladan a presentasion iti likud Ti Ministeriotayo iti Pagarian. Ti maysa pay nga opsion ket pagsasaritaan no kasano nga inayon iti presentasion iti magasin ti maysa a damag, pasamak, wenno piesta opisial (holiday) wenno no ania ti aramiden tapno adda pangibatayan iti panagsarungkar no awaten ti bumalay dagiti magasin. No adda dagiti timmabuno iti taripnong a nakaipaiman kadagiti tukon a magasin, mabalin a kiddawen ti mangidaulo a mangibagada kadagiti ababa a singasing wenno kadagiti makapabileg a kapadasanda. Mabalin a kasta met ti aramiden dagiti mangidaulo kadagiti Domingo mainaig kadagiti tukon iti bulan. Mabalin nga ipaima iti aniaman nga aldaw dagiti publikasion a maus-usar iti panangyadal, kas kadagiti broshur a Naimbag a Damag ken Umimdengka iti Dios ken ti libro nga Isursuro ti Biblia. Gapuna, mabalin nga usigen iti apagbiit ti mangidaulo no kasano nga ipaima dagita a publikasion.

9. Ania ti mabalin a pagsasaritaan iti ngudo ti lawas bayat ti espesial a kampania?

⁹ No makiraman ti kongregasion iti espesial a kampania iti ngudo ti lawas, mabalin nga usigen ti mangidaulo no kasano nga ipaima dagiti agdama a magasin a kadua ti imbitasion wenno tract, wenno no ania ti aramiden no adda aginteres. Ti sabali pay nga opsion ket ti panangisalaysay kadagiti kapadasan a mangipakita iti kinapateg dagiti kasta a kampania.

10, 11. Apay a napateg ti panagsagana dagiti agibumbunannag tapno naballigi ti taripnong sakbay ti panangasaba?

¹⁰ Panagsagana Dagiti Agibumbunannag: Adda met paset dagiti agibumbunannag tapno naballigi ti taripnong sakbay ti panangasaba. No agsaganada a nasaksakbay para iti panangasaba, nalabit bayat ti panagdaydayaw ti pamiliada, adda mairanudda iti dadduma nga agibumbunannag. Karaman met iti nasayaat a panagsagana ti panangala kadagiti kasapulan a magasin ken literatura sakbay a mapan iti pagtataripnongan tapno awan ti mataktak iti ipapan iti teritoria.

¹¹ Napateg met nga iplano ti isasangpet iti taripnong iti sumagmamano a minuto sakbay a mangrugi. Siempre, ikagumaantayo ti agbalin a nasapa kadagiti amin a gimong ti kongregasion. Ngem mabalin nga ad-adda a makasinga no maladawtayo iti taripnong sakbay ti panangasaba. Apay? Adu ngamin ti masapul nga ikabilangan ti mangidaulo sakbay nga organisarenna ti grupo. No bassit laeng ti rummuar a mangasaba, mabalin nga ipaituloyna ti narugianen a teritoria. No adda dagiti nagnagna a napan iti pagtataripnongan ket adayo ti teritoria, mabalin nga ipakaduana ida kadagiti adda luganna. No delikado ti teritoria, mabalin nga adda ipakuyogna a brother iti agkadua a sister wenno mangtuding kadagiti brother nga agtrabaho iti asideg dagiti sister. Mabalin a ti ipatrabahona kadagiti nakapuy ti salun-atna ket kadagiti patad a lugar wenno iti bassit laeng ti agdanna a pasdek nga ayan dagiti pagtaengan. Mabalin nga ipakaduana met dagiti kabbaro nga agibumbunannag kadagiti mas eksperiensiado. Ngem no naladaw dagiti agibumbunannag, masansan a mabaliwan dagiti urnos tapno maipaayan ti atension ti kasapulan dagiti naladaw. Siempre, no dadduma, adda dagiti nainkalintegan a rason a maladawtayo. Nupay kasta, no nakairuamantayon ti maladaw, isaludsodtayo iti bagitayo no gapu dayta iti saantay a panangipateg kadagiti taripnong sakbay ti panangasaba wenno gapu dayta iti ditay panangorganisar a nasaksakbay kadagiti aktibidadtayo.

12. Ania ti mabalin nga usigenyo no gagangayen a dakayo ti mangpilpili iti kaduayo a mangasaba?

¹² Mabalin a dagiti rummuar a mangasaba ti mangpili no asino ti kaduada sakbay a mangrugi ti taripnong, wenno ti mangidaulo ti mangted iti kaduada. No gagangayen a sika ti mangpilpili iti kaduam, mabalinmo kadi ti ‘agpalawa’ babaen ti pannakipagtrabahom iti agduduma a kakabsat imbes a kanayon a dagiti nasinged a gagayyemmo ti kaduam? (2 Cor. 6:11-13) Mabalin kadi a sagpaminsan a makitulagka met a makikadua iti kabbaro nga agibumbunannag tapno matulongam a mangparang-ay iti abilidadna a mangisuro? (1 Cor. 10:24; 1 Tim. 4:13, 15) Denggem a naimbag dagiti instruksion, a pakairamanan ti urnos maipapan iti pangrugianyo a mangasaba. No malpasen ti taripnong, dimon balbaliwan dagiti urnos ken mapankayon a dagus iti teritoria.

13. No ti amin a karaman ket sipapasnek nga aramidenda ti pasetda, kasanotay a magunggonaan kadagiti taripnong sakbay ti panangasaba?

¹³ Kalpasan ti panangasaba ti 70 nga inorganisar ni Jesus, “nagsublida nga addaan rag-o.” (Luc. 10:17) Sigurado a ti pannakitaripnong ni Jesus kadakuada sakbay a napanda nangasaba ket nakatulong iti naballigi a ministerioda. Kasta met laeng a gunggona ti ipaay ita dagiti taripnong sakbay ti panangasaba. No ti amin a karaman ket sipapasnek nga aramidenda ti pasetda, dagiti taripnong sakbay ti panangasaba ti mangpabileg, mangisuro, ken mangorganisar kadatayo a mangitungpal iti annongentayo a ‘mangsaksi kadagiti amin a nasion.’—Mat. 24:14.