Sipapasnek a Bumirok Kadagiti Panagadal ti Biblia
1 Aggibusen ti tiempo daytoy daan a lubong. (2 Tim. 3:1-5) Ania ti kayat a sawen daytoy? Kayatna a sawen nga agpegpeggad iti biag dagiti tattao. Nupay kasta, kabaelantayo pay a tulongan dagiti dadduma a masalbar. (Prov. 3:27) Iti daytoy a panggep masapul a sipapasnektayo koma a mangirugi ken mangikondukta iti panagadal ti Biblia.
2 Nawadwad ti maibanag dagiti naibasar iti Biblia a literaturatayo. Ngem no ania ti kangrunaan a kasapulan dagiti tattao isu ti personal a tulong babaen iti regular a panagadal ti Biblia iti pagtaenganda. Kasano a matulongantayo ida a kumita [mangipateg] iti dayta?
3 Isaludsodtayo dagiti saludsod a pakaseknan dagiti tattao. Dagita a saludsod ti maiturong iti no apay a ti moral ket bigla iti panagbahadana, no apay a ti biag iti pamilia ket saan a nasalindeg, no apay a ti kinaranggas ken krimen ket makapadanagda, no apay a ti naayat a Dios ket pinalubosanna iti agdama a kasasaad. Nasiputkayo koma kadagiti isyu a makapainteres kadagiti tattao idiay teritoriayo. Itudoyo dagiti nabatad a sungbat ti Biblia kadagitoy a saludsod. Ipakitayo no kasano a dagiti literatura ket tumulong kadakuada a mangadal no ania ti makuna iti Biblia maipapan kadagitoy nga isyu a mangapektar kadatayo.
4 Padasenyo nga allukoyen ti bumalay iti saritaan. Naridamkayo koma a mangpaliiw no ania ti pakaseknanna. Pagrikosenyo ti saritaan iti aglawlaw dagidiay paginteresanna. Awisenyo ti asikasona iti salaysay dagiti publikasiontayo a mangilawlawag iti solusion ti Biblia kadagiti problema ti sangatauan. Sakbay nga agpakadakayo, mamataudkayo ti maysa wenno dua a saludsod a mangpabileg iti panagseggana iti sumaruno a sarungkaryo. No agsublikayo, ipalagipyo dagitoy a saludsod, kalpasanna usarenyo ti literatura a mangtulong kenkuana a mangsarak kadagiti sungbat ti Biblia.
5 Ti panangirugitayo iti panagadal ken ti regular a panangidaulo kadakuada ti mabalin a mangbaliw iti biag dagiti tattao. Masapul nga ipakitatayo ti napudno nga interes kadagidiay a masabettayo idiay tay-ak wenno iti impormal a pannakarana. Alaenna [kasapulanna] ti panagsagana tapno mariing iti interesda. Kasapulanna ti anus iti panagsarungkar agingga a maalatayo ida iti regular a padron ti espiritual a panangpakan. Kasapulanna ti naayat nga interes kadagiti mismo a tattao. Masapul a kayattayo a tulongan ida a masalbar manipud iti sumungsungad a pannakadadael. Masapul a maaramid iti panagadal ti Biblia a trabahotayo a kas banag a regular ken buyogen iti napasnek a kararag.—1 Tes. 5:17.
6 Makaparegta unay a makita a gistay maysa a milion a tattao ti nagbalin a bautisado a disipulo iti napalabas laeng a tallo a tawen. (Mat. 28:19, 20) Mangidadaulotayo ita ti agarup nga uppat a milion ket kagudua a panagadal iti Biblia ti kada bulan. Kasanokayo? Ikagkagumaanyo kadi a sipapasnek ti makiraman iti panagadal ti Biblia iti pagtaengan a trabaho? Laglagipenyo, ti biagtayo ken dagidiay sabsabali ti agpannuray iti kinamatalektayo iti daytoy a banag.—Ezek. 3:17-19.