Basbasaenyo Kadi Dagiti Magasin?
1 Kastoy ti kinuna dagiti misionero nga agassawa idiay Africa maipapan kadagiti magasintayo: “Tulongannakami Ti Pagwanawanan nga agalerto iti naespirituan ditoy teritoriami. Maparegta ken mapakiredkami iti tunggal kopia.” Kasta met kadi ti kauneg ti panangapresiaryo kadagiti magasintayo? Ken kasta kadi ti kagagaryo a mangbasa kadagita?
2 Nawadwad a tiempo ti mabusbos a mangisagana kadagiti artikulo ti magasin a mabasa iti sumagmamano la a minuto. No ammoyo daytoy, taldiapanyo la kadit’ biit dagiti artikulo, buyaenyo dagiti ladawan, wenno sumagpaminsan a mangbasakayo iti artikulo a kursonadayo? Masiribtayo no saan la a dayta ti aramidentayo. Iwayaantay koma a basaen ken anagen dagiti amin nga artikulo iti kada ruar dagiti magasintayo. Ti Pagwanawanan isut’ kangrunaan a magasintayo para iti naintiempuan a naespirituan a taraon. Ti Agriingkayo! naglaon kadagiti makapainteres ken napnuan-impormasion nga artikulo iti nagduduma a tema. Dagiti maadaltayo no basaentayo dagitoy a magasin didatay la pakirden iti naespirituan no di ket isaganadatayo iti ad-adda nga epektibo a pannakiraman iti ministerio. No napingettayo nga agbasa, narayraytayto a mangitukon kadagiti magasin kadagiti sabali.
3 No Kasanotay a Parang-ayen ti Ugali nga Agbasa: Maparang-ayyo kadi ti panagbasayo kadagiti magasin? Adtoy ti dua a singasing a praktikal kadagiti adu. (1) Mangipasdekkayo iti regular nga eskediul ti panagbasa. No mangilasinkayo laeng iti 10 wenno 15 a minuto a panagbasayo iti kada aldaw, masdaawkayto ti kawadwad ti mabasayo iti makalawas. (2) Adda koma urnosyo a manginotar no aniada ti nabasayon. Nalabit kur-itanyo ti rugi ti kada artikulo a basaenyo. No dikay kur-itan, mabalin a malaktawanyo ti dadduma nga artikulo wenno intero pay ketdi a magasin. Nasken a mangparnuaykayo iti rutina a panagbasa a praktikal kadakayo ket surotenyo a naynay dayta.—Idiligyo ti Filipos 3:16.
4 “Ti matalek ken masirib nga adipen” nainsiriban a nakibagay kadagiti panagbalbaliw ti tiempo babaen ti panangipablaakna kadagiti artikulo a mangtaming kadagiti pudno a kasapulan ti tattao. (Mat. 24:45) Talaga, inapektaran dagiti magasin ti biagtayo. Ti kapartak ti panagprogresotayo iti naespirituan, dakkel ti panagpannurayna iti kalidad dagiti nateokratikuan nga ugalitay nga agbasa. Nabaknang a naespirituan a bendision ti agur-uray kadagidiay mangiwaya iti panawen a mangbasa kadagiti isuamin a magasin.