Iturong Dagiti Tattao Manipud Sipnget iti Lawag
1 Ti naespirituan a kinasipnget isut’ nangabbungot iti daga. (Isa. 60:2) Ni Satanas, “ti dios daytoy sistema dagiti bambanag,” isut’ nangkulong kadagiti tattao iti espiritual a kinasipnget, ket ti kinalaad iti moral isut’ nagresultaanna.—2 Cor. 4:4.
2 Itan ta nalawagantayo iti kinapudno, maasiantayo kadagiti tattao a kas idi ken Jesus. (Mat. 9:36) No kasta, tagipatgentayo ti komision a naited ken Pablo nga isut’ ‘pananglukat iti mata dagiti tattao ken iturong ida manipud ti kinasipnget iti lawag ken manipud iti autoridad ni Satanas nga agturong ti Dios.’—Ara. 26:16-18.
LAWAGAN ITI PANUNOT KEN PUSO
3 Idinto ta ni Satanas ket binulsekna iti panunot ken puso dagiti tattao, kasanotayo ida a matulongan? Masapul a danonentayo iti panunot ken pusoda babaen iti Sao ti Dios. Inkararag ni Pablo a dagiti taga Efeso ket malawagan koma iti matmata ti pusoda. (Efe. 1:17, 18) Awanen ti mas nabilbileg ngem iti Sao ti Dios a pangdanon iti puso. (Heb. 4:12) Ti pannakaammo iti daytoy isut’ manggutugot kadatayo a mangpatanor iti laing a mangusar ti Biblia no makisaotayo kadagiti tattao.
4 Iti daytoy a banag adda pagimbaganna no mausig dagiti sumaganad: Agsagsaganakayo aya a naimbag a maipaay iti tay-ak ti serbisio? Addaankayo kadi iti sesion ti panaginsayo a mangisagana iti introduksion a makaawis iti interes dagiti bumalay? Ad-adalenyo aya tapno usarenyo iti agdama a Topiko a Pagsasaritaan? Makirinnasonkayo kadi a buyogen iti panangallukoy babaen iti Kasuratan kadagiti ruruangan?—Ara. 17:2.
PANANGBIRUK ITI DIOS A LIBRO A KATULONGAN
5 Ti baro a libro, Ti Panangbiruk ti Sangatauan iti Dios isut’ dakkel a katulongan a manglawag kadagiti tattao iti naespirituan. Addaan iti 16 a kapitulo ken nasurok a 200 a retrato ken ilustrasion, a mangipakita iti historia ti sangatauan a nangsapul iti Dios. Itukontayo daytoy idiay tay-ak ti serbisio bayat daytoy a bulan.
6 Babaen ti panangusar iti Topiko a Pagsasaritaan nga “Itan ti Tiempo a Panangbiruk iti Dios,” mabalintayo a magutugot iti interes dagiti tattao babaen ti panangiturong kadakuada kadagiti lima a saludsod a napatanor idiay parapo 28 iti umuna a kapitulo. Ipakitayo kadakuada a sungbatan daytoy a libro dagitoy a saludsod ken dagiti adu pay a saludsod a maipaay iti umiso a dana ti panangsapul iti Dios. Nalabit a kayatyo met nga iturong ida iti panid 377 iti libro ken ipakitayo dagiti sangapulo a puntos nga agserbi a kas pakailasinan iti pudno a relihion.
7 Bayat nga itukontayo ti Panangbiruk iti Dios a libro, kasapulantayo nga isapul dagiti gundaway a mangiturong kadagiti tattao manipud ti sipnget nga agturong iti lawag. Ti diskusion iti Biblia kadagiti tattao iti panagbalaybalay a trabaho isut’ tumulong kadatayo a mangaramid iti daytoy. No madlawtayo nga interesadoda iti maysa a masinnunuo a punto wenno kapitulo iti libro, maiyurnostayo ti sumubli kadakuada tapno malawlawagan pay dayta. Usarenyo ti pannakaawat a mangbigbig iti nagdumaan dagidiay interesado laeng iti intelektual a diskusion ken dagidiay napudno iti panagkayatda a mangammo iti Dios ken ti umiso a wagas iti panagdayaw kenkuana.
8 Sireregtatayo koma a mangiwaragawag iti kinapudno a mamagwayawaya kadagiti tattao iti Hunio (Juan 8:32), nga usaren ti Panangbiruk iti Dios a libro a kas maysa nga instrumento a mangiturong kadakuada manipud ti sipnget nga agturong iti lawag.