Dagiti Epektibo a Damo a Sarungkar
1 Ti panangrugi a makisao iti ministerio ti mabalin a maysa a karit idinto ta dagiti tattao ket kupadoda iti trabahoda wenno adda bukodda a kapanunotan maipapan ti relihion. Ania koma ti adda iti panunot a tumulong kadatayo a mangaramid nga epektibo ti umuna a sarungkartayo?
2 No itukon iti Mayo 1 a ruar babaen ti artikulo a “Ti Tawen a Nangkellaat iti Lubong,” mabalinyo a kunaen:
◼ “Adu a tattao ti masdaaw no apay a ti kasasaad ket dumegdeg a dumegdeg ngem idi aldaw dagiti appo a lallakay. Ibaga ti Biblia iti sungbat ditoy Apocalipsis 12:12. [Basaen ken komentuan.] Ipakita ti ebidensia nga agbibiagtayon iti maudi nga al-aldaw manipud idi 1914. Kayatyo kadi a basaen ti dadduma kadagitoy nga ebidensia iti daytoy a ruar Ti Pagwanawanan?”
3 Mabalinyo nga iyammo ti Mayo 15, 1992, a “Pagwanawanan” babaen ti panangilawlawag iti padto ti Biblia, a kunaen:
◼ “Masansan a kayat dagiti tattao nga ammuen no ania ti mapasamak iti masanguanan, saan kadi? Ngem ammoyo kadi a ti laeng Biblia ti makaited iti umiso a padto a kanayon a matungpal? Alaentayo a pangarigan iti nakitatayon a natungpal ditoy Lucas 21:10, 11. [Basaen ken komentuan.] Iti daytoy a magasina adda listaan dagiti padto ti Biblia a natungpalen.” Ipakita ti tsart iti “Dagiti Padto ti Biblia a Natungpalen.”
4 Dadduma kadagiti agibumbunannag ti mangusar iti tract a pangirugi ti panagadal iti Biblia ti umuna a dupag.
No itukon ti tract a “Biag iti Maysa a Natalna a Baro a Lubong,” mabalinyo a kunaen:
◼ “Dakami dagiti boluntario iti sangakaarubaanyo. Itedmi kadakayo daytoy a tract, a daytoy ti mangipabigbig iti sasaaden ti trabahomi. Pagarupenyo kadi a daytoy lubong ket kastoyto ti langana?” Kalpasan a maala ti sungbat, mabalin a pagsaritaanyo ti umuna a sumagmamano a parapo iti daydiay tao, a mailawlawag ti Mateo 6:9, 10 ken Salmo 37:29.
5 Panunotenyo a naannad no kasanoyo nga iyammo ti bagbagiyo. Dagiti ekselente a singasing ti naidatag idiay Panakirinnason a libro iti panid 9-15. Silalaing nga usarenyo dagitoy nga introduksion a tumulong iti umuna nga epektibo a sarungkaryo.