Usaren Dagiti Magasin a Mangiranud iti Kinapudno
1 Ti napudno a pakaammo isut’ masansan ita a di maikaskaso gapu kadagiti subra a panangipablaak, makaallilaw a napolitikaan a karkari, ken makatikaw a sangalubongan a panangipapilit. Ti Pagwanawanan ken Agriingkayo! ket naisaluminada agsipud ta isuda laeng ti makaideklara iti kinapudno maipapan ti Pagarian ti Dios ken makailawlawag no ania ti aramiden dagiti amin a mangsagrap iti bendision nga iyegna.
2 Iti maysa a pagilian ti opisial iti ministry of information a nangpadayaw iti pateg dagitoy a magasin ti sisasagana a timmulong iti pannakaanamong ti pannakaiwaras dagitoy. Kinunana: “Ibilangko Ti Pagwanawanan a maysa kadagiti kasayaatan a magasin; maragsakanak unay a tumulong.” Kasanoyo nga iparang dagitoy a makaited-biag a magasin bayat ti Mayo? (Juan 17:3) Nalabit a dagiti sumaruno a singasing ti makatulong.
3 No dakamatenyo dagiti panglukat nga artikulo iti Mayo 15 a “Pagwanawanan,” mabalinyo a kunaen:
◼ “Makisasaokami ita kadagiti tattao maipapan iti kasayaatan a mailako a libro ditoy lubong. Ammoyo kadi no ania daytoy? [Palubosan a sumungbat.] Wen, ti Biblia. Ti rason no apay nga adu a tattao ti gumatang iti Biblia isut’ masarakan iti 1 Timoteo 3:16.” Kalpasan a mabasa ti teksto, mailawlawag dagiti puntos manipud maysa kadagiti artikulo.
4 Wenno kalpasan ti ababa a panangiruangan, mabalinyo a kunaen ti kastoy:
◼ “Nalabit a madlawyo nga adda pannakaseknan iti intero a sangalubongan maipapan ti problema a naipasango kadagiti agtutubo. Ania a problema ti makitayo iti lugaryo a pakaseknanyo?” Palubosan a sumungbat. Maitudo dagiti sumagmamano a serioso a problema a naipasango kadagiti agtutubo kas naibinsabinsa iti panglukat nga artikulo iti Mayo 8 nga Agriingkayo!, ken itudo iti solusion a maitukon ti Pagarian ti Dios.
5 Iti rekord dagiti panagsarungkaryo, nalabit a nailistayo dagidiay nangipakita ti bassit nga interes idi damo. Mabalinyo nga usaren daytoy a listaan a mamataud iti ruta ti magasin. No madlawyo ti maysa nga artikulo a makaallukoy iti maysa a masinunuo a tao, siguruenyo a sarungkaran dayta ken tukonan ti magasin.
6 Impormal a Panangasaba: Maysa daytoy nga ekselente a wagas a mamatanor ti interes kadagiti magasin. Dagiti makapataliaw-mata nga akkub ti umdasen a pangirugian ti saritaan. Maysa a kabsat a babai ti nangibistrad iti nagduduma a ruar idiay lamisaanna tapno makita dagiti katrabahuanna no lumabasda; nawadwad ti naipaimana. Mangitugotkayo ti sumagmamano a kopia kadakayo, ket itukonyo iti daytoy a bulan no mapankayo aggatang, mapan iti pagadalan, wenno no agbiahekayo iti bus.
7 Babaen ti tulong Ti Pagwanawanan ken Agriingkayo!, masarakantayo ti sungbat dagiti nasken a saludsod maipapan ken Jehova ken ti panagdayaw kenkuana. Kayattayo nga usaren dagitoy a pagbasaan iti kada mabalin a wagas tapno tulongan dagiti sabsabali a mangammo ken “Jehova a Dios ti kinapudno.”—Sal. 31:5.