Pagsurotan Para Kadagiti Manangaywan iti Eskuelaan

ITI tunggal kongregasion, adda panglakayen a nadutokan a kas manangaywan iti Teokratiko nga Eskuelaan ti Panagministro. No naipabaklay kenka dayta a responsabilidad, ti panaginteresmo iti eskuelaan ken ti pannakaseknanmo iti irarang-ay ti tunggal estudiante ket dakkel ti maitulongna iti magapuanan ti eskuelaan iti kongregasionyo.

Ti maysa a napateg a paset ti annongem isu ti panangidaulom iti linawas a Teokratiko nga Eskuelaan ti Panagministro iti kongregasionyo. Laglagipem a malaksid kadagiti estudiante nga addaan paset iti naituding a lawas, adda dagiti dadduma pay a tumabuno. Ikonduktam ti eskuelaan iti wagas nga umawat ti intero a kongregasion kadagiti makagutugot, praktikal a pammalagip a nainaig iti uray maysa kadagiti panggep ti eskuelaan a nadakamat iti panid 5 agingga iti 8 daytoy a libro.

Maseknanka koma kadagiti amin nga estudiante, natudinganda man nga agbasa, mangiparang iti demostrasion, wenno agpalawag. Tulongam ida a mangmatmat iti ar-aramidenda a saan a basta naituding a paset, no di ket kas gundaway a rumang-ay iti panagserbida ken Jehova. Siempre, napateg unay iti irarang-ayda ti panagreggetda a mismo. Ngem nasken met nga ipakitam ti naayat a panaginteres, tulongam ida a mangtarus iti pateg dagiti punto a pakabalakadan, ken ilawlawagmo no kasanoda nga iyaplikar dagita a balakad. Gapuna, imdengam a naimbag ti tunggal palawag tapno makaipaayka kadagiti napateg a kapaliiwan.

Siguraduem nga irugi ken ileppas ti eskuelaan iti umiso nga oras. Mangipaayka iti nasayaat nga ulidan babaen ti panagkomentom iti las-ud ti naituding nga oras. No agsobra ti oras a panagpalawag ti estudiante, mangtedka wenno ti katulongam iti senias. Rumbeng a leppasen ti estudiante ti sentensia sa bumaba iti plataporma. No adda agsobra ti oras ti pasetna iti programa, iyababam ti komentom, ket kasaritam ti kabsat kalpasan ti gimong.

No presenteka, ikonduktam ti eskuelaan. No kas pagarigan ta awanka, ti sabali a panglakayen a datin a dinutokan ti bagi dagiti panglakayen ti mangikondukta iti eskuelaan. No kasapulam ti tulong iti panangisagana kadagiti eskediul, panangsurat ken panangiwaras kadagiti porma a pakaisuratan dagiti paset, wenno panangyurnos kadagiti mangsandi iti programa, mabalin a tumulong kadagitoy a banag ti maysa a ministerial nga adipen a dinutokan ti bagi dagiti panglakayen.

Panangipasalista Kadagiti Estudiante. Paregtaem amin nga agibumbunannag nga agpasalista iti eskuelaan. Dagiti dadduma nga aktibo a makitimtimpuyog iti kongregasion mabalinda ti agpasalista no umanamongda la ketdi kadagiti pannursuro ti Biblia ken agbibiagda a mayannurot kadagiti Nakristianuan a prinsipio. No adda agtarigagay nga agpasalista, sibabara a komendaram. No saan pay nga agibumbunannag, kas manangaywan iti eskuelaan ibagam kenkuana dagiti kualipikasion para kadagiti agpasalista iti eskuelaan, a no mabalbalin sisasango koma ti mangyad-adal iti Biblia kenkuana (wenno ti maysa kadagiti manamati a dadakkelna). Dagitoy a kualipikasion ket kas met laeng kadagidiay para iti maysa nga agbalin a di bautisado nga agibumbunannag. Masarakan dagita iti panid 97 agingga iti 99 ti Organisado a Mangitungpal iti Ministeriotayo. Kanayon a pabaruem ti listaan dagiti amin a nagpasalista iti eskuelaan.

Panangusar iti Porma a Pangbalakadan. Ti porma a pangbalakadan para iti tunggal estudiante ket adda iti bukodna a libro, iti panid 79 agingga iti 81. Kas ipasimudaag ti nakoloran a benneg, mabalin nga usaren ti aniaman a punto a pangbalakadan manipud 1 agingga iti 17 no natudingan nga agbasa ti estudiante. Para kadagiti demostrasion, mabalin nga usaren ti aniaman a punto a pangbalakadan malaksid iti 7, 52, ken 53. Ti balakad para kadagiti palawag ramanenna amin a punto malaksid iti 7, 18, ken 30.

No maituding ti punto a pangbalakadan, iti baba ti “Petsa a Naiparang,” suratan ti manangaywan iti eskuelaan babaen ti lapis ti espasio nga adda iti batog dayta a punto iti porma a pangbalakadan iti libro ti estudiante. Kalpasan ti panangiparang ti estudiante iti pasetna, damagem iti pribado no inaramidna dagiti ensayo a masarakan iti ngudo ti artikulo a mangsalaysay iti punto a pangbalakadan. No inaramidna, markaam iti tsek ti kahon nga adda iti porma. No irekomendam nga ituloyna a parang-ayen dayta met laeng a punto a pangbalakadan, awan kanayonan nga isuratmo iti porma a pangbalakadan; saanmo a suratan ti espasio para iti “Petsa a Nakompleto.” Sa la markaan dayta no isu ket nakasaganan nga umallatiw iti sabali a punto. Kanayonanna, iti panid 82 ti libro ti estudiante, iti kannigid ti eksena a nausar, masapul nga isuratmo ti petsa ti panangiparang ti estudiante iti tunggal pasetna. Adda espasio iti porma a pangbalakadan ken iti listaan dagiti eksena a mangipalubos a mabalin nga usaren iti mamindua ti tunggal eksena. Kanayon koma nga awit dagiti estudiante ti libroda bayat ti programa.

Mangitudingka iti maysa laeng a punto a pangbalakadan tunggal agpaset ti estudiante. Kadawyanna, kasayaatan no surotem ti panagsasaganad dagiti punto a pangbalakadan sigun iti pannakailistada. Ngem no naisangsangayan ti abilidad dagiti dadduma nga estudiante, mabalin a paregtaem ida a mangadal ken mangyaplikar a bukodda iti sumagmamano nga adalen. Kalpasanna, tulongam ida kadagiti punto a pagarupem a dakkel ti maitulongna iti irarang-ayda kas epektibo a pumapalawag ken mannursuro.

Uray no adun a tawen nga agpaspaset ti maysa nga estudiante iti eskuelaan, dakkel ti magunggonana no adalen ken iyaplikarna ti tunggal leksion. Tapno matulongan dagiti estudiante nga addaan kadagiti espesipiko a kasapulan, mabalin a mangpilika kadagiti kualidad ti panagpalawag a parang-ayenda imbes a surotem nga agsasaganad dagiti punto iti porma a pangbalakadan.

Panangbalakad. No mangbalakadka, usarem a naimbag dagiti ehemplo ken prinsipio ti Biblia. Marikna koma dagiti estudiante a ti balakad a naited ken ti wagas a pannakaipaayna ket mayannurot kadagiti natan-ok a prinsipio ti Sao ti Dios.

Laglagipem a ‘katrabahuandaka’ dagiti kakabsatmo. (2 Cor. 1:24) Kas kadakuada, masapul nga itultuloymo ti rumang-ay a kas pumapalawag ken mannursuro. Adalem a personal ti libro a Magunggonaan iti Edukasion nga Ipaay ti Teokratiko nga Eskuelaan ti Panagministro, ipakatmo dagiti balakadna, ken ipakitam ti nasayaat nga ulidan a tuladen dagiti dadduma.

Bayat nga aramidem dayta, pagbalinem a kalatmo ti panangtulong kadagiti estudiante nga agbalin a nalaing nga agbasa, makabael nga agpalawag, ken epektibo a mannursuro. Tapno maibanag dayta, ikagumaam nga ipaay ti aniaman a tulong a kasapulan tapno maawatan dagiti estudiante ti nadumaduma a kualidad ti panagpalawag, no apay a napateg dagitoy, ken no kasano a patanoren dagita. Nadisenio daytoy a libro iti wagas a mangtulong kenka a mangaramid iti dayta. Nupay kasta, saan nga umdas ti basta panangibasam iti sasao a linaon ti libro. Salaysayem ti ideya nga adda kadagita a sasao ken no kasano nga ipakat dayta.

No nasayaat ti naaramidan ti estudiante mainaig iti maysa a punto, komendaram. Ibagam iti apagbiit no ania ti namagbalin iti dayta nga epektibo wenno no apay a napateg ti inaramidna. No adda nasken nga ipaayanna pay iti atension a makatulong kenkuana, siguraduem a maawatanna no apay. Ibagam no kasanona nga aramiden dayta. Espesipiko ngem naayat koma ti panangilawlawagmo.

Tandaanam a para kadagiti adu, saan a kaskarina ti agpalawag iti maysa a grupo. No ipapan ti maysa a tao a nakapuy ti nagapuananna, pagduaduaanna no rumbeng nga itultuloyna nga ikagumaan nga aramiden dayta. Tuladem ni Jesus, a dina rinumek ti “naparpar a runo” wenno iniddep ti “agkurkuridemdem a pabilo a lino.” (Mat. 12:20) Ikonsiderarmo ti emosional a kasasaad ti estudiante. No mangbalakadka, panunotem no ti estudiante ket agdadamo wenno aduanen iti kapadasan nga agibumbunannag. Ti nabara ken napudno a komendasion mapabilegna dagiti tattao a mangaramid iti amin a kabaelanda.

Nadayaw koma ti panangtratom iti tunggal estudiante. Ibaga kadatayo ti Roma 12:10: “Iti panangipakita ti pammadayaw iti maysa ken maysa mangidaulokayo.” Anian a maitutop a patigmaan agpaay iti para balakad iti Teokratiko nga Eskuelaan ti Panagministro! No natataengan ti estudiante ngem sika, siaannad nga iyaplikarmo ti pammagbaga a masarakan iti 1 Timoteo 5:1, 2. Ngem aniaman ti edad ti maysa a tao, no naayat ti panangbalakadmo kenkuana a mangbalbaliw iti wagas a panangaramidna iti bambanag, masansan a nalaklaka nga akseptaren dayta.​—Prov. 25:11.

No mangbalakadka, igunamgunammo iti estudiante ti panggep ti panagsanay. Dayta a panggep ket saan a basta lalaingenna ti agpaset tapno makomendaran ken maibaga kenkuana a mabalinnan ti umallatiw iti sumaruno a punto a pakabalakadanna. Ti kalat ket saan a tapno agbalin a pumapalawag ken mannursuro a daydayawen dagiti sabsabali. (Prov. 25:27) Tarigagayantayo nga usaren ti sagudaytayo nga agpalawag a mangidayaw ken ni Jehova ken tumulong kadagiti sabsabali a mangammo ken mangayat kenkuana. Ti panagsanaytayo tulongannatayo a sieepektibo a mangitungpal iti trabaho a naituyang iti Mateo 24:14 ken 28:19, 20. Dagiti kualipikado a bautisado a kakabsat a lallaki ket mabalin a maawis inton agangay a makiraman a mangaywan iti “arban ti Dios” a kas pumapalawag ken mannursuro iti publiko.​—1 Ped. 5:2, 3.

Isingasingmo a basaen dagiti estudiante ti panangsalaysay ti libro iti sumaruno a punto a pakabalakadanda iti las-ud ti sumagmamano nga aldaw apaman a naikkanda iti paset. Paregtaem ida a mangyaplikar iti naadalda no isagsaganada ti pasetda iti eskuelaan, iti inaldaw a pannakisarsaritada, no agkomentoda kadagiti gimong, ken iti tay-ak ti serbisio.

Panangtuding Kadagiti Agpaset. Gagangay a maaramid daytoy iti di kumurang a tallo a lawas a nasaksakbay. No mabalbalin, maisurat koma dagiti amin a naituding a paset iti porma a nairanta para kadagita.

Dagiti paset a ramanenna ti panangisuro iti kongregasion ket maituding kadagiti panglakayen, nasaysayaat no kadagidiay epektibo ti panangiparangda iti kakasta a paset, ken kadagiti ministerial nga adipen a makabael a mangisuro.

No maipapan iti panangikeddeng no ania a paset ti estudiante ti maituding kadagiti lallaki ken no ania dagiti maited kadagiti babbai, surotem dagiti instruksion a nailanad iti eskediul ti eskuelaan. No manmano dagiti lallaki ngem adu dagiti babbai a mangiparparang kadagiti paset ti estudiante, annadam koma tapno maikkan dagiti lallaki iti umdas a gundaway nga agpalawag imbes nga agbasa laeng.

Ikonsiderarmo ti kasasaad dagiti indibidual no ikkam ida iti paset. Nasken aya a pagpalawagem iti eskuelaan ti maysa a panglakayen wenno ministerial nga adipen iti isu met la a rabii nga adda pasetna iti Gimong ti Serbisio wenno iti isu met la a lawas nga isu ti mangted iti palawag publiko iti kongregasion? Nasken aya a tudingam ti maysa a kabsat a babai nga agdemostra iti isu met la a rabii nga adda met paset ti agtutubo nga anakna, a nalabit masapul a tulonganna? Nangruna no iti kaso ti maysa nga agtutubo wenno estudiante a di pay nabautisaran, maikanatad aya kenkuana ti topiko? Siguraduem a ti naituding a paset ket mayanatup iti punto a pakabalakadan ti estudiante.

Kadagiti paset a maituding kadagiti babbai, masansan a ti estudiante ti mangpili iti eksena nga usarenna sigun iti instruksion iti panid 78 ken 82. Adda matudingan a maysa a kaduana (assistant), ngem mabalin nga usaren ti kanayonan a kadua. No kiddawen ti estudiante a ti kaduana ket daydiay koma maibagay la unay a mangidemostra iti maysa nga eksena, mapatgan koma ti kasta a kiddaw.

Dagiti Kanayonan a Klase. No adda nasurok a 50 nga estudiante a nagpasalista, mabalin a kayatmo nga ikonsiderar ti pannakausar ti kanayonan a klase para kadagiti paset dagiti estudiante. Sigun iti lokal a kasapulan, mabalin nga ipatungpal daytoy nga urnos kadagiti amin a paset dagiti estudiante wenno iti laeng dua a maudi a paset.

Addaan koma ti tunggal kanayonan a klase iti kualipikado a para balakad, no mabalbalin maysa a panglakayen. No kasapulan, mabalin a sumandi ti maysa a kualipikado a ministerial nga adipen. Ti bagi dagiti panglakayen ti mangaprobar kadagitoy a para balakad. Makikooperarka a naimbag kadakuada tapno sieepektibo a masurnadan dagiti punto a pakabalakadan dagiti estudiante uray pay no sadino a klase ti pangiparanganda iti sumaruno a pasetda.

Espesial a Klase iti Panagbasa. No ikeddeng ti bagi dagiti panglakayen nga adda sumagmamano a kameng ti kongregasion a makasapul iti instruksion para kadagiti agdadamo nga agbasa iti lenguahe a maar-aramat iti kongregasion, mabalinmo nga iyurnos daytoy mainaig iti Teokratiko nga Eskuelaan ti Panagministro. Mabalin a saklawen daytoy ti panagsursuro nga agbasa, wenno ti panggepna ket panangparang-ay iti panagbasa.

Saan a masapul a maigiddan ti kakasta a klase iti tiempo a panangiparang dagiti estudiante kadagiti pasetda iti Teokratiko nga Eskuelaan ti Panagministro. Tapno maipaay ti umdas a tulong, mabalin nga ad-adu a tiempo ti kasapulan ngem iti mabusbos kabayatan ti programa iti eskuelaan. Dagiti lokal a panglakayen ti mangikeddeng no ania ti kasapulan ken no kaano a maangay ti kasta nga instruksion. Sigun iti kasapulan, mabalin nga iyurnos ti pannakaisuro ti maysa a grupo wenno sinaggaysa a panangisuro kadakuada.

Masapul nga adda kualipikado a mangisuro. Nasaysayaat no madutokan ti maysa a kabsat a lalaki a nalaing nga agbasa ken kabesadona unay ti lenguahe. No awan ti kabsat a lalaki, mabalin a kiddawen dagiti panglakayen iti maysa a makabael, mapagulidanan a kabsat a babai a tumulong. Masapul nga agdalungdong no isurona ti klase.​—1 Cor. 11:3-10; 1 Tim. 2:11, 12.

Naipatarus ti bokleta nga Apply Yourself to Reading and Writing iti adu a lenguahe. Nairanta daytoy a mangisuro kadagiti agdadamo no kasano ti agbasa ken agsurat. Mabalin nga usaren dagiti dadduma a material a mangisuro, sigun iti abilidad nga agbasa dagidiay nagpasalista. No rimmang-ayen dagiti estudiante, nasken a maparegtada a makiraman iti regular a programa ti Teokratiko nga Eskuelaan ti Panagministro.

Kas manangaywan iti Teokratiko nga Eskuelaan ti Panagministro, adu ti maaramidmo a pakagunggonaan ti kongregasion. Agsaganaka a nalaing, ket maitunos iti balakad ti Roma 12:6-8, asikasuem ti annongem a kas napateg a sagut a naggapu iti Dios.