Ti Pagwanawanan ken Agriingkayo!—Naintiempuan a Pagiwarnak ti Kinapudno
“Sinubbotnak, O Jehova, sika a Dios ti kinapudno.”—SALMO 31:5.
1, 2. (a) Kasanot’ panagrikna ti maysa a kabsat a babai iti nabasana iti Pagwanawanan? (b) Aniada a saludsod ti mayimtuod maipapan kadagiti pagiwarnaktayo?
“AGYAMANAK unay,” insurat ti maysa a Kristiano a kabsat a babai, “gapu iti nagsayaat nga impormasion iti artikulo ti Pagwanawanan a ‘Makasarakkayo ti Liwliwa Kadagiti Panawen ti Dukot.’a Nakaad-adu kadagiti punto a pinaruaryo ti mangiladawan iti rikrikna a nasken a sarangtek; kas man la naisurat daytoy nga artikulo nga agpaay kaniak. Iti damo a panangbasak iti dayta, uray la a nakaluaak. Makaparagsak a maammuan nga adda makatarus iti riknak! Yamanek unay ta maysaak kadagiti Saksi ni Jehova. Sadino pay ti pakasarakantayo iti kari a biag nga agnanayon iti Paraiso iti asideg a masanguanan ken liwliwa nga agpaay kadagiti kararuatayo ita! Pagyamanan. Agyamanak unay kadakayo.”
2 Kasta met kadi ti panagriknayo? Adda kadi nabasayo iti Pagwanawanan wenno iti kakuyogna a pagiwarnak, ti Agriingkayo!, a kas man la naisurat a nangnangruna nga agpaay kadakayo? Ania ti adda kadagiti magasintayo a pakaallukoyan dagiti tao? Kasanotay a matulongan dagiti dadduma tapno magunggonaanda iti makaispal-biag a mensahe a linaonda?—1 Timoteo 4:16.
Dagiti Magasin a Mangitantandudo iti Kinapudno
3. Ania dagiti naimbag a rason nga inabbukay ti Pagwanawanan ken Agriingkayo! ti puso dagiti adu a managbasa?
3 Ni Jehova “ti Dios ti kinapudno.” (Salmo 31:5) Ti Saona, ti Biblia, ket maysa a libro ti kinapudno. (Juan 17:17) Dagiti nasingpet-panagpuspusona a tao ipangagda ti kinapudno. (Idiligyo ti Juan 4:23, 24.) Ti maysa a gapu nga inabbukay Ti Pagnawanawan ken Agriingkayo! ti puso ti riniwriw a managbasa isu daytoy: mapagtalkan ken pudno ti linaon dagitoy a magasin. Kinapudnona, ti isyu maipapan iti kinasungdo iti kinapudno ti Biblia ti gapu a nangrugi a maipablaak Ti Pagwanawanan.
4, 5. (a) Ania dagiti sirkumstansia a nangiturong iti panangipablaak ni C. T. Russell iti Watch Tower? (b) Kasano nga us-usaren “ti matalek ken masirib nga adipen” ti magasin a Pagwanawanan?
4 Idi 1876, nakisugpon ni Charles T. Russell ken ni Nelson H. Barbour, ti Rochester, Nueva York. Nangipaay ni Russell iti pundo tapno mairugi manen ti pannakaipablaak ti relihiuso a magasin ni Barbour a Herald of the Morning. Ni Barbour ti kangrunaan nga editor ket ni met Russell ti katulongan nga editor. Nupay kasta, agarup maysa ket kagudua a tawen kalpasanna, iti Agosto 1878 a ruar ti Herald, nagsurat ni Barbour iti maysa nga artikulo a nangilibak iti makasubbot a pateg ti ipapatay ni Kristo. Simmungbat ni Russell, nga agarup 30 a tawen nga ub-ubing ngem ni Barbour, babaen ti maysa nga artikulo iti mismo a sumaganad a ruar a nangitandudo iti subbot, a tinukoyna kas “maysa kadagiti kapatgan a sursuro ti Sao ti Dios.” (Mateo 20:28) Kalpasan ti namin-ano a panangikagumaanna a makirinnason ken ni Barbour manipud iti Kasuratan, inkeddeng kamaudiananna ni Russell a gupden amin a pakainaiganna iti Herald. Mangrugi iti Hunio 1879 a ruar dayta a magasin, saanen nga agparang ti nagan ni Russell kas katulongan nga editor. Kalpasan ti maysa a bulan, rinugian ni 27-años a Russell nga ipablaak ti Zion’s Watch Tower and Herald of Christ’s Presence (a pagaammo itan kas Ti Pagwanawanan Mangibumbunannag ti Pagarian ni Jehova), a mangitantandudo manipud pay idi damo iti Nainkasuratan a kinapudno, kas iti subbot.
5 Iti napalabas a 114 a tawen, kas iti maysa a nalaing nga abogado, pinaneknekan Ti Pagwanawanan ti bagina kas maysa a mannalaknib ti kinapudno ken sursuro ti Biblia. Nagun-odna ti panagtalek ti riniwriw a manangapresiar a managbasa. Sibibileg nga itantandudona pay laeng ti subbot. (Kitaenyo, kas pangarigan, ti Pebrero 15, 1991 a ruar.) Ket agpapan ita, isu pay laeng ti kangrunaan nga instrumento “ti matalek ken masirib nga adipen” ken ti Bagi a Manarawidwid daytoy a mangibunannag iti naipasdeken a Pagarian ni Jehova ken mangipaay iti naespirituan a taraon “iti umiso a tiempo.”—Mateo 24:14, 45.
6, 7. Ania ti naibaga a panggep ti The Golden Age, ket ania ti mangipakita nga impangag dagiti tao ti mensahe daytoy?
6 Ti met ngay magasin nga Agriingkayo!? Manipud pay iti panangrugina, itantandudo met ti Agriingkayo! ti kinapudno. Sigud a maawagan iti The Golden Age, nairanta daytoy a magasin nga agpaay iti publiko. Maipapan iti panggepna, kuna ti umuna a ruar, a napetsaan iti Oktubre 1, 1919: “Ti panggepna isu ti panangilawlawag a buyogen iti Nadiosan a sirib ti pudno a kaipapanan dagiti dadakkel a pasamak iti agdama a panawen ken ti panangpaneknek kadagiti managpanunot babaen dagiti di mabalbaliwan ken makakumbinsir nga ebidensia nga asidegen ti tiempo ti dakdakkel a pannakabendision ti sangatauan.” Impangag dagiti managpanunot a tao ti mensahe ti The Golden Age. No mano a tawen nga ad-adu ti naiwaras nga Agriingkayo! ngem Ti Pagwanawanan.b
7 Nupay kasta, saan laeng a ti panangipablaakda iti pudno a sursuro ken panangilawlawagda iti propetiko a kaipapanan dagiti kasasaad iti lubong ti pangallukoyan Ti Pagwanawanan ken Agriingkayo! Nangruna la unay iti napalabas a maysa wenno dua a dekada, kinayawan dagiti magasintayo ti puso dagiti tao gapu iti sabali pay a rason.
Dagiti Naintiempuan nga Artikulo a Mangapektar iti Biag dagiti Tao
8. Apay a binaliwan ni Judas ti panggepna a nagsurat, nga indagadagna kadagiti sinuratanna a sarangtenda dagiti ania nga impluensia iti uneg ti kongregasion?
8 Agarup 30 a tawen kalpasan ti ipapatay ken panagungar ni Jesu-Kristo, naipasango ti mannurat ti Biblia a ni Judas iti maysa a karit. Nakastrek a di nadnadlaw iti nagbabaetan dagiti Kristiano ti sumagmamano nga imoral ken rinuker a tattao. Pinanggep ni Judas ti agsurat kadagiti padana a Kristiano maipapan iti maysa a doktrina—ti pannakaisalakan dagiti amin a napulotan a Kristiano. Ngem, iti panangiturong ti nasantuan nga espiritu, nariknana a masapul nga idagadagna kadagiti sinuratanna a sarangtenda dagiti dakes nga impluensia iti uneg ti kongregasion. (Judas 3, 4, 19-23) Nakibagay ni Judas iti situasion ken nangipaay iti naintiempuan a balakad a kasapulan dagiti Kristiano a kakabsatna.
9. Ania ti nairaman iti panangipaay kadagiti naintiempuan nga artikulo kadagiti pagiwarnaktayo?
9 Kasta met, ti panangisagana kadagiti naintiempuan nga artikulo kadagiti pagiwarnaktayo ket maysa a makakarit a rebbengen. Agbaliwbaliw ti panawen, kasta met dagiti tao—naiduma ita dagiti kasapulan ken pakaseknanda no idilig uray iti napalabas laeng a maysa wenno dua a dekada. Iti di pay nabayag, kinuna ti maysa nga agdaldaliasat a manangaywan: “Idi nagbalinak a Saksi idi dekada ’50, dagiti doktrina ti kangrunaan nga ipagpaganetgetmi kadagiti yad-adalanmi iti Biblia—nga isuro kadakuada ti kinapudno maipapan iti Trinidad, impierno, kararua, ken dadduma pay. Ngem ita, agparang a nakaad-adu dagiti parikut ken pakarigatan iti biag dagiti tao ket masapul nga isurotay ida no kasano ti agbiag.” Apay a kasta?
10. Apay a saantay a masdaaw a dumakes la a dumakes ti kasasaad ti sangatauan nanipud 1914?
10 Maipapan iti “maudi nga al-aldaw,” impadto ti Biblia: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay, a mangiyaw-awan ken maiyaw-awan.” (2 Timoteo 3:1, 13) Gapuna, saantay koma a masdaaw a dumakes la a dumakes ti kasasaad ti sangatauan nanipud nangrugi ti panawen ti panungpalan idi 1914. Ad-adda ti pungtot ni Satanas iti natauan a kagimongan agsipud ta bassit laengen ti natda a tiempona. (Apocalipsis 12:9, 12) Kas banagna, naiduma unay ita dagiti pagalagadan iti moral ken pamilia no idilig iti napalabas a 30 wenno 40 a tawen. Saan a kas kadagiti napalabas a dekada, saanen nga interesado ti kaaduan a tao iti relihion. Nasaknap unayen ti krimen ket kas panagannad, mangar-aramid dagiti tao kadagiti pamay-an a saan a pagaammo iti napalabas a 20 wenno 30 a tawen.—Mateo 24:12.
11. (a) Aniada a kita ti tema ti pakaseknan dagiti tao, ket kasano nga inasikaso ti klase matalek ken masirib nga adipen dagiti kasapulanda? (b) Mangtedkayo iti pangarigan ti artikulo ti Pagwanawanan wenno Agriingkayo! a nangapektar iti biagyo.
11 Di ngad pakasdaawan a sipapanunot dagiti tao kadagiti isyu maipapan iti pamilia, emosion, ken kagimongan. Situtured a nagtignay ti klase matalek ken masirib nga adipen babaen ti panangipablaakna iti Pagwanawanan ken Agriingkayo! kadagiti naintiempuan nga artikulo a mangusig kadagiti napaypayso a kasapulan dagiti tao ken pudno a mangapektar iti biagda. Usigenyo ti sumagmamano a pangarigan.
12. (a) Apay a naipablaak dagiti artikulo maipapan kadagiti maymaysat’-nagannakna a pamilia iti Pagwanawanan idi 1980? (b) Kasano nga inyebkas ti maysa a kabsat a babai ti panangapresiarna kadagiti artikulo maipapan kadagiti maymaysat’-nagannakna a pamilia?
12 Dagiti isyu maipapan iti pamilia. Idi ipakita dagiti report iti intero a lubong nga umad-adu dagiti maymaysat’-nagannakna a pamilia, naipablaak dagiti naisangsangayan nga artikulo iti babaen ti tema a “Dagiti Maymaysat’-Nagannakna a Pamilia—Panangsaranget Kadagiti Parikut” iti Marso 15, 1981, a ruar Ti Pagwanawanan. Dua ti panggep dagiti artikulo: (1) tapno tulongan dagiti agsolsolo a nagannak a mangsaranget kadagiti naidumduma a parikut a pakaipasanguanda ken (2) tapno tulongan dagiti dadduma a maaddaan iti nasaysayaat a pannakaawat, iti kasta maipakitada ti “pannakipagrikna” ken ti napaypayso a ‘panangasikaso’ kadagiti maymaysat’-nagannakna a pamilia. (1 Pedro 3:8; Santiago 1:27) Adu a managbasa ti nagsurat tapno yebkasda ti panagyamanda kadagiti artikulo. “Uray la a nakaluaak idi makitak ti parupa,” insurat ti maysa nga agsolsolo a nagannak, “ket idi inukagko ti magasin ken binasak ti impormasion, nalapunos toy pusok iti panagyaman ken ni Jehova gapu iti panangipaayna iti kasta nga impormasion iti tumutop a tiempo.”
13. Ania a nauneg a panangsalaysay maipapan iti panagliday ti naipablaak iti Agriingkayo! idi 1982, ket ania ti kuna ti maysa a managbasa maipapan iti dayta?
13 Dagiti emosional nga isyu. Sipud pay idi dekada ’60 a masalsalaysay iti Pagwanawanan ken Agriingkayo! ti tema maipapan iti panagliday. (1 Tesalonica 5:14) Ngem naidatag ti baro ken positibo a panangusig iti dayta a tema iti maysa a serye dagiti artikulo iti babaen ti paulo a “Mapagballigianyo ti Panagliday!” iti Pebrero 8, 1982, nga Agriingkayo! Iti saan a nabayag, ginabsuon a surat ti panagyaman manipud iti intero a lubong ti naawat ti Watch Tower Society. “Diak mayebkas iti papel dagiti rikna nga adda iti pusok,” insurat ti maysa a kabsat a babai. “Agtawenak iti 24, ket iti napalabas a sangapulo a tawen, nagsagabaak iti adu a kanito ti panagliday. Ngem ita mariknak a nasingsingedak ken ni Jehova ket agyamanak ta sinungbatanna ti kasapulan dagiti malmalday babaen kadagitoy naayat nga artikulo, ket kayatko nga iyebkas dayta kadakayo.”
14, 15. (a) Kasano a nasalaysay ti tema maipapan iti panangabuso iti ubing kadagiti pagiwarnaktayo? (b) Ania nga artikulo iti magasin ti nakaallukoyan ti maysa a jockey idiay Australia?
14 Dagiti sosial nga isyu. Impadto ti Biblia nga iti “maudi nga al-aldaw” dagiti tattao “managayatdanto iti bagbagida, . . . awanan nainkasigudan a panagayat, . . . awanan panagteppel, narungsot, awanan panagayat iti kinaimbag.” (2 Timoteo 3:1-3) Gapuna, saantay koma a masdaaw a nasaknap ita ti panangabuso iti ubing. Sipaprangka a nausig daytoy a tema iti artikulo a “Tulong Agpaay Kadagiti Biktima ti Incesto” iti Pagwanawanan nga Abril 1, 1984. Walo a tawen kalpasanna, siaannad a naisagana ti maysa a serye dagiti artikulo iti babaen ti paulo a “Panangagas iti Sugsugat iti Panangabuso ti Ubing” iti Oktubre 8, 1991, nga Agriingkayo! Nangipaay daytoy iti pannakaawat ken namnama para kadagiti biktima. Linawlawaganna met dagiti dadduma tapno makatulongda. Daytoy a serye dagiti artikulo ti kaaduan pay laeng nagun-odna a reaksion manipud kadagiti managbasa iti pakasaritaan dagiti pagiwarnaktayo. Insurat ti maysa a managbasa: “Dagiti makaliwliwa ken Nainkasuratan a reperensia kadagitoy nga artikulo ti kangrunaan a nakatulong iti yuungarko. Ti pannakaammo a maseknan ni Jehova kaniak binang-arannak iti kasta unay. Naliwliwaak met iti pannakaammo a saanak nga agmaymaysa.”
15 Nag-long distance ti maysa a jockey idiay Melbourne, Australia, iti opisina ti Watch Tower Society idiay Sydney, nga inyebkasna ti rurodna gapu iti kasasaad iti karera ti kabalio. Kinunana a kabasbasana ti Marso 8, 1993, nga Agriingkayo! maipapan iti “Panangrames—Pagam-amkan ti Babai” ket kasla narigatna a patien nga adda ti kasta a nagpateg a magasin. Adu ti insaludsodna iti agarup 30 a minuto ket naragsakan a nakangngeg kadagiti sungbat.
16. Kadagiti ania a pamay-an a maipakitayo ti panangapresiaryo kadagiti pagiwarnaktayo?
16 Dakayo met ngay? Adda kadi espesipiko nga artikulo a naipablaak iti Pagwanawanan wenno Agriingkayo! a nangapektar iti biagyo? No kasta, awan duadua a dakkel ti panagyamanyo kadagiti pagiwarnaktayo. Kasanoyo a maipakita ti apresasionyo? Ay ket, babaen ti panangbasayo a mismo iti tunggal ruar. Mabalinyo met ti makiraman iti nasaknap a panagiwaras kadagitoy nagpateg a pagiwarnak. Kasano a maaramidan daytoy?
Iranudyo Kadagiti Dadduma!
17. Aniat’ maaramidan dagiti kongregasion tapno rumang-ay ti panagiwaras kadagiti magasin?
17 Umuna, adda maaramidan ti tunggal kongregasion. Kuna ti Oktubre 1952 a ruar ti Informant (Ti Ministeriotayo iti Pagarian itan): “Ti kaepektibuan a pamay-an ti panangiwaras kadagiti magasin ket iti binalaybalay ken kadagiti pagtagilakuan. Isu nga isingasing ti Sosiedad a dagitoy a pamay-an ti panangiwaras kadagiti magasin agbalin koma a regular a paset ti Aldaw ti Magasin.” Tumutop pay laeng dayta a balakad ita. Mabalin a mangyeskediul dagiti kongregasion iti regular nga Aldaw ti Magasin, ti aldaw a nailasin kangrunaanna iti panangiwaras kadagiti magasin. Iti kaaduan a kongregasion, nasayaat la ketdi a gundaway ti aldaw ti Sabado. Wen, mangilasin koma ti tunggal kongregasion kadagiti espesial nga aldaw wenno rabii iti panangiwaras kadagiti magasin—iti binalaybalay, kadagiti pagtagilakuan, iti lansangan, ken kadagiti ruta ti magasin. Mainayon pay, ania ti maaramidanyo, dakayo nga agibumbunannag ti Pagarian, tapno ad-adu ti magasin a maiwarasyo?
18, 19. (a) Kasano a makatulong kadakayo ti panagbalin a sipapanunot iti Pagwanawanan ken Agriingkayo! iti panangipaima kadagiti magasin? (b) Iti panangitukon kadagiti magasin, ania ti pagsayaatan ti ababa, tumutop a presentasion? (c) Ania ti mangipakita iti pateg ti panangidanon kadagiti magasin iti pagtaengan dagiti tao?
18 Ti umuna nga addang isu daytoy: panagbalin a sipapanunot iti “Pagwanawanan” ken “Agriingkayo!” Basaenyo a nasaksakbay dagiti magasin. Bayat ti panangbasayo, isaludsodyo, ‘Siasino ngata ti mabalin a maallukoy iti daytoy nga artikulo?’ Mangpanunotkayo iti sumagmamano a sao a mabalinyo nga ibaga a mangtukay iti interes iti artikulo. Malaksid pay iti panangsuportar iti regular nga Aldaw ti Magasin, apay a dikay mangitugot kadagiti kopia a mabalinyo nga iranud kadagiti dadduma iti aniaman a tumutop a gundaway—no agbibiahekayo wenno addakayo iti pagtagilakuan ken no makisarsaritakayo kadagiti katrabahuan, kaarruba, kaeskuela, wenno mannursuro?
19 Pagbalinenyo a simple ti presentasionyo. Isu daytoy ti maikadua a singasing. Kuna ti Disiembre 1, 1956, a Watchtower: “Iti panangitukon kadagiti magasin, kasayaatan pay laeng ti ababa ken tumutop a presentasion. Ti panggep isu ti panangipaima iti adu a kopia. Dagiti [magasin] ti makaammon nga ‘agsao.’” Nasarakan dagiti dadduma nga agibumbunannag nga epektibo ti panangpili iti maysa nga ideya iti artikulo, ilawlawag dayta iti ababa, sa itukon dagiti magasin. No inawat ti bumalay dagiti magasin, mabalin a “makisao” dagitoy kadagiti dadduma, malaksid pay iti tao a nangipaimaanyo. Idiay Irlandia, nabasa ti maysa nga agtutubo nga agad-adal iti unibersidad ti Setiembre 1, 1991, a ruar Ti Pagwanawanan, a naipaima ti maysa a Saksi ken ni tatangna. Tinukay dagiti artikulo maipapan iti komunikasion ken dadduma pay a tema ti interesna. Apaman a nabasana ti magasin, tineleponuanna dagiti Saksi, nga inusarna ti numero a nailanad iti direktorio. Di nagbayag, nairugi ti maysa a panagadal iti Biblia, ket nabautisaran ti agtutubo a babai iti “Nadiosan a Panangisuro” a Kumbension Distrito idi Hulio 1993. Wen, idanontayo dagiti magasin kadagiti pagtaengan, a sadiay mabalinda ti “makisao” kadagiti tao! Nangipaay ti maysa nga agdaldaliasat a manangaywan iti simple a singasing: “Iruaryo dagiti magasin iti bagyo.” Kinapudnona, no saan nga interesado ti bumalay iti ibagbagayo, mabalin a dagiti makaay-ayo nga ilustrasion iti akkub dagitoy ti mangipaima kadagiti magasin para kadakayo.
20, 21. (a) Kasanokay nga agbalin a mannakibagay iti pannakiraman iti panangiwaras kadagiti magasin? (b) Ania ti mabalin nga aramidenyo tapno ad-adu ti magasin a maipaima iti tunggal bulan?
20 Ti maikatlo a singasing ket: makibagaykayo. (Idiligyo ti 1 Corinto 9:19-23.) Mangisaganakayo iti sumagmamano nga ababa a presentasion. Mangpilikayo iti maysa nga artikulo a makaallukoy kadagiti lallaki, kasta met iti makaallukoy kadagiti babbai. Para kadagiti agtutubo, mabalinyo nga itampok ti artikulo iti “Agimtuod Dagiti Agtutubo . . . ” Makibagaykayo met no maipapan iti panawen a pannakiramanyo iti panangiwaras kadagiti magasin. Malaksid pay iti Aldaw ti Magasin, ti panangasaba iti rabii mabalin a mangipaay iti nasayaat a gundaway a panangitukon kadagiti magasin iti binalaybalay.
21 Ti maikapat a singasing ket: mangikeddengkayo iti kalat. Ti insert nga “Itudo Dagiti Magasin ti Dalan nga Agturong iti Biag,” nga agparang iti Ministeriotayo iti Pagarian a Mayo 1984, kunana: “Kas singasing, mabalin a mangikeddeng dagiti agibumbunannag iti kalat, ikabiltayon, 10 a magasin iti kada bulan, depende iti kasasaadda; mabalin a pagreggetan dagiti payunir ti 90. Siempre, mabalin a makaipaima dagiti dadduma iti ad-adu pay ket ngarud mabalin a mangikeddengda iti nangatngato pay a personal a kalat. Nupay kasta, gapu iti nakapuy a salun-at, kita ti teritoria, wenno dadduma pay a nainkalintegan a rason, mabalin a nababbaba ti kalat dagiti dadduma. Kaskasdi, napateg latta ti panagserbida ken ni Jehova. (Mat. 13:23; Luc. 21:3, 4) Ti nasken ket maaddaan iti personal a kalat.”
22. Kasanotay a maipakita ti panagyamantayo ken Jehova gapu kadagiti naintiempuan a pagiwarnak ti kinapudno?
22 Anian a yamantayo ta ni Jehova, “ti Dios ti kinapudno,” us-usarenna ti klase matalek ken masirib nga adipen ken ti Bagi a Manarawidwid daytoy a mangipaay kadatayo kadagitoy naintiempuan a pagiwarnak! (Salmo 31:5) Agingga nga ipalubos ni Jehova, itultuloy dagitoy a magasin nga ikkan iti atension dagiti napaypayso a kasapulan dagiti tao. Itultuloyda nga itandudo dagiti nangato a pagalagadan ni Jehova iti moral. Saanda nga agsardeng a mangirupir iti umiso a sursuro. Ken itultuloyda nga ipakita ti kaitungpalan ti padto a mangtanda iti panawentayo kas tiempo ti panagturay ti Pagarian ti Dios ken pannakaibanag ti pagayatan ti Dios ditoy daga iti naidumduma a pamay-an babaen ti dumakdakkel a bilang dagiti pudno nga agdaydayaw ken ni Jehova. (Mateo 6:10; Apocalipsis 11:15) Anian a di magatadan a gameng ti masarakantayo iti Pagwanawanan ken Agriingkayo! Usarentay koma ti tunggal gundaway a mangiranud kadagiti naemmat’-panagpuspusona a tattao kadagitoy nagpateg a magasin a mangapektar iti biag dagiti tao ken mangitandudo kadagiti kinapudno ti Pagarian.
[Dagiti Footnote]
a Hulio 15, 1992, pinanid 19-22.
b Iti adu a tawen, namatmatan Ti Pagwanawanan kas maysa a magasin nga agpaay a nangnangruna kadagiti napulotan a Kristiano. Manipud idi 1935, nupay kasta, maipagpaganetget ti pannakaparegta ti “dakkel a bunggoy,” a mangnamnama iti biag nga agnanayon ditoy daga, a gumun-od ken agbasa Ti Pagwanawanan. (Apocalipsis 7:9) Kalpasan ti sumagmamano a tawen, idi 1940, regular a maituktukon Ti Pagwanawanan kadagiti tao kadagiti lansangan. Manipud idin, napartak a rimmang-ay ti pannakaiwarasna.
Ania ti Sungbatyo?
◻ Ania ti mangipakita a Ti Pagwanawanan ken Agriingkayo! ket pagiwarnak ti kinapudno?
◻ Kasano nga inapektaran Ti Pagwanawanan ken Agriingkayo! ti biag dagiti tao?
◻ Ania ti maaramidan dagiti kongregasion tapno rumang-ay ti panagiwaras iti magasin?
◻ Ania dagiti singasing a makatulong kadakayo a mangipaima iti ad-adu a magasin?
[Kahon iti panid 22]
Dagiti Sumagmamano nga Artikulo a Nangapektar iti Biag Dagiti Tao
Kadagiti napalabas a tawen, adu a managbasa ti nagsurat tapno yebkasda ti panagyamanda kadagiti espesipiko nga artikulo a naipablaak iti Pagwanawanan ken Agriingkayo! Nailista iti baba ti sumagmamano laeng kadagiti adu a tema a nangapektar kadagiti managbasatayo. Binalbaliwan met kadi dagitoy ken dadduma pay nga artikulo ti biagyo?
Ti Pagwanawanan
“Awaten Tulong ti Dios a Mangparmek Kadagiti Nalimed a Basbasol” (Oktubre 15, 1985)
“Panangipakita iti Nadiosan a Debosion Kadagiti Natataenganen a Nagannak” (Hunio 1, 1987)
“Edukasion nga Addaan Panggep” (Nobiembre 1, 1992)
Agriingkayo!
“Mapagballigianyo ti Panagliday!” (Pebrero 8, 1982)
“No ti Inay-ayatyo Matay . . .” (Oktubre 22, 1985)
“Salaknibanyo Dagiti Annakyo!” (Oktubre 8, 1993)
[Ladawan iti panid 23]
Idiay Canada—panangasaba iti binalaybalay babaen kadagiti magasin
[Ladawan iti panid 24]
Idiay Myanmar—panangitukon kadagiti magasin a mangipakita iti dalan nga agturong iti biag