Dagiti Taripnong Sakbay ti Panangasaba
1. Apay a kayattayo ti agserbi iti tay-ak iti organisado a pamay-an?
1 Nangipaay ni Jesus iti ulidan iti panangitungpal iti trabaho a panangikasaba iti Pagarian iti organisado ken epektibo a pamay-an. Iti met kaaldawantayo, dagidiay responsable iti daytoy a sangalubongan a kampania a panangikasaba iti Pagarian tarigagayanda unay a makita a maitungpal daytoy a trabaho iti umasping a pamay-an. Gapu iti daytoy, dagiti kongregasion iti intero a lubong us-usarenda dagiti taripnong sakbay ti panangasaba kas maysa a pamay-an a mangorganisar kadagiti grupo dagiti manangikaskasaba iti Pagarian para iti panagserbi iti tay-ak.—Mat. 24:45-47; 25:21; Luc. 10:1-7.
2. Ania dagiti mabalin nga aramiden kadagiti taripnong sakbay ti panangasaba?
2 Nagsayaat nga Urnos: Nairanta dagiti taripnong sakbay ti panangasaba a mangipaay iti pammaregta, praktikal nga instruksion, ken panangiwanwan kadagidiay mapan mangasaba. Mabalin a pagsasaritaan iti apagbiit ti teksto iti inaldaw no nalawag nga agaplikar dayta iti ministerio iti tay-ak. No dadduma, mabalin a mapagsasaritaan dagiti palagip manipud iti Ti Ministeriotayo iti Pagarian, ti libro a Pannakirinnason, wenno nalabit ti libro nga Eskuelaan ti Panagministro tapno makapagsagana amin a mapan mangasaba iti dayta nga aldaw. Mabalin met a paidemostra iti apagbiit no kasano nga ipaima ti tukon a publikasion. Sakbay ti pangserra a kararag, rumbeng nga ammo ti amin no siasino ti kaduada ken no ania a teritoria ti wanasenda. Kalpasan la unay ti taripnong a di lumbes iti 15 a minuto, masapul a mapanen ti amin iti teritoriada.
3. Siasino dagiti responsable iti panangorganisar kadagiti taripnong iti panagserbi iti tay-ak?
3 Kasanoda a Maorganisar? Ti manangaywan iti serbisio ket isu ti mangidaulo. Isu ti addaan iti responsabilidad a mangorganisar kadagiti taripnong sakbay ti panangasaba. Rebbengen dagiti manangaywan iti grupo, wenno dagiti katulonganda, a kuyogen dagiti grupoda iti panagserbi iti tay-ak kadagiti ngudo ti lawas. Dagiti dadduma a manangaywan wenno dagiti ministerial nga adipen mabalinda a kuyogen dagiti grupo iti panagserbi iti lawlawasna. Adda koma nasayaat a koordinasion iti nagbaetan ti manangaywan iti grupo ken ti manangaywan iti serbisio tapno adda umdas a teritoria a wanasen ti grupoda no mamalaybalayda kadagiti ngudo ti lawas. Kabayatan ti lawas, organisaren ti manangaywan iti serbisio dagiti urnos para kadagiti mangidaulo kadagiti grupo a mapan mangasaba.
4-6. (a) Ania ti panggep dagiti taripnong sakbay ti panangasaba no maipapan iti teritoria ti kongregasion? (b) Ania dagiti mabalin nga usigen iti panangikeddeng no sadino ken kaano a maangay dagiti taripnong sakbay ti panangasaba?
4 Sadino ken Kaano a Maangay Dagitoy a Taripnong? Imbes a maymaysa a lugar ti pagtataripnongan ti intero a kongregasion, gagangay a kasayaatan no maangay dagitoy a taripnong kadagiti kombeniente a lugar, masansan a kadagiti pribado a pagtaengan, iti intero a teritoria tapno mawanas a naimbag ti teritoria ti kongregasion. Mabalin met nga usaren ti Kingdom Hall para iti daytoy a panggep. Adu a kongregasion ti mangus-usar iti Kingdom Hall a mangangay iti taripnong sakbay ti panangasaba kalpasan ti palawag publiko ken ti Panagadal iti Pagwanawanan iti Domingo. Aginggat’ mabalin bassit laeng koma nga oras ti mabusbosyo nga agturong kadagiti teritoriayo. Gapuna, dagiti urnos ket rumbeng a marepaso sagpaminsan tapno masigurado no dagiti agdama a pagtataripnongan ket maitutop pay laeng para iti naan-anay ken epektibo a pannakawanas ti teritoriada.
5 Ti kasayaatan a pannakaangay dagitoy a taripnong ken no mamin-ano a maangay dagita iti uneg ti makalawas ket agpannuray iti kalawa ti teritoria. Dagiti sumaganad a saludsod ket mabalin nga agserbi kas giya iti panangikeddeng no sadino ken kaano ti kasayaatan a pannakaangay ti taripnong sakbay ti panangasaba.
6 Ania a teritoria ti agkasapulan iti dakdakkel nga atension? Ania ti kasayaatan nga oras iti panangasaba iti binalaybalay? Mabalin kadi ti mangyeskediul iti panangasaba wenno panagsarungkar iti rabii? Masapul a maipaskil iti information board amin nga urnos iti panagserbi iti tay-ak. Tarigagayan ti amin nga agibumbunannag iti Pagarian a wanasen a naimbag dagiti naituding a teritoriada tapno maikunatayo met ti kinuna ni apostol Pablo: “Awananakon iti di naasak a teritoria.”—Roma 15:23.
7. Ania ti responsabilidad daydiay mangidaulo iti taripnong sakbay ti panangasaba?
7 Panangikondukta Kadagiti Taripnong Sakbay ti Panangasaba: Daydiay natudingan a mangikondukta iti daytoy a taripnong maipakitana ti nauneg a panagraemna iti daytoy a nateokratikuan nga urnos no agsagana a naimbag. Masapul a mangrugi iti umiso nga oras, makaisuro ken ababa laeng ti pannakaikondukta dagitoy a taripnong. Maangay daytoy iti uneg ti 10 agingga iti 15 a minuto. Sakbay a mangrugi ti taripnong, masapul nga ammon ti konduktor no ania a teritoria ti maasak. Nupay saan a kasapulan nga urayen dagidiay naladaw kalpasan ti taripnong, makatulong no mangibatikayo iti mensahe no sadino ti pangasabaan ti grupo. Masapul a mapan ti amin iti naituding a teritoria kalpasan unay ti taripnong sakbay ti panangasaba. Sigurado a ti nasayaat ti pannakaorganisarna ken makaisuro a taripnong sakbay ti panangasaba iwanwanna ti amin a mapan mangasaba iti dayta nga aldaw.—Prov. 11:14.
8. Kasano a maipakita dagidiay tumabuno kadagiti taripnong sakbay ti panangasaba a makikokooperarda kadagidiay mangidadaulo?
8 Itatabuno Kadagiti Taripnong Sakbay ti Panangasaba: Nasken ti kooperasion. (Heb. 13:17) No posible, daydiay mangor-organisar iti grupo tulonganna ti siasinoman nga agkasapulan iti kadua a mangasaba. Nasayaat no adda dagiti aduan kapadasan nga agibumbunannag tapno matulonganda dagidiay kabbaro ken bassit pay laeng ti kapadasanna nga agibumbunannag. Dakkel ti maitulong dagidiay sidadaan a makikadua sagpaminsan kadagiti nagduduma nga agibumbunannag. (Prov. 27:17; Roma 15:1, 2) Rumbeng nga ikagumaan ti amin ti agbalin a managsapsapa. Ti panangraemtayo iti daytoy a nateokratikuan nga urnos ken ti panangikabilangan kadagiti kakabsattayo tignayennatayo a mangaramid kadagiti kasapulan a panagbalbaliw iti daytoy a banag.—2 Cor. 6:3, 4; Fil. 2:4.
9. Kadagiti ania a pamay-an a masuportaran dagiti payunir daytoy nga urnos?
9 Suporta Dagiti Payunir: Napateg ken makaparegta iti amin ti panangsuporta dagiti payunir kadagiti taripnong sakbay ti panangasaba. Pudno nga adu ti responsabilidad dagiti payunir. Malaksid kadagiti panangyadal iti Biblia ken panagsarungkar, ti eskediulda iti inaldaw mabalin a ramanenna ti panangibaklay kadagiti responsabilidad iti pamilia, ken iseserrek iti panggedan. Gapuna, saan nga obligado dagiti payunir a mangsuporta iti tunggal taripnong sakbay ti panangasaba nga inorganisar ti kongregasion, nangruna no inaldaw a maang-angay dayta. Nupay kasta, mabalin a posible a suportaran dagiti payunir ti uray sumagmamano laeng a taripnong para iti panangasaba iti tunggal lawas. Adda maitulong dagiti taripnong sakbay ti panangasaba iti panangsanay kadagiti miembro ti kongregasion. Dakkel met ti maitulongna kadagiti sabsabali ti espiritualidad ken kapadasan dagiti payunir. Adu ti kapadasanda iti ministerio gapu ta kanayon a makiramramanda iti panagserbi iti tay-ak. Mabalinda nga iranud daytoy. Gapu iti naregta a pannakiramanda iti ministerio ken kadagiti taripnong sakbay ti panangasaba, maibilangda nga ulidan a nasayaat a tuladen. Maapresiar unay ti pannakiramanda kadagitoy a taripnong.
10. Apay a maitutop nga amin nga agibumbunannag iti Pagarian naimpusuan a suportaranda daytoy nga urnos?
10 Kas iti inaramid ni Jesus ken dagiti adalanna, ti dakkel a paset ti trabahotayo a panangikasaba iti Pagarian ket maibanag babaen ti panangasaba iti binalaybalay. Maang-angay dagiti taripnong sakbay ti panangasaba tapno maparegta ken agbalintayo nga epektibo iti pannakiraman iti daytoy a trabaho. Amin nga agibumbunannag iti naimbag a damag masapul a suportaranda dagiti kasta a nateokratikuan nga urnos aginggat’ mabalin. (Ara. 5:42; 20:20) Sapay koma ta naimpusuan a suportarantayo amin daytoy nga urnos. No aramidentayo dayta, sigurado a sibabaknang a bendisionannatayo ni Jehova ken maparagsaktayo ti puso ti Lidertayo a ni Jesu-Kristo bayat nga ikaskasabatayo ti naimbag a damag maipapan iti Pagarian ti Dios.—Mat. 25:34-40; 28:19, 20.