Instruksion Para iti Gimong a Panagbiag ken Ministeriotayo kas Kristiano

Dagiti Linaonna

1. Dagiti instruksion iti daytoy a dokumento tulonganna dagidiay adda pasetna iti gimong a Panagbiag ken Ministeriotayo kas Kristiano. Masapul a repasuenda dagiti instruksion ti pasetda a makita iti Workbook iti Gimong a Panagbiag ken Ministerio ken iti daytoy a dokumento sakbay nga isaganada ti pasetda. Maawis ti amin nga agibumbunannag a mangiparang kadagiti paset dagiti estudiante. Mabalin a makipaset ti dadduma nga aktibo a makitimtimpuyog iti kongregasion no umanamongda kadagiti pannursuro ti Biblia ken agbibiagda maitunos kadagiti Nakristianuan a prinsipio. Ti manangaywan iti Gimong a Panagbiag ken Ministerio masapul nga ilawlawagna dagiti kualipikasion dagiti agpaset para iti asinoman a saan pay nga agibumbunannag a kayatna ti agenrol, ken ibagana no kualipikado. Masapul nga aramidenna dayta a presente ti mangyad-adal iti Biblia (wenno ti Saksi a nagannak.) Dagiti kualipikasion ket kapada dagiti kualipikasion ti agbalin a di bautisado nga agibumbunannag.—od kap. 8 par. 8.

PANGLUKAT A SASAO

2. Maysa a minuto. Kada lawas, kalpasan ti panglukat a kanta ken kararag, ti tserman iti Gimong a Panagbiag ken Ministerio paggagarenna ti tallaong no ania dagiti mailawlawag iti programa. Masapul nga agpokus ti tserman kadagiti punto a pakagunggonaan unay ti kongregasion.

GAMENG MANIPUD ITI SAO TI DIOS

3. Palawag: Sangapulo a minuto. Ti tema ken ti balabala ti dua wenno tallo a kangrunaan a punto ket makita iti Workbook iti Gimong a Panagbiag ken Ministerio. Maited daytoy a paset iti maysa a panglakayen wenno iti kualipikado a ministerial nga adipen. No baro a libro ti Biblia ti nayeskediul iti linawas a panagbasa iti Biblia, adda maipabuya a video kas introduksion. Mabalin nga usaren ti ispiker dagiti punto iti video nga adda pakainaiganna iti tema. Ngem masapul nga ilawlawagna dagiti punto a nadakamat iti workbook. No ipalubos met ti oras, usarenna ti artwork wenno ladawan, a nadisenio a mangsuporta iti impormasion a mailawlawag. Mabalin a mangiraman iti sabali pay a reperensia no makatulong dayta iti pannakailawlawag dagiti punto iti balabala.

4. Panagkali iti Naespirituan a Gameng: Sangapulo a minuto. Daytoy a paset ket saludsod ken sungbat nga awan introduksion wenno konklusionna. Iparang daytoy ti panglakayen wenno kualipikado a ministerial nga adipen. Masapul nga isaludsodna iti tallaong ti dua a saludsod. Mabalinna met nga ipabasa wenno saan dagiti naisitar a bersikulo. Masapul a 30 a segundo wenno awan pay ti kapaut ti panagkomento dagidiay maawagan.

5. Panagbasa iti Biblia: Uppat a minuto. Daytoy a paset ket maited iti lalaki nga estudiante. Masapul a basaen ti estudiante ti naited a material ngem saan a mangted iti introduksion wenno konklusion. Nangnangruna nga interesado ti tserman a mangtulong kadagiti estudiante nga agbasa iti umiso a pamay-an, addaan pannakaawat, naannayas, umiso a panangipaganetget iti sasao, panangbaliwbaliw iti boses, maitutop a panagsardeng, ken agsao iti natural a pamay-an. Gapu ta ab-ababa ken at-atiddog no dadduma ti nayeskediul a panagbasa iti Biblia, masapul nga ikabilangan ti manangaywan iti Gimong a Panagbiag ken Ministerio ti abilidad dagiti estudiante no mangaramid iti eskediul dagiti agpaset.

AGBALIN A MAS EPEKTIBO ITI MINISTERIO

6. Sangapulo ket lima a minuto. Daytoy a paset ti gimong ket nadisenio a mangsanay iti amin para iti ministerio ken mangparang-ay iti abilidadda a makisarita, mangasaba, ken mangisuro. No kasapulan, mabalin a maikkan dagiti panglakayen iti paset dagiti estudiante. Masapul nga iyaplikar ti tunggal estudiante dagiti adalen a punto manipud iti broshur a Mangisuro wenno Ayatem Dagiti Tattao a nakaparentesis kalpasan ti naited a paset iti Workbook iti Gimong a Panagbiag ken Ministerio. No dadduma, adda mayeskediul a paset a pagsasaritaan. Iparang dayta ti panglakayen wenno kualipikado a ministerial nga adipen.—Kitaen ti parapo 15 no kasano nga iparang dagiti paset a pagsasaritaan.

7. Panangirugi iti Saritaan: Daytoy a paset ket mabalin nga ited iti estudiante a lalaki wenno babai. Ti assistant wenno ti kaduana nga agpaset ket masapul a kapadana a lalaki wenno kapadana a babai, wenno kapamiliana. Mabalinda ti agtugaw wenno agtakder.—Para iti kanayonan nga impormasion iti linaon ken setting daytoy a paset, kitaen ti parapo 12 ken 13.

8. Panagsarungkar: Daytoy a paset ket mabalin nga ited iti estudiante a lalaki wenno babai. Ti assistant wenno ti kaduana nga agpaset ket masapul a kapadana a lalaki wenno kapadana a babai. (km 5/97 p. 2) Mabalinda ti agtugaw wenno agtakder. Idemostra ti estudiante no ania ti ibaga no sarungkaran ti maysa a nakasarita iti napalabas.—Para iti kanayonan nga impormasion iti linaon ken setting daytoy a paset, kitaen ti parapo 12 ken 13.

9. Panagaramid iti Adalan: Daytoy a paset ket mabalin nga ited iti estudiante a lalaki wenno babai. Ti assistant wenno ti kaduana nga agpaset ket masapul a kapadana a lalaki wenno kapadana a babai. (km 5/97 p. 2) Mabalinda ti agtugaw wenno agtakder. Idemostrada ti panagadal iti Biblia a madaman a maikonkondukta. Saan a kasapulan ti introduksion wenno konklusion, malaksid no maysa kadagita nga adalen a punto ti espesipiko nga iyaplikar ti estudiante. Saan a masapul a maibasa ti intero a material a naited, nupay mabalin nga aramiden dayta.

10. Panangilawlawag iti Patpatien: No maiparang kas palawag, maited daytoy a paset iti estudiante a lalaki. No maiparang kas demostrasion, daytoy ket mabalin nga ited iti estudiante a lalaki wenno babai. Ti assistant wenno ti kaduana nga agpaset ket masapul a kapadana a lalaki wenno kapadana a babai, wenno kapamiliana. Masapul a mangipaay ti estudiante iti nalawag ken nataktika a sungbat iti pannakatema a saludsod nga usarenna ti naited a reperensia. Mabalinna a pilien no dakamatenna wenno saan ti reperensia bayat ti pasetna.

11. Palawag: Daytoy a paset ket maited iti estudiante a lalaki ken maiparang kas palawag iti kongregasion. No ti palawag ket maibatay iti maysa a punto manipud iti apendise A ti broshur nga Ayatem Dagiti Tattao, masapul nga ilawlawag ti estudiante no kasano a mausar ti/dagiti teksto iti ministerio. Kas pagarigan, mabalin nga ilawlawagna no kaano a mabalin nga usaren ti teksto, ti kaipapanan ti teksto, ken no kasano nga ilawlawag dayta iti maysa a tao. No ti palawag ket maibatay iti punto iti maysa kadagiti leksion iti broshur nga Ayatem Dagiti Tattao, masapul nga agpokus ti estudiante no kasano a mausar ti punto iti ministerio. Mabalin nga ipaganetgetna ti pagarigan iti punto 1 ti leksion wenno ti aniaman a kanayonan a teksto iti leksion, no makatulong.

12. Linaon: Ti material iti daytoy a parapo ken iti sumaruno ket agaplikar kadagiti paset a “Panangirugi iti Saritaan” ken “Panagsarungkar.” Malaksid no nadakamat, ti kalat ti estudiante ket mangiranud iti simple a kinapudno iti Biblia a makatulong iti kasarsaritana ken makaibati iti pagsaritaanda inton sumaruno. Masapul nga agpili ti estudiante iti topiko a naintiempuan ken epektibo iti lugarda. Adda kenkuana no kayatna ti mangipakita iti publikasion wenno video manipud iti Toolbox iti Panangisuro. Imbes nga idemostra dagiti estudiante ti naikabesa a presentasion, masapul a praktisenda dagiti abilidad iti pannakisarita, kas iti panangipakita iti personal nga interes ken kinanatural.

13. Setting: Masapul nga iyaplikar ti estudiante ti naited a setting iti kasasaad iti lugarda. Kas pagarigan:

(1) Panagbalaybalay: Karaman iti daytoy a setting ti panangasaba iti binalaybalay—iti man in person, tawag, wenno surat—ken panagsarungkar iti nakasarita iti napalabas a panagbalaybalay.
(2) Di Pormal a Panangasaba: Ipakita daytoy a setting no kasano a gundawayan ti gagangay a pannakisarita tapno makapangasaba. Mabalin a karaman iti daytoy ti panangiranud iti punto ti maysa a teksto kadagiti makasaritam iti pagtrabahuan, eskuelaan, kaarruba, pangpubliko a transportasion, wenno sadinoman bayat nga ar-aramidem dagiti inaldaw nga aktibidadmo.
(3) Panangasaba iti Publiko: Mabalin a karaman iti daytoy a setting ti cart witnessing, panangasaba kadagiti lugar ti negosio, street witnessing, wenno panangasaba kadagiti parke, paradaan, wenno sadinoman a pakasarakan iti tattao.

14. Panangusar Kadagiti Video ken Literatura: Depende iti kasasaad, mabalin a pilien ti estudiante ti mangusar iti video wenno literatura. No adda video iti paset wenno no pilienna ti mangusar iti video, iruangan ken pagsaritaan ti video ngem saanna nga i-play.

PANAGBIAG KAS KRISTIANO

15. Kalpasan ti kanta, ti sumaganad a 15 a minuto iti daytoy a seksion ket addaan iti maysa wenno dua a paset a nadisenio a tumulong iti tallaong a mangyaplikar iti Sao ti Dios. Malaksid no nadakamat, dagitoy a paset ket mabalin a maited kadagiti panglakayen wenno kualipikado a ministerial nga adipen, ngem no lokal a kasapulan, masapul a maited dayta iti panglakayen. No ti paset ket pagsasaritaan, mabalin a mangusar ti ispiker iti kanayonan a saludsod malaksid kadagiti saludsod nga addan iti Workbook. Masapul nga ababa la koma ti introduksionna tapno ad-adu ti tiempo a mausar para kadagiti kangrunaan a punto ken iti pannakipaset dagiti agdengdengngeg. No adda mainterbiu, maymayat no agsao ti mainterbiu iti entablado imbes nga iti tugawna, no posible.

16. Panagadal ti Kongregasion iti Biblia: Tallopulo a minuto. Daytoy a paset ket masapul a maited iti kualipikado a panglakayen. (No limitado ti bilang dagiti panglakayen, mabalin a maited daytoy iti kualipikado a ministerial nga adipen, no kasapulan.) Ti bagi dagiti panglakayen ti mangpili no asino ti kualipikado a mangikondukta iti Panagadal ti Kongregasion iti Biblia. Dagiti naaprobaran ket masapul a nasayaat ti panangidauloda tapno saan a lumbes iti oras ti panagadal, maipaganetget dagiti kangrunaan a teksto, ken matulongan ti amin a mangapresiar iti praktikal a pateg dagiti nailawlawag a punto. Makatulong kadagiti naaprobaran no repasuenda ti naited nga instruksion iti panangikondukta kadagiti paset a saludsod ken sungbat. (w23.04 p. 24, kahon) No nailawlawagen a naimbag ti maadal iti dayta a lawas, saan a masapul a paatiddogen pay ti panagadal. No posible, agduduma a konduktor ken parabasa ti mausar iti kada lawas. No ibaga ti tserman iti Gimong a Panagbiag ken Ministerio a mapaababa ti panagadal, masapul nga ikeddeng ti konduktor no kasano a mapaababana ti panagadal. Mabalin a dinan ipabasa ti dadduma a parapo.

PANGSERRA A SASAO

17. Tallo a minuto. Repasuen ti tserman iti Gimong a Panagbiag ken Ministerio dagiti makagunggona a punto iti kalkalpas a gimong. Masapul met a dakamatenna dagiti maadal iti sumaruno a lawas. Mabalin nga inagananna dagiti estudiante nga agpaset iti umay a lawas, no ipalubos ti oras. Malaksid no adda sabali a nadakamat, masapul nga ipakaammona ti aniaman a napateg nga anunsio ken ibasana iti kongregasion ti aniaman a napateg a surat kas paset ti pangserra a sasaona. Dagiti regular nga impormasion, kas iti urnos ti panangasaba ken panagdalus, ket saan a maipakaammo iti plataporma ngem masapul a maipaskil iti information board. No adda pakaammo wenno surat nga at-atiddog ti pannakaibasana ngem iti oras para iti pangserra a sasao, masapul a kiddawen ti tserman iti kakabsat nga agpaset iti seksion a Panagbiag kas Kristiano a paababaenda dagiti pasetda sigun iti kasapulan. (Kitaen ti parapo 16 ken 19.) Maserraan ti gimong babaen ti kanta ken kararag.

KOMENDASION KEN BALAKAD

18. Kalpasan ti paset ti tunggal estudiante, addaan ti tserman iti Gimong a Panagbiag ken Ministerio iti agarup maysa a minuto a mangted iti komendasion ken balakad a naibatay iti naited nga adalen a punto. No iruangan ti tserman ti paset ti estudiante, saanna a dakamaten ti naited nga adalen a punto. Ngem no nalpasen ti paset ti estudiante ken naikkanen iti maitutop a komendasion, mabalin a dakamaten ti tserman ti adalen a punto sa ibagana no apay a nasayaat ti naaramidan ti estudiante iti dayta a punto wenno siaayat nga ilawlawagna no apay ken no kasano a parang-ayen pay ti estudiante dayta a punto. Mabalin met a komentuan ti tserman ti dadduma pay nga aspeto ti demostrasion no makitana a makatulong daytoy iti estudiante wenno iti tallaong. Kalpasan ti gimong wenno iti sabali a tiempo, mabalin a maipaay a pribado ti kanayonan a makatulong a balakad manipud iti broshur nga Ayatem Dagiti Tattao, broshur a Mangisuro, wenno iti libro nga Eskuelaan ti Panagministro, iti man naited nga adalen a punto wenno iti sabali pay nga adalen a punto.—Para iti kanayonan nga impormasion maipapan iti akem ti tserman iti Gimong a Panagbiag ken Ministerio ken iti akem ti kanayonan a mamalbalakad, kitaen ti parapo 19, 24, ken 25.

ORAS

19. Masapul a saan a lumbes iti oras ti amin a paset, uray ti komento ti tserman iti Gimong a Panagbiag ken Ministerio. Nupay naikabil iti Workbook iti Gimong a Panagbiag ken Ministerio ti espesipiko nga oras ti tunggal paset, no nailawlawagen a naimbag ti material, saanen a kasapulan ti mangnayon iti impormasion tapno laeng mausar ti naikeddeng nga oras. No lumbes iti oras dagiti paset, ti tserman iti Gimong a Panagbiag ken Ministerio wenno ti katulongan a mamalbalakad ket masapul a mangted iti pribado a balakad. (Kitaen ti parapo 24 ken 25.) Ti kapaut ti intero a gimong, agraman dagiti kanta ken kararag, ket 1 nga oras ken 45 a minuto.

BISITA TI MANANGAYWAN ITI SIRKITO

20. No ti kongregasion ket bisitaen ti manangaywan iti sirkito, maiparang ti programa sigun iti makita iti Workbook iti Gimong a Panagbiag ken Ministerio malaksid kadagitoy: Ti Panagadal ti Kongregasion iti Biblia a paset ti Panagbiag kas Kristiano ket masuktan iti 30-minuto a palawag serbisio ti manangaywan iti sirkito. Sakbay ti palawag serbisio, ti tserman iti Gimong a Panagbiag ken Ministerio repasuenna ti kalkalpas a programa, dakamatenna dagiti maadal iti sumaganad a lawas, ibasana dagiti napateg nga anunsio ken surat, sa iyam-ammona ti manangaywan iti sirkito. Kalpasan ti palawag serbisio, ti manangaywan iti sirkito serraanna ti gimong babaen ti napilina a kanta. Mabalinna nga awisen ti maysa a brother para iti pangserra a kararag. Awan koma dagiti maangay a kanayonan a klase iti lengguahe ti kongregasion bayat ti bisita ti manangaywan iti sirkito. Mabalin latta nga angayen ti maysa a grupo dagiti gimongna uray no bumisita ti manangaywan iti sirkito iti host a kongregasion. Ngem masapul a makitipon dayta a grupo iti host a kongregasion para iti palawag serbisio ti manangaywan iti sirkito.

LAWAS TI ASAMBLEA WENNO KOMBENSION

21. Awan ti gimong ti kongregasion iti lawas ti asamblea wenno kombension. Masapul a maipalagip iti kongregasion nga adalenda a personal wenno kas pamilia dagiti material a nakaeskediul para iti gimong kadagita a lawas.

LAWAS TI MEMORIAL

22. No ti Memorial ket maangay iti tengnga ti lawas, awan ti mayeskediul a Gimong a Panagbiag ken Ministerio.

MANANGAYWAN ITI GIMONG A PANAGBIAG KEN MINISTERIO

23. Ti panglakayen a pinili ti bagi dagiti panglakayen ti agserbi a manangaywan iti Gimong a Panagbiag ken Ministerio. Responsabilidadna a siguraduen a nasayaat ti pannakaorganisar daytoy a gimong ken maaramid sigun kadagitoy nga instruksion. Masapul a nasayaat ti pannakikomunikarna iti katulongan a mamalbalakad. Apaman nga addan ti Workbook iti Gimong a Panagbiag ken Ministerio, iyeskediulen ti manangaywan iti Gimong a Panagbiag ken Ministerio ti amin a maikkan iti paset iti gimong iti tengnga ti lawas para iti dua a bulan. Karaman iti daytoy ti paset dagiti saan nga estudiante ken dagiti agtserman iti gimong iti tengnga ti lawas nga inaprobaran ti bagi dagiti panglakayen, kasta met ti paset dagiti estudiante. (Kitaen ti parapo 3-16 ken 24.) No mangi-assign iti paset dagiti estudiante, masapul nga ikabilanganna ti edad ti estudiante, ti kapadasanna, ken no adda wayawayana nga agsao maipapan iti material a maited. Kasta met laeng ti aramidenna no mangi-assign iti dadduma a paset ti gimong. Masapul a maited dagiti paset iti di kumurang a tallo a lawas sakbay ti petsa a pannakaiparangda. Ti porma nga Our Christian Life and Ministry Meeting Assignment (S-89) ket mausar para kadagiti paset dagiti estudiante. Masapul a siguraduen ti manangaywan iti Gimong a Panagbiag ken Ministerio a naka-post iti information board ti kopia ti eskediul dagiti paset para iti intero a gimong. Mabalin a mangdutok ti bagi dagiti panglakayen iti sabali a panglakayen wenno ministerial nga adipen a tumulong kenkuana. Nupay kasta, dagiti laeng panglakayen ti mabalin a mangpili kadagiti mangiparang kadagiti saan a paset ti estudiante.

TSERMAN ITI GIMONG A PANAGBIAG KEN MINISTERIO

24. Kada lawas, maysa a panglakayen ti agserbi a tserman iti intero a Gimong a Panagbiag ken Ministerio. (No limitado ti bilang dagiti panglakayen, mabalin a maited daytoy kadagiti kualipikado a ministerial nga adipen, no kasapulan.) Responsabilidadna nga isagana ti panglukat ken pangserra a sasao. Iruanganna met ti amin a paset, ken depende iti kaadu dagiti panglakayen, mabalin nga isu pay ti mangiparang iti dadduma a paset ti gimong, nangnangruna kadagiti mangipabuya laeng kadagiti video a saan a masapul a pagsasaritaan. Masapul nga ababa laeng ti komentona iti nagbabaetan dagiti paset. Pilien ti bagi dagiti panglakayen no asino dagiti panglakayen a kualipikado iti daytoy nga akem. Agsisinnublat kas tserman dagiti kualipikado a panglakayen. Depende iti lokal a kasasaad, mabalin a mas masansan a mausar kas tserman ti manangaywan iti Gimong a Panagbiag ken Ministerio ngem iti dadduma a kualipikado a panglakayen. No kualipikado ti maysa a panglakayen a mangikondukta iti Panagadal ti Kongregasion iti Biblia, mabalin a kualipikado met nga agserbi kas tserman iti gimong. Ngem pangngaasiyo ta laglagipenyo a ti panglakayen nga agserbi kas tserman ket makiddaw a mangipaay iti naayat ken makatulong a komendasion, ken no kasapulan, balakad kadagidiay agpaset kas estudiante. Responsabilidad met ti tserman a siguraduen nga agleppas ti gimong iti umiso nga oras. (Kitaen ti parapo 17 ken 19.) No kayat ti tserman ken no adda espasio, mabalin nga adda maipuesto a sabali a mikropono iti stage nga usarenna tapno mayam-ammona ti sumaruno a paset bayat nga agturturong iti podium ti brother nga agpaset. Baka kayat met ti tserman ti agtugaw iti stage a nakalamisaan bayat ti paset a panagbasa iti Biblia ken ti seksion nga Agbalin a Mas Epektibo iti Ministerio. Mabalin a makainut daytoy iti oras.

KATULONGAN A MAMALBALAKAD

25. Agingga a posible, nasayaat no maysa a panglakayen nga eksperiensiado a pumapalawag ti mausar iti daytoy nga akem. Ti katulongan a mamalbalakad responsabilidadna ti mangipaay iti pribado a balakad, no kasapulan, kadagiti panglakayen ken ministerial nga adipen iti aniaman a palawag nga iparangda, a pakairamanan dagiti pasetda iti Gimong a Panagbiag ken Ministerio, palawag publiko, ken panangikondukta wenno panagbasa iti Panagadal iti Pagwanawanan wenno iti Panagadal ti Kongregasion iti Biblia. (Kitaen ti parapo 19.) No adu a panglakayen iti kongregasion ti nalaing nga agpalawag ken mangisuro, mabalin ngarud nga agduduma a panglakayen ti agserbi kas katulongan a mamalbalakad iti tunggal tawen. Saan a kasapulan a mangbalakad ti katulongan a mamalbalakad kalpasan ti tunggal paset.

KANAYONAN A KLASE

26. Depende iti bilang dagiti estudiante, mabalin a mangangay ti kongregasion kadagiti kanayonan a klase para kadagiti paset dagiti estudiante. Masapul nga adda kualipikado a mamalbalakad iti tunggal kanayonan a klase, ket maymayat no maysa a panglakayen. No kasapulan, mabalin nga ited iti kualipikado a ministerial nga adipen daytoy nga akem. Masapul a desisionan ti bagi dagiti panglakayen no asino ti mabalin nga agserbi iti daytoy nga akem ken no mapagsisinnublatan dayta. Masapul a suroten ti mamalbalakad ti instruksion iti parapo 18. No maangay ti kanayonan a klase, masapul a maibaga kadagiti estudiante a mapanda iti sabali a kuarto kalpasan ti Panagkali iti Naespirituan a Gameng a paset ti seksion a Gameng Manipud iti Sao ti Dios. Masapul a makitiponda iti kongregasion kalpasan ti maudi a paset dagiti estudiante.

DAGITI VIDEO

27. Dagiti napili a video ti mausar iti daytoy a gimong. Dagiti video para iti gimong iti tengnga ti lawas ket makita iti JW Library® app ken ma-access iti nadumaduma a gadyet.

S-38-IL 11/23