Maaramidyo Kadi Dayta?
1 ‘Aramiden ti ania?’ maisaludsodyo. Sungbatan ti Proverbio 3:27: “Dika ipaidam ti naimbag kadagidiay karbenganna, no adda pannakabalin ti imam a mangaramid iti dayta.” Adda kadi “pannakabalin ti imam” a mangpalawa iti aktibidadmo ken makiraman iti auxiliary ken regular payunir a serbisio? Maaramidyo kadi dayta?
2 Anian a makaparegta a nabasa idiay 1993 Yearbook nga adda promedio a 22,205 a payunir ditoy Pilipinas, a ti katupag iti 1 a payunir isut’ 5 nga agibumbunannag. Wen, 3,697 ti simrek iti payunir a serbisio idi napan a tawen. Katimbangna daytoy ti nasurok a 10 nga agibumbunannag iti kada aldaw ti nakausig iti kasasaadda nga ad-adu pay ti maaramidda iti ministerio.
3 Ti auxiliary payunir a serbisio isut’ maysa a dalan iti panagaramid ti naimbag kadagiti sabsabali. Idi napan a tawen adda kangatuan a 17,009 nga auxiliary payunir. Ekselente dayta. Adu nga agibumbunannag ti nangipamuspusan a maka-auxiliary payunirda iti adu a daras ti makatawen.
4 Tapno maikeddeng no “maaramid dayta” wenno saan, umuna nga usigenyo ti napusuan a tarigagayyo. (Mat. 22:37-39) Kunaen kadatayo ti Aramid 20:35: “Naragragsak nga amang ti mangted ngem ti umawat.” Awan duadua, dagidiay mangted iti nawadwad a tulong ti naespirituan manipud iti puso ti addaan iti umiso a tarigagay. Tapno agballigikayo nga agibumbunannag wenno payunir, nasken dayta a tarigagay.
5 Maikadua, tingitingenyo iti agdama a kasasaadyo. Maaramidyo aya ti panangator iti inaldaw nga ar-aramidyo tapno makaserbikayo iti amin a tiempo? Saan a maaramid daytoy ti tunggal maysa. Ngem kalpasan ti nainkararagan a panangusig iti bagi, kada tawen a rinibo dagiti nakasarak ti dalan a “mangaramid iti dayta.” (Col. 4:5) Kas ehemplo, dadduma kadagiti pamilia ti pumili iti masinnunuo a bulbulan a dadduma kadagiti miembro ti pamilia ti ag-auxiliary payunir. Dagiti dadduma a pamilia ti mangimaton iti maysa a miembro ti pamiliada a kas regular payunir. Inusigen aya ti pamiliayo dagitoy a posibilidad?
6 Ti panangtulong iti sabsabali a mangammo iti kinapudno isut’ mangyeg ti napudno a pannakapnek, agserbikayo man nga agibumbunannag wenno payunir. Ammotayo a ti pudno a rag-o ket agubbog iti panagaramid ti naimbag a maipaay iti sabsabali, nangruna no mapasamak nga adda ‘pannakabalin ti imam a mangaramid iti dayta.’