Nalaka ken Epektibo a Panagsarungkar
1 Regularkayo kadi nga agsarungkar, wenno marigatankayo agsipud ta dikay ammo ti ibagayo? Tallo a bambanag ti tumulong kadakayo a naballigi: (1) nasayaat a panagsagana; (2) abilidad a mangilawlawag ti maysa wenno dua a puntos iti sumagmamano a nalaka a suheto ti Biblia; (3) kinatulok a dumngeg iti panangmatmat ti bumalay.
2 Iti panagsagana nga agsarungkar, usigen no ania a suheto ti kasayaatan a mailawlawag iti bumalay. Namataudkayo kadi ti saludsod iti ngudo daydi napalabas a bisitayo, wenno ti bumalay ket nangipakita iti interes ti maysa a masinnunuo a suheto? Repasuenyo ti notayo, ken usarenyo iti libro a Panakirinnason a mangsarak ti impormasion a kasapulanyo a mangaramid iti epektibo a sarungkar. No aramidenyo ti sarungkar, kablaawanyo iti bumalay babaen ti naganna.
3 No nakapaimakayo Ti Pagwanawanan ken Agriingkayo! iti bumalay, ti sarungkaryo isut’ maibatay iti maysa wenno dua a puntos a napiliyo manipud magasina. No tract ti naipaimayo iti umuna a dupag, mabalinyo a komentuan ti tract a mismo wenno iturong iti maitutop a punto ti magasina wenno broshur.
4 No nakapaimakayo iti “Biag iti Maysa a Natalna a Baro a Lubong,” silalaka a kunaenyo:
◼ “Idi damo nga immayak, nagsaritaantayo maipapan iti kari ti Dios a maysa a natalna a baro a lubong. Bayat a linawagantayo, dagiti naimbag a kasasaad ti dumteng babaen iti Pagarian ti Dios. Ania ti pagarupenyo a kasapulan tapno kabilangtayo iti dayta a natalna a baro a lubong?” Palubosan ti bumalay nga agkomento, kalpasanna iturong kadagiti puntos idiay Salmo 37:9, 11, 19.
5 No “Ania’t Namnama kadagiti Ing-ingungoten a Natayen” ti naipaimayo, dagitoy ababa a sasao iti makairubbuat ti saritaan:
◼ “Kalpasan daydi naudi a saritaantayo, nakaibatiak kadakayo iti tract nga Ania’t Namnama dagiti Ing-ingungoten a Natayen? Ti maikatlo a parapo pataudenna dagiti makapainteres a saludsod: ‘Apay a matay ti tao? Sadino ti ayan dagiti natay? Kasanotayo a masiguro nga agbiagda manen?’ Ti sumaruno a subtema, napauluan ti ‘Ipapatay, ken Ania’t Mapasamak no Mataytayo,’ sungbatanda ti kada saludsod. Siputanyo ti kunaenna iti maikapat a parapo.” Basaen ti parapo, agraman dua a kasuratan, ken saludsoden iti bumalay ti panangmatmatna.
6 Kabayatan ti diskusion, nalabit a ti bumalay ket mangiyebkas iti sumagmamano a panangmamat a saan nga umiso. Saan a kasapulan a sumraen ti kada ibagana. Imbes, agintekkayo iti topiko a madama a malawagan. Aniaman a saan a nainkasuratan a kapanunotan ti mabalin a mapalinteg iti masanguanan a sarungkar.
7 Iti amin a pamuspusan iplanoyo a sarunuen ti aniaman nga interes babaen iti nalaka ken epektibo a panagsarungkar bayat ti Mayo.