Magunggonaankayo a Naan-anay Kadagiti Taripnong Sakbay ti Panangasaba
1. Ania ti maitulong dagiti taripnong sakbay ti panangasaba?
1 Dagiti epektibo a taripnong sakbay ti panangasaba mangipaayda iti pammaregta ken praktikal a balakad sakbay a mapantayo iti pangasabaan. Dayta ti tumulong kadatayo a makiraman iti grupo a panangasaba tapno makaduatayo ti dadduma maipaay iti panagbibinnadang ken pannakasanay. (Prov. 27:17; Ecl. 4:9, 10) Ania ti mabalin nga aramidentayo tapno naan-anay a magunggonaantayo kadagitoy a taripnong?
2. Ania ti sumagmamano a bambanag a mabalin nga usigen ti mangidaulo?
2 Ti Mangidaulo: Saan a naibalabala a nasaksakbay ti espesipiko nga impormasion a mausig kadagitoy a taripnong. Gapuna, masapul nga agsagana a naimbag ti mangidaulo. Nupay mabalinyo nga iraman a pagsasaritaan ti teksto no mainaig dayta iti ministerio, diyo koma iyugali nga usigen lattan ti inaldaw a teksto. Panunotenyo no ania a praktikal a tulong ti mabalin nga ipaay kadagidiay mangasaba iti dayta nga aldaw. Kas pagarigan, mabalin a kayatyo a pagsasaritaan wenno iparang ti maysa a presentasion. Mabalinyo a repasuen ti maysa a banag iti libro a Pannakirinnason, Eskuelaan ti Panagministro, wenno ti kalkalpas a paset iti Gimong ti Serbisio. No dadduma, mabalin nga usigenyo no kasano a tamingen ti maysa a parikut a mabalin a pakaipasanguanyo iti teritoriayo, wenno mabalin a pagsasaritaanyo no kasano a maparayray ti interes ken mairugi ti panangyadal iti Biblia, nangnangruna no adu nga agibumbunannag ti mangaramid iti panagsarungkar. Aniaman ti usigenyo, agbalinkayo koma a narayray ken makaparegta.
3. Kasano kapaut ti taripnong, ket ania koma ti maibanag bayat dayta nga oras?
3 Uray no ammoyo a maladaw ti dadduma, irugiyo ti taripnong iti naituding nga oras. Tingitingenyo a naimbag no kasano nga urnosen dagiti grupo, ken ikkanyo iti teritoria dagidiay agkasapulan iti dayta. Agpaut koma ti taripnong iti 10 agingga iti 15 a minuto laeng wenno ab-ababa pay no maangay dayta kalpasan unay ti gimong ti kongregasion. Sakbay nga agngudo ti taripnong, ammo koma ti amin no asino ti kaduada ken sadino ti pangasabaan. Nasken nga agngudo ti taripnong babaen ti kararag.
4. Ania ti makatulong iti amin tapno magunggonaanda a naan-anay kadagiti taripnong sakbay ti panangasaba?
4 Adda Maitulongyo: Kas kadagiti gimong ti kongregasion, maipakitatayo ti panagraem ken Jehova ken ti konsiderasion kadagiti sabsabali no nasapatayo a sumangpet. Makiramankayo iti saritaan. Mabalin a ti mangidaulo ti mangdutok iti kaduayo, wenno mabalin a dakayon ti makitulag sakbay pay ti taripnong no siasino ti kayatyo a kadua. No dakayo ti agpili iti kaduayo, ikagumaanyo ti ‘lumawa’ babaen ti pannakipagtrabahoyo iti agduduma nga agibumbunannag, imbes a dagiti nasinged a gagayyemyo laeng ti kanayon a kaduayo. (2 Cor. 6:11-13) No nalpasen ti taripnong, liklikanyo a baliwan dagiti urnos, ken mapankayo a dagus iti teritoria.
5. Ania ti panggep dagiti taripnong sakbay ti panangasaba?
5 Ti panggep dagiti taripnong sakbay ti panangasaba ket kas met laeng kadagiti gimong ti kongregasion. Nayurnosda tapno ‘agpipinnanunottayo iti maysa ken maysa tapno mangparegta iti ayat ken nasayaat nga ar-aramid.’ (Heb. 10:24, 25) No ikagumaantayo ti magunggonaan kadagitoy a taripnong, tumulong dayta kadatayo a mangitungpal iti ministeriotayo—maysa a ‘nasayaat nga aramid’!