Saludsod

◼ Kasano a maidaulo ti panglukat a kanta iti Teokratiko nga Eskuelaan ti Panagministro, ti Gimong ti Serbisio, ti Miting Publiko, ken ti Panagadal iti Pagwanawanan, ken siasino ti mangidaulo iti dayta?

Dagiti napili a panglukat a kanta iti tunggal lawas para iti Teokratiko nga Eskuelaan ti Panagministro ket nailista iti Eskediul ti Teokratiko nga Eskuelaan ti Panagministro a naikabil iti suplemento ti Oktubre a Ti Ministeriotayo iti Pagarian. Nailanad iti panid 2 Ti Ministeriotayo iti Pagarian dagiti panglukat ken pangserra a kanta iti tunggal lawas para iti Gimong ti Serbisio. Kasta met a dagiti makanta iti linawas a Panagadal iti Pagwanawanan ket masarakan iti panid 2 ti tunggal ruar Ti Pagwanawanan. Gapu ta dagiti napili a makanta ket adda pakainaiganna iti maysa a paset ti gimong, idauluan dayta ti kabsat a mangikondukta iti dayta imbes a ti tserman iti immuna a gimong.

Kas pagarigan, ti manangaywan iti Teokratiko nga Eskuelaan ti Panagministro abrasaenna ti tallaong, idauluanna ti panglukat a kanta, ikonduktana ti eskuelaan, ken awisenna iti plataporma ti umuna nga ispiker iti Gimong ti Serbisio. Ti kabsat nga umuna nga agpaset iti Gimong ti Serbisio ti mangidaulo iti kanta kas panglukat iti Gimong ti Serbisio.

Umasping iti dayta, ti tserman ti manglukat iti Miting Publiko. Sibabara nga abrasaenna amin a timmabuno ken awisenna ida a makidanggay a mangkanta iti panglukat a kanta a napili ti ispiker. Ti tserman (wenno nalabit ti sabali a kualipikado a kabsat a nadutokan a nasaksakbay) ti mangipaay iti panglukat a kararag. Isu ti mangyam-ammo iti ispiker ken ibagana ti tema ti palawagna. Kalpasan ti palawag, iyebkas ti tserman iti ababa a panagyaman gapu kadagiti banag a nasursuroda ngem saan a mangted iti sumario ti palawag ti ispiker. Iyanunsiona ti tema ti palawag publiko para iti sumaganad a lawas sa awisenna amin a timmabuno nga agtalinaedda para iti Panagadal iti Pagwanawanan. Saanen a kasapulan a damagen ti tserman no kayat ti tallaong nga ipaw-it ti ayat ken kablaawda iti kongregasion ti naawis nga ispiker. Kalpasanna, ti tserman awisenna iti plataporma ti mangikondukta iti Panagadal iti Pagwanawanan.

Ti mangikondukta iti Panagadal iti Pagwanawanan ti mangidaulo iti umuna a makanta para iti panagadal. Idauluanna ti panagadal sigun iti naipablaak a material. Kalpasanna, iyanunsiona ti pangserra a kanta. Ti mangikondukta iti Panagadal iti Pagwanawanan masansan nga awisenna ti kabsat a nangidatag iti palawag publiko a mangipaay iti pangserra a kararag.

Ti panangsurot kadagitoy a pagannurotan tulongannatayo a mangsigurado a maikondukta dagiti gimongtayo iti kongregasion iti naurnos a pamay-an.