Panangusar ti Panakirinnason a Libro iti Panagsarungkar
1 “Nagmulaak, ni Apolos ti nagsibug.” Kasta ti nakuna ni apostol Pablo. (1 Cor. 3:6) Ti panagsarungkar a trabaho isut’ masansan a maawagan iti “panagsibug” a trabaho. Tumulong daytoy kadatayo a ‘mangimurumor iti pannakaammo’ tapno mapadanuman ti interes agingga nga agramut ket mairugi iti panagadal ti Biblia.—Prov. 15:7.
2 Mabalin nga agkedked dagiti dadduma a sumarungkar manen agsipud ta agpangaduada no ania ti sawenda. Ti Panakirinnason a libro mangted iti pagsurotan kadagiti Nainkasuratan a tema a mabalin a mailawlawag iti bumalay. Agsaganakayo a naimbag a maipaay iti panagsarungkar, a nalabit a mausaryo iti maysa wenno ad-adu pay kadagiti sumaruno a singasing.
3 No nakapaimakayo iti kopia ti Abril 15, 1992, a “Pagwanawanan,” iti suheto maipapan ti kararag, no sumarungkarkayo mabalinyo nga isango ti saludsod:
◼ “Ania ti mangaramid iti kararag ti maysa a tao a di awaten iti Dios?” Kalpasan a mapalubosan iti bumalay a sumungbat, iruaryo ti Panakirinnason a libro ken ukagenyo iti panid 82. Ilawlawag kenkuana dagiti dadduma a kasuratan iti baba dayta a tema, a paregtaen a basaenna a diretso manipud iti libro. No mariknayo ti napudno nga interesna, mabalin a pilienyo a tukonan iti suskripsion.
4 Iti sabali a panagsarungkar, kalpasan a masaludsodan ti bumalay no ania iti maawatanna maipapan ti Pagarian iti Dios, kas nadakamat iti Kararag ti Apo, iturong iti pinanid 267-73. No ipalubos ti tiempo, maputar dagiti kasuratan iti baba ti “Aktual kadi a kunaen ti Biblia a ti Pagarian ti Dios ket maysa a gobierno?” ken “Anianto ti magapuanan ti Pagarian ti Dios?”
5 Iti sabali a gundaway, mabalin nga alaen ti bumalay iti kopia ti Abril 22, 1992, nga Agriingkayo! iti “Biag—Ania ti Panggepna?”
Mabalinyo nga isaludsod:
◼ “Adda kadi ebidensia a ti natauan a bagi ket nasukog nga agbiag ti agnanayon ditoy daga?” Wenno, “Pagarupenyo aya a dagiti natay ammoda no ania ti ar-aramiden dagiti sibibiag?” Maiyurnos ti sarungkar a masungbatan dagitoy, kas masarakan iti Panakirinnason a libro iti pinanid 67, 68 ken 168.
6 No ti damo a diskusion isut’ maipapan iti masanguanan ti daga, mabalinyo nga isaludsod:
◼ “Palubosan kadi ti Dios dagiti tattao a mangdadael iti daga babaen ti aniaman a pamay-an?” Kalpasanna iturong iti pinanid 41-2 ti Panakirinnason a libro ken pagsaritaan ti Nainkasuratan a sungbat. Wenno mabalin a maisaludsod ti bumalay: “No binilion ti agungar manipud ken patay, sadino ti pagnaedanda?” Masarakan ti sungbat idiay Panakirinnason a libro, panid 313.
7 Dikay padasen a gaburan iti bumalay ti kinapudno iti mamimpinsan a daras. Mangibatikayo ti dadduma a saludsod a masungbatan iti masanguanan a sarungkar. Kas katrabahador ti Dios, kayattayo a silalaing nga ibanag ti panagmula ken panagsibug babaen iti epektibo a panangusar ti Panakirinnason a libro. Masigurotayo a padakkelen dayta ti Dios.