Saludsod

◼ Ania a bambanag ti mapagsasaritaan koma kadagiti taripnong sakbay ti panangasaba?

Ti taripnong sakbay ti panangasaba ket nairanta a tumulong kadatayo a mangipamaysa iti aktibidad a sumaganad iti dayta—ti panangasaba. Nakasagana ngarud koma a naimbag ti konduktor a mangiranud kadagiti makapabileg, espisipiko, ken praktikal nga impormasion. No ti teksto iti dayta nga aldaw ket direkta a mainaig iti trabaho a panangasaba, mabalin a maibasa ken mausig dayta iti apagbiit. Nupay kasta, ti taripnong ket nangnangruna koma a naipamaysa iti panangtulong iti amin a makiruar tapno ad-adda a nakasaganada a mangitungpal iti ministerio iti dayta nga aldaw.—2 Tim. 4:5.

Mabalin a mapagsasaritaan dagiti praktikal a punto manipud iti Ti Ministeriotayo iti Pagarian tapno mapalagipan ti amin no ania ti agdama a tukon ken no kasano nga iparang dayta. Iti Aldaw ti Panagmagasin, mabalin nga idemostra ti presentasion iti “No Ania ti Ibagayo Maipapan Kadagiti Magasin.” No maipapan kadagiti dadduma a tukon, mabalin a maitampok ti maysa wenno dua nga introduksion manipud iti Pannakirinnason a libro a maibagay iti teritoriayo. Mabalin a pagsasaritaan wenno idemostra ti maysa a benneg ti ministerio, kas koma no kasano nga usaren ti Biblia a mangasaba, no kasano ti makisarita iti saan nga interesado a tao, no kasano ti mangitukon iti panagadal iti Biblia, wenno no kasano a sarungkaran ti maysa nga interesado.

Agpaut la koma iti 10 agingga iti 15 minuto ti taripnong sakbay ti panangasaba, a pakairamananen ti panangyurnos kadagiti grupo, panangituding iti teritoria, ken kararag. No nalpas ti taripnong, ammo koma ti amin a presente no siasino ti kaduada ken no sadino ti pangasabaanda, ket mapanda koma a dagus iti teritoria. Gapu iti kinaababa ti taripnong, napateg a sumangpet a nasapa ti amin. No adda panangasaba kalpasan ti gimong ti kongregasion, kas iti Panagadal iti Pagwanawanan, ab-ababa koma ti taripnong sakbay ti panangasaba. Saan a nesesita a pagsasaritaan ti teksto iti dayta nga aldaw, yantangay kalkalpas a natagiragsak ti maysa a nagsayaat a Nainkasuratan a diskusion.

Nasakbay koma a madutokan dagiti kualipikado a kakabsat a lallaki a mangidaulo iti kada taripnong sakbay ti panangasaba. No adda aldaw nga awan ti mangidaulo, nasken a mangdutok dagiti panglakayen kadagiti sister a mangidaulo no kasapulan. Bayat a situtugaw, mabalin nga irugi ti sister ti maysa a grupo a diskusion maipapan iti teksto dayta nga aldaw wenno dadduma a punto mainaig iti panangasaba, ket ababa koma dagiti komentona. Rumbeng nga agdalungdong dayta a sister.

Ti taripnong sakbay ti panangasaba ket nagsayaat a gundaway tapno mapabileg ken makabalantayo a makiraman iti ministerio. No nakasagana a naimbag ti mangidaulo, ad-adda a magunggonaan ti amin.